حاجــــات جوايــا: 7/1/10

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Thursday, July 22, 2010

الريسة وصلت يا جدعان

السادة والسيدات

الإخوة والاخوات

اسمحولى ازف اليكم خبر عاجل ... عاجل جدااا

ويا تلحقوه يا متلحقوهوش

من اليوم ولمدة عشرين يوم

يبدأ عهدى الجديد مع السلطة .. مع النفوذ .. مع الديكتاتورية المتنكرة على هيئة ديموقراطية ..مع التسلط .. مع الجبروت .. مع النكران والجحود

من اليوم أتسلم مشعل الرئاسة

لأقود العشر حلقات الاولى من مسلسل قلب كامل

من سلسلة ليالى مصرية

أرجوا منكم الانتقال فورا لمقر ليالى مصرية لمتابعة الحدث الجلل

وإضافة رابط المدونة لريدراتكم

للمتابعة أولا بأول

تفاصيل أكتر من حيث الاشتراك والمراسلة واى حاجة هتلاقوها

فى مدونة ليالى مصرية وفى بوست كلمة الرئيس

وزى ما قال الريس

المسلسل هيبقى كويس

ان شاء الله

فى انتظاركم هناكـ

Wednesday, July 14, 2010

أغرب من الخيال

والله الدنيا دى فيها كوميديا طبيعية ارتجالية كده من غير لا سيناريو ولا حوار ولا تلاكيك مخرجين

الفنانة صابرين السنة اللى فاتت – بعد حجابها – عملت مسلسل اسمه الفنار .. دورها حسبما رات هى كان يستلزم انها تكون غير محجبة فى بعض المشاهد معللة ان ده ضرورى لمصداقية العمل عشان الجمهور يصدقها .. على اساس ان مينفعش المراة تبقى قاعدة فى البيت بالحجاب .. كده احنا كجمهور مش هنصدق ونقول دى بتمثل علينا .. قال يعنى احنا مش عارفين انها بتمثل فى مسلسل ولاحاجة ... قوم ايه بقى استقر رأيها انها تلبس باروكة فى المشاهد اللى المفروض تظهر فيها بشعرها

اللى يغيظ فى الموضوع انها لما سألوها هل استشرتى علماء الدين فى حكم لبس الباروكة كان ردها انها مخدتش رأيهم عشان تتحجب .. هتاخد رأيهم فى لبس الباروكة ليه .........؟؟؟

كلام غريب جدا ميطلعش منك يا صابرين وانتى كنتى هاريانا برامج دينية .. طيب الحجاب فرض وانتى عارفة انه فرض عشان كده اتحجبتى فمش محتاجة تسألى علماء الدين .. بس لما تنوى انك تقربى لربنا بفريضة فرضها عليكى المفروض تشوفى ايه الخطوات الصح اللى تخليكى دايما فى الطريق السليم عشان اللى عملتيه ميروحش هدر .. مش كده ولا ايه ؟

الغريب والعجيب والبايخ جدا جدا جدا ان صابرين أعلنت الكلام ده فى برامج على الهوا .. وفى أحاديث للصحف ومفيش شيخ فيك يا وطن يا عربى فكر أنه يتصل بيها عشان يعرفها الحلال والحرام ويقنعها بالحسنى

يعنى نفسر سكوتهم ده بإيه ؟؟؟

هى مقتنعة بوجهة نظرها .. واحنا عارفين ان ده غلط .. نسيبها ليه من غير ما ننصحها فى الله .. هما الشيوخ مش بيتكلموا إلا لما حد يسألهم ؟؟.... مش القول الحق امانة .. مش تبليغ الرسالة امانة .. ولا إيه .........؟؟

ولا عايزين البنات المحجبات تاخدها قدوة وتلاقوهم ماشيين فى الشارع بباروكات بدل الحجاب على أساس انه مش الشعر الحقيقى

طيب انتى نفسك يا صابرين طالما مقتنعة بالباروكة للدرجة دى .. ليه متقلعيش الحجاب وتكتفى بالباروكة طالما انها بتغطى الشعر الاصلى ... انا عايزة بس أفكرك بالحديث الشريف

قال صلى الله عليه و سلم : " من سن سنة حسنة فعمل بها كان له أجرها و أجر من عمل بها لا ينقص من أجورهم شيئا و من سن سنة سيئة فعمل بها كان عليه وزرها و وزر من عمل بها لا ينقص من أوزارهم شيئا"رواه مسلم

نتيجة صمت علماءنا الأجلاء .. ان الفنانة صابرين صورت مسلسل شيخ العرب اللى هيتذاع فى رمضان بالباروكة برضه فى معظم مشاهده حسبما قرات .. يعنى دلوقت هى ذنبها فى رقبة مين ..............؟؟؟؟؟

أنا حبيت اخلص ذمتى وأقول اللى عندى لأنى بالتأكيد سأُسأل على صمتى طالما انى عارفة وكاتمة

يقول الله تعالى في كتابه المحكم
( وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الْأِثْمِ وَالْعُدْوَانِ )

و يقول الرسول الكريم صلى الله عليه و سلم : " الدين النصيحة ... الدين النصيحة . قيل : لمن يا رسول الله ؟ قال: لله و لكتابه و لرسوله و لأئمة المسلمين و عامتهم " رواه مسلم

عملت سيرش عن حكم لبس الباروكة بالادلة وجبته يمكن صابرين او اى حد من اللى اقتنع بفكرها يقرأه فى يوم من الأيام ويعرف الصح فين .. وربنا يتقبل

حكم لبس الباروكة وزراعة الشعر لمن سقط شعرها

Monday, July 12, 2010

ولسه يا وزير التغييم

لقى طالب مصرعه من مركز أبو قرقاص منتحراً، بعد إعلان نتيجة الثانوية العامة. تلقى اللواء محسن مراد مدير أمن المنيا بلاغا من مأمور مركز شرطة أبو قرقاص يفيد انتحار الطالب وليد خلف عبد الحكيم من زاوية حات التابعة لمركز أبو قرقاص، عقب سماعه النتيجة والتأكد من رسوبه، حيث تبين أنه قام بإغلاق الباب على نفسه وربط حبل فى سقف المنزل ووضعه حول رقبته وشنق نفسه. وقد عثرت عليه أسرته معلقا إلا أنها لم تستطع إنقاذه.

الخبر من اليوم السابع

ولسه يا وزير التعليم

بجد حسبى الله ونعم الوكيل

مش عارفة ايه مزاج السادة الوزراء انهم يعكننوا على الشعب

عايزة افهم بس هما بيستفيدوا ايه ؟؟؟

الثانوية العامة فى بلدنا كارثة من الكوارث الطبيعية

وياريت بيطلع منها الطلاب فاهمين حاجة

شوية مختلين عقليا ميعرفوش اى حاجة فى اى حاجة ماسكين العملية التعليمية ومعتقدين انهم جهابذة وعباقرة واللى بيعملوه محدش يقدر عليه

من ناحية محدش يقدر عليه .. ففعلا محدش يقدر عليه

لان محدش عنده كمية الغباء دى كلها .. ده غباء حصرى فى التعليم المصرى

الخبر ده كنت متوقعاه ويمكن اكون كنت بستناه .. وبستنى اكتر منه كمان .. مهو أكيد الموضوع مش هينتهى بانتحار طالب واحد

فى شرع مين يرسب نصف طلاب الثانوية العامة ؟؟؟؟؟؟؟

نصف الطلاب !!!!

نصف الطلاب مذاكروش ليل نهار .. ولا تعبوا وسهروا واكتأبوا وعيطوا من المناهج التقيلة اللى مش قادرين عليها

نصف الطلاب أهاليهم مدفعوش اللى وراهم واللى قدامهم فى دروسهم الخصوصية

نصف الطلاب معاشوش سنتين فى جحيم الثانوية العامة وعيشوا معاهم أهاليهم وأقاربهم ، وبيوتهم تحولت من بيوت عادية لثكنات عسكرية معلن فيها حالة الطوارئ ليل نهار

والله أنا قلبى بيبكى .. حزينة جداااا على كسر قلوب الطلبة وأهاليهم بالشكل المفجع ده

هو خلاص مفيش رحمة

طيب بتضيقوا عالناس فى المعيشة .. فى الجواز .. فى الشغل .. فى غلاء الأسعار .. فى الارتفاع الجنونى لاسعار شقق الشباب .. فى تدمير نفسية الشباب والبنات .. والناس مش قادرة وهتنفجر من كل حاجة ومحدش حاسس ولا سائل ... لكن دى حاجة وانكوا تحطموا قلوب واحلام ولادهم حاجة تانية خالص

كل انسان طبيعى بيستحمل كل حاجة عشان خاطر ولاده

عشان يربيهم كويس ويعلمهم كويس ويفرح بيهم ولهم

حتى الفرحة استخسرتوها فى الناس

مفيش عقل خالص .. مفيش نسبة ذكاء أرنب حتى

سيبوا للناس حاجة تريحهم نفسيا يمكن ينسوا عمايلكوا السودة شوية

مش كفاية أصلا انهم هيدخلوا كليات عجيبة وأساتذتها معقدة برضه ويتخرجوا منها زى ما دخلوها وفى الاخر يقعدوا فى بيوتهم

طيب ادوهم فرصتهم فى البهدلة الطبيعية .. بلاش تبهدلوهم كده من اولها وتكرهوهم فى حياتهم وبلدهم .. الحكاية مش ناقصة

هى عقدة وبنخلصها فى الناس ولا ايه ؟؟
والله ياريت يا حكومة قبل ما تمسكى حد مصير ابنائك .. تعرضيه على طبيب نفسى

وياريت تبقى تكشفى انتى كمان احتياطى زيادة اطمئنان احنا طبعا واثقين فى قدراتك العقلية الخارقة بس محتاجين نطمن.. يمكن يكون مستوى ذكائك تعدى الحدود الطبيعية وكسر الارقام القياسية .. وساعتها بقى يبقى يا بختنا يا هنانا

ربنا يرحمك يا وليد ويصبر أهلك و ينتقم من كل ظالم

حسبى الله ونعم الوكيل

Wednesday, July 7, 2010

في وقت من الأوقات 4

في وقت من الأوقات قلبك بيكون قوى

بيقول للحزن لا .. ده الدمع كتير أوى

مش عايز جرح تانى لو حتى الجرح جاله

هيدور وشه ويمشى في طريق يكون مستوى

في وقت من الأوقات بتفتح للفرح بابك

وترمى كل همومك وتأتنس بأحبابك

مش كل حاجة لازم تبقى دمع وبُـكا

أمال هتفرح امتى ..؟؟ حرام عليك شبابك

في وقت من الأوقات بتحس انك بتكبر

حاجات كتير بتفوت ومش قادر تحصل

يا عم سيبك بقى وبص للي جاى

هو اللي في ايديك .. وان شاء الله هتوصل

Friday, July 2, 2010

عندمــا أحب

عندما أحب

أتجاوز حدود علاقة خاصة .. لأدخل معك في علاقة حب مع العالم كله

أحب العالم كله من أجلك .. لأنك بين أرضه وسماءه

تحتضن رماله خطواتك .. وتتمايل طرقاته طربا بسيرك عليها

عندما أحب

أتحمل القليل والكثير من أجلك

أهمس باسمك في صلواتي وأنا ابتهل إلى الله أن يحفظك دائما

فأنت سر خاص جدا بيني وبين خالقي

وما أحب الأسرار إن كانت بريئة

عندما أحب

يتلاشى الزمان ... ويتلاشى المكان

وتبقى أنت في الوجدان زماني ومكاني

وأعبر فوق حدود الخيال .. واتخذ الحلم سكنى ودارى

عندما أحب

أفرح قليلا .. وأحزن كثيرا .. وأشتاق دائما

يكبلني الخوف حينا .. ويترجمه الدمع أحيانا كثيرة

أحبــــــك حبيبي .. وكلى لهفة وحيرة

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.