حاجــــات جوايــا: 2009

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Monday, December 14, 2009

فى وقت من الاوقات 3

فى وقت من الاوقات بتحس انك مهزوم

خارج من حرب حامية بترتعش .. محموم

تدور على صوتك .. على لسانك .. متلاقيش

تبكى بدمع غالى عشان مش عارف تعيش

جواك ارادة .. لكن مكسورة

مش باقى من كيانك غير مجرد صورة

الحزن هزمك ايوه لانك استسلمت

خلاك تتوه فى طريقك .. لا وقفت ولا كملت

مع ان الحزن ضعيف بايدينا نهزمه

لو بس نبص لغيره .. نقدر نتحمله

لكن احنا بننسى غيره وبس نفكر فيه

نسيب اللى يفرحنا وندور عالجرح ليه ؟

دى الدنيا مش مستاهلة دمعة من عنينا

ولا حتى لحظة ندم عاللى ضاع من ايدينا

ويوم ما بُكانا يخلص وتنشف العيون

نلاقى اللى بكانا وسهر الجفون

مكانش يستاهل عذابنا ولا حتى لوم

تعالوا بينا نفرح .. ونضحك من قلوبنا

لو لسه فاضل لينا فى الدنيا بس يوم

...........................................................

شاركونا الاحتفال بعيد ميلاد دودو عاشقة الرومانسية

على المدونة الجديدة .. السهرة معانا تحلى

فى انتظاركم عشان نطفى الشمع

كل سنة وانتِ طيبة يا دودو وبكل الخير يارب

Thursday, November 26, 2009

عيد أضحى سعيد على الامة الاسلامية

كل عام وأنتم بخير بمناسبة عيد الأضحى المبارك
أعاده الله عليكم وعلى كل ذويكم بالخير واليمن والبركات
كل سنة ومصر طيبة
كل سنة والمصريين طيبين
كل سنة والامة الإسلامية متوحدة ومتجمعة على كلمة لا إله إلا الله محمد رسول الله
يارب العيد يكون سعيد عليكم
ويارب يارب يارب يكتبلنا الوقوف على عرفات وحج البيت الحرام
لا تنسونى بالدعاء
.
دمتم يكل الخير والرضا والهنا وراحة البال

Wednesday, November 18, 2009

فى حب مصـــــر

يا مصر يا غالية علينا .. يا حتة مننا

نفديكى بدمنا

لو يوم احتاجتى لينا .. نضحى بعمرنا

مهما نشرق نغرب .. أو نبعد او نقرب

ولو حتى قسيتى علينا

غلاوتك فى قلوبنا .. من غلاوة امنا

يا مصر يا هبة النيل

يا اطيب شعب .. يا أرض الخير

ان شاء الله هنفرح . بنصرك الجميل

بحبك يا بلادى .. يا حبى يا فؤادى

ثمانين مليون اخواتى

بيقولوا بس مصر

بندعيلك بقلوبنا .. تنتصرى فى كل وادى

كلنا بنقول يارب .. وبنرفع الايادى

اللهم انصر منتخب بلادى نصرا عزيـــــزا مؤزرا

اللهم وحد صفهم وسدد رميهم واحفظ مرماهم يارب العالمين

اللهم آمين

Saturday, November 14, 2009

بمووووووت فى ترابك يا مصر - تحديث : ألف مبروووووك لمصرررررر

النهارده يوم غير عادى

بستناه من فترة طويلة

وعاملاله ألف حساب

مش أنا بس طبعا

أكيد كل المصريين او على الاقل معظمهم

وللغرابة انى أصلا مليش فى الكورة

منتمية للنادى الاهلى بشكل شرفى بس

مش بتابع حتى غير فى النهائيات

بس المرة دى الكلام على مين ؟؟

على مصـــــــــــر

أيوووووه .. مصررررر

مش المنتخب المصرى بس

مصر كلها بكل طوائفها ومهنها وشعبها

بكل كبارها وصغارها

رجالها ونسائها

تخيلوا

تخيلوا ماتش كورة ياخد كل الاهتمام ده

ويثير كل الحروب الاعلامية دى

وكل التصرفات الاستفزازية دى

بجد مش عارفة ليه الجزائريين متشنجين معانا كده

ليه بيكرهونا كده

احنا اصلا شعب طيب ملناش فى العداء ولا الكيد

ليه يعملوا معانا كده

حرقوا علمنا وتيشيرت المنتخب

وشوهوا صورة رجالنا ونسائنا ولاعبينا ومدربينا

وعملولنا اغانى ونزلوها عاليوتيوب وشتمونا وبهدلونا ولا راعوا ان طفل او بنت ممكن يشوفوا او يسمعوا الكلام ده ولا اى حاجة

ورغم مبادراتنا السلمية واظهار حسن نوايانا

ومحاولات التهدئة .. وكان ناقص يعملوا خارطة الطريق

وكانها حرب بين فلسطين واسرائيل

أنا هدعى لمنتخب مصر مش بس لانه منتخب بلدى

ولا لأنه الأحق بالفوز بس

ولكن لأن كل رجاله .. رجال

رجالة محترمة متدينين وخلوقين

عارفين اللى ليهم واللى عليهم

حسبى الله ونعم الوكيل

ولسه هنشوف فى الملعب

ربنا يستر

عجبنى اوى الراب ده
كلامه فى الصميم

رد محترم على كلامهم الغير محترم

والله المصريين بجد بجد أحسن ناس

ربنا ينصرهم يارب

اللهم انصر منتخب بلدى نصرا عزيـــــــــزا مؤزرا

اللهم آمين يارب العالمين

نتقابل ان شاء الله بعد الفوز

السلام عليكم

Sunday, October 25, 2009

فى وقت من الاوقات 2

فى وقت من الاوقات بتحتاج تكون قوى

تكره كلمة مالك .. معلش .. كلنا كده .. ليه منطوى

محتاج تفضفض باللى فيك من غير ما تنزل دمعة من عنيك

ولا حتى تحس بيها فى قلبك

نفسك تعيش فى سلام .. ترتاح من الآلام

تحس بحبيب جنبك

ولكن هيهات .. ده الحزن ليه طلبات

ملقهاش غير فى تعبك

فى وقت من الاوقات بتكابر باللى فيك

بتبان سعيد .. مبسوط .. والفرح مالى عنيك

عايش الحياة بسمة وضحكة والكل فرحان بيك

تطبطب وتداوى وكأن الهنا بإيديك

وفى لحظة تتعب اوى .. تهرب م اللى حواليك

تبعد عن كل الناس وتقفل الباب عليك

تلاقى قلبك بيصرخ وبينزف دم عليك

Monday, October 12, 2009

المسلمين فين ؟

ايه اللى بيحصل ده ؟؟
وازاى اصلا يحصل ؟؟
للدرجة دى العرب ملهومش قيمة
ومقدساتنا ملهاش اعتبار

هم طبعا يقدروا يعملوا اكتر من كده
اللى يدنس مصحفنا الشريف هنستنى منه ايه يعنى
المشكلة مش فيهم خالص
المشكلة فينا احنا
ليه ساكتين
ليييييييييييييه
؟؟؟؟؟؟؟؟؟؟؟؟
العرب لو ماتوحدوش فى مواجهة المهازل دى
هيتوحدوا امتى ؟
ايه تانى هيبقاله قيمة اكبر تخليهم يتحركوا
ليه بقينا كده ..؟؟؟؟
صم بكم عمى ... اعتقد ده وصفنا الحقيقى

اللهم لا حول ولا قوة لنا الا بك
إنا لله وإنا إليه راجعون

Tuesday, September 22, 2009

عيدكم سعيد .. أو حسن .. او سيد

وحشتووووووووونى

كل سنة وانتم طيبين وبكل الخير والهنا

ربنا يتقبل صيامكم وقيامكم وصلاتكم ويثقل بها ميزان حسناتكم ويثبتكم على طاعته ويعينكم على ذكره وشكره وحسن عبادته ويغفر لكم ولنا وللمسلمين أجمعين

عيد سعيد عليكم وعلى أسركم الغالية والامة الاسلامية

ربنا يجعل كل أيامكم أعياد وأفراح ويعيد عليكم العيد بالخير والهنا

مش ناسياكم من العيدية اهه

شوفتوا بقى

يلا كل واحد ييجى ياخد عيديته

مائة جنيه لكل مدون

كل سنة وانتم طيبين

استنوا استنوا

رايحين فين

تاخدوا العيدية وتمشوا كده من غير ما تعبرونى

فين عيديتى

؟؟؟؟؟؟؟

الحصالة قدامكم اهى مش شايفينها

يلا كل واحد يصفى نيته كده ويطلع المحفظة

وانتوا وذوقكوا يعنى مش هحددلكوا المبلغ

بس اقل من مائة جند مش هاخد

انا بقولكوا اهه

هههههههههههههههههههههه

كل سنة وانتوا طيبين ومعيدين وفرحانين وقابضين ودافعين كمان ههههههههه

دمتم بكل الخير والهنا

عيد سعيد

Tuesday, August 18, 2009

رمضان جانـــــــا

بمناسبة شهر رمضان .. جانى التاج الجميل ده .. اللى حاسه كده ان ريحته بخور .. وطعمه خشاف .. من الأخ الفاضل أبو صهيب .. صاحب مدونة فارس على طريق الدعوة .. ألف شكر يا فندم .. ورمضان كريم

ماذا يمثل لك رمضان في كلمتين؟؟
شهر انتقاء الصالحين وتثبيتهم على الطاعة .. اللهم اجعلنا منهم وثبت قلوبنا على طاعتك

هل كتبت خطتك التي تنوي تطبيقها في رمضان؟؟

لا الحقيقة مش متعودة اخطط .. بس فيه حاجات كتير فى دماغى اتمنى ربنا يقدرنى احققها .. اهمها انى مش عايزة اتقل فى الفطار عشان مدوخش وانام بعده واقدر انزل اصلى التراويح السنة دى فى المسجد أصل الصلاة فى المسجد احلى كتير من الصلاة من البيت وبتحسسنى برمضان بجد.. واهو الحمد لله دودو كبر شوية ومش هيعمل قلق .. المهم هو كمان مينامش .. استرها يارب..

ايه احسن حاجة لك في رمضان ؟

رمضان كله على بعضه الحقيقة احسن حاجة فى السنة كلها وفى الدنيا كلها .. بحب كل حاجة فيه
بمجرد قدومه بتحس ان قلبك طاير وبيرفرف ولما بتبدأ فى الطاعات بتحس انك مش ماشى عالأرض اصلا
لما بتقرأ القرآن بيبقى مش هاين عليك تخلص
وكل ما يخلص حزب تقول لنفسك هخلص الربع ده كمان واقوم اشوف اللى ورايا .. طب كمان صفحتين .. طب هانت اهه الجزء هيخلص هههههههه
بيكون عندك تسامح غريب .. ورضا بكل شئ .. ولسانك رطب بذكر الله فى كل وقت
بتتصل وبتستقبل اتصالات كتير لناس مشوفتهومش من زمان .. مش شرط يكونوا قرايب .. بس بتحس فى رمضان انهم فاكرينك وانك حد قريب منهم عشان كده بيكلموك او انت بتكلمهم .. فبتفتكرهم طول السنة
اللــــــــــه عليك يا رمضان .. ياريتك السنة كلها .. اللهم بلغنا ومن نحب رمضان وتقبله منا

ايه الحاجة اللي انت جربتها رمضان اللي فات وناوي تكررها السنة دي ؟

ممممم .. والله ما انا فاكرة .. انا مكنتش راضية عن نفسى رمضان اللى فات .. وقعدت شهرين عندى اكتئاب بسبب الموضوع ده .. حسيت انه ضاع منى من غير ما احس بس اقدر اقولك اللى مش ناوية اجربها السنة دى .. او على الاقل مش هتابعها بضمير .. المسلسلاااااااات .. بجد دمار لأغلى ساعات وأيام فى السنة .. ربنا يعافينا يارب
والسنة دى السباق بادئ من بدرى أوى .. ومفيش حاجة حصرى .. كله عالتليفزيون المصرى
قوينا ياااااااارب

شعارك السنة دي في رمضان ايه؟

رمضان بلا مسلسلات .. بلا قطيعة .. بلا نوم بعد الإفطار

ناوي تفطر كام واحد في رمضان؟

ربنا يسهل .. قولوا يارب

ايه الطاعة اللي انت ناوي تداوم عليه بعد رمضان ؟

ان شاء الله صلاة القيام
امرر التاج الى

كل المدونين المسلمين
فـــــردا فــــردا
مش هذكر اسماء لان العدد كبير قوووووووى ما شاء الله ومش عايزة انسى حد
بس اى حد يشوف البوست واى حد يعلق واى حد يعدى صدفة واى حد يزورنى لأول مرة واى حد بعتله تاج قبل كده وخصوصا اللى مشافش اسمه المرة اللى فاتت وكل الموجودين فى الريدر- وطبعا هما عارفين نفسهم - لازمن وحتما يجاوب عالتاج
اتفقنــــــــا .. مش عايزة تزويغ .. ده تاج رمضان .. لو مجاوبتهوش دلوقت هتجاوبوه امتى يعنى ؟؟.. ولا يعنى لازم انده الاسامى واحد واحد عالملأ هههههههههه

يلا شدوا حيلكم .. واللى يحل التاج يبلغنى عشان آجى اشوفه
وكل تاج وانتوا طيبين .. وكل رمضان وانتوا صائمين وقائمين وللقرآن قارئين ومرتلين ولله ذاكرين وحافظين وتائبين وفى الصلاة خاشعين

آه على فكرة فيه بوست حلو اوى هنا عن اللى ممكن نعمله فى رمضان بجانب الصوم والصلاة لاكتساب الحسنات والصدقات الجارية . روحوا شوفوه

كل سنة وانتم طيبين
ورمضان كريم

Thursday, August 13, 2009

لحظة صـــــــــدق + تحديث

اذكر عشرة أشياء صادقة فى حياتك ؟؟

.
التاج ده وصلنى من دودو عاشقة الرومانسية
أسأل الله ان يفرج همها ويشفى لها خطيبها ويقرب فرحتها

.
مش عارفة ليه حاسة ان التاج ده صعب
صحيح هو سؤال واحد .. بس مش من المنهج عااااااااااا
فكرت انزل نتايج الكويزات اللى عملتها فى الفيس بوك .. واللى فيها منى كتير
بس تراجعت
وقلت هخلى البوست تلقائى .. مش مقيد بارقام ولا نقاط .. لانى مش عايزة اكرر اجاباتى عن التاجات السابقة
واتمنى انى اقدر اعبر عن نفسى بشكل كويس وغير ممل

اول حاجة جت فى بالى
انى بحب ابنى جدا .. وخايفة عليه جدا من الدنيا و من الزمن
نفسى ربنا يقدرنى أنا وزوجى ونربيه كويس
مش عايزاه يكون تافه ولا فاشل ولا عايش اليوم بيومه من غير هدف
عايزاه يبقى اقوى من الزمن .. من الصدمات .. من التحديات .. من المغريات .. من الفتن
عايزاه يقدر يقول لأ ويكون أدها .. لأى حاجة غلط .. ولنفسه أولا عشان يهذبها ويقومها
عايزاه يحفظ القرآن ويعمل به ليردعه ويحفظه من كل سوء
عايزاه يكون من سعداء الدارين .. الدنيا والآخرة
مش مهم يكون دكتور .. ولا مهندس .. المهم يكون انسان صالح وتقى ويتقى الله فينا وفى كل من سيُسئل عنه يوم القيامة .. فالدار الآخره خير وأبقى
رجاء .. ادعولى ربنا يقدرنى .. وادعوا لابنى ربنا يجعله من الصالحين

من امتع اللحظات اللى بتسببلى هدوء نفسى غريب .. انى اكون راكبة عربية فى وقت حلو مش حر لمسافة طويلة .. وسامعة موسيقى حلوة خصوصا صوت فيروز وفاتحة الشباك اللى جنبى وجايب هوا .. بحب السفر جدا بس من زماااااااااااااااااااااااااااااااااااااااان مسافرتش .. تقريبا من 9 سنين .. كتير برضه

اكتشفت فى نفسى عيب مكنتش آخده بالى منه .. أقولكوا عليه ولا اخليه سر ؟؟؟
مممممم .. لا هقول وعايزة رأيكم فيه .. وعايزة روشتة للعلاج منه كمان
لما برسم صورة فى خيالى عن حد نتيجة حلم من احلامى مثلا
او حاجة بتمناها فى الانسان اللى قدامى
او موقف من المواقف بنيت عليه رأيى وبعدين يطلع مش بالصورة اللى انا تخيلتها
وبعيد كل البعد عن الصورة دى .. والموقف اللى عجبنى منه ده كان مجرد صدفة .. خصوصا لما تكون حاجة تمس مبادئى أو مرتبطة بالسلوكيات الدينية او الاخلاقية
بنهاااااار داخليا وتنهار صورته جوايا
ولما بنهار بتقع منى حاجات كتير فى الطريق
بيكون فيها حلو كتير بس الوحش بيطغى والدنيا بتسود فى عينى
ومش بلاقى مفر غير البعد ..اللى ممكن اوى يكون بعد أبدى
انا عارفة ان مفيش حد مثالى .. وعارفة ان كل البشر فيهم عيوب واولكم انا
بس مش بقدر استحمل اضغط على مشاعرى واقبل حاجات مش عاجبانى رغما عنى
ولما بيحصل .. واكيد بيحصل .. مش بعرف اغير نظرتى ليهم اللى بقت دون المستوى خالص
وغصب عنى بتتغير معاملتى ليهم .. وده فى حد ذاته بيضايقنى جداااااا ويخلينى مخنوقة طووووووول الوقت
أغيثونى اغاثكم الله .. انا مش ملاك .. بس مش بستحمل .. قولولى اعمل ايه عشان ارضى بعيوب الناس ؟؟؟؟؟؟؟؟؟؟؟؟؟؟؟

آخر حاجة بقى
أنا اول ما فكرت اجاوب عالتاج ده .. قلت هكتب ايه جديد يعنى .. هما أكيد بقوا عارفينى اكتر من نفسى
وبناء عليه عايزة اتاكد منكم
انتوا فعلا بقيتوا عارفينى ؟؟ .. وقادرين تحكموا على ّ ؟؟ ولا انا بيتهيألى ؟
طب لو عارفين .. ممكن تقولولى شايفينى ازاى ؟؟؟

فى انتظار رؤيتكم .. بأقصى درجة صراحة ممكنة

ممكن يكون فيا حاجة غلط مش آخده بالى منها

والمفروض ان المسلم مرآه لأخيه المسلم

اتمنى انكوا تكونوا مرايتى

معلش يا جماعة كنت نسيت امرر التاج

وش مكسووووووووف

بس ملحووووووقة

أمرر التاج لــــ

حنين القلب

حنين همس الاحساس

ام مالك

كيارا

pink dreams

ديالا

سماء

rovy

شريكة فى المطعم

ريمان

بنت الاسلام

طالبة الفردوس

المعلم محمد صاحب المطعم - طعمية سخنة

حازم النبراوى

لورنس العرب

همس الاحباب

محمد عتلم

د. ابراهيم سماحه

محمد غاليه

معتز شاهين - مدونة احنا وهما

assafo anaroze

ابو صهيب ( الجمعاوى الاصيل ) سابقا

هعزف لنفسى

ذو الوجه المبتسم

وكل عام وانتم إلى الله أقرب وعلى طاعته أدوم
اللهم بلغنا ومن نحب رمضان وأعنا على صيامه وقيامه واغفر لنا وارحمنا واعتقنا من النار وبلغنا ليلة القدر وتقبله منا يارب العالمين

Thursday, August 6, 2009

شموع مضيئة 7

إذا قدر لك يوما أن تطلع على عيوب غيرك فلا تسارع إلى إفشائها .. حتى لا يأتي يوما يطلع فيه غيرك على عيوبك ويسارع في إفشائها

من الجميل ان تدعو غيرك لتعديل صفاته .. ومن الأجمل أن تستطع أنت تعديل صفاتك

الرغبة فى التغير شئ رائع .. والأروع هو الإرادة والقدرة على التغير

الحياة مدارس وفصول .. أهم من فيهم من يجاورك في المقعد .. إما صالح فيصلحك .. وإما فاسد فيفسدك

لا يشعر بقيمة الأشياء .. إلا من يفتقدها

سر السعادة ليس ان تمتلكها لنفسك .. وانما ان تشعر بها فى قلب من تحب

الغيرة ضريبة الحب .. فإن ذهب الحب سقطت عنه الضريبة .. وانطفأت نار الغيرة

اتكلم كتير .. تغلط كتير .. تشيل ذنوب كتير .. وتزعل ناس كتير
اتكلم قليل .. تغلط قليل .. تشيل ذنب قليل .. وميزعلش الا قليل
متتكلمش خالص .. متغلطش خالص .. متشيلش ولا ذنب .. ومتزعلش حد خالص

Tuesday, July 28, 2009

فى وقت من الاوقات

فى وقت من الاوقات بتحس انك وحيد فى الدنيا رغم ان حواليك كتير

مش سامع غير صوت جاى من جواك مغطى على كل الدوشة والكلام الكبير

يدور شريط حياتك فى خيالك .. تحس انك فى يوم من الايام كنت بتحلم الحلم ده .. بتسمع أو بتقول الكلام ده .. وتعيد فيه وتزيد

طب ليه حلمك متحققش .. وليه الكلام ده متنفذش .. ليه قلبك مش سعيد

وليه انت استسلمت تضيع منك سنين عمرك وانت بتتفرج من بعيد

مليون سؤال يدور جواك .. ومش بتحاول تلاقى إجابة

يسيطر عليك القهر .. وتقول دى دنيا كدابة

لا قادر تعيشها زى ما هى وتنسى حلمك .. ولا قادر تحقق حلمك وتسيبك من الكآبة

فى وقت من الاوقات بتهرب من حياتك وتحن لذكرياتك

تلاقى الذكرى مطوية فى كتاب قديم عليه تراب

تاخد من الحاضر منديل تمسحها بيه وكلك لهفة تنسى العذاب

ريحة الذكرى تنشيك .. والحنين يتحرك فيك

تقلب فى صفحاتها تلاقيها صفرا

سطورها مش واضحة

تقول لنفسك اييييييه كانت ذكرى حلوة ياريت دامت ولو قليل

تقفل ذكرياتك وترجع لحياتك

محتاج الحاضر يضمك .. ينسيك همك.. يجفف عرق المشوار الطويل

تلاقيه طلعلك منديل .. تبص فيه تلاقيه .. الذكرى لوثته ولسه محتاج غسيل

Saturday, July 18, 2009

اعتذار .. وتهانى .. وما تيجوا نلعب

ازيكم يا حبايبى أخباركم ايه

وحشتونى جدا

بشكر كل اللى هنونى بزفاف اختى عقبال عندكم جميعا يارب

ومكسوفة منكم جدا جدا

بقالى فترة كده مش مركزة ومقصرة معاكم ومع المدونة

قلت اجيبلكم بوكيه الورد ده معايا ادارى فيه وانا جاية يمكن تسامحونى وتنسوا ولا انتوا عايزين لحمة ولا ايه ؟ ها ؟؟

حنين القلب طبعا عايزة لحمة .. صح ؟؟؟؟

المرة الجاية بقى وانتى طيبة فى عيد جوازك الجاى .. اصلى يدوب لسه عارفة النهاردة وملحقتش ادبح هههههههههه

كل سنة وانتى طيبة يا حبيبتى .. ربنا يملا حياتك فرح ويسعدك مع زوجك ويرزقك بالذرية الصالحة اللهم آمين

استنوا استنوا استنوا

الف مليووووووووووووووون مبروووووووووووووووك لحنين القلب .. على الحمل يارب يارب يارب يكمل على خير واشيل ولادك واولاد ولادك يا أم حنين ان شاء الله

صحيح لو طلع ولد هتسميه ايه يا قمر

؟؟؟؟؟؟؟؟؟؟؟

يارب يبقوا توام شهد وحنين .. ربنا يجعلهم قرة عينك يا حبيبتى ويرزقك برهم ان شاء الله

دودو الجميلة الف مبروك لأحمد ربنا يتمم له على خير ويعينه وزوجته على طاعة الله ويرزقهم بالذرية الصالحة ان شاء الله وعقبالك يا قمر

أبو همس الجميلة .. كل سنة وانت طيب وبكل الخير وإلى الله أقرب وعلى طاعته أدوم

...........................................

نيجى بقى للبوست

المرة دى البوست مختلف

عبارة عن لعبة

صورة عليها كلام

بكل بساطة وهدوء وبرااااءة

هسألكم سؤال واحد بس

تقولوا الكلام ده لميـن

؟؟؟؟؟؟؟

والكلام هو

إذا كنت ستعيش مائة عام ، فإننى اتمنى ان اعيش مائة عام تنقص يوما واحدا كى لا أضطر للعيش بدونك

شوفتوا مفيش ابسط من كده

ومش هغلس عليكوا واقولكوا اختاروا شخص واحد بس ولا أى حاجة

اللى هتقولوه موافقة عليه

لو عشرة موافقة

ولو مفيش خالص برضه موافقة

بس ياريت لو حد قال مفيش خالص يقول مفيش ليه ؟؟؟

اتـفـقـنــــا

فكروا قبل ما تجاوبوا

فكروا كويس اووووووى .. لا تكون ساعة إجابة ولا حاجة

العمر مش بعزقة

أنا قلتلكوا اهه وانتوا احرار

ههههههههههه

كل لعبة وانتم طيبين

تابعونــــــــا

واوعوا تروحوا فى أى حتة

هجيبكم هجيبكم ههههههههههه

Monday, July 6, 2009

النهارده عيــــــــد .. عالكل سعيــــــد

النهارده يوم غير عااااااااادى
ويارب كل حاجة فيه تعدى بشكل هااااااااااااااادى
النهارده 6/7/2009 فرح اختى الصغيورة سحورة
أختى أختى يعنى مش زى أختى
طبعا احساس جميل انك تجوز اختك الصغيرة
وفى نفس الوقت احساس صعب خصوصا انها هتسافر
ومش هنشوفها بعد كده غير كل فين وفييييييين
يارب يهون بالايام والسنين ويرجعوا بالسلامة وسطنا يارب

عقبالكم كلكم يارب بنات وشباب
ربنا يملا قلوبكم بالفرح والهنا
دعواتكم بقى لسحورة وعريسها محمد ربنا يبارك لهم فى حياتهم ويعينهم على طاعة الله ويرزقهم بالذرية الصالحة
بارك الله لهما وبارك عليهما وجمع بينهما فى خير

وعقبالكم جميعا ياااااااااااااااااااااارب
أكيد طبعا عرفتوا سبب غيابى وانشغالى .. منا أخت العروسة مشغولة ومشغولة ههههههههه

Friday, June 19, 2009

شموع مضيئة 6-------- تحديث وخبر ساااااار

يا دنيا زوقوكى بالعز والهنا .. يا فرحة قسموكى واتوصوا بيا انا

لالالالالالالالالا

قصدى اتوصوا بدودو عاشقة الرومانسية

النهارده الجمعة 19/6/2009 اتقرت فاتحتها فى تمام الساعة 8:04 م

وطبعا قريناها معاها عشان نشاركها فرحتها ودنيتها الجديدة

اللى يارب تكون مليانة حب وفرح وهنا وسعادة

ألف مليون مبروك يا دودو يا جميلة

وألف مليون مبروك لعريسك أحمد

ربنا يتمملكم بكل الخير وكل الهنا وكل الفرح

بارك الله لكما وبارك عليكما وجمع بينكما فى خير

الدبل دى هدية منى .. عشان الخطوبة

كنت هجيبلك علبة شيكولاتة
وبعدين قلت لا هى شيكولاتاية واحدة تقسموها مع بعض
صدقينى هيبقالها طعم تانى خاااااااالص

وبوكية الورد ده هدية ليكم انتم الاتنين ..يارب يعجبكم
ألف مبروك يا قمر
وعقبال الخطوبة ان شاء الله والفرحة الكبيرة
..........................................................................

أغلى الناس هو من يصدقك إن تكلمت .. ويشعر بك إن حزنت .. ويحيطك بالأمان إن شعرت يوما بالخوف .. وترى السعادة في عينه وقلبه إن تبسمت

ما أقسى أن تقضى عمرك في انتظار شئ ما .. وعندما تلقاه وتصل إليه .. تجده مخالف لكل توقعاتك وآمالك

عندما يجرحك حبيب وتتألم .. تذكر كم تألم من أحبك من قبل .. وجرحته

إذا أردت أن تحيا في الماضي .. فاختر لنفسك أناس لا يهتمون لأمرك .. ولا يتأذون ببعدك

ما أقسى ان تنظر فى عين من تحب لترى صورة غيرك فيها

الجراح الكبيرة رغم عنفها وقسوتها .. تعلمنا كيف نجتاز الجراح الصغيرة ولا نلق لها بالا

إن لم تستطع يوما فعل الطيب .. فلا تفعل الخبيث

علمتني الحياة .. أن القيم والأخلاق والوفاء .... لا دين لهما

لماذا ؟؟ ... كلمة لا يجرؤ المؤمن أن يقولها لربه .. فكل ما يفعله الله خير حتى وان لم يرضيه

الصدق منجى حقاااااااا .... وأحيانا يكون الصمت أسلم

Sunday, June 7, 2009

تانى مشكلة - سيبوووووونى فى حالى..... تحديـــث

هـ ) فتاة فى العقد التالت من العمر .. تحكى مشكلتها قائلة )

بداية انا مش بعتقد ان فيه حد يقدر يحل مشاكل التانى .. خصوصا لو كانت المشاكل دى قدرية ملهاش حل إلا من عند ربنا .. انا مشكلتي الاساسية اني معدتش عايزة اعيش وفي نفس الوقت مش عايزة اموت عشان مش مستعدية للآخرة .. الناس بتقر عليا وشايفني في نعمة واني مفيش بعد كده لكن الحزن مبيفارقنيش والناس مش بتقدر بيحسدوا وخلاص
يعني لو اشتغلت يقروا على المرتب ولو قعدت في البيت يقروا ان اهلي بيصرفوا عليا ومستتيني .. وبيقروا على عدم زواجي وعدم الخلفة واني بكده في نعمة
مش عارفة عايزين مني ايه ؟ .. مفيش حد بيحبني ولا حد موجود جنبي .. طول عمري مواطن من الدرجة التانية فى اسرتى .. حتى والدتى شايفة ان الحياة اديتنى اكتر مما استحق .. واصحابى اتجوزوا ومشغولين بحياتهم واولادهم .. شبابي راح وعمري كله وحياتي واقفة من سنين لا بتجوز ولا بشتغل ولا عارفة اطلع عمرة ولا حتى قادرة اصلى واحفظ قرآن بصلى بس مش بالتزام ولما بصلى بيحسدونى على خشوعى لدرجة انى بقيت بروح الجامع مستخبية ومبقولش .. انا تعبت من الناس ومن الدنيا .. الوحدة صعبة .. يمكن اصعب حاجة لو عندك مشكلة بس عندك اللي يسمعها او اللي يخفف عنك احسن من الوحدة .. انا بس لو الاقي طريق الاخرة واقدر اقرب من ربنا استريح
قولولى اعمل ايه ؟؟ أنا بجد تعبت من الوحدة ومن الناس ومن الدنيا كلها .. ونفسى يسيبونى فى حالى

تحديـــــــث

...................

صاحبة المشكلة (هـ) بتشكركم جدا على المساندة .. و حبت توضحلكوا انها معندهاش مشكلة مع الآخرين بالقدر اللى فهمتوه .. هى عارفة ان الناس مش هتبطل كلام ... لكن كل اللى مزعلها انها بتيجى من القريب اقوى واصعب واقسى من الغريب ... محدش حاسس بيها من القريبين منها حتى والدتها مش بتحس معاها بالمشاعر الفياضة المعتادة والاحتواء الامومى .. ودى اكتر حاجة تعباها .. الجفاء العاطفى من كل المحيطين

فى انتظار آرائكم ودعمكم ومساندتكم

اما انا فسأنضم لصفوف الجماهير ورأيي هيكون معاكم فى التعليقات
رأيكم مهم جداااااا لا تبخلوا به
الدعوة مفتوحة لكل الناس حتى غير المدونين
فيه خاصية فى التعليقات اسمها انونيميس ممكن تستخدموها
المهم نشارك .. صوتك امااااااااانة .. واحتسبوا الأجر عند الله
.
ولا ننسى أبدا أن رسول الله صلى الله عليه وسلم قال
المسلم أخو المسلم ، لا يظلمه ولا يسلمه ، ومن كان في حاجة أخيه كان الله في حاجته ، ومن فرج عن مسلم كربة فرج الله عنه كربة من كربات يوم القيامة ، ومن ستر مسلما ستره الله يوم القيامة

هفكركم تانى بإيميل باب افتح قلبك
Eftah.2albak@yahoo.com
للمراسلة فـقــــط
فى انتظاركم دائما لو كان فى العمر بقية

دمتم فى حفظ الله وأمنه

Sunday, May 24, 2009

أنا مسلم .. لن يغلبنى شيطانى

من هذا اليوم انا أقوى من شيطانى

من هذا اليوم لن ادعه يتسلل إلى .. لن أسمع لوسوسته .. حتى وإن وجدت ميلا لها فى نفسى

لن أدعه يضيع عمرى فى اقتراف الذنوب .. ولا يظلم حياتى بظلمات ذنبى

من هذا اليوم اعلنها صريحة .. لن املكك منى أيها الخبيث .. أنا أقوى منك بإيمانى .. واقرب إلى الله بعدم عصيانى .. سجدت لله تعالى وطلبت منه الغوث منك .. ومن نفسى .. ومن شياطين الإنس

لن اعرض نفسى لسخط الله للحصول على لذة لحظية أيا كانت وأى ما كان الباعث إليها

لن اخسر دنياى وآخرتى من اجلك

لن اجعلك تنظر إلى شامتا فى ضعفى وطاعتى لك وانا اكتوى بنار جهنم

لن اسمح لك ان تجعلنى سلاحا رخيصا فى يدك اللعينة لتبارز الله بى وتتحداه بضعفى

انا إنسان مسلم برئ منك قولا وعملا .. لن اتبرا منك بقولى .. وانا أطيعك بعملى

سأحافظ على صلاتى لانها ضياء حياتى .. وستكون أهم أولوياتى

سأحاول ان افرش قبرى بطيب عملى وحسن طاعتى وابتهالاتى .. فهو أهم عندى من دار حياتى

لن اوحش قلبى ببعده عن ربى .. لن أضل من اجلك دربى

أيها اللعين سأفقأ عينيك وأميتك قهرا سأقاتلك فى أحب الأعمال إليك .. ولست وحدى من يبغضك .. فكل حى على وجه الأرض يكرهك إلا من كانوا على شاكلتك

دعوة إلى كل مسلم بتحرى الحلال فى الماكل والمشرب .. فى القول والعمل

دعوة إلى كل من يريد السعادة فى حياته باللجوء إلى الله وهجر شيطانه

دعوة إلى كل مدمن لعادة أو سيجارة وكل ما حرم الله بالإقلاع عنها .. ابتغاء لمرضاة الله

دعوة إلى كل مسلم بإتقاء الله فى السر والعلن .. فلا نتخفى عن عيون الناس ونجاهر الله بالمعاصى

من خاننى .. لن اخونه
من اهاننى .. لن اهينه
من كذب على وخدعنى .. لن احط من قدرى وأفعل مثله
من اغتابنى .. فله شكرى على ما قدمه إلى من حسنات
من حسدنى .. فكفاه ما أصابه من نيران حسده التى قبل أن تضرنى .. ضرته
و كفانى أن حسبى الله ونعم الوكيل
قادر ان يرد لى حقى ويرد غيبتى

دعوة إلى كل شاب مسلم بغض البصر وإغماض عينه عن الحرام وعدم ارتياد المواقع والقنوات الإباحية لصلاح نفسه ودينه ودنياه

دعوة إلى نشر الموضوع أو الإشارة إليه بمدوناتكم والمنتديات العربية .. تحت شعار أنا مسلم .. لن يغلبنى شيطانى

الدعاء الذى يخاف منه الشيطان

اللهم انك سلطت علينا عدوا عليما بعيوبنا يرانا هو وقبيلة من حيث لانراهم اللهم آيسه منا كما آيسته من رحمتك وقنطه منا كما قنطته من عفوك - وباعد بيننا وبينه كما باعدت بينه وبين رحمتك وجنتك بسم الله الرحمن الرحيم لا اله الا الله رب السموات السبع ورب العرش العظيم

وختاما
اوصيكم ونفسى بتقوى الله
واعوذ بالله من ان اكون جسرا تعبرون به إلى الجنة ويلقى به فى النار
أحبكم جميعا فى الله

اللَّهُمَّ كُنْ لِي مُؤَيِّداً وَنَاصِراً، وَكُنْ بِي رَؤُوفاً رَحِيماً، يَا خَيْرَ الْمَسْؤُولِينَ. إِلَيْكَ أَشْكُو ضَعْفَ قُوَّتِي، وَقِلَّةَ حِيلَتِي، يَا أَرْحَمَ الرَّاحِمِينَ إِرْحَمْنِي بِقُدْرَتِكَ عَلَيَّ، وَلاَ تَكِلْنِي إِلَى نَفْسِي طَرْفَةَ عَيْنٍ. يَا حَيٌّ يَا قَيُّومُ، بِرَحْمَتِكَ أَسْتَغِيثُ

اللهم اغفر و ارحم كل من ظلمني وكاد لى و تقبل مني صالح الأعمال وإجعلنى من الكاظمين الغيظ و العافين عن الناس

Monday, May 18, 2009

أووول مشكلة .. حبيبتى أكبر منى >>تحديث من صاحب المشكلة

بسم الله نفتتح باب افتح قلبك

مشكلة اليوم
لشاب .. سنرمز له بحرف وليكن ( م ) تخرج من الجامعة والتحق بالعمل بإحدى المكاتب هو ومجموعة من الزملاء والزميلات كان من بينهم بطلة الموضوع التى التحقت بالعمل معه فى نفس اليوم والتى سنرمز لها بحرف وليكن (ن)
كانت (ن) فتاة جميلة .. محترمة .. ذكية .. نشيطة جدا وغاية فى الذوق .. و كان من الطبيعى ان يواجها نفس الظروف فى العمل والتى كان من بينها اضطهاد إحدى زميلاتهم لهما والتى سبقتهم فى العمل بـ 6 سنوات ، وكان هذا الاضهاد موجها لـ (ن) أكثر منه بشكل مستفز ووصل بها الامر حتى انها كانت تحاول الايقاع بينهما وخلق نوع من الغيرة المهنية كما جاء فى رواية صاحب المشكلة

كانت اذا ارادت ( ن ) معلومة ذهبت الى هذه الزميلة كي تطلبها منها لانها تعلم اكثر منا فنحن اول مرة نعمل بمكتب في تخصصنا فكانت لا تعطيها اياها بأي حجة وبعد فترة تاتي هذه الزميلة وتعطيني انا المعلومة امامها لكي تكيدها فكنت بدوري اقدم لها المعلومة لاني احب روح الفريق في العمل

ولكن هذا لم يحقق هدفها .. بل زادهما قربا وأصبحا ثنائى عمل رائع غاية فى التفاهم والتجانس مما زاد من غيرة هذه الزميلة وزادها حدة واشتعالا فدأبت على اختلاق المشاكل لـ ( ن ) حتى تزيحها من المكتب وتعود للتحكم بزمام الامور كما كان من قبل .. ولم تستثنيه أيضا من نيران حقدها وغيرتها وحبها للظهور وحدها دون غيرها امام رؤسائها واختلقت له العديد من المشاكل أيضا

الجانب المهم من المشكلة يرويه صاحبها قائلا

^^^^^^^^^^^^^^^^^^^^^

لم اذق يوماً طعم الحب ولم اعرفه من قبل كنت اسمع عنه فقط ولم اكن اتخيل اني في يوم من الايام سأقع فيه
كنت اشعر بالسعادة الغامرة حينما اراها وابدأ الحديث معها ولا اريد له ان ينتهي .. واليوم الذي تغيب فيه اشعر بالوحدة الشديدة .. لم اكن اعلم ان ذلك هو الحب .. عشت 4 شهور من السعادة والذي اسعدني اكثر اني شعرت في الطرف الاخر نفس الشعور فحينما كنت اغيب لسبب ما او اخرج في مأمورية خارجية اجدها تكلمني لتطمأن علي وعلى احوالي .. كما كانت تشركنى معها فى مشاكلها الشخصية وتبوح لى باسرارها الخاصة .. تحملنا مع بعض مشقات العمل واضطهاد الطرف الذي ذكرناه وكان يواسي كلا مناً الاخر ونصبر بعضنا على الاستمرار في العمل ولكن تأتي الرياح بما لا تشتهي السفن فبعد مرور 4 شهور استطاعت زميلتنا ان تختلق مشكلة وتترك هذه الفتاه العمل
شعرت بوحدة شديدة وكلمتها ان تعود للعمل مرة اخرى ولكنها رفضت بشدة ولم استطيع ان اكمل في المكتب بعدها .. شعرت بالم شديد فاصبحت لا استطيع ان اراها أو حتى أحدثها تليفونيا فهذا غير جائز على الاطلاق

انا حائر لا اعرف ماذا افعل ؟
مر على ذلك الى الان 5 شهور قلت ان الزمن سينسني ولكني مازلت معلق بها وكلما تذكرتها احسست بان قلبي سيخرج من صدري من كثرة الضربات
واتمنى لو اني اسمع صوتها فحسب ولكني لا استطيع فهل يقدم لي احد الحل ؟

مع العلم انها تكبرني بعاميين

ماذا افعل ؟؟
انسى وخلاص ولا اعمل ايه ؟؟

كانت هذه هى مشكلة ( م ) مع العلم أنه لم يكن طرفا او له دخل فى ترك زميلته ( ن ) للعمل .. ولم يصرح كلا منهما للآخر بحبه علانية لكن كان هناك تلميحات وكلام بطريقة غير مباشرة من كلا الطرفين والصب تفضحه عيونه

تحديــــــــث

................

يقول ( م ): اتقدم بخالص الشكر لكل من اهتم بالموضوع وشاركني التفكير في حل واود ان اقول لكم انا لا يوجد عندي مشكلة اطلاقاً في موضوع السن ولا يوجد بيننا فوارق اجتماعية مادمت احبها فلا يعنيني اي شئ المشكلة الحقيقية انه من شهر بالظبط واحد جارنا خطب واحدة اكبر منه بسنة وكان رد فعل البيت عندنا غير طبيعي فهم يرفضون المبدأ من الاساس وان الراجل لازم يكون اكبر من الست فقعدت ادافع عن جارنا ده واقنعهم ان الموضوع مفهوش مشكلة طالما في وفاق بينهم لكن وجدت الرفض المطلق حتى ان والدتي قالتلي وانت ايه اللي مضايقك قوي كده ومعرفتش ارد عليها بصراحة فدي المشكلة انهم مش مقنتنعين اصلاً وياعالم اهلها ممكن يكونوا زي اهلي كده ولا ايه فانا فعلاً محتار

على اعتبار ان (ن) معندهاش مانع .. ياريت اللى عنده خبرة سابقة لا يبخل على (م) بها فى كيفية اقناع أهله .. ثم اهلها

وجزاكم الله خيرا كثيرا

----------

فى انتظار آرائكم ودعمكم ومساندتكم
اما انا فسأنضم لصفوف الجماهير ورأيي هيكون معاكم فى التعليقات
رأيكم مهم جدا لا تبخلوا به
الدعوة مفتوحة لكل الناس حتى غير المدونين
فيه خاصية فى التعليقات اسمها انونيميس ممكن تستخدموها
المهم نشارك .. صوتك امااااااااانة .. واحتسبوا الأجر عند الله
.
ولا ننسى أبدا أن رسول الله صلى الله عليه وسلم قال : ( المسلم أخو المسلم ، لا يظلمه ولا يسلمه ، ومن كان في حاجة أخيه كان الله في حاجته ، ومن فرج عن مسلم كربة فرج الله عنه كربة من كربات يوم القيامة ، ومن ستر مسلما ستره الله يوم القيامة

هفكركم تانى بإيميل باب افتح قلبك
Eftah.2albak@yahoo.com
للرجال .. مراسلة فقط
وللبنات .. مراسلة برضه وممكن شات

فى انتظاركم دائما لو كان فى العمر بقية
دمتم فى حفظ الله وأمنه

Tuesday, May 12, 2009

قــال تــــــاج قــال

إزيكوا يا جماعة .. وحشتونى
فاصل قصير لغاية ما ربنا يفرجها فى باب افتح قلبك .. ونرجع نكمل مع المشاكل الكتير جداااااا اللى جت .. أصل الواحد تعب بصراحة من قلة .. احم .. قصدى من كتر المشاكل .. وقلت آخد فاصل عشان أقدر أواصل هههههههه

المهم بقى دودو الجميلة ... عاشقة الرومانسية .. البنوتة الجميلة الطيبة الشقية اللى كلكوا عارفينها طبعا .. أهدت لى .. وخدوا بالكوا كويس من أهدتنى دى .. أهدتنى ايه بقى ؟؟
أقولكوا
أهدتنى تاج مش عارفة إسمه ايه بصراحة
بس هو تاج يعنى
وهو ده المهم

ويلا بقى نجاوبه ويا نخلص عليه يا يخلص علينا هههههههههههههههه

.

من أنت ؟ وما الذى تفعله هنا ؟

.
لا إله إلا الله
قال يا قاعدين يكفيكوا شر الجايين
واحدة وقاعدة فى مدونتها تعباكى فى ايه انا ؟؟ ههههههه
أنا واحدة من الناس .. عادية خالص حاصلة على ليسانس بطالة شعبة قعاد فى البيت – كان زمان اسمها ليسانس تربية شعبة لغة فرنسية بس دى موضة قديمة طبعا متخدوش فى بالكم- متفائلة وصبورة وعندى أمل كبير فى بكره
بعمل ايه هنا ؟؟ بجاوب عالمحضر اللى قدامى ده ههههههه

.
إسرائيل تقصف كل جنوب ممكن بحثا عنك ، أى شمال ستقصد؟

واسرائيل هتبحث عنى ليه اصلا .. ؟؟
على أساس انى خطر على امنها التدوينى مثلا ههههههه
أوووووووك هروح شمال أمريكا وتبقى تقصفها بقى نياهاهاهاها

أنت مكلف بحذف حرف من حروف اللغة العربية .. أيها ستختار ولماذا ؟

.
والله انا مش بحب حرف ( ظ) .. بيفكرنى بالظلم والظالمين والظلام . بس طبعا الكلمات دى ذكرت فى القرآن الكريم .. و حروف اللغة العربية اصلا مصدرها القرآن الكريم .. فمينفعش افكر مجرد تفكير انى اغيرها او احذف منها

لو قدر لك أن تدخل السجن فما هي القضية التي تتمنى ان تدخل بها إليه؟

حلوة تتمنى دى هههههههههه .. كأنى هروح دريم بارك مثلا ههههههههههههه
والله لو قدر لى ادخل السجن يبقى قدر لى .. وساعة القدر يعمى البصر .. مش هلحق اختار التهمة ههههههههههه هتبقى القضية جاهزة ومتظبطة ومستنيانى .. بس عموما ( اتمنى ) مدخلوش هههههههه

بالمناسبة.. منذ متى اكتشفت نفسك؟

والله لسه مكتشفتش نفسى .. بجد يعنى
شايفة فى نفسى طاقات مهدرة .. وحاسة انى ممكن اعمل حاجة لو وظفتها فى مكانها .. بس .....؟؟

معندكوش حد يكتشفنى ؟

على مفترق طريق الافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

مش عارفة ليه حسيت ان المسيخ الدجال هو اللى بيسألنى وجنته نار .. وناره جنة ههههههههههههه
انا هختار اليمين واتوكل على الله .. لأنه اليمين .. مش لانه حلمى

نحن لا نعيش حياتنا بل نتعلم فيها كيف نعيش ما تعليقك؟

لا احنا بنعيش حياتنا .. بس مبنتعلمش غير بعد ما نمر بمواقف الحياة المختلفة على مدار الحياة

بجملة واحدة فقط أكتب تعريفاً لكل كلمة من الكلمات التالية

الوطن
مصر – دمياط – بيت العيلة
الأم
حنان وعطاء ودفء واحتمال
الليل
هدوء ورومانسية وجراح وآلالام
الحب
وهم نخدع به أنفسنا ونجرح به أو ( يجرحنا به )غيرنا
أمريكا
مراة أبو العالم الشريرة
المرأة
حمالة الاسية
الصمت
لغة لا تقل اهمية عن الكلام
الانترنت
ضيف دخل بيوتنا واحتلها وبقينا احنا الضيوف :).. مقدرش اقول انه سئ جدا .. أو انه جميل جدا .. لأن اللى بيستخدمه هو اللى بيضفى عليه الصفات دى

ز
أخترمنصباً واتخذ قرارا ؟

.
رئيسة تحرير و صاحبة دار نشر .. الاتنين هههههههه

مش بقولكوا طاقات مهدرة هههههههه

قرارى

تعيين معظم المدونين كتاب وصحفيين بمرتبات مجزية .. عشان بجد فيه ناس عندها موهبة رائعة فى التعبير والنقد والسرد وكلها مواهب مدفونة خلف الشاشات .. هضبطكم متخافوش هههههههههه

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

تغييب ايه ؟؟
كان زمان الكلام ده .. ما ياما .. يامااااااااا ستات قالوا شعر .. مقريتش ليهم ولا مرة الحقيقة هههههههههه .. بس شغالين يعنى ههههههههههه
يمكن لأن المرأة اكثر خجلا من الرجل قى التعبير عن مشاعرها .. أكيد كانوا بيكتبوا شعر برضه بس مخبينه فى درج المكتب

أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل

أعلل ؟؟
والله ما انا عارفة ده تاج ده ولا كلبشات
مرة اسرائيل بتبحث عنى
و مرة تدخلونى السجن
ومرة مطلوب فى جريمة
ناقص تسألونى تحب تموت ازاى .. بالاعدام شنقا ولا بالموت حرقا هههههههههههه
لا طبعا مش عايزة حد يطلبنى .. ولو حد طلبنى مش هرد أصلا.. النمرة غلط ههههههههههه

.
إلى أين تمضي كلمات الحب .. بعد أن نقولها؟

من القلب للقلب رسول .. المهم ان يكون الحب صادق.. وليست مجرد كلمات

هل تجد علاقة بشكل أو بآخر بين المرأة وقطاع الطرق ؟

ممممممم أكيد اللى عمل التاج ده رجل
طييييييييب .. قاطع الطريق يسرق أموالك .. والمرأة تسرق قلبك

هذا فراق بيني وبينك .. متى ولمن تقولها ؟

.
أتمنى مقولهاش لأى حد بحبه .. واى حد بيحبنى مش هيخلينى أقولها .. وبكده سهل اقولها لاى حد طالما مش بيحبنى ولا بحبه

.
كيف هو غداً ؟
والله لو عشت إلى غدا هابقى أقولك .. عموما اتمنى ميكونش حَر هههههههه

أمرر التاج الى

معلش بقى يا جماعة ياللى همررلكم التاج
هو تاج رخم صحيح بس لذيذ ههههههههههه
وانا معرفش يبقى معايا حاجة وموزعهاش على الحبايب .. معلش بقى استحملونى ومحدش يدعى عليا .. ماشى
توكلنا على الله

محاسن صابر
أم أحمد المصرية
رفقة عمر
موناليزا
Soul .o.0.o .whisper
Aidy
rovy
ملكة بحجابى
نهى الوكيل
محمد عتلم
جنى
همس الاحباب
امبارح كان عمرى عشرين
طعميه سخنه
تامر على

اللى يجاوبه يعرفنى
واللى عايزه يتفضله

يارب البوست يكون خفيف عليكوا .. ومكونش ضيعت وقتكم فى الفاضى

سلااااااام
ومتنسوش باب افتح قلبك
Eftah.2albak@yahoo.com

Tuesday, May 5, 2009

افتــح قلبـك

لدى كثير منا مشكلة أو بعض المشاكل تحيره .. تؤرقه .. تسهده نهارا وتسهره ليلا .. تسيطر على كل مشاعره .. تلقيه في دوامة عنيفة من الأفكار المتلاطمة والأحاسيس المتضاربة والمشاعر الجريحة .. وتجعله يميل إلى الهروب منها بطريقة أو بأخرى .. وربما تدفعه إلى الوحدة والاكتئاب والانطوائية والانعزال

ولما كنا جميعا نمثل أسرة واحدة في عالمنا الإفتراضى .. ومن عادة أفراد الأسرة الواحدة أن يتشاوروا ويتناصحوا فيما بينهم أو على اقل تقدير يفضفض كل منهم للآخر بما يشغله .. ففكرت في تخصيص إيميل لاستقبال المشاكل التي تواجهنا ونمر بها وهو

Eftah.2albak@yahoo.com

وهو إيميل مخصص للمراسلة وليس للشات

على أن تعرض الرسائل الواردة هنا لمناقشتها وإبداء آرائكم فيها لإفادة صاحب المشكلة والاستفادة أيضا من تجربته التي مر بها ولا ننسى أبدا أن رسول الله صلى الله عليه وسلم قال : ( المسلم أخو المسلم ، لا يظلمه ولا يسلمه ، ومن كان في حاجة أخيه كان الله في حاجته ، ومن فرج عن مسلم كربة فرج الله عنه كربة من كربات يوم القيامة ، ومن ستر مسلما ستره الله يوم القيامة ) .

يا ترى إيه رأيكم ؟؟
موافقين على الفكرة ولا ألغيها ؟؟؟
ولو موافقين تحبوا اخصص إيميل وباسورد موحد لأصحاب المشاكل لضمان السرية .. ولا عادى – مع العلم انه سيتم الحفاظ الكامل على السرية التامة لبيانات صاحب المشكلة حتى فى حالة ذكرها
ها متحمسين للفكرة ولا هتحبطونى ؟؟؟؟؟؟؟؟؟

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.