حاجــــات جوايــا: حكايات عايش وعبده طناش

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Showing posts with label حكايات عايش وعبده طناش. Show all posts

Saturday, October 25, 2008

الحلقة العاشرة " عين .. وصابتـنـــــــا "

الحلقة العاشرة

عين ... وصابتنـــــــــــا

يجلس عبده طناش على مكتبه فى مقر عمله يراجع بعض الاوراق ويدخل بعضها إلى جهاز الحاسب الآلى الذى يستقر امامه

صوت طرقات متناغمة على الباب يعقبها دخول صاخب لأحد زملاؤه

أبو المعاطى مهللا : مين ؟ .. عبده بيه ؟ .. عبده باشا ؟؟ حضرة معالى جناب سيادة عبده باشا بنفسه قاعد قدامى ومتواضع على مكتب حقير زى ده !!!؟

عبده طناش فى سره .. يا فتاح يا عليم يا رزاق يا كريم
ثم يلتفت إليه قائلا : اهلا يا ابو المعاطى .. خير ؟؟؟ ايه الهيصه اللى انت عاملها دى ؟

أبو المعاطى يغمز بعينه قائلا : يا راجل اطلع من دول .. انت هتعملهم علىّ .. ده انا حبيبك واخوك وكاتم أسرارك .. مكانش العشم يا عُبد

عبده طناش فى نفاذ صبر : خير يا أبو المعاطى .. حد قالك انى اترقيت ولا خدت مكافأة ولا حاجة ؟؟ ... طب يا سيدى احب اطمنك مفيش حاجة من دى حصلت .. ها .. ارتحت .. اى خدمة تانية ؟؟

أبو المعاطى : خدمة ؟؟ العفو يا باشا ده انا اللى فى الخدمة .. مكافاة إيه يا راجل ولا ترقية انت فاكرنى ساذج ؟؟ .. انت برضه تفكر فى التفاهات دى ؟؟ ما خلاص بقى عديــنا

عبده طناش : يارب صبرنى .. هات من الآخر يا أبو المعاطى وخلصنى .. مش ناقصك .. عايز ايه ؟؟

أبو المعاطى : بلغنا يا سيدى من مصادر موثوق منها انك دخلت عالم البورصة يا معلم .. بجد ضربة معلم بصحيح .. عرفت تختار الطريق الصح وهتلعب بالفلوس لعب زى حيتان البلد .. مين أدك يا عم ده انا عارف من نص رمضان وكل شوية اقول عبده هيقولى .. عبده هيحكيلى .. وانت منفضلى خاالص .. ما كانش العشم يا عُبد

عبده طناش : انت بتقول ايه ؟؟ أقولك ايه واحكيلك ايه ؟؟ هو حصل إيه اصلا .. انا لا اشتريت ولا بعت .. كل اللى عملته انى عملت كود بس .. مفيش غير كده .. انت عامللى حكاية على ايه ؟؟ ما انتاش لاقى حاجة تعملها قلت تيجى تنبرلى شوية ولا ايه ؟؟ وبعدين دى البورصة واقعة فى العالم كله .. وفيه ازمة مالية عالمية .. انت مش متابع ولا ايه ؟؟

أبو المعاطى متظاهرا بالغضب : أنبرلك يا عبده .. بقى ده جزائى ..؟ ده انا جيت لحد عندك أهنيك .. هو انا جاى أشحت منك .. على العموم كتر خيرك .. ويا سيدى متخافش سرك فى بير مش هقول لحد

عبده طناش يشتاط غضبا : سرى فى بير ؟؟؟ انت عايز تستفزنى وخلاص .. صح؟ يللا يا أبو المعاطى روح شوف شغلك وسيبنى فى حالى انا ورايا شغل كتير ... ولسه قدامى مشوار طويل لحد البيت

يعتدل أبو المعاطى فى وقفته ويسير نحو الباب وهو يرمى إليه بالكلام : ماشى يا سيدى براحتك .. بس متزقش .. ما خلاص بقى اللى عِلي عِلي .. هتتعالى علينا وتبصلنا من فوق .. الله يرحم المشاريب اللى كنت بتشربها على حسابى

يخرج ويطرق الباب وهو يغمغم مع نفسه : قال وراه مشوار طويل قال بيوفر سيادته!!.. امشى يا سيدى امشى .. امشيلك شوية زى الغلابة اللى زينا .. بكره يبقى عندك عربية بسواقها تركبها وتدوس علينا .. هو حد بيدخل البورصة دى ويطلع خسران .. ده العالم كله عايش عليها .. بلا ازمة مالية بلا كلام فاضى .. بكره تروق وتحلى ويرجعوا يلعبوا بالملايين والمليارات تانى .. بس لو كان معايا قرشين زيه كان زمانى اتنططت عالبلد بحالها .. بس تقول ايه .. ؟؟ حظووووووظ

فى حين كان عبده طناش يزفر فى ضيق وهو يحدث نفسه قائلا : يا ساتر يارب .. محدش بيسيب حد فى حاله أبدا .. إنسان غريب .. أراهن انه سبب الازمة المالية وهبوط البورصة
ثم يكمل عمله وهو يحاول تناسى الموقف .. وما ان ينتهى حتى يرن الموبايل ليجد المتحدث عايش

عبده طناش : أهلا يا عايش إزيك اخبارك إيه ؟؟

عايش : الحمد لله يا عبده أخبارك انت ايه ؟

عبده طناش : الحمد لله والله .. انت بتتكلم منين ؟

عايش : أنا هنا جنبك قلت أشوفك خلصت ولا لسه عشان اعدى عليك نروح سوا

عبده طناش : آه خلصت الحمد لله كنت بقفل المكتب

عايش : طيب خير الحمد لله.. انزل بقى انا مستنيك تحت اهه

عبده طناش : أوكى .. هامضى انصراف واكون عندك خلال دقايق ان شاء الله .. يللا سلام مؤقت

عايش : سلام

كان عايش يقف بمحاذاة إحدى السيارات التى تتخذ صف اول .. لم يستغرق الامر دقائق ليجد عبده طناش خارجا من باب الشركة التى يعمل بها

عايش : إزيك يا عبده اخبارك ايه ؟ فينك يا عم من زمان ؟؟

عبده طناش : إزيك انت يا عايش .. معلش انا عارف انى مقصر والله بس انت عارف الواحد اتلهى فى حاجات كتير فى رمضان والعيد كل سنة وانت طيب .. بس ايه المفاجاة الحلوة دى ؟؟ اى رياح طيبة اتت بك إلينا ؟؟

عايش : أبدا يا سيدى كنت مقدم ورقى فى شركة جنبك هنا وجيت اشوف اخباره ايه يمكن ربنا يكتبلى فى يوم من الايام ابقى موظف محترم زيك كده ههههههههه .. بس طبعا لا جديد

عبده طناش ضاحكا : هههههههه يادى النهار الغريب .. الناس كلها النهارده عايزه تبقى زيي .. قال يعنى كانت نفعت معايا هههههههه

عايش : ههههههه بجد .. فيه حد تانى النهارده قالك انه عايز يشتغل ويبقى موظف محترم .. زيك كده ؟؟هههههههه

عبده طناش : يااااااااريت .. لا يا سيدى ده واحد معايا فى الشغل .. بس ربنا يحفظنا منه عينه مابتسيبش حد .. إدانى جرعة نبر ونق عالصبح قفلنى طول اليوم

عايش : يا عم حرام عليك .. تلاقيه كان بيهذر معاك بلاش تظلمه .. انت اللى تلاقيك متنشن شوية النهارده ومش مستحمل حد

عبده طناش : أظلمه مين ؟؟؟ .. ده يظلم أى حد يقابله .. فضل ورا المدير بتاعنا لغاية ما الراجل جاتله ازمة قلبية ومات .. ده كمان تخيل قعد ينق عالبقشيش اللى بياخده عامل البوفيه الغلبان .. خلاه يدوب خارج من عندنا راح متزحلق ورجله اتكسرت ومن ساعتها الراجل اتقطع عيشه وقعد فى بيته

عايش : يا عم متبالغش .. دى كلها اقدار

عبده طناش : طب تقول ايه فى حريق مجلس الشورى .. والمسرح القومى .. وانهيار المقطم ؟؟

انفجر عايش ضاحكا وهو يقول : هههههههههههههههههه انت بتهزر أكيد صح ؟.. مش ممكن طبعا يكون هو السبب بطل تهريج بقى

عبده طناش : تهريج مين يا ابنى .. ده احنا كنا مرة قاعدين فى الكافى شوب ولقينا ده فجأة راح قايم وقايل .. والله عمار يا مصر .. يا بلد الهرم وأبو الهول .. مصر دى مفيش حاجة فيها تخرب .. دى بلد الفراعنة .. كل حاجة موجودة فيها هتفضل عايشة لآلاف السنين .. وقعد يدينا أمثلة كان منها مجلس الشعب والمسرح القومى وكذا حاجة تانية بس مش عايز أفسر ليحصلوهم .. مفيش أيام ولقينا المصايب نازله على مصر ورا بعضها

عايش وقد بدأ بالتجهم : يا ساتر يارب .. معقول ؟؟ بجد فيه ناس كده ؟؟ اللهم احفظنا يارب

عبده طناش : والنهارده بس بيقولى انه عرف انى دخلت البورصة من نص رمضان .. وانا بقول ايه اللى جرى فى الدنيا .. وازاى البورصة تقع بالشكل ده فى العالم كله لدرجة ان د.زغلول النجار بيقول ان الازمة دى بداية الانهيار الغربى .. اتارى هو السبب

عايش : لالالالالالالالالا مش ممكن .. الموضوع ده ميتسكتش عليه .. الراجل ده بجد مدمر .. دى مصر هتبقى خرابه على إيده .. مصر إيه ؟ ده العالم كله هيفلس بسببه

.
عبده طناش : عندك حق والله يا عايش .. يللا نبلغ عنه .. ابو المعاطى السبب فى خرابك يا مصر .. أبو المعاطى السبب فى انهيارك يا بورصة

انتظرونا فى الحلقة القادمة إن شاء الله مع عايش وعبده طناش

دمتم بكل الخير

Monday, August 11, 2008

الحلقة التاسعة " لا خاب من استخار .. ولا ندم من استشار "

(الحلقة (9

لا خاب من استخار .. ولا ندم من استشار
.

اتفق الصديقان كالعادة على اللقاء فى مقهى البؤساء .. عفوا أقصد " منتدى الصفوه " بعد التجديد

عبده طناش : ألووو .. أيوه يا عايش انا وصلت خلاص ومستنيك أهه .. ماشى يللا سلام

وبعد مضى ما يقرب من الخمس دقائق

عايش : السلام عليكم .. ازيك يا عبده معلش اتأخرت عليك أصل كنت بقفل الحساب

عبده طناش : وعليكم السلام .. ولا يهمك يا عايش أخبارك ايه ؟

عايش : الحمد لله ماشى الحال .. أدينا بنعافر فى الدنيا وعلى الله يبقى بفايده

عبده طناش : ان شاء الله يبقى بفايده ربنا كبير .. عملت ايه فى مشروعك .. ناوى ولا غيرت رأيك ؟

عايش : والله يا عايش قعدت مع الحاجة لقيت كل اللى عندى أربعين ألف وشوية يعنى يدوب أشارك حد مينفعش أشتغل لوحدى .. لأنى برضه ناوى أسيب حاجة على جنب أجيب بها اجهزة كهربائية ولا أى حاجة تنفع لبعدين

عبده طناش : آه فعلا .. والحاجة رأيها ايه ؟

عايش : الحاجة خايفة عالفلوس تضيع ومنعرفش نعوضها بس أنا اقنعتها اننا لو فضلنا سايبينها كده هتبقى قيمتها كمان كام سنة زى ورق الكوتشينة بالضبط .. لأن الأسعار بتعلى كل يوم عن التانى والفلوس دلوقت معدتش بتجيب حاجة زى زمان

عبده طناش : عندك حق والله شوف المائة جنية اللى كانت من كام سنة بتجيب خزين يكفى شهر دلوقت متكفيش يومين تلاتة

عايش : أيوه ولسه .. دى بكره تديها مصروف لولادك اللى فى كى جى ون متكفيهومش وممكن يعملوا اضراب عن المدرسة ويقعدولك فى البيت ههههههههههه

عبده طناش : انت بتقول فيها .. احنا فعلا داخلين على أيام صعبة .. بكره لما نفتكر أيامنا دى نقول ده احنا كنا عايشين ملوك وبنتدلع .. على الأقل لاقيين ناكل ونشرب صحيح مش أد كده بس أدينا بناكل بغض النظر عن طوابير العيش المسلح اللى ميتاكلش أصلا ولحم الكلاب والحمير وانفلوانزا الطيور والفواكه والخضروات المسرطنه والحمى القلاعيه

عايش : ربنا يستر يا عبده والله .. الواحد مش عارف يعمل ايه ؟ ربنا يرفع مقته وغضبه عنا

عبده طناش : اللهم آمين .. طيب ايه رأيك تشارك الحاج مصطفى فى المحل ؟

عايش : لا لا يا عبده .. معتقدش انه يرضى .. وبعدين اتحرج أصلا اكلمه فى الموضوع ده ؟

عبده طناش : وايه وجه الاحراج ؟ .. انت لو شاركته المحل هيوسع ويكبر وممكن تقدموا خدمات أكتر زى صالة جيم مثلا

عايش : امممممممم مش عارف والله ممكن يكون رأيه ايه فى الموضوع ده .. أعتقد انه ملوش فى الحاجات دى ومكتفى بالمحل وبس .. بس على كل حال لو جت مناسبة هبقى أفاتحه

عبده طناش : الموضوع مش مستاهل انك تستنى مناسبة يا عايش فاتحه وخلاص عشان تشوف هتعمل ايه ؟؟

عايش : ربنا يقدم اللى فيه الخير ان شاء الله .. وانت عملت ايه مقولتليش ؟؟؟

عبده طناش : روحت يا سيدى عملت كود فى شركة التداول فى الأوراق المالية اللى محسن زميلى فى الشغل بيتعامل معاها وهو رشحلى كام سهم كدا عشان أتابعهم .. بيقول عليهم شغالين كويس بقالهم فترة منهم واحد فى قطاع الغزل .. بيقول انه كان بـ 6 ج ودلوقت فى الأربعينات .. تخيل ؟؟

عايش : ما شاء الله .. بس ده أكيد مطلعش مرة واحدة .. وأكيد خسّر ناس كتير بطلوعه ونزوله العشوائى

عبده طناش : أكيد طبعا .. بس اللى احتفظ بيه من يوم ما جابه أكيد كسب فيه كتير

عايش : اللى بقى ........ فى البورصة نادر لما تلاقى حد محتفظ بسهم لفترة طويلة .. مبدأ البورصة " اخطف واجرى " لأن اللى بيستنى ممكن يخسر كتير

عبده طناش : مممممم ... وممكن برضه يكسب كتير

عايش : والله انت شكلك ناوى تدخل تنام فى البورصة وتطلع منفض جيوبك .. يا ابنى لو مِشيت معاك امشى معاها .. متوقفش وتسيبها تجرى لتتوه منها وتتوه منك .. اتحكم فيها انت ومتخليهاش تتحكم فيك .. البورصة دى عاملة زى الفرس الجامح .. اللى محتاج فارس ذكى ولماح .. وزى العربية اللى محتاجه قائد ماهر .. دى لعبة كبيرة لو مش أدها متدخلش فيها .. وبينى وبينك أنا لغاية دلوقت مش عارف ان كانت حرام ولا حلال ؟؟؟؟؟؟؟؟؟

عبده طناش : لالالالالالالالا حلال طبعا .. منا سألت دار الافتاء قالولى تكون حلال اذا كنت مساهم فى شركات مش بتصنع الخمور والسجائر والمحرمات بكل أنواعها ولا بتتاجر فيها .. وان شاء الله مش هقرب للحاجات دى خالص .. اهم حاجة طبعا اننا نتحرى الحلال فى مأكلنا ومشربنا وربنا يبارك فى الرزق ولو كان قليل .. مش معقول هدخل بيتى فلوس حرام محناش ناقصين قلة بركة

عايش : ربنا يكتبلك الخير يا عبده ومتنساش تصلى صلاة استخارة قبل ما تشترى أو تبيع حاجة .. لا خاب من استخار ومحدش يعرف الخير فين الا ربنا سبحانه وتعالى

عبده طناش : ونعم بالله .. أكيد هعمل كده ان شاء الله كويس انك فكرتنى يا عايش ربنا يباركلى فيك

عايش : ويباركلى فيك يا عبده .. انت أكتر من اخويا ودايما بلاقيك جنبى ربنا ميحرمنيش منك

عبده طناش : ولا يحرمنى منك يا عايش .. احنا فعلا أكتر من أخوات ربنا يديم المحبة ويباركلنا فى بعض .. أسيبك بقى دلوقت عشان أروح اتفق مع السيبر اللى تحتى يدينى خط نت عشان اعرف اتابع البورصة .. دعواتك يا عايش

عايش : ربنا يكتبلك الخير كله ان شاء الله .. انا كمان عندى مشوار مع الحاجة هعدى عليها أخدها ونتوكل على الله .. أشوفك على خير ان شاء الله

عبده طناش : ان شاء الله يا عايش .. مع ألف سلامة

انتظرونا فى الحلقة القادمة ان شاء الله مع عايش وعبده طناش

دمتم بكل الخير

--------------------------------------

تحديــث هاااااااااااااااام
------------

أرجوا المشاركة فى موضوع " هل أصبحت القطط أكرم من أطفال الشوارع " على مدونتى واحة الفكر والقلم للاهمية وجزاكم الله كل خير

دمتم بكل الخير

Saturday, June 28, 2008

الحلقة الثامنة " تحويشة العمـــــــر "

(الحلقة (8

تحويشة العمـــــر

على منتدى " الصفوة " قهوة البؤساء سابقا

عايش : السلام عليكم يا حاج صبحى .. مبارك على التعديلات اللى عملتها فى القهوة دى

الحاج صبحى : وعليكم السلام ورحمة الله وبركاته .. الله يبارك فيك يا أستاذ عايش .. هنعمل إيه يعنى ؟ كل حاجة دلوقتى بتتغير .. اشمعنى احنا اللى هنفضل واقفين .. قلت اعمل للقهوة نيولوك زى ما بيقولوا وأخليها منتدى ههههههههه

عايش : هههههههههههه ماشى يا حاج .. وصفوة بقى ونظام وأضواء خافتة وموسيقى هاديه .. انت ناوى تصفى القهوة .. قصدى المنتدى من البؤساء ولا إيه ؟

الحاج صبحى : هههههههههه لكل وقت آذان يا أستاذ عايش .. وكل ما المكان يبقى أرقى .. كل ما زباينه برضه تبقى أرقى ورزقه يبقى أعلى .. بس ده مش معناه طبعا انى هصفى المنتدى من زباينه المحترمين حتى لو كانوا بؤساء .. كلنا بؤساء يا استاذ عايش

عايش : عندك حق يا حاج والله .. نظرية اقتصادية سليمة ميه فى الميه .. الواحد لازم يعمل اللى عليه ويطور من نفسه والأرزاق بيد الله أولا وأخيرا

الحاج صبحى : ونعم بالله .. وانت أخبار شغلك عند الحاج مصطفى ايه ؟

عايش : الحمد لله يا حاج ماشى الحال

الحاج صبحى : يارب دايما يا بنى .. وازاى الأستاذ عبده ؟ .. بقالى فترة كبيرة مشوفتوش

عايش : الحمد لله يا حاج والله .. زمانه جاى دلوقت .. كلمنى عالموبايل واتفقنا نتقابل هنا

الحاج صبحى : طيب خير .. ربنا يطمنا عليكوا يا بنى ويصلح أيامكوا .. تؤمرنى بحاجة ؟

عايش : متحرمش منك يا حاج اتفضل حضرتك متعطلش نفسك

الحاج صبحى : طيب عن إذنك يا ابنى .. السلام عليكم

عايش : وعليكم السلام ورحمة الله وبركاته

انصرف الحاج صبحى وجلس عايش يفكر فى كلمات هذا الرجل الذى يبدو بسيطا فى مظهره و لكنه عميقا فى خبرته وتفكيره وتعايشه مع الحياة

وأثناء ذلك قطع تفكيره صوت يقول : ايه يا عم روحت فين ؟؟ انت مش سامعنى ؟؟

انتبه عايش على الصوت والتفت إلى مصدره ليجده عبده طناش

عايش : أهلا يا عبده .. انت جيت .. حمدا لله على السلامة

عبده طناش : الله يسلمك يا عايش .. كنت بتفكر فى ايه ؟

عايش : أبدا .. بفكر فى حالنا واننا لسه واقفين محلك سر مش بنتقدم ولا خطوة وكل اللى بييجى بيروح

عبده طناش : انت هتقوللى على اللى بيروح ده ؟ ده بيروح حتى من قبل ما ييجى

عايش : إحنا لازم نعمل حاجة .. الشغل لوحده كده مش كفاية

عبده طناش : شغل ايه اللى مش كفاية يا عايش .. انت عايز تقتل نفسك ولا إيه ؟؟ ده انت يا ابنى بتشتغل من 10 الصبح لواحدة بالليل يوميا ما عدا يوم الاثنين .. عايز تشتغل تانى إمتى ؟

عايش : أنا بتكلم عالفلوس يا عبده .. تحويشة العمر .. عايز اعمل بها مشروع أو اى حاجة تزودها شوية

عبده طناش : وانت تضمن منين ان المشروع ده هينجح ومش هياخد تحويشة العمر ويطير ؟؟؟؟؟؟؟؟؟؟؟

عايش : لازم نجرب يا عبده .. لازم نغامر .. الرسول عليه الصلاة والسلام أمرنا بالتجارة .. لو حطينا فلوسنا جمبنا وقعدنا عمرها ما هتكسب ولا تزيد .. بالعكس دى قيمتها هتقل يوم عن يوم

عبده طناش : عليه الصلاة والسلام .. بس حكاية التجارة دى صعبة شوية خصوصا ان مفيش فائض رأس مال تتسند عليه .. يعنى هتغامر بكل فلوسك وتحولها لبضاعة وتفضل قاعد جنبها مش عارف هتروج ولا هتبور .. حاجة تخوف وتقلق

عايش : طالما راس المال حلال .. والبضاعة حلال .. وانت بتتاجر بالحلال عمرها ما هتبور ان شاء الله

عبده طناش : طب انت بتفكر فى مشروع ايه ؟؟

عايش : لغاية دلوقت لسه مش عارف .. بس هاقعد مع الحاجة كده إن شاء الله أشوف حوشتلى أد إيه وآخد رأيها وعلى الأساس ده اتوكل على الله وأبدأ فى اللى ربنا ييسرهولى

عبده طناش : ربنا معاك يا عايش .. ربنا معاك بجد

عايش : الله يكرمك .. وانت يا عبده هتعمل ايه ؟؟

عبده طناش : أنا بفكر احط فلوسى فى البورصة .. مكسبها سريع وكبير ومش محتاج تعب

عايش بفزع شديد : البورصة يا عبده !!!!!!!!!!!! .. بقى انت قاعد تخوفنى من التجارة وعايز ترمى فلوسك فى البورصة ؟؟؟؟ مين قالك ان مكسبها كبير وسريع ؟؟؟

عبده طناش : معايا واحد فى الشغل كان كحيان زى حالاتى ودخل البورصة وزهزهت معاه عالآخر .. جاب عربية وبيقسط لشقة تمليك ربنا يزيده

عايش : بس دى مش قاعدة .. صحيح فيه ناس بتزهزه معاها زى ما بتقول .. بس برضه فيه ناس بتبيع اللى وراها وقدامها بسبب البورصة دى .. يوم فى السما ويوم فى الأرض .. متتهورش يا عبده وتضيع فلوسك .. مش هتعرف تجيبهم تانى

ينظر إليه عبده طناش بنظرة توحى بالعزم والإصرار وهو يقول : لا لا هجرب ان شاء الله .. هخسر ايه يعنى .. يمكن تلعب معايا أنا كمان مين عارف .. مهو الشغل مش نافع .. والسفر مش نافع .. والجواز مش نافع .. ولو فكرت فى مشروع برضه مش نافع .. هعمل ايه يعنى ؟؟ مفيش قدامى إلا الحل ده ؟

عايش : انت تقدر بفلوسك تبدأ مشروع صغير .. بس انت اللى مش عايز .. كل اللى أقدر أقولهولك ربنا يسترها معاك وحاول على أد ما تقدر تسيب حاجة للزمن .. على رأى الحكمة اللى بتقول " لا تضع البيض كله فى سلة واحدة "

عبده طناش : ربنا يعمل اللى فيه الخير

عايش : اللهم آمين .. طيب انا هقوم بقى ألحق الحاج مصطفى أصله سبقنى عالمحل .. مش عايز منى حاجة يا عبده

عبده طناش : متحرمش منك يا عايش ربنا معاك .. مع السلامة

عايش : ومعاك يا عبده .. السلام عليكم

عبده طناش : وعليكم السلام ورحمة الله وبركاته

انتظرونا فى الحلقة القادمة ان شاء الله مع عايش وعبده طناش

دمتم بكل الخير

Monday, June 2, 2008

الحلقة السابعة " عايش يمر بأزمة عاطفية "

(الحلقة (7

عايش يمر بأزمة عاطفية

يجلس عايش وحيدا فى غرفته .. ووالدته بالخارج تتأسف على حاله

صوت طرقات تفتح على إثرها والدة عايش الباب ليدخل عبده طناش محييا بتحية الإسلام

عبده طناش : السلام عليكم يا حاجة .. إزاى صحتك ؟

الحاجة : أهلا يا عبده يا ابنى .. الحمد لله بخير اتفضل يا ابنى البيت بيتك

يدخل عبده طناش وهو يهمس : ربنا يكرمك يا حاجة
ثم يرتفع صوته قليلا : أخبار عايش إيه .. عديت عليه فى المحل قالولى أنه تعبان شوية ومنزلش فجيت أطمن عليه

الحاجة : تسلم يا ابنى ده العشم برضه ما انتوا اخوات وأصحاب طول عمركوا
ثم تستطرد : الحقيقة عايش مقريف شوية ومتضايق عشان موضوع كده
تخفض صوتها وهى تقترب برأسها منه وتقول : عارف البنت اللى ساكنة قصادنا اللى عايش كان بيحبها وناوى يخطبها ؟

عبده طناش : أيوه يا حاجه عارفها مالها ؟

تمط الحاجة شفتيها وهى تحرك يدها بحركة توحى بالحزن وتقول بتحسر : اتخطبت وهتتجوز كمان 3 شهور

يرتفع حاجبا عبده طناش باندهاش وهو يهتف متأثرا بصوت يحرص أن يكون منخفض : اتخطبت ؟ ... امته ؟.... وليه ؟.... مش كانوا متفقين عالخطوبة من سنين ؟؟

الحاجة : اتقرت فاتحتها الجمعة اللى فاتت وهو عرف امبارح بالصدفة من الحاج حسين جارهم

عبده طناش : يعنى كمان مقالتلوش ؟؟

الحاجة : لا يبنى والله ولا حتى شافها كأنها كانت ناوية على كده من زمان .. ده احنا حتى مسمعناش زغرودة طالعة من بيتهم ولما قال كده للحاج حسين قاله انهم قروا الفاتحة فى بيت أختها اللى فى الشارع اللى ورانا

عبده طناش : وهو إيه أخباره دلوقت ؟

الحاجة بحزن شديد : والله يبنى حاله يقطع القلب .. قافل على نفسه بابه لا بيكلم حد ولا عايز حد يكلمه .. حتى الأكل مش راضى ياكله

عبده طناش : لا حول ولا قوة إلا بالله .. بس ليه يعمل فى نفسه كده هى متستاهلش أصلا .. اللى يبيعنا نبيعه وكل واحد بياخد نصيبه

الحاجة : ادخلله يا ابنى الله يصلح حالك عقله بكلمتين .. قوله ميعملش فى نفسه كده عشان صحته وعشان خاطرى

عبده طناش : من عنيا يا حاجة .. بعد إذن حضرتك

الحاجة : اتفضل يا ابنى

يتوجه عبده طناش لغرفة عايش .. يطرق الباب عدة طرقات فيأتى صوت عايش آذنا له بالدخول

عبده طناش : السلام عليكم .. ايه يا عم عايش .. المحل مضلم من غيرك .. انت هتبتدى الكسل ولا إيه ؟؟؟

عايش : وعليكم السلام يا عبده اتفضل .. لا كسل ولا حاجة بس معادليش نفس أعمل حاجة فى الدنيا

عبده طناش : لالالالالالالالالا مش مصدق ودانى .. عايش اللى يقول كده .. عايش اللى كله حماس يعمل كده .. سيبت ايه بقى لأمثالى ؟؟؟ههههههه

عايش : الدنيا مش مستاهلة ان الواحد يضيع عمره فيها فى الشغل .. نشتغل ليه ونتعب نفسنا ليه .. عشان مين كل ده ؟ طالما كل تعبنا بيروح هدر .. انت اللى صح يا عبده .. انت اللى صح

عبده طناش : ايه الكلام ده يا عايش .. صحيح انا مش بحب اتعب نفسى زيادة عن اللزوم وعايش وخلاص وزى ما تيجى بس مش معنى كده انى صح .. ليه بتقول كده ؟؟؟؟؟؟؟

عايش يغالب البكاء وهو يقول : عشان حلم عمرى اللى عشت أحلم بيه طلع وهم .. كابوس .. ضيعت عمرى فيه وطلع ميستاهلش

يزفر بأسف ثم يستطرد : أميرة احلامى باعتنى لاول واحد جاهز عشان معاه فلوس وانا لسه بكون نفسى .. باعتنى رخيص .. رخيص أوى

عبده طناش يربت على كتفه وهو يقول بصوت منخفض : واللى يبيعنا رخيص نبكى عليه ولا نبيعه احنا كمان .. ونبيعه ببلاش

عايش : أنا مش ببكى عليها .. أنا حزين عالوهم اللى كنت عايش فيه وضيعت فيه سنين عمرى وفاكر نفسى فى حلم جميل .. أنا كنت بشتغل عشانها وبحوش عشانها .. بنيت فى خيالى بيت صغير جميل يجمعنا واتهد .. حزين من الغدر والكدب والخيــــــانة حاسس ان الدنيا معدش فيها امان .. وان كل اللى حواليا مش بيحبونى وهيغدروا بيا زيها .. أنا تعبان ومش قادر .. حاسس ان روحى بتتسحب منى .. حاسس انى متكتف ومخنوق وعاجز وفقير وصغير .. صغير اووووى

عبده طناش متأثرا : عايش انا مش عايز أشوفك فى الحالة دى .. مش عايزك تستسلم للاحساس ده .. انسى كل حاجة وابدأ من جديد .. ارمى كل حاجة ورا ضهرك وبص لقدام وانت قدها وقدود .. بكره تثبتلها وتثبت لكل الناس انك أحسن مما كانوا يتوقعوا .. وأحسن من اللى هيا اختارته .. هى ضيعت نفسها .. عمر الفلوس ما تعمر بيوت ومحدش هيقدر يحبها زيك .. دى بتبقى فرصة فى العمر يا تستغلها يا تضيعها من ايدك للأبد
أنا عارف انك قوى .. وهتقدر .. وعايز أقولك حاجة من الآخر .. هى مش نصيبك .. نصيبك لسه فى علم الغيب .. لو كانت نصيبك مكانتش ضاعت منك أبداااااااااا مهما حصل
قوم يللا اتوضى وصلى وافتح المصحف واقرا قرآن وادعى ربنا يفك كربك ويفرج همك ويبدلك خيرا منها .. ونام ومتفكرش فى حاجة والصبح ان شاء الله هجيلك المحل

يحاول عايش الاعتراض فيقاطعه عبده طناش : ولا كلمة دلوقت .. لما تعمل اللى قلتلك عليه قلبك هيرتاح ويطمن وهتنزل الشغل من بكره وتبدأ من جديد بقلب جديد وعقل جديد .. أقوى واكبر .. وعلى راى المثل " الضربة اللى متموتش .. تقوي " والحمد لله على كل حال
أسيبك بقى دلوقت واعدى اطمن عليك بكره ان شاء الله .. مش عايز منى حاجة

عايش : متحرمش منك يا عبده .. ربنا يكرمك

عبده طناش : أشوفك على خير ان شاء الله .. السلام عليكم

عايش : وعليكم السلام ورحمة الله وبركاته .. مع السلامة

انصرف عبده طناش بعد ان ألقى السلام على الحاجة والدة عايش .. واتجه عايش ليتوضأ استعدادا للصلاة .. تفتكروا بعد الصلاة والأخذ بنصيحة عايش قلبه هيطمئن ويهدى ولا هيرجع تانى لألمه وجرحه ؟؟؟

انتظرونا مع عايش وعبده طناش فى الحلقة القادمة ان شاء الله

دمتم بكل الخير

---------------------------------------------------------------------

تحديث هااااااااام جداااا

-----------------

يا أصحابى يا أهلى يا جيرانى .. إليكم النبأ الهام

انتظروا إذاعة حلقة عن مدونتى يوم السبت ان شاء الله الموافق 7/6/2008 على محطة البرنامج العام الإذاعية .. فى برنامج انت تسأل والكمبيوتر يجيب للإنسان الجميل أ/ صلاح حجازى .. والجميلة / عبير صبرى فى تمام الساعة التاسعة وعشر دقائق صباحا على اذاعة مصر الرئيسيه اى البرنامج العام وقبل برنامج الى ربات البيوت مباشرة فى القاهره على موجه اف ام 107 وسته من عشره كما يمكن الأستماع اليها وقت اذاعتها بالضغط على رابط لذلك فى موقع الإذاعة والأنتظار قليلا

والموقع

http://dear.to/cairo

الحاضر يعلن الغايب .. والجاى يعلن الرايح .. والصاحى يعلن النايم .. وركزوا جاااااااااامد عشان هعملكوا امتحان مفاجئ ههههههههههههه

ملحـوظـة صغنـونــه

=========

اللى يحب يسمع الحلقة هيلاقيها فى مدونة البرنامج هنا..........> " أنت تسأل والكمبيوتر يجيب " على الجانب الايسر فى الارشيف

sally ana wa alnet بعنوان

حملوها واسمعوها

Saturday, May 10, 2008

الحلقة السادسة : عبده طناش يبحث عن عمل بالخارج

(الحلقة (6

عبده طناش يبحث عن عمل بالخارج
.

فى إحدى اوتوبيسات النقل العام

يمد عبده طناش نظره إلى جريدة الجالس بجواره فى الأوتوبيسات .. وفجاة يخطفها منه وهو يصرخ
"أخيرا .. أحمدك يارب .. أحمدك يارب "

و أثناء قوله تلتهم عينيه محتوى ذاك المربع الصغير المنزوى فى نهاية الصفحة بالجريدة
ثم يتدارك الموقف وينظر إلى جاره فى المقعد والذى ينظر إليه بدوره بنظرة استنكار

ويغمغم معتذرا : أنا آسف والله اعذرنى .. أصل بقالى شغال 10 سنين فى الحكومة وما أدراك ما شغل الحكومة !!.. وبدور على أى فرصة للسفر ومش مصدق إنى لقيت الفرصة دى

يبتسم الرجل بهدوء وهو يعيد الجريدة إلى مقرها بين يديه ويغمغم : انت كمان ؟

يصل عبده طناش إلى محطته وينزل من الاوتوبيس وهو منتشى وسعيد تغمره فرحه عارمة .. ويداعبه أمل يكاد أن يتجسد فى عينيه إلى حقيقة ملموسة

يتوجه إلى أقرب منفذ لبيع الجرائد ليشترى الجريدة على غير عاداته ثم يحتضنها بين يديه ويسرع الخطى نحو بيته وهو يلقى بنظره فى الطريق على طوابير العيش والزحام والضوضاء والباعة والخناقات ويهتف بداخله : وداعا .. وداعا .. وداعا

أصبحت الساعة الخامسة وعبده طناش لا يزال ممسك بالجريدة يعيد قراءة " فرصة العمل " مرات ومرات .. له ولأهله ولأصدقائه عبر الهاتف .. حتى الجيران وصلهم الخبر

ينتهى عبده طناش من احتساء مج الشاى المضبوط ذو الثلاث قطع سكر و ينزل من منزله متوجها إلى صديقه عايش فى مقر عمله

عبده طناش : عايش حبيبى أخيرا ربنا هيفرجها عليا .. أخيراااا

عايش مستفهما : ربنا يفرجها عليك دايما يا عبده .. بس هو ايه اللى حصل ؟؟

عبده طناش : فاكر لما كنت قولتلك من شهر كده يوم خطوبة أختك انى بدور على سفر .. أخيرا الحمد لله لقيت الفرصة دى النهارده .. شوف مكتوب ايه فى الجرنال ..

يتناول عايش الجريدة ويقرأ بصوت مسموع : إيه ده ؟ وظايف خاليه .. مطلوب فنى حاسب آلى للعمل بالكويت .. خبرة لا تقل عن 10 سنوات .. المقابلة فى شركة كذا .. بميدان كذا .. تليفون كذا
ها وعملت ايه ؟؟؟ روحت ؟؟؟

عبده طناش : لا يا عايش .. ده لسه الجرنال ده بتاريخ النهارده .. هروح بكره ان شاء الله من بدرى

عايش : بس بيقولوا فيه مقابلة .. يعنى اجهز يا بطل .. لغة وكمبيوتر وكله

عبده طناش : أكيد أكيد ما أنت عارف أخوك كان لبلب فى الانجليش فى ثانوى.. أما الكمبيوتر فده بقى لعبتى .. ادعيلى بس ربنا يوفقنى

عايش : ان شاء الله ربنا هييسرلك .. بس انت برضه شد حيلك و اعمل اللى عليك .. ولو لك خير فيها ربنا هيقدمهولك ان شاء الله

عبده طناش : يارب .. يارب .. لما ألحق بقا أروح أقرالى كلمتين عشان بكره ان شاء الله هاخد أجازة عارضة وأروح المقابلة دى .. متنسانيش فى دعائك ووصى الحاجة تدعيلى

عايش : هدعيلك والله ربنا يوفقك ويرزقك بالخير كله ويجعلك فى الشغلانة دى نصيب

عبده طناش : متحرمش منك يا عايش .. يللا سلام

عايش : مع السلامة .. ربنا يسمعنا عنك كل خير ان شاء الله

نظرة اندهاش واستغراب من عبده طناش أثناء صعوده على سلم الشركة لعمل الانترفيو .. يعقبها بغمغمة : يااااربى .. إيه الناس دى كلها ؟ ... كل دول بتنطبق عليهم الشروط .. شكلك كده يا عم عبده روحت فى الباى باى

يقترب منه أحد الواقفين – شاب فى منتصف العشرينات – ويقول له : أهلا وسهلا .. حضرتك جاى عشان الانترفيو مش كده ؟

عبده طناش : آه تمام .. بس الحقيقة مكنتش متوقع العدد ده كله .. وحضرتك ؟

الشاب : آهااا وانا كمان مكنتش متوقع كل ده .. أنا اول ما شفت الخبر .. قلت ده متفصل عشانى .. مكنتش فاكره متفصل على مصر كلها ههههههههه

عبده طناش باستغراب : إزاى .. ده المطلوب خبرة 10 سنوات .. وواضح ان سنك صغير على الاقل اصغر منى بـ 5 سنوات .. هو انت عندك كم سنة ؟؟

الشاب : انا الحقيقة عندى 24 سنة .. بس عندى خبرة 10 سنوات فعلا

عبده طناش باستغراب : ازاى يعنى ؟؟

الشاب : اشتغلت فنى حاسب آلى من وانا فى ثانوى ولغاية دلوقتى .. أصل والدى كان عنده مكتب صغير كده للصيانة ولما توفى مسكت مكانه جنب دراستى وبقت مهنتى الاساسية اللى بفهم فيها اكتر من اى حاجة

عبده طناش : آآآآآآآآآه عشان كده ..طيب ربنا يسهل
ولسان حاله يقول : آدى واحد من الألوف الموجودة شكله هيطيرنى .. امال الباقى بقا .. ؟؟؟؟

ثم يتوجه إلى رفيقه قائلا : متعرفش المقابلة دى بتستغرق أد إيه وبيسألوا فيها عن إيه ؟

الشاب : لا والله .. حضرتك عارف كل واحد هنا بيقول نفسى .. نفسى .. ومحدش بيساعد حد .. كان واقف معايا واحد هنا من شوية معاه دبلومة فى الصيانة .. دخل وخرج ومشى من غير ميقوللى عمل إيه

عبده طناش : فعلا فعلا عندك حق

وبعد هنيهة من الوقت .. وتفكير يتوجه للشاب قائلا : طيب مش عايز حاجة ..؟

الشاب مستفهما : حضرتك هتدخل ولا إيه ؟

عبده طناش : لا .. الحقيقة أنا هامشى .. أصل افتكرت ميعاد مهم جدااا ..وشكل الموضوع كده هيطول اوى .. يللا سلام عليكم

الشاب : وعليكم السلام ورحمة الله وبركاته .. ولسان حاله يقول : عقبال الباقى يارب

ينسحب عبده طناش مطاطا الرأس وهو يشعر بالفشل والدونية فالسفر للخارج ليس بالسهولة التى يتخيلها .. ومؤهله وحده لا يفتح له الأبواب التى يحلم بها .. بل لا يفتح له أى باب سوى باب الوظيفة الحكومية التى يشغلها .. لقد تغيرت متطلبات سوق العمل واختلفت كثيرا فلم تعد للمؤهلات العليا قيمتها كما كانت فى الماضى ..بل لابد ان يُصقلها الخبرة والكفاءة والنُدرة المهنية والتخصصية فى آن واحد وعلى التوازى

أما هو فقد اكتفى بمؤهله ولم يُصقله باى خبرة اخرى واعتمد على معلوماته القديمة التى تعلمها فى الجامعة ظنا منه انه قد وصل إلى نهاية التعلم

يعود عبده طناش إلى منزله ماراً بطوابير العيش وصراعاتها .. والزحام والضوضاء والباعة والخناقات والسحابة السوداء ..
وهو يصرخ بداخله : آآآآآآآآآآآه يا غلبى .. يا فرحة ما تمت

تابعونا فى الحلقة القادمة ان شاء الله

دمتم بكل الخير

Sally

Saturday, May 3, 2008

الحلقة الخامسة :عايش يساند عبده طناش فى ازمته النفسية

(الحلقة (5

عايش يساند عبده طناش فى أزمته النفسية

على مقهى البؤساء

عايش : أخبارك ايه دلوقتى يا عبده ؟ .. سمعت انك تعبت بعد اللى حصل فى طابور العيش

عبده طناش : الدنيا معدش فيها رحمة .. مش عارف ايه اللى بيحصل ده .. أنا سمعت كتير عن اللى بيموتوا فى طابور العيش بس متخيلتش ان الموقف غير آدمى بالشكل ده .. قلوب الناس بقت حجر .. ومحدش بيهمه غير نفسه

عايش : هون عليك يا عبده وانسى بقا .. أنا عارف ان الموقف صعب خصوصا انه حصل قدام عينك .. بس لو فضلت تشيل كل حاجة كده فى قلبك مش هتلاقى نفسك

أقولك حاجة .. أنا اكتشفت ان الجهل أكبر نعمة فى الدنيا .. لما تجهل إزاى وليه مش هتشغل دماغك ايه حصل ؟.. وايه السبب ؟؟ هتعيش وخلاص .. ومطرح ما الدنيا توديك هتروح .. معظمنا عايشين كده .. واللى بيحاول يعرف أو بيفهم بالصدفة بيتعب أوى ويحس بالمشاعر اللى جواك دى
أقولك من الآخر .. روق وقوم اتوضى يللا عشان صلاة المغرب وجبت .. تعالى نصلى فى الزاوية اللى جنب المحل دى

عبده طناش : توكلنا على الله الذى لا إله غيره وليس لنا رب سواه

عايش وعبده طناش يتجهان للمسجد للصلاة .. يقيمانها ثم يخرجان معا

عايش : الجمعة الجاية ان شاء الله خطوبة أختى على ابن عمى .. هتبقى فى دار المناسبات ولازم تنورنا ان شاء الله .. انت مش محتاج عزومة

عبده طناش : بجد ! .. ما شاء الله ! ألف مبروك .. الأيام بتجرى والبنات بتكبر وتتجوز

عايش : منا بقولك شد حيلك خلينا نفرح بيك انت كمان .. العمر بيجرى

عبده طناش : ياريت يا سيدى هو انا اكره .. بس جواز يعنى حاجات كتير أوووووى وصعبة أوووووى فى الزمن ده .. ده انا بخرج كل فين وفين عشان اشتريلى حاجة أروح بها الشغل ألاقى الأسعار ولعت .. إزاى بس هجيب واحدة بنت ناس وأعيشها معايا العيشة القحط دى

عايش : انوى انت بس وتوكل على الله وهتلاقى بإذن الله ربنا فرجها وحلها من حيث لا تدرى

عبده طناش : ربنا يسهل ان شاء الله .. المهم جبت البدلة اللى هتحضر بيها خطوبة أختك ولا لسه ؟

عايش : آه طبعا بس وديتها تتظبط شوية عند الترذى .. كنت لسه رايح استلمها دلوقتى .. تيجى معايا ؟

عبده طناش : وماله .. انا أصلى مخنوق ومش عايز اروح دلوقتى

عايش : ارمى حمولك على الله

عبده طناش : ونعم بالله .. الحمد لله على كل حال

فى حفل الخطبة

عبده طناش : ألف مبروك يا عايش خطوبة مروة .. عقبالك يا بطل .. عايزين نفرح بيك انت كمان

عايش : الله يبارك فيك يا عبده .. متحرمش منك أبدا .. بس الدور عليك انت يا باشا .. احنا هنحمرق ولا ايه ؟؟

عبده طناش : ههههههههه كل شئ بأوان .. بس قول يارب

عايش : يارب .. يارب

عبده طناش : العرسان ما شاء الله زى القمر ربنا يسعدهم ويهنيهم .. عقبال الفرح ان شاء الله

عايش : متحرمش منك يا عبده .. ماهم اخواتك برضه .. تعالى نقعد هنا

عبده طناش وعايش يتخذا ركنا ليجلسا فيه لمتابعة الحفل .. يتجول عبده طناش بعينيه فى وجوه الجالسين وتلفت انتباهه فتاة تجلس فى نهاية الصف الذى يسبقه

عبده طناش يميل على أذن عايش يسأله : مين البنت اللى قاعدة فى آخر الصف اللى قدامنا دى ؟

عايش : فين دى ؟ .... أهااااااا دى صاحبة مروة أختى بس اكبر منها بخمس سنين تقريبا .. كانت معاها فى كورس اللغات

عبده طناش : والله .. يعنى سنها اممممممم 26 سنة

عايش : آه تقريبا .. بس بتسأل ليه ؟؟

عبده طناش يشيح بوجهه : أبدا .. مجرد حب استطلاع .. هى مخطوبة ؟؟؟

عايش : لا مش مخطوبة .. انت بتشاور عقلك ولا إيه ؟ .. تحب نكلمهالك ؟

عبده طناش : لالالالالا مش وقته خاالص .. لما ادبر امورى وأشوف هينفع ولا لأ ... بس بينى وبينك .. شكله مش نافع دلوقتى خاااااااااالص .. انا عايز أسافر والله بس مش لاقى فرصة مناسبة

عايش : دور وربنا يوفقك .. طالما مش عايز تشتغل شغلانة تانية بعد الضهر

عبده طناش : فعلا ده اللى لازم يحصل .. هدور ان شاء الله

تابعونا فى الحلقة القادمة ان شاء الله
(مع( عبده طناش يبحث عن فرصة عمل بالخارج
دمتم بكل الخير
Sally

Saturday, April 26, 2008

الحلقة الرابعة : عبده طناش .. ورغيف العيش

عدنا بعض الفاصل السعيد

لمتابعة حلقات " عايش .. وعبده طناش "

عقبال كل فاصل من نفس النوع كده إن شاء الله

(الحلقة (4

عبده طناش ... فى طابور العيش

*******************

تجمع وزحام كبير جدا على احد أفران العيش المدعم بينما يحاول عبده طناش الوصول إلى منافذ البيع

أحد الواقفين : حاسب يا عم انت رايح فين ؟ مش شايف الناس واقفة على بعضها ازاى هى ناقصة زحمة وخنقة

عبده طناش : آسف يا سيدى أصلى مستعجل وعايز ألحق الشغل

يرد الرجل حانقا : شغل !! .. يعنى انت بتشتغل واحنا مبنشتغلش .. أما عجايب عالبشر دى أوقف فى دورك يا سيدنا خلى النهار يعدى

سيدة تصرخ : الحقونى .. هتخنق .. حاسب .. حاسب .. مش عارفة اتنفس .. آه .. آآآآآآآه

عبده طناش : وسع يا عم للست دى مش شايف مزنوقة إزاى ؟

آخر : ما تخلصونا بقى خلينا نشوف اكل عيشنا .. ايه الطابور الميت ده ؟

السيدة تواصل الصراخ المتهدج : حاسبوا .. حاسبوا .. عدونى .. خرجونى

لا يتحرك احد فالكل يخشى على مكانه من الضياع ويستمر الضغط .. وعشرات الأيدى تمتد لنافذة البيع

السيدة تستنجد : مش قادرة .. هموت .. خرجونى .. آآآآآآآآآآآآآآآآآآه ........آآآآآآآآآآآه

ولا من مجيب

عبده طناش : يا ناس خلى عندكوا دم .. الست هتموت .. الناس هتمَوِت بعضها على رغيف العيش .. تعالى يا مدام .. وسع يا حاج .. هاتى ايدك .. حاسب يا ابنى

يزوم الجميع بعبارات الضجر .. أحدهم يفسح مكانا والآخر يستغل الفرصة و يحتله والباقى لا يتحركون من اماكنهم .. ويستمرون فى التدافع

دقائق ثقيلة تمر .. ولا يتحرك أحد

والسيدة تستغيث وتصرخ .. ويضيع صوتها بين هتافات من حولها
وعبده طناش يحاول الوصول إليها .. ولا يمنحه احد الفرصة

وتسقط ..
تسقط السيدة مختنقة بين تدافع وهتافات وصياح وخناقات
تسقط ليشعر من حولها أنهم تخلوا عن آدميتهم .. وعن شهامتهم وسقطوا .. كما سقطت
سقطوا فى اختبار الحياة .. والشهامة والرجولة

عبده طناش يصرخ : حرام عليكوا يا ظلمة .. حرام عليكوا يا ظلمة .. حسبى الله ونعم الوكيل .. حسبى الله ونعم الوكيل

يلتف الجميع حولها وهى ممدة أرضا يحاولون افاقتها .. لكن لا مجيب

يهرول البعض لطلب الاسعاف .. والبعض الآخر ثابت فى مكانه بلا حراك ينظر إليها فى بلاهة وكأنه يتسائل ماذا حدث ؟ وكيف حدث ؟ ولم حدث ؟

تأتى سيدة كانت تمر بسيارتها بالقرب من المكان .. تتطوع بنقلها للمستشفى .. تمددها فى المقعد الخلفى .. يركب معها عبده طناش وتنطلق وهو يحسبن ويتمتم وكأنه يحدث نفسه

الناس خلاص مبقاش عندها رحمة .. يدوسوا بعض عشان رغيف .. كان هيحييهم الرغيف اللى هيجيبوه ده ؟ .. لا حول ولا قوة إلا بالله .. لا حول ولا قوة إلا بالله

يصلون للمستشفى .. وفور الكشف عليها

ينظر إليهم الطبيب بنظرة أسف ويغمغم : جيتوا متاخر .. أنا آسف .. البقاء لله

يصرخ عبده باكيا : لااااااااااااااااااا ثم يسقط مغشيا عليه

تابعونا فى الحلقة القادمة ان شاء الله
مع " عايش يساند عبده طناش فى أزمته النفسية "
دمتم بكل الخير

Sally

تحديث هام

********

ساهم بتوقيعك في مطالبة الحكومة الهولندية بسن قوانين من شأنها حمايةالمسلمين من العبث بمقدساتهم الدينية خاصة ومن التجديف على الأديان عامة على الرابط التالي

http://kawlansadida.blogspot.com/2008/04/blog-post_21.html

وجزاكم الله عن إسلامكم خيراً

Monday, April 21, 2008

الحلقة الثالثة " فى صالون الحلاقة"

(الحلقة (3

" فى صالون الحلاقة "

**************

عايش : أهلااااااااااااا.. ازيك يا عبده أخبارك ايه ؟ فينك من زمان ؟

عبده طناش : ازيك يا عايش ..لك وحشة والله .. أنا لقيتك معدتش بتيجى القهوة قلت اخطف رجلى واجيلك اطمن عليك

عايش : فيك الخير يا عبده والله .. انا عارف انى مقصر .. بس والله غصب عنى أصلى بشتغل ورديتين فى اليوم عشان اعرف أحوشلى قرشين .. ويوم الاتنين بقضيه نووووووم يعوض تعب الاسبوع

عبده طناش : ربنا يعينك ويقويك يا عايش

عايش : متحرمش منك يا عبده المهم طمنى عليك وعلى اخبارك

عبده طناش : الحمد لله بخير بس مفيش جديد انت عارف حياة الموظفين روتينية كل أيامنا شبه بعضها اللى بتصحى فيه بتبات فيه وأهى أيام من العمر بتضيع هدر

عايش : طب متشوفلك وظيفة بعد الضهر أهى تنفعك وتهز المرتب شوية

عبده طناش : هشتغل ايه يعنى ؟ انت ناسى انى بروح الشغل الساعة 8 الصبح و برجع الساعة 3 العصر هشتغل ايه بقى فى الفترة دى .. وهنام امتى واصحى امتى ؟ لو حسبتها بوقت النوم مش هلاقى وقت ينفع للشغل
يعنى مثلا من الساعة 6 للساعة 12 ممكن اشتغل ايه فى الفترة دى ؟

عايش : مش انت بتفهم كويس فى الكمبيوتر .. متشوفلك كده مركز صيانة ولا مكتب تجميع اجهزة ولا اى حاجة من دى أهى شغلانه تسندك .. وبعدين نوم ايه اللى بتفكر فيه .. النوم ده للمرتاحين مش للى زيينا

عبده طناش : لا يا عم مش طالبة مرمطة .. وانا يعنى هروح أدلل وأقول ياللى عايز يشغلنى .. انا برضه موظف محترم وليا مكانتى حتى لو مكنتش لاقى آكل

عايش : والله انت بتفكرنى بالمثل الشهير " أقرع ونزهى " انت كسلان بشكل مش معقول مش عايز تتعب نفسك فى حاجة .. يبنى اتحرك كده الرزق يحب الخفية .. وظّف مهاراتك فى اى شغلانة بدل ما تصدى خليك تعرف تتجوز وتخلف قبل ما تعجز

عبده طناش : أما أبقى اشوف بقا ربنا يسهل .. سيبك انت .. المهم انت عامل ايه فى الشغل هنا ؟ مرتاح ولا ندمت ؟

عايش : الحمد لله تمام والله .. الحاج طيب اوى وابن حلال وبيعاملنى زى ابنه تمام .. مبقاليش شهر هنا وأهه زودنى 10 ج فى المرتب .. ولسه ان شاء الله .. كلام فى سرك انا ناوى اتعلم الصنعة دى .. سهلة وبسيطة ومكسبها ماشاء الله بس عايزة شوية خبرة وفن .. ادينى بعمل اللى عليا والباقى على ربنا سبحانه وتعالى

عبده طناش باستنكار : ايه ده ؟ انت ناوى تشتغل حلاق ؟

عايش : آه وفيها ايه ؟ الشغل مفيش فيه عيب طالما بالحلال .. ده غير ان محدش بيستغنى عن الحلاق ومحله مبيفضاش
إلا بالحق .. انت محلقتش من امته ؟ انت مال شكلك كده محلقش من شهور ؟ متيجى اقصلك شعرك ده

عبده طناش : لالالالالالالالا ياعم سيبنى فى حالى لسه ميعاد الحلقة التانية مجاش انت عايز تبوظلى الجدول وتخرمللى الميزانية ولا إيه؟ ابعد عنى الله يكرمك .. يللا سلام

عايش : طب استنى بس هقولك

عبده طناش : سلااااااام أشوفك كمان شهر ونصى ان شاء الله .. سن الموس على ما جيلك

يبتعد عبده طناش .. وعايش يبتسم فى استغراب لحاله

تابعونا فى الحلقة القادمة ان شاء الله
مع " عبده طناش .. وطابور العيش "
دمتم بكل الخير

Sally

Sunday, April 20, 2008

الحلقة التانية " عايش يجد فرصة عمل"

(الحلقة (2

عايش يجد فرصة عمل

************

عايش : عبده .. عبده .. الحمد لله انى لاقيتك

عبده طناش : خير يا عايش .. طمنى ؟

عايش : خلاص يا عايش خلاص .. الدنيا هتبتسم لى وتدينى وشها .. لقيت شغل أخيرااااااااااااااااا .. لقيت شغل .. أنا مش مصدق نفسى

عبده طناش : بجد يا عايش الحمد لله .. الف ألف مبروووووووووك .. هتشتغل ايه وفين ؟

عايش : احم ..احم .. بص هوه يعنى صحيح مش مناسب لكفائتى بس أهه شغل وخلاص

عبده طناش :هه .. يلا قول فين ؟؟

عايش : احم .. احم .. عند الحاج مصطفى الحلاق

عبده طناش يفغر فاه .. وتتسع عيناه

عايش : ما تبصليش كده .. أنا يعنى أعمل ايه ؟ ده انا مكسوف من قعدتى فى البيت جنب امى زى البنات

عبده طناش : ولا يهمك يا عايش .. بس هتشتغل ايه عنده ؟

عايش : أهه .. امسكله حسابات المحل .. انت عارف انى بكالريوس تجارة شعبه محاسبه ... هاهاها هم يضحك وهم يبكى

عبده طناش : وماله .. خير .. يمكن ربنا يكرمك ويجيلك زبون صاحب شركة ولا حاجة يشغلك معاه

عايش : يسمع منك ربنا يا عبده .. المهم انت عامل ايه فى الوظيفة الحكومية بتاعتك .. مبتحكليش عن اخبارك وانا اللى داوشك كده علطول

عبده طناش : أبدا .. ادينا شغالين زى التيران فى الساقية .. وبنقبض آخر الشهر مرتب ملوش لزمة

عايش : ملوش لزمة فعلا .. المفروض تخلى عندك دم وتتبرع به للحكومه عشان تسد ديونها .. هاهاهاهاها

عبده طناش : هاهاهاها .. انت بتقول فيها .. المفروض بجد بدل مهو محسوب علينا مرتب ومش مكفينا عيش حاف .. أهو على الاقل نبقى كسبنا به ثواب فى آخرتنا

عايش : لا بس بجد بدك تحوشلك قرشين عشان ندورلك بقى على بنت الحلال .. انت عجزت يبنى عالعزوبية دى .. اللى أدك دلوقتى متجوزين ومخلفين كمان .. 32 سنة ولسه عازب ..كتير أووووى

عبده طناش : جواز ايه يبنى انت لسه فاكر .. ده بقى موضه قديمة .. بنت مين دى اللى ترضى تتجوز شحات عشان تتمرمط معاه .. هوه انا عارف أأكل نفسى لما اتجوز كمان .. يا عم قول يا باسط

عايش : اعمل جمعية بجزء من مرتبك .. أنا ناوى على كده ان شاء الله ..أول ما امسك الاوبيج هعمل جمعية علطول عشان موصلش لسنك ده الا وانا خاطب على الاقل

عبده طناش : ولو ان حاسس انك متفائل زيادة عن اللزوم .. وشايف ان السبع سنين اللى بيننا مش هيدوك فرصة تحقق احلامك دى .. بس أهو .. ربنا معاك وينولك اللى فى بالك .. اما انا بقى فمعنديش فلوس زيادة أدخل بيها جمعية .. لو عندك انت بقى ابقى اعمللى جمعية وانا اقبضها .. هاهاهاها

عايش : ربنا يعينك يا عبده ..أنا هقوم أحضر نفسى بقى للشغلانة الجديدة دى .. ربنا يجعلها قدم الخير ويرزقنا بالحلال

عبده طناش : يارب .. ماشى يللا سلام يا عايش ..أشوفك على خير ان شاء الله وربنا يوفقك

تابعونا والحلقة القادمة ان شاء الله

مع عايش وعبده طناش فى صالون الحلاقة

دمتم بكل الخير

Sally

الحلقة الأولى : على مقهى البؤساء"

حكايات عايش وعبده طناش

حلقات منفصلة متصلة من واقع الحياة المصرية المعاصرة

(الحلقة (1

على مقهى البؤساء

**************

عبده طناش : ازيك يا عايش أخبارك ايه النهارده ؟ سألت عليك الواد حوكشه القهوجى قالى ما شافكش من ييجى اسبوع .. انت كنت فين ؟

عايش : مفيش أدينى قاعد فى البيت حاطط ايدى على خدى زى الولاية عمال ادور على اعلانات الوظايف الخالية فى الجرايد

عبده طناش : ها ...ولقيت حاجة تناسبك ؟

عايش : هلاقى منين يعنى .. كل الاعلانات اللى شفتها مطلوب فيها خبرة ما تقلش عن سنتين .. وعن خمس سنين

عبده طناش : هاهاهاها ... قال خبرة قال والخبرة دى هتيجى منين ؟

عايش : أنا عارف يا خويا .. هتيجى من القعدة على القهاوى .. ولا الفرجة عالتليفزيون ؟

عبده طناش : معلش بكره ان شاء الله تتعدل وربنا يصلح الحال

عايش : يارب يا عبده .. ادعيلى وقول للحاجة تدعيلى لحسن أنا خلاااااااااااااص فاض بى ومعدتش طايق نفسى .. يللا لما أسيبك عشان الحق انام لى ساعتين قبل الماتش .. سلام

عبده طناش : ماشى يا بطل بالتوفيق ان شاء الله ..مع السلامة
^
^
تابعونى والحلقة القادمة ان شاء الله
مع عايش وعبده طناش فى
" عايش يعثر على فرصة عمل "
دمتم بكل الخير

Sally

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.