حاجــــات جوايــا: مصريات.. بحلوها ومرها

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Showing posts with label مصريات.. بحلوها ومرها. Show all posts

Monday, January 17, 2011

أول الغيث ..... ولا آخره ؟؟؟

عبده عبد المنعم يشعل النار في نفسه أمام مجلس الشعب وهو يهتف ضد "أمن الدولة .. يا امن الدولة يا امن الدولة...؟. حقى ضايع فى الدولة .. حرس مجلس الشعب يطفوه بطفايات الحريق وينقلوه فى سيارة اسعاف على مستشفى المنيرة .. ده اليوم السابع بتقول كده ..

بس مصراوى بقى بيقول ان اللى جرى عليه سائق تاكسى وحاول يطفيه بطفاية الحريق اللى معاه الخاصة بالتاكسى بمساعدة المارة .. وبعد استقرار حالة الرجل، قامت النيابة بسماع اقواله في الواقعة، حيث قال إنه يملك مطعم بمدينة القنطرة شرق بمحافظة الإسماعيلية، وأنه أقدم على إشعال النار في نفسه احتجاجا على عدم صرف حصة الخبز الخاصة بمطعمه، مما تسبب له في البطالة

وصول فريق من النيابة لمستشفى المنيرة للتحقيق مع المصاب لتبين أسباب حرقه لنفسه

المستشار الإعلامي لوزير الصحة يجتمع مع مدير مستشفى المنيرة ويعقد مؤتمرا صحفيا بعد قليل

إصابات عبده عبد المنعم سطحية وتتركز بالوجه والرقبة واليدين واحتمالات بخروجه بعد يومين

وصول أيمن نور لمستشفى المنيرة محاولا زيارة عبده عبد المنعم ... تويتات ايمن نور على تويتر بتقول :

الاسم عبده عبدالمنعم حماد من قنطره غرب ونسبه الحروق 30 فى المائه والأصابات فى الوجه واليدين وعمره 49 سنه ويقول لجهات التحقيق الان انه لم يتمكن من الحصول على رغيف العيش وذهب لرئيس المجلس المحلى فلم يساعده أحد ونتيجه ظروفه الاقتصاديه وضع بنزين على رأسه وأشعل النيران .... المحامى العام يحقق معه الان وهناك اتجاه بأن يكرر نفس السيناريو المعتاد بأنه مريض نفسى ... حصار أمنى لكل أبواب المستشفى وإجراء التحقيق معه دون وجود ايه محامين ومنع دخول اى شخص إلا الأمن قسم الحروق .. مسؤلين بالمستشفى والامن لم يقصد الانتحار فسالتهم هل كان يجرب حلاقه ذقنه بالبنزين ؟ ... تذكره المواطن عبده عبدالمنعم تم سحبها من قسم الحروق لأحد المكاتب الإداريه فى حضور الأمن لكتابه أسماء عقاقير طبيه نفسيه حيث يتجه الامن لذلك ... مشاورات بين الأمن والنيابه لاحاله المواطن المحترق لأحد المصحات النفسيه لإثبات مدى قواه العقليه ... المواطن المحترق يقول فى التحقيقات ان له نشاط سياسى سابق ويتحدث عن مشكله لوالدته فى التأمينات وصعوبه الحصول على رغيف العيش

تواجد أمني كثيف داخل مستشفى المنيرة والأمن يمنع دخول الصحفيين

الاهرام : المواطن الذي أحرق نفسه يعالج نفسيا في مستشفى العباسية .. !!!!

البرادعى مقالش حاجة لسه :)

زوجته : رفضوا صرف الخبز له فاشعل النار فى نفسه

صديق مقرب لعبده : حالته النفسية طبيعية .. ومصدر طبى :الحروق 30%
.....

حرقت نفسك عالفاضى يا عبده

أديك طلعت مجنون

يعنى ولادك ذنبهم ايه .. ابوهم يبقى محروق وكمان مجنون

روح يا شيخ ربنا يسامحك

Sunday, January 9, 2011

وبعدين ..؟

وبعدين ..؟

هنفضل ساكتين لامتى

عمل ايه السكات؟؟

كل يوم ضحية جديدة من ولاد بلدنا

كل يوم قهرة جديدة وحسرة جديدة ووجع جديد

كل يوم بنتضامن مع مصرى جديد

مظلوم جديد

قلبى واجعنى

ومعدتش قادرة اتكلم

Sunday, January 2, 2011

وجاءت 2011

فى القلب غصة .. وفى العين الدمعة .. لا قادرة أبلعها ولا عارفة أنزلها

تعازيا الحارة لأسر ضحايا الارهاب الغاشم على كنيسة القديسين بالاسكندرية

ودعواتى بالشفاء العاجل للمصابين

ربنا يحفظ مصر وأبنائها مسلمين وأقباط من شر كل معتدى

اللهم آمين

Thursday, December 9, 2010

الشعب بيتكلم !!!

كليب يوجع القلب

الشعب بيتكلم بصوت عالى

يصرخ ويشجب ويدين ويستنكر ويبحث عن حلول

يلوم المؤسسات .. ويدين الفساد .. وينكل بالمزورين

ويرفع رموزا إلى أعلى القمم ويتوسم فيهم الاصلاح

وانه على ايديهم سيستحى الظلم وسيكون الحق مباح

الشعب ثائر .. غاضب.. هائج

يتبادل السباب و الكلمات النابية على نظام فقد شرعيته فى عينه وصار وجوده كابوسا خانقا يثقل على القلوب والانفس

ويتطاول بلسانه ( وبلسانه فقط ) على من يخدعونه ليل نهار

يتلقى الخداع وينوم تنويما مغناطيسيا ويصمت .. يصمت .. ربما لانه لا يستطيع سوى الصمت .. أو لانه ما زال يصدق المخادعين ويتوسم فيهم صدق الخدعة فى كل مرة !

الشعب طيب .. ورغم ذلك عنيف

تجلى عنفه فى دوائر الانتخابات التى انتهجت التزوير منهجا لا بديل له

فكسر .. واحرق .. وهشم

الشعب مخيف

ومع ذلك احذره

فالقائمون على التزوير كانوا أيضا من الشعب

الشعب الكادح المسلوبة حقوقه الذى يحيا تحت خط الفقر والذى لم يجد غضاضة فى المشاركة فى مسرحية الفساد الهزلية

بقلب ثابت وبعين لا تطرف وبلا أدنى تردد شارك فى التزوير

ومع ذلك فالشعب ضعيف

يُرهبه مخبر قادم من بعيد غير مسلح .. يرتعب اذا راى تعذيب مواطن مدنى أمام أعين المارة فى الطريق .. لا يتدخل .. وان تدخل لا ينصف المظلوم

كما حدث مع خالد سعيد .. حدث مع مصطفى عطيه وقبلهم وبينهم وبعدهم كان الكثير وسيبقى الاكثر والاكثر

طالما ان الشعب يرى نفسه أرنبا وكل همه الاحتماء والاختباء حتى يمر الخطر

الشعب غريب

لا تفهم له موقف .. أحيانا محارب ومناضل .. واحيانا جبانا ومذعورا .. وفى أغلب الأحيان صامت ومستسلم

ومع ذلك ينادى بالتغيير

ربما بوقفة احتجاجية .. أو بتعليق على مقال بجريدة الكترونية أو ببوست فى مدونة

غير معلومة الهوية أو ببرنامج جرئ على قناة فضائية

=========

آخـــر الكـــلام

.........

الشعب بسيط عايز حياة كريمة والسلام

عايز يعيش فى بلده كرامته متصانة مش متهان

عايز يلاقى قوته وقت حاجته وميباتش جعان

عايز يجيب العيش من غير طابور يوقف ميدان

ولما يشتريه يلاقيه نضيف لا عليه تراب ولا دبان

عايز لما يسافر يحس انه انسان

عايز لما يتجوز ما يمدش ايده لاحسان

عايز لما يخلف ولاده يتعلموا ويكبروا ويعيشوا فى أمان

مش عايز يلاقى فى الشارع تحرش ولا امتهان

ولا مخبر ملوش قيمة يعامله كأنه جربان

عايز مرتبه يكفيه وميضطرش للسلف والزوغان

ولا ايد حرامى تسرقه ويرجع بعد الصبرغلبان

لا يهمه حزب ولا انتخابات ولا تغيير ولا برلمان

الشعب مش عايز غير رحمة ... وإنسانية كمان

واكيد يوم ما تحصل .. هيكون الزمان غير الزمان

Monday, November 29, 2010

إذا الشعب يوما أراد الحياة.. قاوم التزوير

فى مدينة دمياط الجو كان هادى جداااا

الانتخابات مرت بسلاسة وهدوء غير طبيعى

لدرجة انى مكنتش مصدقة وقلت اخيرا المعجزة حصلت

زعلت اوى انى منزلتش انتخب

لانى أصلا معنديش بطاقة انتخابية

وحسب معلوماتى لازم اطلع بطاقة انتخابية قبل الانتخابات بثلاثة شهور

يعنى مش هيكتفوا ببطاقة الرقم القومى

ولان الانتخابات السابقة كانت بتبقى بهدلة وضرب وتحرشات من خريجات السجون بالنساء ووجع دماغ فمحاولتش اطلع بطاقة ولا اهين نفسى وانزل من بيتى

عشان كده زعلت لما عرفت ان الانتخابات كانت هادية

لكن ولأننا مش فى عصر الاحلام ولا عايشين فى المدينة الفاضلة

فزعلى مطولش الحقيقة لما تابعت الفيديوهات اللى هتشوفوها دى عالنت

الاحداث دى فى قرية فارسكور التابعة لمحافظة دمياط

بعد كل ده

نطلع بحقيقة واحدة لا خلاف عليها

.

مفيـــــــــــــش فايـــــــــــــــــــــــــــــده

Tuesday, November 2, 2010

تعليم.. اعلام .. عولمة .. فساد

زيارة وزير التعليم لمدرسة مصر الجديدة الاعدادية بنين

.. بعد تعرض احد الطلاب لاغتصاب وهتك عرض من قبل ثلاثه من زملائه بادرة طيبة تستحق الاشادة والاحترام

ليت كل مسئول يتعلمها

وليت يسرى الجمل قام بها بعد بلاغات الضرب والقتل التى حدثت فى المدارس فى عهده واشهرها مقتل الطفل اسلام على يد مدرسه الذى بكت له قلوب المصريين جميعا

لست من انصار قول .. (كان من الاول) بل احيى كل بادرة طيبة ايا كانت المواقف السابقة للقائم بها .. فهكذا يتم التقدم بالتشجيع والتحفيز وليس بالانتقاد و (التقطيم ).. ولا حتى بالتطبيل والتهليل .. يكفى فقط ان نحيى

اغتصاب طالب الاعدادى امر يشيب له الولدان

وناقوس خطر يدق فى اذان المجتمع والمعلمين ومن قبلهم اولياء الامور

لكن من أين أتت لنا هذه الثقافة القذرة .. ومن المسئول عن ترويجها والتسويق لها ؟؟

سؤال يستحق اعادة ترتيب الاوراق.. واعادة النظر فيما حولنا

هل هذا الطالب المسكين هو اول من تعرض لانتهاك داخل اسوار مدرسته ؟

ام ان هذا الامر وهذا الشذوذ يتم ممارسته بالفعل بين الطلاب بكامل الرضا بعيدا عن اعين المدرسين والمشرفين .... واولياء الامور المغيبين (بل ربما حتى بعلم المدرسين .. طالما ان مدير المدرسة المحترم يستنكر ان الاب المكلوم مكبر الموضوع !!!)ولم يتم اكتشافه الا بعد اعتراف الطالب المغتصب لوالديه بما حدث له ؟

لا اخفيكم القول اننى اميل للافتراض الثانى .. فالمتابع للأفلام ( الواقعية ) كما يدعى بعض المخرجين من ذوى الشطحات الشاذة و( الجريئة ) سيجدها مليئة بمثل هذه المشاهد المقززة

هذه هى ثقافتكم يا ( كريمة المجتمع ) التى تعلمونها لأبنائنا فى سن الطفولة والمراهقة .. هذه هى الثقافة التى تحاربون من اجل نشرها وانتشارها بحجة علاجها والتصدى لها وانتم انفسكم من تلفتون الانظار إليها

من أين لطفل فى سن الثانية عشرة ان يعرف معنى الشذوذ وكيفيته ؟

وأين رقابة الاسرة على ما يشاهده ابنائها ؟

على اخلاقياتهم .. على سلوكياتهم ؟؟

هذه القضية وغيرها ان دلت على شيء فإنها تدل على مجتمع بلا قيم ولا دين

مجتمع يسير وراء شهواته لم يعلمه احد الحلال والحرام

مجتمع متسيب لا رقابة عليه ولا رقيب لتصرفاته

مجتمع هش ينحى الدين جانبا ويفصله عن الحياة .. عن التربية .. عن الدولة

مجتمع بلا أب يقوم .. وبلا ام تربى

وبلا إمام مسجد ومدرس تربية دينية يعلم الصغار الحلال والحرام .. الصواب والخطأ

مجتمع بلا فن محترم

مجتمع فاســد

Monday, July 12, 2010

ولسه يا وزير التغييم

لقى طالب مصرعه من مركز أبو قرقاص منتحراً، بعد إعلان نتيجة الثانوية العامة. تلقى اللواء محسن مراد مدير أمن المنيا بلاغا من مأمور مركز شرطة أبو قرقاص يفيد انتحار الطالب وليد خلف عبد الحكيم من زاوية حات التابعة لمركز أبو قرقاص، عقب سماعه النتيجة والتأكد من رسوبه، حيث تبين أنه قام بإغلاق الباب على نفسه وربط حبل فى سقف المنزل ووضعه حول رقبته وشنق نفسه. وقد عثرت عليه أسرته معلقا إلا أنها لم تستطع إنقاذه.

الخبر من اليوم السابع

ولسه يا وزير التعليم

بجد حسبى الله ونعم الوكيل

مش عارفة ايه مزاج السادة الوزراء انهم يعكننوا على الشعب

عايزة افهم بس هما بيستفيدوا ايه ؟؟؟

الثانوية العامة فى بلدنا كارثة من الكوارث الطبيعية

وياريت بيطلع منها الطلاب فاهمين حاجة

شوية مختلين عقليا ميعرفوش اى حاجة فى اى حاجة ماسكين العملية التعليمية ومعتقدين انهم جهابذة وعباقرة واللى بيعملوه محدش يقدر عليه

من ناحية محدش يقدر عليه .. ففعلا محدش يقدر عليه

لان محدش عنده كمية الغباء دى كلها .. ده غباء حصرى فى التعليم المصرى

الخبر ده كنت متوقعاه ويمكن اكون كنت بستناه .. وبستنى اكتر منه كمان .. مهو أكيد الموضوع مش هينتهى بانتحار طالب واحد

فى شرع مين يرسب نصف طلاب الثانوية العامة ؟؟؟؟؟؟؟

نصف الطلاب !!!!

نصف الطلاب مذاكروش ليل نهار .. ولا تعبوا وسهروا واكتأبوا وعيطوا من المناهج التقيلة اللى مش قادرين عليها

نصف الطلاب أهاليهم مدفعوش اللى وراهم واللى قدامهم فى دروسهم الخصوصية

نصف الطلاب معاشوش سنتين فى جحيم الثانوية العامة وعيشوا معاهم أهاليهم وأقاربهم ، وبيوتهم تحولت من بيوت عادية لثكنات عسكرية معلن فيها حالة الطوارئ ليل نهار

والله أنا قلبى بيبكى .. حزينة جداااا على كسر قلوب الطلبة وأهاليهم بالشكل المفجع ده

هو خلاص مفيش رحمة

طيب بتضيقوا عالناس فى المعيشة .. فى الجواز .. فى الشغل .. فى غلاء الأسعار .. فى الارتفاع الجنونى لاسعار شقق الشباب .. فى تدمير نفسية الشباب والبنات .. والناس مش قادرة وهتنفجر من كل حاجة ومحدش حاسس ولا سائل ... لكن دى حاجة وانكوا تحطموا قلوب واحلام ولادهم حاجة تانية خالص

كل انسان طبيعى بيستحمل كل حاجة عشان خاطر ولاده

عشان يربيهم كويس ويعلمهم كويس ويفرح بيهم ولهم

حتى الفرحة استخسرتوها فى الناس

مفيش عقل خالص .. مفيش نسبة ذكاء أرنب حتى

سيبوا للناس حاجة تريحهم نفسيا يمكن ينسوا عمايلكوا السودة شوية

مش كفاية أصلا انهم هيدخلوا كليات عجيبة وأساتذتها معقدة برضه ويتخرجوا منها زى ما دخلوها وفى الاخر يقعدوا فى بيوتهم

طيب ادوهم فرصتهم فى البهدلة الطبيعية .. بلاش تبهدلوهم كده من اولها وتكرهوهم فى حياتهم وبلدهم .. الحكاية مش ناقصة

هى عقدة وبنخلصها فى الناس ولا ايه ؟؟
والله ياريت يا حكومة قبل ما تمسكى حد مصير ابنائك .. تعرضيه على طبيب نفسى

وياريت تبقى تكشفى انتى كمان احتياطى زيادة اطمئنان احنا طبعا واثقين فى قدراتك العقلية الخارقة بس محتاجين نطمن.. يمكن يكون مستوى ذكائك تعدى الحدود الطبيعية وكسر الارقام القياسية .. وساعتها بقى يبقى يا بختنا يا هنانا

ربنا يرحمك يا وليد ويصبر أهلك و ينتقم من كل ظالم

حسبى الله ونعم الوكيل

Wednesday, November 18, 2009

فى حب مصـــــر

يا مصر يا غالية علينا .. يا حتة مننا

نفديكى بدمنا

لو يوم احتاجتى لينا .. نضحى بعمرنا

مهما نشرق نغرب .. أو نبعد او نقرب

ولو حتى قسيتى علينا

غلاوتك فى قلوبنا .. من غلاوة امنا

يا مصر يا هبة النيل

يا اطيب شعب .. يا أرض الخير

ان شاء الله هنفرح . بنصرك الجميل

بحبك يا بلادى .. يا حبى يا فؤادى

ثمانين مليون اخواتى

بيقولوا بس مصر

بندعيلك بقلوبنا .. تنتصرى فى كل وادى

كلنا بنقول يارب .. وبنرفع الايادى

اللهم انصر منتخب بلادى نصرا عزيـــــزا مؤزرا

اللهم وحد صفهم وسدد رميهم واحفظ مرماهم يارب العالمين

اللهم آمين

Saturday, November 14, 2009

بمووووووت فى ترابك يا مصر - تحديث : ألف مبروووووك لمصرررررر

النهارده يوم غير عادى

بستناه من فترة طويلة

وعاملاله ألف حساب

مش أنا بس طبعا

أكيد كل المصريين او على الاقل معظمهم

وللغرابة انى أصلا مليش فى الكورة

منتمية للنادى الاهلى بشكل شرفى بس

مش بتابع حتى غير فى النهائيات

بس المرة دى الكلام على مين ؟؟

على مصـــــــــــر

أيوووووه .. مصررررر

مش المنتخب المصرى بس

مصر كلها بكل طوائفها ومهنها وشعبها

بكل كبارها وصغارها

رجالها ونسائها

تخيلوا

تخيلوا ماتش كورة ياخد كل الاهتمام ده

ويثير كل الحروب الاعلامية دى

وكل التصرفات الاستفزازية دى

بجد مش عارفة ليه الجزائريين متشنجين معانا كده

ليه بيكرهونا كده

احنا اصلا شعب طيب ملناش فى العداء ولا الكيد

ليه يعملوا معانا كده

حرقوا علمنا وتيشيرت المنتخب

وشوهوا صورة رجالنا ونسائنا ولاعبينا ومدربينا

وعملولنا اغانى ونزلوها عاليوتيوب وشتمونا وبهدلونا ولا راعوا ان طفل او بنت ممكن يشوفوا او يسمعوا الكلام ده ولا اى حاجة

ورغم مبادراتنا السلمية واظهار حسن نوايانا

ومحاولات التهدئة .. وكان ناقص يعملوا خارطة الطريق

وكانها حرب بين فلسطين واسرائيل

أنا هدعى لمنتخب مصر مش بس لانه منتخب بلدى

ولا لأنه الأحق بالفوز بس

ولكن لأن كل رجاله .. رجال

رجالة محترمة متدينين وخلوقين

عارفين اللى ليهم واللى عليهم

حسبى الله ونعم الوكيل

ولسه هنشوف فى الملعب

ربنا يستر

عجبنى اوى الراب ده
كلامه فى الصميم

رد محترم على كلامهم الغير محترم

والله المصريين بجد بجد أحسن ناس

ربنا ينصرهم يارب

اللهم انصر منتخب بلدى نصرا عزيـــــــــزا مؤزرا

اللهم آمين يارب العالمين

نتقابل ان شاء الله بعد الفوز

السلام عليكم

Friday, November 7, 2008

حزب الغد اتحرق يا رجالة

وتتوالى سلسلة الحرائق فى مصر

احترق مجلس الشورى
وتلاه حزب الغد
يا ترى الحريق الجاى فيييييييييين ؟؟؟؟؟؟؟؟؟؟؟؟؟؟؟؟؟؟؟

نقلا عن مدونة الوعى المصرى

القاهرة
رويترز + وكالة أنباء الشرق الأوسط

نظم أنصار مصطفى موسى الرئيس المعين لحزب “الغد” المعارض وقفة إحتجاجية قبل ظهر “الخميس” أمام مقر الحزب بشارع قصر النيل بميدان طلعت حرب وسط القاهرة تمهيدا لدخول المقر تنفيذا لحكم قضائى بتسليمه لموسى.

وقالت وكالة انباء الشرق الاوسط الرسمية ان أنصار موسى فوجئوا بعناصر تابعين لأيمن نور - المسجون حاليا - يقذفونهم بالحجارة لمنعهم من دخول المقر.

واكدت الوكالة ان أنصار ايمن نور أشعلوا النيران فى محتويات مقر الحزب، وأحدثوا تلفيات فى السيارات الموجودة اسفر مبني مقر الحزب.

بينما قال عضو قيادي في جناح بحزب الغد مؤيد للزعيم المعارض المسجون أيمن نور ان أعضاء في جناح مناؤي لهم في الحزب أشعلوا النار في مقر الحزب القائم في وسط القاهرة وان النار أتت على محتوياته.

وقال العضو القيادي في الحزب وائل نوارة لرويترز ان حوالي 200 عضو في الجناح الموالي لنور كانوا يعقدون اجتماع الجمعية العمومية للحزب حين هوجموا بالزجاجات الفارغة والحجارة من قبل مناوئين لنور.

وأضاف أن النار اشتعلت في المقر بعد الهجوم الذي قال ان عشرات الاشخاص شاركوا فيه.

وأضاف أن الحاضرين هرعوا الى طابق أعلى في المبني.

وقال شهود من رويترز ان سحب دخان كثيفة ارتفعت فوق مبنى مكون من عدة طوابق يضم مقر الحزب الذي اسسه نور.

وقال شاهد ان النار امتدت الى الطابق الذي يعلو مقر الحزب لكن رجال الاطفاء أخمدوا الحريق بعد حوالي 45 دقيقة من اندلاعه.

واتهمت وكالة انباء الشرق الاوسط قرينة نور الإعلامية جميلة إسماعيل بتريد هتافات مما دفع أنصار أيمن نور الى الاشتباك مع أنصار مصطفى موسى.

وعملت قوات الحماية المدنية بالقاهرة على محاصرة النيران والسيطرة عليها خشية امتدادها الى الشقق التى تعلو مقر الحزب..فيما ألقت قوات الأمن القبض على ثمانية أشخاص من المشاركين فى إضرام النار بمقر الحزب.

وأصيب بعض الأشخاص بحالات اختناق نتيجة التدافع الشديد أمام مقر الحزب وتم نقلهم بسيارات الاسعاف لتلقى الاسعافات اللازمة .

ونجح رجال الحماية المدينة بالقاهرة فى انقاذ 6 أشخاص (اربع سيدات ورجلين ) وانزالهم من مقر الحزب والشقة التى تعلوه بواسطة السلالم الهيدورليكية ..وشرعوا فى عملية تبريد لمحتويات مقر الحزب المحترقة.

وقامت قوات الامن بعمل كردون أمنى حول مقر الحزب حرصا على حماية المواطنين من الحريق .. حيث تمكن رجال الحماية المدنية من السيطرة على الحريق .

ونظم أنصار الحزب مسيرة بميدان طلعت حرب يتقدمهم مصطفى موسى رئيس الحزب ورجب حميدة عضو مجلس الشعب نددوا خلالها بايمن نور.

وسجن نور الذي نافس الرئيس حسني مبارك في انتخابات عام 2005 لمدة خمس سنوات لادانته بتزوير أوراق تأسيس حزب الغد لكن نور يقول ان القضية سياسية وان الهدف منها الخلاص من نشاطه السياسي.

وكان مقر حزب الغد مكتب محاماة خاصا بنور قبل اتخاذه مقرا رئيسيا للحزب.
المصدر : امل الامة

.......................

تساؤلات منطقية فرضت نفسها على الساحة تحتاج إلى إجابة

ما هو سبب وجود موسى مصطفى موسى ورجب هلال حميده قبل الحريق بمقر طلعت حرب؟

ما علاقه حريق حزب الغد بنجاح اوباما في امريكا؟

ما هو سر عدم تدخل الداخليه وعدم تواجد الامن في هذا التوقيت بالذات؟

ما هو مصير الجمعيه العموميه لحزب الغد غدا الجمعه؟

ما هو رد فعل الحزب بعد هذه الكارثه؟

ما هي حاله الدكتور ايمن نور بعد تلقيه هذا الخبر؟

هل ساعد اشخاص داخل جبهه ايمن نور زعيم الغد على حدوث هذه الكارثه؟

من المستفيد الاول والاخير من هذه الكارثه؟

مش قلتلكوا أبو المعاطى السبب .. هو أبو المعاطى مفيش غيره

توضيح بسيط كده على جنب قبل ما امشى

انا مش من انصار حزب الغد ولا حزب الوفد ولا الإخوان ولا الحزب الوطنى ولا اى حزب صغير او كبير

انا مصرية مستقلة حزينة اووووووووى بجد على بلدى م اللى بيجرالها بسبب صراعات مقيتة على السلطة هتضيعها وتضيعنا وتحولها لدولة خربة شكلا ومضمونا

ربنا معاكى ومع اولادك يا مصر

Tuesday, August 19, 2008

مجلس الشورى ... هل نقول وداعا اااااااا؟؟؟

بجد مش عارفة أقول ايه ؟؟؟
مش قادرة أوصف إحساسى
متضايقة جدا من اللى حصل ده
إزاى مبنى كبير وعريق زى مجلس الشورى ميكونش متامن ضد الحريق
بغض النظر عن الاسباب سواء ماس كهربائى أو بفعل فاعل
إزاى مفيش إنذار حريق فى المبنى أو طفايات حريق اوتوماتيك .. او حتى طفايات عادية ؟؟
ده انا مشوفتش واحد بيحاول يطفيها بكوباية ميه حتى
والاسعاف والمطافى جايين يتمختروا بعد ما النار بدأت تسود
وإيه جرادل الماء اللى الهليوكوبتر بترميها دى .. دى جرادل دى ولا كوبايات ؟؟؟؟

وكمان المبنى خشب ومتجددش والنار عمالة تجرى فيه كانها فى سباق
دى ماساة بكل المقاييس

الإهمال وصل للدرجة دى ؟؟؟؟؟؟؟؟؟

انا عارفة انه وصل مش هقول لأ
عارفة ان الإهمال فى كل مكان فى حياتنا .. وفى كل حاجة فى بلدنا
بس مجلس الشورى ده مكنتش اتوقع أنه ينتهى بالشكل ده
ينتهى بحريق .. وميلحقهوش .. وبسبب الاهمال

لا حول ولا قوة إلا بالله

لا حول ولا قوة إلا بالله

والله لو كان بفعل فاعل كان بقى أهون

وبينى وبينكوا يعنى ما استبعدش انه يكون بفعل فاعل .. لانه لو كان طبيعى كان على الاقل دور واحد بس اتحرق .. بسبب تأخر المطافى وبسبب الحجرات الخشبية ..مش الثلاث ادوار .. واكيد عربيات المطافى الحكومية واللى تبع القوات المسلحة كانت قدرت تطفيها .. لكن دى كانت كل ما تنطفى تولع تانى .. وكأن فيه مادة سريعة الاشتعال مرشوشة فى المكان ومحدش لاحق يطفيها .. خصوصا وإن الايام اللى فاتت زى ما أنتم عارفين الفضايح فيها كانت على آخرها من نواب مجلس الشعب " الكباااااار " .. وأكيد حد له مصلحة فى إخفاء امر ما والقضاء عليه .. يعنى هيعملوا ايه بس هيقطعوا نفسهم .. قتل وقتلوا .. نهب ونهبوا .. .. معدش بقى غير حرق المجلس كله .. بس ربنا ستر ومكانش فيه حد .. أصل محدش فيهم يستحق شرف الشهادة

أو بقى الاحتمال الاخير .. وبصراحة انا بميل له اكتر من الاحتمالين اللى فاتوا .. وهو غضب ربنا .. أصل اللى بيحصل فى البلد دى بجد مش شوية .. ده كتيرررررررر .. وكتير جداااااااااا كمان .. وربنا ميرضاش بالظلم .. السرقة علنى والقتل ببجاحة والتزوير على آخره وفى كل حاجة .. وكل واحد فاكر نفسه صاحب حق وملوش كبير وناسى ان ربنا موجود ومنتقم جبار .. بجد بجد عقبال كل ظالم .. حسبى الله ونعم الوكيل

دى بعض المواقع الإخبارية اللى غطت الحدث

موقع أبناء مصر

موقع الجزيرة

موقع العربية

ربنا يستر ويسلم
ويشفى المجروحين الغلابة اللى ملهمش ذنب سواء من الموظفين او من الجنود

دمتم بخير وسلامة

Sally

Sunday, April 13, 2008

مجرد رؤية لما حدث

ما زلت لا أصدق ما حدث فى بلدتى الحبيبة
ما زلت مذهووولة مما رأته عينى .. وسمعته أذنى وأحسه قلبى
بكى قلبى ودمعت عينى وأنا أرى شعب بلدى فى هذه الحالة من " الانهيار العصبى " ان صح القول .. والذى دفعهم لفعل ما فعلوه فى مدينة المحلة
فلم تعد قواهم تحتمل المزيد
فاض بهم الكيل
وقصف ظهورهم الظلم
فثاروا وغضبوا وانتابتهم حالة من الانفجار
انفجرووووووووووا
بشدة
بقسوة
بعنف
كان بامكانهم تدمير كل ما تطاله ايديهم
وتدمير حتى ذواتهم
فماذا تبقى ؟؟
البعض منهم انتحررررررر
يأسا من الحياة .. وهربا من صراعاتها على لقمة العيش
والبعض الآخر استسلم لما يحدث حوله .. ورضا بقضاء الله .. واهى عيشة والسلام
والبعض ثار وانفجر
حطّم وتحطم .. ولم تعد تُجدى معه التصريحات والوعود

ولا زال الغضب يحرقهم
وضيق الحال يمزقهم
واضراب آخر فى الأفق .. يلوح لهم

فلم كل هذا الذى وصلنا إليه ؟؟؟؟؟؟؟؟؟؟؟؟؟؟؟؟؟؟؟؟؟

هل تعجز مصر عن تحقيق الأمن والأمان لأبنائها ؟؟
الأمن النفسى
والأمان المادى
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

منذ فترة ليست بالقريبة سادت بين قوى الشعب حالة من الخوف
تكممت الأفواه
قُصفت الأقلام و وُجه الاعلام ..
وصار ما نراه بأعيننا شئ .. وما نسمع عنه فى الصحف والفضائيات الموجهة شئ آخر
وكأننا صرنا بلدين فى بلد واحد

والشعب يفهم كل ما يدور حوله
ما أخفوه .. وما أعلنوه
ويصمت
ولا تدرى لم ؟؟
هل يصمت بسبب الخوف ؟
أم يصمت بسبب العجز وقلة الحيلة ؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وظل الشعب يصمت ويصمت
إلى ان نال منه الجوع مداه .. فلم يعد يستطع الصمت
فالجوع والخوف لا يجتمعان فى قلب واحد
نسى الشعب الخوف
نسى قانون الطوارئ
والاختطافات
والمعتقلات التى تفتح أبوابها على مصراعيها وتقول "هل من مزيد " ؟

صم أذنه عن التهديدات
رفع صوته المكتوم
وسن قلمه المقصوف
وأصلح عدسته المكسورة
وجعل من أحياء مدينته ميدانا للمعركة

طالب بحقوقه المهدرة
وآدميته المُنكَرة

رفع صوته عاليااااااااااااااااا
لم توقفه المدرعات ولا القنابل المسيلة للدموع ولا الطلقات
كان كأسد ثائر من الجوع .. يريد ان يلتهم من منعوا عنه طعامه ورزقه .. وأن يمزقهم تمزيقا

حزنت كثيراا جداااااااااا لهذا الحال
وكأننا قى فلسطين .. نقاوم اسرائيل

أهذا يُرضى الله ؟؟؟

هل ما حدث هذا يُرضى أحد ؟؟
أين المسئولين الذين لهم صوت مسموع ؟
أين مسئولى الشعب الذى يتكلم باسمه ؟
أكان لزاما على كل هذه الجماهير أن تعلن العصيان المدنى حتى يتحركوا ؟
ما فائدة رؤساء النقابات ؟
رؤساء تحرير الصحف ؟
الوزراء ؟
نواب الشعب ؟

ما فائدتهم ان لم يتكلموا بلسان الشعب ؟؟؟؟
ألا يتفرغون إلا للفن والفنانين ولاعبى الكرة ومشاكلهم التافهة ؟

أيظنون ان كل الشعب يحيا حياة الترف والرفاهية ويرتاد السواحل الشمالية ؟
ألا يشعرون ان هذا الشعب المطحون لا يكفيه فُتاتهم الذى يلقون به إليه كمرتبات " عيش حاف "؟

أسأل الله العلى العظيم أن يهديهم ويُصلحهم
ويصلح حالنا وحال المسلمين اجمعين

دمتم بكل الخير

Sally

Wednesday, January 16, 2008

مفيش اتنين طيبين يصالحونا على بعض ؟؟؟

أنا بجد زعلانة منها أوى

ومتضايقة أوى أوى

ومش عارفة أعمل إيه ؟؟

عارفين مين هى ؟؟

مصــــــــــر

ليه بتعملى فينا كده

يا مصر ده انتى أمنا

ده انتى لو كنتى مراة أبونا كنتى بقيتى أحن من كده

كل حاجة فى حياتنا صعبة

تعبنا فى الدراسة لغاية ما خدنا مؤهلاتنا .. تعبنا أوووووووووى

استحملنا المناهج المعقدة .. والأسئلة الغامضة .. والكم الكبير والحشو اللى ملوش لازمة

واللى مستفدناش منه حاجة أصلا !!!

وقلنا ميهمش فى الجامعة هنرتاح .. لقيناها ملهاش مقياس

مش بتنجح فيها لأنك شاطر .. ولا حتى بتسقط لأنك فاشل

بتنجح أو بتسقط لأن الدكتور عايز كده

لأنك مشتريتش الكتاب .. أو محليتش الشيت

أو لأن الدكتور بيستخف دمك أو عارف باباك وعمك

وفى آخر المشوار .. بعد البهدلة والسهر والعياط ليل نهار .. والمراجع والقواميس ..

وكل المصاريف

وعنينا اللى اتمققت فى الأبحاث والدبلومات .. وبعد كل الكورسات .. فى الكمبيوتر واللغات .. قعدنا فى البيت

الرجالة زى الستات .. مستنين الفرج .. بالشغل أو بالجواز

طب ايه فايدة اللى اتعلمناه ؟

ايه خلاصة 18 سنة تعليم ؟

اننا نقعد عالنت .. نشارك فى المنتديات ونعمل مدونات ؟؟

وإيه فايدة المدونات ؟؟

مجرد فضفضة .. بدل ما نطق ولا نموت من الغيظ

بس

ملهاش فايدة تانية

حتى لو بنعلم بعض فيها

ايه فايدة التعليم

يعنى كان تعليمنا اللى اتعلمناه نفعنا فى حاجة ؟!

ايه فايدة التعليم فى بلد ماشية بس بالوساطة مش بالكفاءة

فى بلد اللى شغال فيها ياخد على دماغه وتطلع عينه ويستغله زمايله ويرموا الشغل عليه

وبعد كل ده .. يطلع له حافز أو مكافأة أقل من زميله اللى ما بيشتغلش أصلا

ورايح جاى يوزع هدايا ويمسح جوخ للمدير

بجد حاجة تخنق وتجيب اكتئاب مزمن

أنا تعبت .. وقرفت

وحاسة بالفشل والعجز

حاسة انى مشلولة .. ومتكتفة

وبصرخ وصوتى مش طالع

الله يكون فى عون الرجالة بجد .. لما الستات يبقوا مخنوقين كده

الرجالة يعملوا ايه ؟؟

ربنا يتولانا برحمته

آآآآآآآآآآآآآمين

احتراماتى

sally

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.