Rss
twitter
كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Sunday, June 7, 2009

تانى مشكلة - سيبوووووونى فى حالى..... تحديـــث


هـ ) فتاة فى العقد التالت من العمر .. تحكى مشكلتها قائلة )

بداية انا مش بعتقد ان فيه حد يقدر يحل مشاكل التانى .. خصوصا لو كانت المشاكل دى قدرية ملهاش حل إلا من عند ربنا .. انا مشكلتي الاساسية اني معدتش عايزة اعيش وفي نفس الوقت مش عايزة اموت عشان مش مستعدية للآخرة .. الناس بتقر عليا وشايفني في نعمة واني مفيش بعد كده لكن الحزن مبيفارقنيش والناس مش بتقدر بيحسدوا وخلاص
يعني لو اشتغلت يقروا على المرتب ولو قعدت في البيت يقروا ان اهلي بيصرفوا عليا ومستتيني .. وبيقروا على عدم زواجي وعدم الخلفة واني بكده في نعمة
مش عارفة عايزين مني ايه ؟ .. مفيش حد بيحبني ولا حد موجود جنبي .. طول عمري مواطن من الدرجة التانية فى اسرتى .. حتى والدتى شايفة ان الحياة اديتنى اكتر مما استحق .. واصحابى اتجوزوا ومشغولين بحياتهم واولادهم .. شبابي راح وعمري كله وحياتي واقفة من سنين لا بتجوز ولا بشتغل ولا عارفة اطلع عمرة ولا حتى قادرة اصلى واحفظ قرآن بصلى بس مش بالتزام ولما بصلى بيحسدونى على خشوعى لدرجة انى بقيت بروح الجامع مستخبية ومبقولش .. انا تعبت من الناس ومن الدنيا .. الوحدة صعبة .. يمكن اصعب حاجة لو عندك مشكلة بس عندك اللي يسمعها او اللي يخفف عنك احسن من الوحدة .. انا بس لو الاقي طريق الاخرة واقدر اقرب من ربنا استريح
قولولى اعمل ايه ؟؟ أنا بجد تعبت من الوحدة ومن الناس ومن الدنيا كلها .. ونفسى يسيبونى فى حالى
تحديـــــــث
...................

صاحبة المشكلة (هـ) بتشكركم جدا على المساندة .. و حبت توضحلكوا انها معندهاش مشكلة مع الآخرين بالقدر اللى فهمتوه .. هى عارفة ان الناس مش هتبطل كلام ... لكن كل اللى مزعلها انها بتيجى من القريب اقوى واصعب واقسى من الغريب ... محدش حاسس بيها من القريبين منها حتى والدتها مش بتحس معاها بالمشاعر الفياضة المعتادة والاحتواء الامومى .. ودى اكتر حاجة تعباها .. الجفاء العاطفى من كل المحيطين


فى انتظار آرائكم ودعمكم ومساندتكم
اما انا فسأنضم لصفوف الجماهير ورأيي هيكون معاكم فى التعليقات
رأيكم مهم جداااااا لا تبخلوا به
الدعوة مفتوحة لكل الناس حتى غير المدونين
فيه خاصية فى التعليقات اسمها انونيميس ممكن تستخدموها
المهم نشارك .. صوتك امااااااااانة .. واحتسبوا الأجر عند الله
.
ولا ننسى أبدا أن رسول الله صلى الله عليه وسلم قال
المسلم أخو المسلم ، لا يظلمه ولا يسلمه ، ومن كان في حاجة أخيه كان الله في حاجته ، ومن فرج عن مسلم كربة فرج الله عنه كربة من كربات يوم القيامة ، ومن ستر مسلما ستره الله يوم القيامة

هفكركم تانى بإيميل باب افتح قلبك
للمراسلة فـقــــط
فى انتظاركم دائما لو كان فى العمر بقية
دمتم فى حفظ الله وأمنه

39 comments:

المعلم محمد صاحب المطعم - طعمية سخنة said...

اولكشي

المعلم محمد صاحب المطعم - طعمية سخنة said...

التاني كمااااااااااان

المعلم محمد صاحب المطعم - طعمية سخنة said...

استني اقرا و اجي

المعلم محمد صاحب المطعم - طعمية سخنة said...

ولا اقولك خدي الرابع كده استفتاح كمان

المعلم محمد صاحب المطعم - طعمية سخنة said...

رايي و بكل صراحة
طظ في الناس و تطلع لهم لسانها كمان
بكل بساطة تروح الجامع و بكل بساطة ترجع
و تعمل كل اللي تحبه طالما لا عيب ولا حرام

الناس في كل الحالات بتتكلم و غالبا بالسوء

يبقي تتكلم بدون كبت حريتها و بدون عمل حساب ليهم

واحدة مفروسة said...

ياحلولى انا اول تعليق ولا ايه؟؟؟؟؟؟
بصي يا ستي
اولا قولى لبنوته ديه اللى فى العقد التالت
كلنا على فكرة بنحس نفس الاحاسيس ديه
ديه حاجه مش عجيبه ابداااا ولا غريبة
دايما الناس بتبص على غيرها و سبحان الله بتشوف نعمة الله على الغير و مش بتبص على نفسها و تشوف نعم الله عليها ابداااااا
و علشانن كده فيه حسد و حقد امال ايه؟
حاولى تسيبك من الناس
و بصي و ركزي على نعم الله عليكي
اعدلك النعم ديه ولا انتى ممكن تكتبيها فى ورقه و تدونى جنب كل نعمة من نعم الله عكسها
يعنى ببساطه و على سبيل المثال
انتى عندك بيت و سرير بتامي عليه و يمكن يكون عندك تكييف ولا مروحة
و لما بتتحري بتاخدى شاور بشامبو
فيه ناس بتنام فى الشارع
و فيه ناس مش لاقيه الميه اللى بتاخدى بيها شاور
فيه ناس اصلا مش لاقيه بروة صابونة تستحنمى بيها
ديه نعمة اهو
نعم كمان مش نعمة واحده
يا ستى انتى عندك اهل يصرفوا عليكي و فيه ناس مش لاقيه اللى يصرف عليها
عندك اهل
و فيه ناس معاندهمش حد خااالص
مش حسردلك النعم كلها
لانك انتى ادرى منى بالنعم الخفية مش الظاهرة للناس
كونك انك مش اتجوزتي لدلوقتى ديه لحكمة اكيد
مش علشان انتى وحشه ولا حتعنسي بس ده لشيء لا يغلمه الا الله
تقدري تقوليلي ايه حيبقى حالك لو اتجوزتى واحد طلع عينك بعد الجواز؟؟؟
و فيه امثله كتيره قريناها فى المدونات او الجرايد او حكاوي من اصحاب او قرايب
ساعتها اكيد و انا متاكده بتقولى جواكي الحمد لله انى مش اتجوزت
يعنى مثال بسيط عليا مثلا
انا مش عندى اولاد
و لما حسيت ان الشيطان حيدخلى من الباب ده و ينغص عليا عيشتى و حيكرهنى فى نفسي و فى اللى حواليا و اولهم جوزي
قعدت مع نفسي و قلت طيب لو كان ربنا اداني طفل و الطفل ده معاق مثلا زي كتير من الناس هل كنت حعرف اتعامل معاه و اصير
و ساعتها قلت الحمد لله انى مش عندى اطفال
و لا لو كان عندى طفل و ربنا اخده منى هل حجم الاسى و الحزن اللى حيكون ساعتها جوايا حيكون بنفس قدر حزنى على عدم وجود اطفال؟؟
لاقيتنى بقول الحمد لله على انى مش عندى اطفال
ربنا اكيد بيحبنى علشان مجنبنى ده
ولا مثلا ابنى اتخطف ولا قتلوه و اخدو اعضائه زي ما بنسمع اليومين دول
الاقينى اقول الحمد لله انى مش عندى اطفال
ولا لو كبر و طلع ابن عاق و لا... ولا...
كلها حاجات بترجعنى لنفس الجملة
الحمد لله انى مش عندى اطفال
عارفه على كل ده
الناس اللي بقابلهم يقولولى يا بختك انتى مش عندك اطفال
ههههههههههههههههههه
حاجة تفرس
بس صحيح
الحمد لله على كل شيء
يابنتى احنا عندنا من نعم الله اكتر كتير من غيرنا
و ربنا عادل جداااااااااا
اما الصلاة و التقرب الى الله
فده عادى
لان ابليس ربنا يجحمه
مهمته فى الدنيا انه يبعدنا عن الصراط المستقيم
و محاولتنا للرجوع الى الله ده جهاد
على فكرة انا مش بنصح
انا بحاول اقولك الكلام اللى بقوله لنفسي فى اوقات الضعف
و ما اكثرها
اما حكاية ان والدتك شايفه ان الحياة ادتك اكثر مما تستحقين
فأكيد خانها التعبير
هيه تقصد اكيد ان ربنا مديكي كتير
لان ربنا بيدي الواحد على قد ما يستحق بالمللى لا اكتر ولا اقل
طلوعك العمره ديه بإذن الله بس
هوه اللى لازم يدعوكي اليه
هوه انتى ينفع تزوري حد من غير ما يإذنلك؟؟؟؟
اطلبيها من الله و اللحي فى الطلب
و انتى ان شاء الله ييسرهالك و يدعوكي
كونك حاسة ان مافيش حد بيحبك ده لانك ببساطه مش بتحبي نفسك
حبي نفسك حتلاقيكي بتحبي اللى حواليكي و اللى حواليكي بيحبوكى
التصالح مع النفس مهم
انا برضه مش بدى مواعظ
انا برضه بقولك الكلام اللى بقوله لنفسي بصوت عالى ساعات قدام المرايا
طول ما احنا عايشين الناس حتحسدنا على كل شيء و اي شيء و حتدعبس علشان تلاقى حاجه تحسدنا عليها
يا بنتى ده انتى ممكن تلاقي ناس احسن منك بكتيييييير
انتى شايفاهم كده
و برضه حيحسدوكي
و حتلاقى نفسك بتقولى بيحسدوني على ايه دول عندهم حاجات اكتر
هيه ديه مشكلة البشر
بيبصوا لغيرهم مش لنفسهم
اسمعى كلامي
خدى اجازة مع نفسك و لتكن ساعات
و هاتي ورقة و قلم
و اكتبي اللى الناس بيحسدوكي عليه
و الحاجات اللى مش عندك
حتلاقى نفسك بتقولى الحمد لله على اللى عندى و اللى مش عندى
و ربنا يهديها يارب

فكرة حلوة اللى انتى عاملاها ديه على فكرة
لان الواحد فى نصحه للغير بينصح نفسه برضه و بيشوف نفسه بين السطور
احيكي على الفكرة ديه
و قولى للراسلة
عمرك ما حتكوني وحيده لان ربنا موجود و هوه احسن و اخلص و اوفى انيس لينا فى الدنيا
تحياتي

ابو صهيب ( الجمعاوي الاصيل)سابقاً said...

السلام عليكم ورحمة الله وبركاته

اعلمي اختي الفاضلة ان الامة لو اجتمعت على ان ينفعوكي بشئ لن ينفعوكي بشئ الا قد كتبه الله لكي

واعلمي انهم لو اجتمعوا على ان يضروكي بشئ لن يضروكي بشئ الا قد كتبه الله عليكي

رفعت الاقلام وجفت الصحف

محدش بياخد اكتر من نصيبه واللي مكتوب لازم هنشوفه

اما عن كلام الناس فلو شغلنا بالنا بكلام الناس هنموت لان الناس عمرها ما هتبطل تتكلم

ده ممكن تلاقي الناس لو ملقتش حاجة تتكلم عليها هتتكلم عن نفسها

اما عن الوحده والزهق ومش عاوزة اعيش والكلام ده كله من الشيطان

والبعد عن الطريق الصح هو طريق الله
استجمعي قواك وقوي اراداتك وعزيمتك وقربي من الله اكتر وان شاء الله كل الاحسيس دي هتروح ومتشغليش بالك خالص بالناس

ودمتم في رعاية الله وحفظه

اخوكي في الله

بارك الله فيكي ام دودو

mahasen saber said...

لا حول ولاا قوة الا بالله

ياه يا سالى والله قلبى اتقطع عليها
واكتر شئ وجعنى جملة حتى امى شايفه ان الدنيا ادتنى اكتر مما استحق

يا حبيبتى ربنا يصبرها ويفرج كربها ويعوضها خير

اكتر شئ مؤلم فعلا يا سالى انك تبقى عايش وسط بشر وحاسس انك وحيد

حازم النبراوي said...

اختى الفاضلة
واضح من كلامك ان اهتمامك بالناس يفوق اهتمامك بنفسك
عموما انا اتكلمت عن الموضوع دة فى مدونتى الصوتية تحت عنوان (انت وكلام الناس)
تقدري تدخلى على الرابط وتسمعينى و تعرفى انا عايز اقولك ايه
الرابط
http://arabfreeradio.blogspot.com/search?q=%D9%83%D9%84%D8%A7%D9%85+%D8%A7%D9%84%D9%86%D8%A7%D8%B3

وكمان انا شايف ان ناقصك الرضا بالنصيب ودة موضوع انااتكلمت عنه بردوا تحت عنوان (حقك وصلك) ورابط الموضوع علشان تسمعينى هو

http://arabfreeradio.blogspot.com/search?q=%D8%AD%D9%82%D9%83+%D9%88%D8%B5%D9%84%D9%83

وعموما رابط مدونتى هتلاقى كل المواضيع اللى ل سمعتيها اكيد حياتك هتتغير للاحسن
رابط المدونة

http://arabfreeradio.blogspot.com/

اتمنى انك تستفيدى من اللى هتسمعية

تحياتى

mahasen saber said...

طب بصى عشان مشكلتها تتحل اولا تواضب على الصلاه اعتقد انها لو ارتبطت بالسجود هيجيلها راحه نفسيه

ثانيا تشوف شغل او اى حاجه تشغلها او تروح دار ايتام تراعى الايتام اليى فيها

ثالثا طالما متاكده ان حد بيحسدها تقرا الموعوذات وتحصن نفسها

رابعا تحاول تشوف انها فى نعمه كبيره انها لسه فوق الارض مش تحتها

خامسا بئه ونصيحتى بجد قوليلها تعمل مدونه وتدخل وسطنا اكيد ان شاء الله
ربنا هيكرمها بالدعم النفسى ان شاء الله

سادسا بئه انا قلبى وجعنى وقوليلها لو تحب تاخد ميلى وانا ااقدر اساعدها بأى حاجه انا تحت امرها

بس بالله قوليلها متزعلش يا سالى
ومدايقش نفسها ربنا هيكرمها وهيفرج همها ان شاء الله

mahasen saber said...

بوسه بئه كبيره ليكى وبدوده
ربنا يحمى بسم الله ما شاء الله قمر

ربنا يحميه يا رب

A.A.S said...

والله دي مشكله نفسيه مش اكتر
واحده فاكره لناس بتحسدها مع ان ممكن ميكنش كدا خالص

خليها تفكر بإيجابيه احسن ما تقعد تراقب تصرفات الناس تجاهها وتفكر في اللي قالوه واللي عملوه

hamma said...

السلام عليكم ورحمة الله وبركاته
ما يحدث لصاحبة القصة يتكرر مع الأغلبية و الفرق بسيط واحد يفصح و يسعى لحل و آخر يدفن نفسه بين الآلام و هذا خطيرا عليه
أولا الإنسان يحمد الله أنه كرمه بعديد النعم لعل أقلها الصحة
ثانيا : الدنيا خليطا بين البشر و هذا ليس إعتباطا بل فيه حكمة كبيرة
الإنزواء و الوحدة أكثر من اللزوم لا تؤتي نفعا
البشر لا بد من الإنفتاح و رغم التعب و ما يتسبب له ...لازم يصبر و يتعلم أحيانا يتعرض الى النقد و أخرى الى المدح...في النهاية توسعة دائرة المعارف فيها معرفة للآخر من تجارب وووووو
كذلك تمكن المرء من معرفة دقيقة لمجتمعه
الدنيا ليس فيها الدراسة فقط
الدنيا ليست منزل ،مدرسة و أماكن عبادة حسب الظرف و معرفة الناس عن قرب بعيدا عن الشاشات و مغالطاتها أما عن الضغط فهذا يتعاظم حسب مراحل العمر و المسؤليات المناطة بعهدته و دائما لا بد من إبتكار حل بنفسه
هذا مجرد رأي والله أعلم

dr aly khamis said...

السلام عليكم و رحمة الله و بركاته
أختى الكريمة
اعتقد إن المشكلة هنا مزدوجة ...
مشكلة من هذه الأخت الفاضلة و مشكلة من بعض من حولها!!!!
فيما أرى - و الله أعلم- أنها حساسة
و لكن أكثر قليلا من اللازم
لا اعتقد أن كل الناس حولها فى هذا الحال السيئ ...و كأنها تعيش فى الكيان الصهيونى و هى الفلسطينية الوحيدة...
كيف علمت من أمها أنها ترى أنها أخذت أكثر مما تستحق ...هل قالت لها أمها هذا مباشرة أم أنه فقط شعورها و على أى أساس-إن كان فقط شعور- بنت هذا الإستنتاج ..

بالتأكيد هى لن تصل إلى هذا الشعور إلا إذا كان هناك بالفعل بعض أو الكثير من المضايقات من بعض أو الكثير من المحيطين بها و فى هذه الجزئية أنصحها أن تتجاهل هذا تماما .. و تدفع بالتى هى أحسن -قدر المستطاع و لكل نفس طاقة -تحاول أن تفعل فقط ما تريد و تراه صوابا بعد إستخارة الله عز و جل و عرض الأمر على الشرع و لتترك كل ما قد يعترضها من حسد أو حقد أو تعطيل خلف ظهرها فمن ينشغل أكثر من اللازم بالناس لن يصل إلى مبتغاه ....أبدااا

أن تجلس جلسة مع نفسها ...تقيم ما فات من عمرها ..ماذا أنجزت و ماذا تريد أن تفعل و أن تقيم الناس من حولها لتنتقى من بينهم من يصلح لأن يقترب منها و لأن يكون أهلا لحفظ سرها و لنصحها بإخلاص و أكيد لن تعدم فأمة محمد لن يفنى فيها الخير

سؤال أخير أرجو أن تسأليه لها ...ما السبب فى عدم زواجها ...عدم تقدم عرسان ..أم أن هناك من يتقدمون و يرفضهم أهلها - و لماذا يرفضونهم - أم أن هناك من يتقدم و ترفضهم هى و لماذا؟؟؟؟
هذا مهم جدا فىما اعتقد !!!!!

و أيضا أنصحها بقراءة موضوعك السابق ( أنا مسلم ..لن يغلبنى شيطانى)
فقد تكون هذه حيلة من حيل الشيطان ليثنيها عن العمل و التقدم
فكما قال الصالحون : العمل من أجل الناس رياء و ترك العمل من أجل الناس شرك


أخيرا أسأل الله لهذه الأخت التوفيق و السداد و الرشد
و لسائر المسلمين

بارك الله فيك
تقبلى تحياتى

dr aly khamis said...

استغفر الله العلى العظيم و أتوب إليه
أعوذ بالله من البخل
فقد قال صلى الله عليه و سلم :
البخيل من ذكرت عنده و لم يصلى علىّ

و أنا ذكرته فى تعليقى و لم أصل عليه

فاللهم صلى على سيدنا محمد و على آله و صحبه و من اتبعه على هدى و سلم تسليما كثيرا

موناليزا said...

من جعل الله همه كفاه الله ما اهمه
بصى مالكيش دعوة بكلام الناس وماتسمعيهوش كمان وماتخليش حياتك تبقى كتاب مفتوح للجميع كده
عايزة تروحى المسجد مش لازم تعملى اعلان
عايزة تصلى مش لازم تقولى
اسمعى دروس دينية كتير لاى شيخ انتِ بتحبيه واسمعى قرآن كتير وحاولى يكون ليكِ ورد يومى من قراءة القرآن ومارسى هواياتك
واجعلى هدفك الجنة فقط
واشكِ دايما لله هو الوحيد اللى بايده أمرك وهو الوحيد القادر عن تخفيف ماتعانى
وربنا يسعدك ويفرج همك

حنين القلب said...

السلام عليكم

اولا ازيك يا سالى يا رب بخير دايما

ثانيا بقى مشكله الاخت اللى تعبانه من الناس
بصى يا ستى انتى استحاله هتعرفى ترضى الناس فاحسن حاجه سيبك منهم خالص وفكرى ازاى ترضى ربنا وبعدين ترضى نفسك شوفى ازاى تكونى سعيده ومبسوطه عايزة تشتغلى اشتغلى عايزة تفضلى قاعده فى البيت براحتك برضه بس المهم تطلعى من حاله الاكتئاب دى
وصدقينى والله السعاده ولا فى الجواز ولا فى الخلفه هما صحيح اساسيات الحياه بس الرضا بالمقسوم هو السعاده الحقيقيه

وربنا يصلح حالك وحال المسلمين جميعا

ريمان said...

البعد عن الناس غنييييييييمه


كنز كبير والله


الدنيا تعبها فى كلمه وراحتها فى كلمه


انا بسبب قر الناس عليا خسرت حاجات كتير راحت منى عشان يبقوا يتبسطوا بقه


والناس مش بيعجبهم العجب

لو البنت مشت مؤدبه يقولك البت دى مالها هاديه كده ليه؟ ومقفله كده ليه؟ اااااه ده اكيد تحت الساهى دواهى

ولو مشت البت صايعه فى الشارع يكلموا عنها ويفتروا عليها بحاجات مش فيها


هما الناس كده

لا عاجبهم مجوزه ولا مطلقه ولا بتشتغل ولا مش بتشتغل


بصى


انتى اللى تاعيه نفسك

بتلتفتى ليهم ليه؟

مفيش وراهم غير تعب القلب

ابعدى عنهم شويه مش تخطلطى بيهم كتير

ما انا اهو


لسه مكمله 21 سنه ومطلقه وباخد كلام من المجتمع زى النيله وبتحصل معايا مواقف صعبه جدا فوق ما تتصوريها وانتى اكيد عارفه نظره المجتمع المتخلف للمطلقه عامله ازاى

الاول كنت بتأثر بكلامهم

انما الوقتى والله بحط صابعى فى عين اتخن تخين فيهم

كنت الاول عبيطه وشم بعرف ارد انما الوقتى برد

بس برد بالجزززززمه للى يستحقوا الجزمه

وبرد بالقلم للى يستحق القلم على وشه وبرد بلسانى للى يستحق كده

انتى احمدى ربنا

انتى احسن من غيرك

ومش اى حاجه تأثر عليكى

وانتى والله حالك احسن منى بكتير بس انا قويه بعرف ازاى انى ماتهزش ولا اى حد يقدر انه يهنى ولا اسمح لاى مخلوق انه يكلمنى كلمه تزعلنى ولا بهتم باراء الناس


انا وبسسسسس

بستعين بشرع الله وبس لو حبيت انى اعمل اى شىء واعرف مدى صحته وحكمه ولا بكلم حد ولا بحكى لحد من الناس عن شىء

اهدى بس كده وكونى كالجبللللل

لا تهزك الرياح


ولا تضرك


ولا تقسمك

تامر علي said...

لا سلامة من ألسنة الناس ... ولا راحة في الدنيا

لكن لابد للإنسان من البحث عن حظه من السعادة ...لذلك عليها ألا تهتم ولا تلقي بالا للناس وان تهتم بنفسها فقط وتوطد العلاقة مع الله حتى تخرج من حالة البؤس بنجاح
تحياتي

صبرني يارب said...

مالكيش دعوه بحد يا بنتى

اعملي الصح والى يرضى ربنا

واقرأي المعوذتين صباحا مساءا وما يصيبكش حسد

ولو مشيتي على كلام الناس
هاتشيلى الحمار على راسك فى الاخر

واتقي الله وصلي لربنا
مش صلي عشان قالوا ولا ما قالوا

واحمدي ربك على نعمه

واسلكي السبل للحياه والحب والاستقرار والجواز

هوني على نفسك وعلى شريك حياتك
وقيسى بمعيار واحد

من يتقي الله

اختاريه وسيبى الباقي على الله


وفين الايمان بقى والخشوع الى بتتكلمي عنه

ازاي مؤمنه وبتصلي بخشوع وفى نفس الوقت قانته من رحمة الله ؟؟

باستغرب على التناقض

اقراي القرآن وارضى بما كتبه الله لك

الرضا الرضا الرضا


ربنا يكرمك يا سالي

ملكة بحجابى said...

انا جيييييت
بصى يا ام دودو اللى وحشنى اوى
هى البنت دى من حقها تعمل اللى هى عايزاه طالما ما بتغضبش ربنا
القيل والقال اصلا من عمل الشيطان
ولعياذ بالله
قوليلها
اوختشك اميرة بتقولك اجمدى كدة
(اللى متغاظ مننا يعمل زيينا )
تروح المسجد وتصلى وتطيع ربنا
وترجع البيت تتعامل بطبيعتها بدال ما بيخرجش عن الحدود اللى بترضى ربنا
رب محمد هو رب موسى وعيسى
يعنى اللى بتسجدله فى المسجد بدال بتراعى وجهه الكريم فى تصرفاتها
يبقى طظ فى الناس
:)

تقبلى مرورى
:)
أميرة
(ملكة بحجابى )

Anonymous said...

عايزة اقوللك انا عندى نفس مشكلتك عندى قريبتى ليها بنت دايماتعقدالمقارنات بينى وبينها كانت دايما تقولى دانتى عنيكى صافية عن عنين بنتى وبنتى وشها اصفر وانتى لا ودايما تقولى انتى جسمك حلو ورشيقة والوزن دة صحى وانتى مش هيجيلك امراض لحد ما تعبت وخدت ادوية فيها كورتيزون زودتلى فى وزنى وياريتها سابتنى فى حالى دى قعدت تقولى جسمك ملا واحلويتى على هههههههههه

ولما كنت بشتغل كانت اهم حاجة تسئل عليها المرتب فكنت اقولها ميهمش المرتب بس اهم حاجة اكون مرتاحة

المهم ان بنتها دى متزوجة وعندها عيال ما شاء اللة وان لسة بس الحمد للة على كل شىء

اقرئى المعوذات وارقى نفسك ذى ما الرسول صلى اللة علية وسلم ما كان بيرقى الحسن والحسين

ويارب تكونى فى احسن حال انتى وكل المسلمين

وكلام الناس لابيقدم ولاياخر

أم أحمد المصرية said...

حبيبتي سالي
بعد السلامات و التحيات
اسمحي لي اقول لصاحبة المشكلة انت عايزة جدول لشغل وقتك و تفكيرك
احثي عن عمل سواء مرتب او خيري
اشتركي في كورسات
اذهبي للنادي
اذهبي للدروس الدينية
اتعرفي علي ناس جدد
عيشي كل دقيقة في حياتك و ما تهتميش بكلام الناس و اللي يقول لك كلام يضايقك ضايقيه و لا يهمك

Soul.o0o.Whisper said...

السلام عليكم و رحمة الله و بركاته


سالى الجميلة
اولا وحشانى مووووووووووت
يارب تكونى بخير


ثانيا يا جميل بصراحة
مش عارفة اقول ايه لصاحبة المشكلة

لانها ماتكلمتش فى مشكلتها باتزان
تقريبا هى كانت فى لحظة غضب او زهق
فقامت كتبت الرسالة دى

فمش عارفة صراحة أقولها ايه
غير انها تهدى الاول و تفكر بعقلانية
عشان تعرف مشكلتها فين بالظبط


ربنا يهدينا جميعا
و ييسرلناامورنا
و يفرج عنا كروبنا


دمتى بود يا قمر

MaNoOoSh said...

علي فكرة الموضوع دة مظهرش عندي فى الريدر
عاااااااااااااااااا


بالنسبة للبنت
هي المفروض تسعي لرضى ربنا ثم سعادتها.. وتعرف كويس قوي انها متعملش حساب لكلام حد

لان عمر ما الناس هتجتمع على حاجة تريح حد.. الانسان هو اللي بيسعس لراحته
وان شاء الله ربنا مع سعيها هيرزقها بالزوج الصالح اللي يآنس وحدتها.

أنفاس الصباح said...

حبيبتى سالى

وحشتينى قوى

انا مقصرة فى حقك فى الزيارة والتعليق

دعواتك احنا فى امتحانات

عمر خلص تقريبا خلاص والباقى لكن الثانوية العامة لسه

انا ساعات ادخل واقرء بس اكون مش عندى تعليق

المرة دى كنت عوزة اعمل كده بضوا
بس قاومت الرغبه دى

يمكن علشان كتير المشكلة دى موجودة وبحب اتكلم فيها بينى وبين صاحبتها احسن

على اى حال هنا ناس كتير قالوا كلام جميل
يارب تستفيد به
لكن فعلا مش هترتاح الا لما تستقر عاطفيا
ربنا يرزقها الزوج الصالح الى يسعدها ويعوضها
كل الى اقدر اضيفه على الى قاله الى قبلى

عليك بدعاء سيدنا موسى

رب انى لما انزلت الى من خير فقير

ده فى قصته مع الفتاتين وكيف انه بعده رزقه الله العمل والزوجة وقد كان مطاردا ووحيدا وغريبا
وبلا اهل او عمل او وطن

استعينى بالفيوضات الالهية
الدعاء الدعء الدعاء
ربنا يصلح احوال الشباب وينتقم من الى كان السبب
فى امان الله

Anonymous said...

متديش كلام الناس الاهتمام الاكبر ومتخلهوش شاغل كل تفكيرك لأن التفكير قاتل والفراغ قاتل حاولى انك تشغلى وقتك بحاجات بتحبى تعمليها طالما مش بتضرى حد وشوفى الحاجات اللى بتسعدك واعمليها لكن لوركزتى على كلام الناس مش هتعرفى تعملى حاجة فى حياتك

rovy said...

السلام عليكم

ازيك ياسالى ؟ يارب دايما بخير
بالنسبه للمشكله .. انصحها اولا بقراءة اذكار الصباح و المساء بس باحساس و ايمان بان الله سبحانه و تعالى وحده القادر و لا حول و لا قوة الا به وحده سبحانه و عليها التقرب من الرحمن جداا و اقامة الليل و مناجاة الله سبحانه فهذا يعطيها قوة و طمأنينه لا حدود لها ..
ايضا يجب ان تشغل وقتها قدر استطاعتها و ان لا تستمع كثيرا لكل كلمة تسمعها من الناس .. و لكنى ايضا ادعوها لمحاوله حسن الظن بهم خصوصا الاقربون منها و الاخص جدا امها !!
اخيرا اشعر ايضا انها ربما تحتاج لبعض المساعده النفسيه من طبيب متخصص و هذا ليس عيبا فكلنا نمر بفترات نحتاج فيها لعون من اخرين ...
ادعوا الرحمن ان يفك كربها و ان يرزقها السعاده التى تتمناها ..

دمتم بخير
تحياتى

حلـم،، said...

مدونة رائعة مواضيع مهمة اول مرور لي ادعوكي لزارة مدونتي المسكينة في بوستها الجديد محترفي ضياع

aidy said...

هى جايز حساسة زيادة عن اللزوم

وبتبص للناس اكتر ما بتبص لحياتها

يعنى مركزة مع الناس اوى لدرجة انها نسيت معاهم حياتها

وده نابع من وحدتها وفراغها العاطفى اللى فى حياتها

لو لقت حاجة تشغل حياتها مش هتاخد بالها من الناس

يعنى تشتغل وتروح الجامع وترفع راسها وتبص فى عيون الناس

لأن ده شئ تفتخر بيه حتى لو الناس بتبص عليها

وماله خليهم يبصوا بس متركزيش معاهم

انتى مش عندك مشكلة

نفسيتك التعبانة وشعورك انك مواطنة درجة تانية هو اللى مشكلة

مفيش مواطن درجات

انتى تقدرى تكونى التوب بس حاولى

مشكلتك جوة نفسك وانتى اللى هتحليها

تحياتى

حاجات جوايا said...

السلام عليكم ورحمة الله وبركاته


ألف شكر لكل المشاركين ربنا يبارك فيكم ويكرمكم يارب و يفرج همومكم

اللهم آمين يارب العالمين



----------
صاحبة المشكلة (هـ) بتشكركم جدا على المساندة .. و حبت توضحلكوا انها معندهاش مشكلة مع الآخرين بالقدر اللى فهمتوه .. هى عارفة ان الناس مش هتبطل كلام ... لكن كل اللى مزعلها انها بتيجى من القريب اقوى واصعب واقسى من الغريب ... محدش حاسس بيها من القريبين منها حتى والدتها مش بتحس معاها بالمشاعر الفياضة المعتادة والاحتواء الامومى .. ودى اكتر حاجة تعباها

الجفاء العاطفى من كل المحيطين



ما زلت فى انتظار مداخلة صاحبة المشكلة


خالص تقديرى واحترامى لكم جميعا

وومن said...

والله يا هـ انا كمااااااان عاوزة اصوت واصرخ واقول سيبوني في حالي

انا زيك بالظبط وأكتر كمان كل اللي حواليا عاملين منصحين وهما اللي فاهمين الدنيا ولا لاء

لو رفضت الجواز ابقي مجنونة ومش طبيعية لما ارتبط بواحد علشان مرتحالة وبيفهمني طلعوا فيه القطط الفاطسه وهو دون المستوي ومش عارف ايه

فسخت الخطوبة مش عاجبهم وبقيت واحدة مش بتاعه عيشة ومش عاوزة اتلم

اللي مشتغلتش يتحسدني علشان اشتغلت
واللي بتشتغل زي بتحسدني علشان باخد مرتب اعلي منها
واللي متختبطش اضايفت اني اتخطبت قبلها

انا كفاية اني مسمعتش مبروك علي خطوبتي اكتر ما اتحطيت في تحقيق
علشان كل واحدة تطمن اني مفوزتش يعني ووقعت واقفة
ولما محصلش نصيب مخلصت من الشماتة

بس اهو هاتعملي ايه يعني هابطل اتعامل مع الناس

عادي الحمد لله اني عندي مدونة بفضفض فيها براحتي وبلاقي اللي يفهمني

شمس النهار said...

ازيك
الظاهر اني جيت متأخره
بس معلش كان عندي ظروف تعبانه واللاب توب عيان وكمان انشغلت شويه كده
البنوته دي غير انها قطعت قلبي
عشان امها مش فهماها خالص
طبعا الناس قالت كل الكلام ماشاء الله
بس عايزه اقول لها تستشير طبيب برضه مش عيب والا حرام

وتستغين بالصبر والصلاه والاستغفار
كل ما تقرب من ربنا كل ماتبعد عن كل الكلام البايخ ده
وتستهيفه

!!! عارفة ... مش عارف ليه said...

ماشاء الله الناس كلها مغطية الموضوع من كل جوانبه

وإن شاء الله تكون الفائدة المرجوة قد تحققت

وإن كنت أعلم مقولة ما حك جلدك مثل ظفرك

لذلك أفتكر أن صاحبة المشكلة هي الوحيدة التي تملك الحل

وسيكون الله في عونها بإذن الله حتى تصل إلى الخيار الصحيح الذي فيه مرضاة الله والتقرب إليه


تحياتي
وليد

همس الاحباب said...

الاخت العزيزة ام دودو
ربنا يجازبكى خيرا
ويبارك فى حضرتك
على مجهودك فى مساعدة الاخرين
تقبلى تحياتى

حاجات جوايا said...

المعلم محمد صاحب المطعم - طعمية سخنة
-----------------------------------
أهلا بك أخى الفاضل
مبروك عليك التعليق الاول والتانى والتالت والرابع والخامس
وانا متفقة مع رايك
نورتنى اخى الفاضل

حاجات جوايا said...

واحدة مفروسة
-------------
أهلا يا قمر
معلش بقى ملحقتيش اول تعليق
المعلم محمد سبقك
تتعوض ان شاء الله

تسلمى يا قمر عالمشاركة الرائعة جداااااا دى
ربنا يكرمك ويكتبلك الخير يارب
كفيتى ووفيتى
نورتينى يا قمر

حاجات جوايا said...

ابو صهيب ( الجمعاوي الاصيل)سابقاً
-------------------------------
وعليكم السلام ورحمة الله وبركاته
جزاك الله خيرا على النصيحة الرائعة
بارك الله فيك
نورتنى اخى الفاضل

Anonymous said...

هي كون ان الناس تتكلم دي حاجة مش وحشة قوي لأنهم بيحسدوها علي حاجات يقال بعني انها مش موجودة عندها ودي برده حاجة كويسة جدا لأن في ناس كتير عندهم نفس الحالة بس مبيبقووش عايزين حد يكون علي دراية بمشاكلهم عشان صورتهم متتشوهش قدام الناس ويبقي في تصورهم الشخصي ان عيوبهم أكتر من مميزاتهم بس الناس دول يبقوا حاجة من الاتنين ياما معقدين وعلي طول خايفين من الناس ودول ربنا يتولاهم ياما كتوميين ومنغلقين علي نفسهم ويرجعوا برده يقولوا في الأخر محدش بيحس بينا ولا بيسمعنا طب والناس هتعرف منين اذا كنت انت مش بتحط منطق معاهم ولا بتحكب حاجة لحد

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون


Free CursorsMyspace LayoutsMyspace Comments
كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.
 
Powered :blogger