Rss
twitter

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Tuesday, March 31, 2009

جيل الآبـاء ... وآباء الجيـل

أتذكرون كيف كان أجدادنا ؟؟ أتعلمون كيف تربى آباؤنا ؟؟
لم تكن حياتهم سهلة ولا بسيطة .. بل كانت شاقة ومُنهِِكة .. ومؤلمة
لم يكن لديهم تليفزيون .. ولا تليفون ...ولا بوتوجاز .. ولا ثلاجة ..ولا .. ولا ..ولا ..الخ
كانت أقصى أجهزة الرفاهية هى الراديو ..اللى بيوش ..ششششششش
لم يكن بمقدورهم السهر بعد العشاء .. لعدم وجود كهرباء
كانوا يستذكرون دروسهم .. على لمبة جاز
و شغلهم الشاغل .. وحلمهم الأبدى .. أن يحققوا ذواتهم لكى يُفرحوا أهلهم ويُريحوا قلوبهم من حمل همهم .. بل همومهم كم كانت الحياة صعبة .. لكنها خلقت رجالا على درجة عالية من الرجولة .. والصلابة .. والمسئولية
رجالا لم يذوقوا طعم الراحة .. لكن قلوبهم كانت عامرة بالإيمان ..لم يسخطوا على حالهم .. و لم يتطلعوا إلى ما فوق امكانياتهم
رجالا حملوا مسئولية النكسة .. ولم تقر أعينهم ويهدأ بالهم إلا بالنصر
النصر العظيم .. الساحق .. الذى جعلنا مرفوعى الرؤوس والهمم أمام العالم بأسره حتى يومنا هذا

مثل هذا الجيل العظيم .. جيل البطولات .. والانتصارات .. لم يكن متوقع منه إلا انتاج ُذرية قوية .. صلبة ..على قدر عالٍ من العلم وتحمل المسئولية
!!!!!!!!!!!!!!!!!!!
هكذا توقعت مؤشرات العقل المنطقية ؟؟
فماذا حدث ؟؟
وكيف ُوجد هذا الجيل السطحى ؟ الغير مسئول ؟
هذا الجيل الذى توفرت له كل سبل الرفاهية .. وزادت عن المتوقع .. كان أولى به أن يكون أنضج وأعمق وأشد صلابة
كان أجدر به أن يتفرغ للعلم والتعلم والابتكار

أنا لا أعمم على الجيل كله بالطبع .. فهناك شباب على قدر كبير من النضج الفكرى والسياسى والعملى .. لكن للأسف هناك فئة ليست بالقليلة تحيا فى عالم آخر خاص بها .. عالم منشق عن عالمنا الملئ بالصراعات .. وفى نفس الوقت يصب بسلبياته داخل مجتمعنا فيزيده بلاء

كيف حدثت هذه المعادلة اللا معقولة ؟؟
وكيف تدهورت الأجيال هذا التدهور.. المخيف .. المفزع ؟؟
فبدلا من ان تتوارث الأجيال المتعاقبة الرجولة والعزة والمسئولية .. تجدهم يتوارثون التدليل والإعتمادية والسطحية أكثر فأكثر
للأسف
يقع جزء كبير جدا من المسئولية على الآباء .. وللغرابة تجدهم فخورون بأبنائهم المدللين وسعداء بهم وان ناقشتهم فى الامر .. لا تجد إلا اجوبة ثابتة مثلا
" سيبوهم يفرحولهم يومين قبل المسئولية ووجع الدماغ "
أو
" أنا عايز أعوض ابنى عن اللى اتحرمت منه وأنا فى مثل سنه "
أو
" طب أعمل إيه ؟ يعنى عايز ابنى يبقى أقل من أصحابه وابن فلان وعلان ؟ مهو كله كده مش ابنى بس !"

إخـوانى

كيف يخرج من هذا الجيل المدلل ..آباء ؟؟؟
ماذا تتوقع من شاب يتركه أهله بلا سؤال عن أصدقائه .. ولا متابعة لسلوكه .. ولا رادع لتصرفاته لدرجة التطاول على والديه ؟
ماذا تتوقع من شاب "جامعى" كل همه فى الحياة مسايرة موضة الشعر والجينز والموبايلات والاستعراض امام الفتيات؟
بل ماذا تتوقع من شاب يرتدى ملابس .. كملابس البنات ؟
ماذا تتوقع من شاب يقضى يومه مسدات وتليفونات.. ويسهر ليله على الشات ؟

متى يُنتج ؟
ومتى يعرف دينه ؟
ومتى يدرك معنى الزواج ؟

مثل هذا الشاب .. " زوج "
كيف سيتعامل مع زوجته .. ولم يتعود قط على العطاء ؟
تعود أن يأخذ دائما .. وأن يطلب دائما ..فأصبحت الأنانية طبعه

مثل هذا الشاب .." أب "
كيف سيُربى أبناؤه على الدين و المبادئ والقيم والأخلاق والرجولة والعزة والكبرياء .. وكل هذه الأشياء للأسف ذات معانى مشوهة لديه .. فهو يدركها شكلا ..لا مضمونا ، اسما ..لا معنى

بالطبع أنا لا أنتقد مسايرة الشباب للموضة .. فكلنا نتابع الموضة وننتقى منها ما يناسبنا ويناسب شخصيتنا ودرجة تديننا .. لكننى انتقد الاستغراق التام فى هذه الأمور لدرجة أنك عندما تحادث شابا من هذه الفئة قد تجده لا يجيد الحديث الا فى هذه الاشياء ، فلا يوجد حيز للتفكير او للثقافة أو للاختراع أو للابتكار فى عقولهم
فعقولهم موجهة توجيها مقصودا نحو هذه الاشياء السطحية لا يرى سواها رغم أن الشباب الغربى فى اوروبا وأمريكا يهتم بأحدث الموضات وأكثر من ذلك ومع ذلك لا يتوقفون عن الانتاج والابتكار

أعلم انها ليست مشكلة الشباب وحدهم .. ولا مشكلة الآباء وحدهم .. لكنها مشكلة مجتمع بأسره بخل على أبناءه بالمشاركة الحية والفعالة فى اموره الهامة وهمشهم و حجر على تفكيرهم وقضى على ثقتهم فى انفسهم وفى قدرتهم على العطاء .. فصاروا مجرد متفرجين وليسوا أصحاب قرار .. وانعكس ذلك على علاقاتهم الإجتماعية والأسرية
== وللأسف كان مردود هذا الإنعكاس ان

ازدادت حالات الطلاق فى هذا العصر ازديادا ملحوظا .. وطبقا
لآخر إحصاء فقد بلغت النسبة حالة طلاق كل 6 دقائق، وأكثر الحالات تقع بين المتزوجين حديثاً وخاصة فى العام الأول .. وكل ذلك بسبب عدم استطاعة رجال الجيل تحمل المسئولية .. وبالتالى فقد أصبحوا غير مقنعين بالنسبة لزوجاتهم كرجال

كما زادت نسبة
عنف الزوجات ضد أزواجهن ووصلت إلى 50.6 % من إجمالي عدد المتزوجين في مصر


وستظل هذه النسبة فى ازدياد طالما ان الرجال لم يعودوا رجال وصاروا أشباه رجال فما الحل؟
هل سنظل بهذا المعدل المؤسف ؟
أما آن لهؤلاء الشباب أن يفيقوا من غفوتهم ؟
أما آن للآباء أن يستعيدوا سطوتهم .. ويعززوا مكانتهم ؟
أما آن لبلادنا الحبيبة ان تمد يديها إلى أبنائها وتطلب مساعدتهم وتعزز ثقتهم فى انفسهم ؟؟
أم لم يعد أمامنا إلا التباكى والتحسر على عصر ذهب وصار خيال
كان اسمه .. عصر الرجال
........................................
ملحوظة هامة جدا
الشباب المقصود بالنقد هم الشباب السطحيين أيا كانت طبقتهم الإجتماعية ليس فقط الأغنياء
فهناك العديد من أبناء الفقراء ومحدودى الدخل من يحيون هذه الحياة الترفه ويحملون أهلهم مالا يطيقون من نفقات على مظهرهم واقتناء أحدث الموبايلات وما إلى ذلك لمجرد التباهى أمام الزملاء والأقران
بمعنى أكثر عصرية هم الشباب السيس

79 comments:

صيدلانيه طالعه نازله said...

للاسف الجيل اللى موجود دلوقتى معندوش تحمل مسئوليه نهائى لان الاهل اصلا مع زياده متطلبات الحياه اصبحوا شبه غير موجودين مع ولادهمو بعد ما يكبروا و يوصلوا لسن الشباب بيبقى كل هم الاباء انهم يجوزوهم طب ازاى و هوا لسه مشتغلش و لا كون نفسه
الاهل يقولوا نساعدهم و فى الحاله دى بتبقى المساعده من الالف للياء و الولد بعد الجواز بيبقى مش حاسس بقيمه الحاجه اللى عنده و قيمه زوجته كمان لانه ببساطه متعبش فيهم و اللى بيجى بالسهل بيضيع بسرعه و بيحصل الطلاق للاسف على اتفه الاسباب و اعتقد ان ده صح من واقع انا لامساه فى حالات كتير حواليا

محمد عتلم said...

المشكله مش فى الجيل اللى فات
ولا فى الجيل اللى جاى
المشكله فى الجيل ابو زلومه
ـــــــــــــــــــــــ
لالا نتكلم جد شويه
الجيل اللى فات زى ماقلتى كانت مواصفاته فيها قدر كبير من التحمل والمسؤليه رغم ان ابهاتهم هما كمان كان بيقولو عليهم جيل فاشل وشباب اى كلام
وهكذا على مر الاجيال
نيجى للجيل اللى جاى طبعا احنا لم نكبر فى السن هنقول عليهم نفس الكلام وكمان هما هيقولو على ولادهم كده برضه . مش دى الحقيقه اللى نشوفها فى الحياه والتلفزيون والافلام والمسلسلات ؟؟
بس كل ما رجعنا لورا بالزمن لقينا التكنولوجيا والرفاهيه اصبحت اقل هذا مما يعنى ان الشخص لما يكون عايز حاجه هيخبط مشوار جامد ويصحى بدرى ويزبط ساعته عشان يكون ملتزم بمعاده ويقوم من النوم وياخد دش ويفطر وينزل يركب اتوبيس عشان قلة المواصلات ويروح مشوار يمكن من بلد لبلد ويرجع بعد بهدلة سته ولا سبع ساعات فى الشوارع عشان مثلا يجيب ورقه من شركه متوافق عليها من مدير الشركه مثلا ويرجع شركته او بيته بعد يوم طويل
بعدين يا اما يدخل المطبخ ويعمل الغدا لو هوا عايش لوحده او يروح مطعم فى اخر الدنيا ويستنى الاكل وياكل ويروح وياخد دش يبص فى الساعه يلاقى معاد النوم جه
النهارده الواحد بيقوم من النوم يفتح الجهاز يلاقى الميل وصل فى الانبوكس بتاعه .. يمسك الموبايل يطلب دليفرى يبص فى الساعه يلاقيها عدى عشر دقايق بس .. بالمقارنه بينه وبين رجل الماضى ان رجل الماضى بيتعب بجد عشان يحصل على معلومه او خدمه ممكن يكون قيمتها صغيره اوى بس تمنها كبير اوى
راجل النهارده كل حاجه متاحه ليه يعنى مش تعبان فى حاجه .. يعنى اتعود انه ياخد بس .. وعلى فكره الاجيال القادمه هتكون حياتهم التكنولوجيه اسهل بكتير اوى واحنا هنقول على نفسنا اننا كنا جيل من حديد وكنا رجاله وبنستحمل و و و و
قيسى على كده كل مقومات الحياه
ولو عايزه تقتنعى فعلا ان الجيل اللى فات مكانش اد كده فعلا بصى للجيل اللى قبله واللى قبله لحد مانوصل للزمن اللى الواحد لما كان بيحب يوصل معلومه لواحد فى الجزائر مثلا كان يطخ مشوار صغير قيمة سنتين بالحصان بتاعه ويديله المعلومه ويرجع تانى على طول
مين بأه كان بيتحمل المسؤليه اكتر ؟؟ الجيل ده ولا اللى قبله ولا اللى قبله ؟
متقوليش العيب على المجتمع عشان كل الناس بتقول العيب على المجتمع .. طيب مين بأه المجتمع ؟؟ مش انا وانتى والجيران واصحابنا والناس كلهم ؟مش هوا ده المجتمع ؟ طولت عليكى بس فعلا الحياه كده ودوام الحال من المحال ولازم الفرد يبدأ من نفسه علشان المجتمع يكون احسن مع مراعاة الظروف المحيطه اقتصاديا واجتماعيا وسياسيا وثقافيا وماديا وكده تبقى باظت الطبخه عشان الظروف طبعا نيله

ريمان said...

ههههههههههههههههههه


حلوه اوى صوره البت اللى بتخربش جوزها دى


ههههههههههههههه


شكلها قطعت وشه تقطيييييييع

هههههههههههههههه

معاكى حق والله


احنا بنحزن على النماذج اللى بنشوها القوتى

بس والله بجد الغلط من الاباء فى اساليب التربيه اللى بيستخدموها

بقولك ايه

عايزه اتكلم معاكى فى حاجه كده انتى مش بتدخلى ع الميل لييييييه
؟؟؟؟؟؟؟

Empress appy said...

اممممممممممممممم الجيل انهى جيل اللى طلع على ايه وراح فين
انتى ليه عاوزة الناس تزعل منى يا سمسمه
كده برضه
يعنى ابعبع ما انتى فاهمه راى كويس
وعموما انتى كويسه قولتى الصح او اللى فى بالى
على فكره معلومه فيه ناس اغنياء جدا جاد ومربين ولادهم على تحمل المسئولية كويس اوى ورجاله بجد
مش عيال مايصه

موناليزا said...

الغريب ان غالبية البنات بيفكروا كدا فعلا
والشباب لايهتمون

mahasen saber said...

سالى الجميله كل اليى ذكرتيه صح يا حبيبتى بس سوء التربيه مش قاصر على ابناء الاغنيا فقط وانما فيه ناس دخلهم محدود وبتلاقى اولادهم مشروع ومشاريع للانحراف السلوكى بشتى انواعه

بس كل اليى ااقدر ااقوله ربنا يقوينا على تربية ابنائنا صح فى ظل الحياه السريعه ومغرياتها الكتير وقيمها اليى بدأت تندثر دى

mahasen saber said...

عملت ايه يا قمر دمياط فى موضوع امبارح

اتصلت عليكى

يا رب يكون خير ان شاء الله

بوسه كبيره كبيره كبيره لبوده من خالته

Unknown said...

طيب زي ما الشباب متحمل كل الاخطاء دي و بقي اشباه رجال و مش مقنعين كازواج

يا تري بقي البنات ملايكة و معليهمش اي مسئولية ؟؟؟؟؟

كان نفسي تتناولي النقطة دي في موضوعك


و بعدين فين انا في الريدر عندككككككككككك؟

aidy said...

فعلا الحالة العامة فيها اكتر من كده بكتير

كمان لو تلاحظى ان المبادئ نفسها اتغيرت
كان الاول الشهامة والمروءة صفة متلازمة مع الرجل لكن دلوقتى بقي الجرى نص الجدعنة

ده دلوقتى لو بنت حد بيعاكسها الناس بتخاف تتكلم


احنا محتاجين حد يعرف اسباب المشكلة فين
عشان يقدر يخرج حلول ميبقاش مجرد كلام وخلاص

تحياتى ,,

mohamed ghalia said...

فعلا مشكلة
ربنا يهدى شبابنا
ويعنا على تربيتهم

Unknown said...

3eb 3aleky ya sally !
kol el 7ekaya eny ebtadet adwen bel3araby orayeb awy

we 3amel modawana sha5seya we lesa gededa fa 2l2an mn gehet el zowar la2n el reader we el comments 7aleyan homa asas el visitors we homa elly haye7komo akamel wala la2

laken ana mesh batehmek wala 7aga ! la sama7 allah

ana met3awed 3ala el tadwen bel english we makontish al2an mn el zeyarat la2n kol modawana kan leha mawdo3 mo7adad we beygely zowar mn el search engines we makontish aslan basma7 b ay ta3lee2 feha wala kont ba7ot ay tabadol rawabet

o3zoreny lesa geded 3ala nezam el 3araby da ( 3'asheem )

we mabrook 3ala el sora el gededa:D

Unknown said...

السلام عليكم

ازيك اولا

ثانيا وحشتني مدونتك كتير


ثالثا بقي اسمحيلي اتفق معاكي في كل الكلام اللي قلتيه

لكن هختلف معاكي في نقطه صغيره بس



وهو انك خانك التعبير وكنتي طول البوست بتتكلمي عن الرجل

ومن وجهة نظري المفروض كنتي تقولي ذكر


لأن القاعده
ان كل الرجال ذكور
وليس كل الذكور رجال

لا يستحق لقب رجل الا القليل
اتمني ان اكون منهم


اتمني يكون القصد وصلك


ودمتي موفقة


اخوكي
برقش

بـِصَمتـِـ أميرة ــــى said...

هو زى ماانتى قولتى تمام شباب سيس وكمان ادب سيس
يابنتى جيل البناطيل الفانكى والبانجو مش بتاعى وهيفا وتسمحلى ادلعك مايطلعش لا ازواج ولا اباء
مطلع حاجة لتشيفه كدة مبشره بان الرجالة هى اللى هتعنس والراجل اللى بجد بقى عمله نادرة جدا
تقبلى انبهارى باسلوبك
هجيلك تانى اكيد
أميرة
ملكة بحجابى

همس الاحباب said...

دمتى مبدعة اختى العزيزة
فانا متفق معكى قلبا وقالبا
كل ما ذكرتيه حقائق واقعة
سوء التربية افة المجتمع
وعدم المسئولية كارثة مزمنة
ولابد من الاهتمام بتربية الابناء
لانهم شباب اليوم ورجال الغد
تحياتى وتقديرى

Anonymous said...

انا معاكى فى كل كلمه قولتيها
وفعلا نحن فى أمس الحاجه
للصدق مع انفسنا
اذا اردنا النصر والتقدم
لا خيار لنا الا الاجيال
قرأت من فتره
موضوع عن كتاب أسمه امه فى خطر
كانوا بتكلموا فيه عن احوال الشعب الامريكى وان الشاب الامريكى اهمل الجامعه وهمل العلم وتفرغ الساندوتشات
وان الكثير من ابناء الجامعات لا يكتبون بطريقه صحيحه
وتكرر هذا الموقف فى انجلترا
ورأى علماء الاجتماع وعلماء التعليم
انه لا أمل الا فى الصغار
هذه النبته التى نبذرها
هى الامل
وبدأ فى النظر فى تعليم الصغار وبدأو فى تطويرها
واعدوا لهم فى التلفاز برامج تعليميه مسليه
مثل الكارتون والشخصيات الشهيره منها
انا بتكلم عن جزء واحد هنا
انا بتكلم نظره الغرب للطفل
هى نظره للمستقبل
فهم يؤمنون بأن أطفالهم هم الامل
ونحن مازلنا
لاندرك هذااااااااا


يحيى الحكيم

عاشقه الرومانسيه said...

انا بقالى كتير مش باجى هنا
وجيت اعتذر
هتقبلى اعتذارى؟

(:
هارجع تانى علشان اعلق على البوست

بحبك

Tamer Nabil Moussa said...

السلام عليكم

المشكلة مشكلة مجتمع

ظروف صعبة ومنها جو غير نظيف سواء اجتماعى او سياسى


مشكلة عايزة حل وايد واحدة من المجتمع باكملة


تحياتى

rtrcbh said...

السلام عليكم ورحمه الله وبركاته

السادة الأفاضل زوار مدونتي الأعزاء ، أساتذتي الفضلاء ، إخوتي من المدونين والمدونات ،أصدقائي الأعزاء
تحية طيبة وبعد
أتشرف بدعوتكم اليوم إلى زيارة مدونتي ( مدونة ادم ويحيى ) وذلك بصفتكم أحد الشركاء الأساسين فيها بآرائكم وتعليقاتكم على موضوعاتها وزيارتكم لها
لحضور ندوة بعنوان

( ادم ويحيى ، تجربة تدوين )

اليوم هو استفتاء على تجربة تدوين

اليوم نعرف من هو أبو يحيى وادم وكذلك ادم ويحيى من هم ومن والدتهم

اليوم نعرف حقيقة هذه المدونة وما هي رسالتها الحقيقة وهدفها

اليوم رسالة اعتذار لكم عن بعض الأمور

اليوم رسالة شكر من كل قلبي على أمور أخرى

اليوم استفتاء حول منهج مدونة ادم ويحيى

اليوم هو رسالة منكم لي حول ما طالعتموه بيوم من الأيام بهذه المدونة
فأرجوا أن لا تبخلوا على بتعليقكم على هذه ألتدوينه
في انتظار زيارتكم
والسلام عليكم ورحمة الله وبركاته
د/أبو يحيى وادم

Unknown said...

السلام عليكم ورحمة
الله تعالى وبركاته
كل ما افكر ان جيل ثانوى واعدادى سواء البنات او البنين وبعيد عن عقبات الزواج كل ما افكر انهم حيكونوا اباء وامهات بعد نقولمثلا 7-10سنين اتخض طب ازاى؟حيربوا عيالهم بايه؟وكيف؟ربنا يرحمنا .عارفة لما بكون ماشية من اداممجموعة من طلبة ثانوى سواء ولاد او بنات ببعد على قدر الامكان انتى مش ضامنه ممكن يعملو ايه وقت ما هم عايزين وابقى دورى على اللى يجيب لك حقك:(
ربنا يرحمنا ياسالى يارب.

Unknown said...

مش حأنسى ادعيلك واحنا يوم الجمعة
ربنا يخليلك احبابك كلهم (الواد ابو الواد واخوات الواد إن شاء الله)
ربنا يحميكم جميعا يارب.

أبو العريف said...

للأسف كلامك تمام
والجيل اللي احنا فيه دا ما يعلم بيه الا ربنا
واكيد الحياه السهله
والامكانيات المتوفره مش هي السبب
لان فيه بلاد زي اليابان امكانياتهم اعلي وحياتهم اسهل لكن بيقدسو العمل والنظام وبالتالي اكيد بتلاقي فيهم الاب والزوج اللي بيتحمل المسؤليه
المشكله في التربيه لان دايما اباءنا
مش عايزينا نتعب ونشيل المسؤليه زيهم
ودا طبعا خطأ كبير

أم أحمد المصرية said...

سمعت كلامك و رجعت حبيبتي
بجد وحشتوني
في انتظاركم تزوروني

Unknown said...

الله ينور
بوست هايل ومدونة رائعة أهنيكي عليها
وفعلا في مشكلة عندنا مشكلة تربية
احنا جيل متربناش
والأباء راحو الخليج وأوربا يجيبوا الفلوس لنا ونسوا أهم حاجة وهي
يربونا
الله ينور ومستني رد الزيارة

ويبقى التواصل

Anonymous said...

رائعة ... فعلاً الجيل محتاج تربية جديدة

انا منهم

بس لله المستعان

Soul.o0o.Whisper said...

سالى الجميلة

أولا وحشتينى أوىىىىىىىىىى

ثانيا معلش على التأخير حبيبتى يارب مش تكونى زعلانة


ثالثا موضوعك مهم جدا جدا يا سالى والله
و اد ايه شاغل تفكيرى جداااااااااااا

بصى يا سالى مش نقدر نقول الاباء فقط اللى غلطانين و لا الابناء بردوا اللى غلطانين

لما بأقعد اتكلم مع ناس كبيرة فى السن و اولادهم يعنى مش بالشكل المرجو
يقولولى بكل حسرة
ماكناش عاوزينهم يعيشوا الايام اللى عشناها و لا يتحرموا من حاجة
لكن للاسف أخدوا انهم لما يطلبوا تجاب اوامرهم و مش يدوا

و للاسف طلع الجيل دا
و الدراسة الحديثة بتؤكد ان 96% من قيم و شخصية الانسان بتتشكل خلال ال6 سنين الاولى لحياته و توصل ل99% تقريبا وهو 8 سنين
ثم ال1% خلال المراهقة

عشان كدا أكبر غلط بنعمله فى حياتنا اننا نسيب الاولاد لحد 20 أو أحيانا25 و نقول لسه صغيرين
صغيرين ايه؟؟؟
دول خلاص شخصيتهم أتكونت و بئت كدا خلاص
فعلا آباء كتير جنوا على اولادهم من منطلق الدلع و لسه صغيرين

و لنا فى رسول الله صل الله عليه و سلم الاسوة الحسنة لما قال علموهم الصلاة لسبع
و دا مش للصلاةبس بل هى لكل شئ فى حياتنا.. التعليم لحد 7
و بعدين اضربوهم عليها لعشر
لأن كدا تقريبا خلاص شخصيته اتكونت فالغلط قومه قبل ما ياخد عليه للابد
و بعد كدا بيكون كل اللى عليك صداقتهم لان بعد كدا هو خلاص مش هيسمع كلام حد غير اللى هو مقتنع بيه

و بكدا لو البذرة اللى جواه صح لما يغلط بعد كداو تقومه
فطرته السليمة هتقوله فعلا كدا غلط و ترده للصح و مش هيكون صعب عليه
لكن لما تكون البذرة غلط فأنت بتتكلم مع مين؟؟


لكن بردوا الشباب عليه جزء من المسئولية لان بعد ما بلغ و أصبح يدرك الصح و الغلط و الحلال و الحرام
أصبح مكلف
و هيتحاسب حتى لو كانت بذرته غلط
صحيح هيكون صعب عليه جدا
و ممكن يحاول و يفشل أكتر من مرة
لكن لنا فى جيل الصحابة الاسوة
و هم الذين تحولوا للاسلام على كبر
و قول رسول الله صل الله عليه و سلم
" إنما العلم بالتعلم و إنما الحلم بالتحلم و إنما الصبر بالتصبر"
يعنى واحدة واحدة نوصل إن شاء الله


لكن نيجى لمشكلة اكبر
أين المعلم؟؟؟
إذا كان الاباء الان و ارجو المعذرة
غير مؤهلين لتربية أولاد
فالاب يكدح طول النهار خارج البيت
و الام اما فى الشغل فترة الصباح و لما ترجع البيت ذاكر يا واد ذاكرى يا بت
و إذا كانوا اصغر فهما مع تيته اللى مدلعاهم على الاخر

او الام فى البيت و لا يشغل بالها إلا جاراتها أو حتى تلبية حاجات الطفل دون أن تعى أن عليها أن تبنى شخصيته خلال هذه الفترة

بصراحة يا سالى الموضوع عاوز وقفة كبيرة اوىىى
و قناعة من داخل كل فرد فينا انه لازم يتغير و يقتنع بالصح و يعمله


معلش عارفة إنى طولت عليكى اوى اوى
بس موضوعك مهم اوى و شاغلنى فعلا جدا

دمتى بكل ود و حب يا جميلة

ذو الوجه المبتسم said...

السلام عليكم
بصراحة الموضوع جميل جدا
واتمنى لو كل الشباب يقروه
ويستفيدو من الكلام ده
لكن بصراحة
كم شاب ممكن يتغير
كم شاب ممكن ينصلح حاله
كم شاب ممكن يتحمل المسئولية
البوست بتاعك ده من واقع الحياة فعلا
ربنا يهدينا جميعا الى ما يحبه ويرضاه
تقبلى تحياتى

تامر علي said...

أنا متفق طبعاً مع الكلام ده ... لكن هناك عوامل اخرى ...مثلاً العوامل الاقتصادية المتدنية جعلت عائلات كثيرة تهاجر لطلب المال وتترك الأولاد بدون رقابة ... وكذلك انتشار الفكر المادي "اللي معاه قرش = قرش " كل هذه العوامل انخرط فيها المجتمع بكل فئاته العمرية وليس الشباب فقط مما أدى إلى تدهور الحالة الأخلاقية للمجتمع ككل .

موضوع خطير فعلاً

تحياتي وتقديري

د.توكل مسعود said...

حاجات جوايا
السلام عليكم ورحمة الله... وبعد

فلا أدرى كيف أشكركم ... ولا أستطيع ذلك... ولكنى أكل إلى الله شكركم.... ولعل عمق الأخوة.. وصدق الحب.... وإخلاص الدعاء... كانوا جميعا وراء هذه الانفراجة السريعة التى لم أتوقعها ولم تحدث معى من قبل......جزاكم الله خيرا وأحسن الله إليكم.

simple girl.. ..simple dream said...

انا فعلا شدنى اسم مدونتك لان كان عندى مدونة سابقة تحمل اسم " حاجات ملخبطة جوايا" والتشابه بين الاسمين خلانى ادخل عندك واقرالك

بصى انت اتكلمتى فى موضوع حساس جدا وعندك حق فى كلمة
لازم الام تعى وهى بتربى ابنها انها امانة ومسؤلية
الموضوع مش اكل وشرب وخلاص
التربية اكبر من كدة بكتير

جنّي said...

السلام عليكم

موضوعك رائع .. شخص أهم مشاكل مجتمعنا ومستقبله لان الشباب هم مستقبل بلادنا .. وهناك اسباب كثيرة لهذا التغير منها البيت والمدرسة والاعلام وحتى المسجد وهناك وسائل الاتصال الحديثة التي تحولت لاداة افساد اكثر من اي شئ آخر .. والعولمة والنت وتقليد الغرب في الجوانب السيئة فقط ..
لذا يجب علينا الكثير في الزود عن مجتمعنا والبحث عن اوجه العلاج وليتك تفردي لنا بوست عن العلاج ..

دعواتك لي بتمام الشفاء

محمد فارس said...

الاخت الغاليه والعزيزه سالي
اشكرك جدا علي سؤالك
انا بخير والحمد لله

ولكنها مشكلة الوصله (وصلة النت)0
انا اسف جدا في التاخير علي التعليق
جيل الاباء واباء الجيل
انا ظني ان الحياه الاقتصاديه المتدنيه
للفقراء مما تسبب عن انشغال الاباء بالعمل ليل نهار لتستمر الحياه بالنسبه لهم
اما الاغنياء
كثرة الدلال والدلع والتكنولوجيا
الحديثه والسفر الدائم للاباء للخارج
مع توفير كل وسائل الانحراف بلا وعي خلقت من ابناء هذا الجيل او بعضهم
من تتحدثين عنهم بموضوعك الهام
كفانا الله ما ابتلاهم به
مع تمنياتي لك بالسعاده

المنسى said...

السلام عليكم ورحمة الله وبركاته
أولا إزيك أختى الفاضلة وعاملة إيه
يارب تكونى بخير
ثانيا متشكر جدا على سؤالك أسعدنى جدا
ثالثا انا كويس والحمد لله بس الدراسة وعدم توافر النت بشكل دائم هما سبب إبتعادى عن التدوين
رابعا : محتاج دعائك جدا ياريت تدعيلى بجد
خامسا: إعذرينى على عدم قرأة موضوعك لضيق الوقت وإنشغالى فى إمتحانات الميد تيرم
دعواتك بقى
مش هوصيكى
ربنا يوفقك إلى ما يحب ويرضى
أخوكى : المنسى

مجداوية said...

السلام عليكم


أختنا الكريمة أم مصرية تناولت الحياة عموما في مصر وما أصابها من تدهور والشباب جزء من هذا التدهور وعلقت عندها بأن مصر محتلة فبعد أن فشل الاحتلال العسكري لها لأنهم يعلمون تماما أن الشعب المصري قاهر المحتلين فلجأوا الى احتلالنا ثقافيا واخلاقيا واجتماعيا وللاسف نجحوا في ذلك لأن من ساعدهم على هذا الاحتلال السلمي هم عناصر الفساد في بلادنا

ما ذكرتيه عن الشباب وما آل اليه هو نتيجة هذا الاحتلال فقد أفسدوه باليأس والبطالة والمخدرات والغرائز ومن نجحوا في الافلات منهم أخرسوهم حتى لا يقوم لهم قائمة أما الأباء فقد نزعوا منهم النخوة بمعاهدة الاستسلام وربطوهم في ساقية الرزق وتحقيق طلبات الأبناء ما ترينه حاليا نتاج معاهدة الاستسلام وهي من ضمن عوامل الاحتلال لنا

الذي يجعل الاحتلال يدوم هو بقاء الفساد وغفلة الشعب المصري الذي لم يع
بعد أنه محتل

موضع قيم جدا وواقعي جدا ومؤلم جدا

mostafa rayan said...

سالي اسمحيلي ابدا معاكي من الاخر الشاب البيسيط اللي بيحمل اهله فوق طاقته علشانيظهر قدام الاغنياء اصحابه مين اللي دفعه لكدة مش المجتمع اللي بقي بيبص للناس بنظرية اللي معاه قرش يساوي قرش اللي معاه عشرة يساوي عشرة
الشباب دة مظلوم قوي البلد مادتلوش حاجة علشان يحبها
لا علمته صح والاكل ملوث ومتسرطن والهواء اللي بيتنفسو مليان بلاوي ومافيش شغل واي شغل حتى لو حارس امن يقولك لازم خبرة خمس سنين يعني اللي ماعندوش خبرة يورح يموت ويندفن بالحياة الجيل السابق دة البلد ادتله حاجات كتير قوي ايام عبد الناص كان فيه مصانع وثورة و امتلاك اراضي زراعية والسادات عمل انفتاح وماصانع اتنبت وناس اشتغلت ورغم كدة الناس دي سابت البلدوراحت بلادالدولاروالريال وبعدكدة بيوقوللك على الشباب ماعندوش انتماء ومش عارف ايه طيب انت يا عم المنتمي ماقعتدش في بلدك ليه
حتى اللي ماسكين دلوقتي هما الجيل اللي فات اللي مش عايز يدي الشباب دة فرصته
الموضوع كبير قوي يا سالي
تحياتي ليكي دايما

شاب كــ طخين ـــــا said...

مش عارف حوار مقارنه الأجيال ببعضها ده
بيكون غير منطقى خالص
يعنى الجيل الاحضرتك ذكرتيه انهم الراجال وان من بعدهم الرجاله انقرضو او أتأسرو فى 73
هو ده نفس الجيل بتاع بناطيل الشلستون ورقصات السمبا والعيله الاسبور والامسبورش

فيه فيلم بتاع ليلى مراد ومحمد فوزى لما كان طيار وكان خالة عايزة يخليها تحبة علشان يثبتو ان اخلاقها تعبانه وكده
المهم يعنى فى الفيلم ده
خال محمد فوزى الراجل الضخم ده بيقولهم
انتو جيل هايف مش متحمل المسوليه
وابنه بيرد عليه يقوله احنا فى القرن العشرين خليك اسبور

والكلام ده من قرن فات :D:D

اسف طبعا على التطويل وعلى الفيلم الخنيق ده
بس بجد حوار اننا جيل فاشل ومبنقدرش المسؤاليه والحاجات دى مستفز اوى


_____________

ومعلش كمان مرة كلمتين بردو ماسكين فى الكيبورد

حضرتك الجيل الاقولتى عليه لما انتصر فى اكتوبر او اى حاجه تانيه علشان كان فيه هدف محدد لهم وكله اشتغل عليه
واظن ده طبع فينا

لكن احنا مفيش اى مشروع قومى حتى يخلينا نحس اننا بنعمل حاجه كويسه او وصلنا لنتيجه نمسكها بأيدنا
ده اكبر انجاز الحكومة او البلد عملته انها جمعت الناس فى 2006 فى استاد القاهرة


_____________

بوست رائع
تقبلى تحياتى
سلاااااااااام

Mafrousa said...

انا جيت
انا جاية اقولك انا هنا
لابدالكم فى الدرةى
هههههههههههههههه
حروح فين يعنى
بس الفكرة ان الجو بدأ يحرر و انا مش طايقه نفسي اصلا
و كم الحاجات اللى تفرس مخلياني مش عارفه انطق
ههههههههههههههههههه
و بيني و بينك بلعب على الفيس بوك لعبة حلوة
بتخليني ابطل فرسة شوية
هههههههههههههههههههههه
تحياتي ليكي يا قمرة

Unknown said...

سالي فين البوست الجديد !؟!؟!؟!؟!؟
كمان ايه هو محدش شايف تهديدي اللي في المدونة ولا العداد التنازلي !!!!!؟؟؟؟؟؟

انا بالنسبة ليا علاقاتي علي النت دي مهمة جدا لأني عرفت ناس محترمة جدا جدا جدا و اصدقاء لحد دلوقتي ! من 7 سنين و اغلبهم بنات !!!

مـجـنـووون said...

بجد موضوع في منتهي الروعة وانا قريته من أوله لأخره

طبعا كل الكلام الي قولتيه صحيح بس أحب أنوه علي حاجه

الناس ايام زمان مكنش في بالهم أي حاجه غير الاكل والشرب وكانت دمغهم فاضيه

يعني كانوا بينامو من المغرب وكنت الحياة نقية وبسيطة ومفهاش تعقيد خالص وكانت الاسعار مش غاليه وكان الواحد ممكن يتجوز في عشه

بس الشاب الايام دي اول ما يفكر في الاستقرار لازم يشتغل دماغه في ألف حاجه

1- شقة
2- عفش
3- مهر وذهب
4- فرح

بالله عليكي مش عيزاهم يتعقدوا

بالله عليكي انتي ترضي بواحد ميكنش عنده الحاجات دي

كان ايام زمان بيشتروا راجل ومش مهم الفلوس ولا اي حاجه

لكن دلوقتي بيشتروا الحاجات دي ويسيبوا الراجل

تقبلي مروري
مجنووون

assafo anaroze said...

حاجات جوايا
مقال و كلمات تشخيصية لكن ربما تتحدثين عن طبقة معينة طبقة الفئات المتوسطة او الغنية اللي بتعيش في نغنغة و بحبوحة ورفاهية
سيدتي في شباب فقير من عائلات فقيرة لا تعرف عن كل الذين تتحدثين عنه شباب كل همه البحث عن لقمة خبز ليسد بها رمق جيش من الافواه
سيدتي تتحدثين عن شباب مدلل من طرف الاباء كيف لفئة مثل هذه التي اتحدث عنها ان تكون مدللة كيف وواقع حالها الجوع و الفقر و الاقصاء و التهميش لا اظن
سيدتي اذا كان هنالك من يستحق العقاب و الحساب فهو النظام الحاكم الذي اوصل البلاد الى السكتة القلبية من فقر مدقع و جوع و غلاء الاسعار و ديكتاتورية نظام لا يسمح بممارسة الحقوق الديمقراطية و السياسية و لا يوفر لهم ابسط ضروريات العيش
سيدتي اتمنى ان يصلك ما اريده
و الاختلاف لا يفسد للود قضية
مودتي

حاجات جوايا said...

صيدلانية طالعة نازلة
--------------------
اهلا يا قمر
أكيد صح
مش انتى بس اللى لامساه للأسف
معظم اللى حوالينا كده
والولاد بياخدوا كل حاجة عالجاهز من اول الشقة للعفش للعروسة
واى محك حقيقى بالمشاكل بيظهر درجة الهشاشة وقلة الصبر والرغبة فى الاعتمادية على أى حد يشيل عنهم المسئولية

نورتينى يا قمر

حاجات جوايا said...

محمد عتلم
---------
أهلا بك اخى الفاضل
صحيح جيلنا فيه تكنولوجيا بدرجة اكبر من الاجيال السابقة
وعشان كده الاولى اننا نبقى افضل
وعشان أكون منصفة .. فيه طبعا فى الجيل الحالى ناس واعية وفاهمة ومدركة لمسئولياتها وحقوقها وواجباتها وبتبذل كل جهدها وعلمها لخدمة مجتمعها وتنمية قدراتها
لكن للاسف انهم قلة
والغالبية مكبرين دماغهم وعايشين وخلاص


وكده تبقى باظت الطبخه عشان الظروف طبعا نيله
:)
صح
ربنا المعين بقى

نورتنى أخى الفاضل

حاجات جوايا said...

ريمان
--------
أهلا يا قمر
ههههههههههههه
ده تلاقيه دلوقت فى القصر العينى ... ياعينى
ههههههههههههههه

للأسف الغلط منظومة متكاملة
ربنا يصلح الحال

نورتينى يا قمر

حاجات جوايا said...

appy
-------
اهلا يا جميلة
هههههههههه
لا مش عايزين نزعل حد
اكيد طبعا
انا مقصدش اولاد الاغنياء بس
حتى الفقراء فيهم الصفات دى برضه
المشكلة مشكلة تربية وتعود ومسئولية
مش مشكلة طبقة اجتماعية
بس اكيد بتظهر اكتر فى الاغنياء

نورتينى يا قمر

حاجات جوايا said...

موناليزا
-------------
أهلا يا حبيبتى
فعلا غريب والله
نورتينى يا قمر

حاجات جوايا said...

mahasen saber
--------------
أهلا يا قمرى
عندك حق طبعا وانا كمان أقصد كده
التدليل موجود فى كل الطبقات حتى الطبقة الكادحة

ربنا يسمع منك يارب ويقدرنا على حسن التربية
ولو انى خايفة جدا م الجيل الصاعد اللى ماسكين الموبايل من الكى جى


انتى عارفة بقى انا عملت ايه :)

نورتينى يا قمر

حاجات جوايا said...

طعميه سخنة
----------
اهلا بك اخى الفاضل
البنات طبعا ملايكه عندك اعتراض ولا ايه
:)

بجد بقى
البنات من طبيعتهم الدلع اصلا والاعتماد على الرجل سواء كان اب او اخ او زوج او حتى ابن
يعنى ده شئ ميعيبهومش
ورغم كده فيه بنات كتير بتسد فى المواقف الجادة وبيبقوا بميت راجل وقت اللزوم
والدليل ان الامهات اقدر على تربية الابناء من الاباء .. حتى فى عدم وجود الاب لظروف سفر او انفصال او وفاة
وده شئ نادر فى الرجل عموما

نورتنى أخى الفاضل

حاجات جوايا said...

aidy
--------
أهلا يا جميلة
فعلا الاخلاق اتغيرت كتير جدا
والندالة بقت طابع مميز
بينى وبينك انا شايفة ان السبب هو النظام الحاكم
يعنى لولا كمية الاحباطات وسوء المعيشة مكنتش ظهرت الانانية وكل واحد عايز ينجو بنفسه وبس
ولولا الظلم السائد مكنتش ظهرت الكوسة ولا اتزرعت فى البلد دى اصلا
ولولا ولولا ولولا ..حاجات كتير جدا
كلها محتاجة حل
مش باضراب
لكن باصلاح
والحل صعب وبعيد

ربنا يرحمنا
نورتينى يا جميلة

حاجات جوايا said...

mohammed ghalia
---------------
أهلا بك أخى الفاضل
يااااااااارب
ربنا يسمع منك
ويقدرنا نلحق الاجيال الجاية

نورتنى أخى الفاضل

حاجات جوايا said...

طعميه سخنة
----------
أهلا بك أخى الفاضل
ولا يهمك يا فندم
اعذرنى انا بس استغربت الموضوع لأنه مش متداول
منور التدوين العربى ومبروك عالريدر
والله يبارك فيك على الصورة

نورتنى أخى الفاضل

حاجات جوايا said...

bar2ash
-----------
أهلا بك اخى الفاضل
انا بخير الحمد لله
عندك حق برضه ليس كل الذكور رجال
خانى التعبير فعلا

نورتنى اخى الفاضل

حاجات جوايا said...

ملكة بحجابى
----------
اهلا يا ميرو
ههههههههه
فعلا شباب سيس ادب سيس
جميل التعبير ده فعلا
واكيد النوع ده هيعنس
ربنا يخليكى حبيبتى
نورتينى يا ميرو

حاجات جوايا said...

همس الاحباب
--------------
اهلا بك أخى الفاضل
ربنا يكرمك يارب
فعلا المشكلة فى التربية
ربنا يقدرنا ونعرف نربى اولادنا صح وميبقوش شباب سيس

نورتنى اخى الفاضل

حاجات جوايا said...

يحيى الحكيم
-----------
اهلا بك أخى الفاضل
نورت بلوج سبوت
فعلا الامل فى الاجيال القادمة
بس يارب منرجعش نقول ان الجيل الحالى كان افضل منهم
دى تبقى كارثة بجد
ربنا يستر

نورتنى اخى الفاضل
اتمنى دوام التواصل

حاجات جوايا said...

عاشقة الرومانسية
-----------------
اهلا يا دودو
وحشتينى يا حبيبتى
اعتذارك مقبول طبعا من قبل ما تعتذرى
انتى صاحبة بيت

أنا كمان بحبك يا قمر
نورتينى يا حبيبتى

حاجات جوايا said...

tamer nabil
-------------
وعليكم السلام ورحمة الله وبركاته
أهلا بك اخى الفاضل
عندك حق طبعا
مشكلة عايزة حل وايد واحدة من المجتمع باكملة
بس تفتكر ده ممكن يحصل ؟؟
بصراحة لا اعتقد
ومش شايفة امل فى حاجة

نورتنى اخى الفاضل

حاجات جوايا said...

د/ ابو يحيى وآدم
-----------------
وعليكم السلام ورحمة الله وبركاته
أهلا بك اخى الفاضل
كل سنة ومدونتك طيبة وبخير

نورتنى اخى الفاضل

حاجات جوايا said...

norahaty
----------
وعليكم السلام ورحمة الله وبركاته
أهلا يا جميل
عندك حق الاساس فعلا غلط
فيه مهزلة تعليمية وتربوية فى المدارس
والطلبة فقدوا الاحترام بمن يكبرهم سنا
أيا كان اب او ام أو مدرس
ومحدش عارف يربيهم ولا حتى يعلمهم صح
ربنا يستر بجد

نورتينى يا نور

حاجات جوايا said...

norahaty
-----------
حبيبتى متحرمش منك أبدااااا يارب
ولكِ المثل يا غالية

حاجات جوايا said...

أبو العريف
-----------
أهلا بك اخى الفاضل
فعلا خطا كبيررررررر
لازم نتعب ونحاول ونخطئ ونصيب
مرة فى مرة هنتعلم
ونقدر نوصل للى احنا عايزينه
اللى بيجى سهل بيروح سهل من غير منحس بقيمته

الجيل الحالى طلع خلاص واللى كان كان
المهم ناخد بالنا بقى م الا جيال القادمة
دى مسئوليتنا كآباء وامهات متعلمين ومتعلمات

نورتنى اخى الفاضل

حاجات جوايا said...

أم احمد المصرية
-------------
القمر رجع تانى يا ولااااااااااااد
حمدا لله على السلامة يا حبيبتى
يارب تفضلى منورانا دايما ومتغيبيش تانى ابداااااااا

نورتينى يا قمر

حاجات جوايا said...

معتز شاهين
----------
أهلا بك اخى الفاضل
ربنا يكرمك يارب
الله ينور حياتك

وفعلا في مشكلة عندنا مشكلة تربية
احنا جيل متربناش
والأباء راحو الخليج وأوربا يجيبوا الفلوس لنا ونسوا أهم حاجة وهي
يربونا
-----------
ههههههههه
العفو يا فندم
انا مقصدش جيلك الحقيقة
جيلك وجيلى الى حد ما معقول
المشكلة فى الاجيال اللى بعد كده
ربنا يصلح الحال

نورتنى اخى الفاضل

حاجات جوايا said...

حجر كريم
-----------
أهلا بك اخى الفاضل
كل حد فينا يقدر يربى نفسه بنفسه
حتى لو الاهل مش سائلين فينا .. أو حتى بيدللونا زيادة عن اللزوم
طالما احنا كبار وفاهمين الصح م الغلط
يبقى منسايرش الموجة ونعمل اللى يرضى ربنا اولا ويرضي مجتمع العقلاء ثانيا ويرضينا ثالثا

نورتنى اخى الفاضل

حاجات جوايا said...

Soul.o0o.Whisper
------------------
أهلا يا قمر
وحشتينى يا سوووووول

تقريبا المشكلة ان الاباء معدش عندهم صبر للشد والجذب مع ابنائهم
عشان كده بيريحوا دماغهم ويعملولهم اللى هما عاوزينه عشان يخلصوا من الزن


المعلم فقد دوره التربوى من زمان يا حبيبتى
المعلم دلوقت بينضرب فى المدرس ويتبهدل وفى الاخر يشتكوه ويتوقف
دور المعلم بقى دور مرسوم لاكمال الصورة ليس إلا .. فمتعتقديش ابدا انه ممكن يكون قدوة لاى طالب فى الزمن ده

عندك حق التغير فعلا لازم يكون كلى وشامل

نورتينى يا جميلة

حاجات جوايا said...

ذو الوجه المبتسم
----------------
أهلا بك أخى الفاضل
شكرا ربنا يكرمك
مش المهم يقروه بقدر ما الاهم انهم ياخدوا بالهم من ان تصرفاتهم غلط ولازم يتغيروا .. ربنا يصلح حالهم وحال أولياء الأمور عشان يقدروا يربوا الجيل الجاى صح

نورتنى أخى الفاضل

حاجات جوايا said...

تامر على
---------
أهلا بك أخى الفاضل
انتشار الفكر المادي "اللي معاه قرش = قرش "

عندك حق فعلا .. دى من اهم اسباب المشكلة
كله عايز يظهر زى الاخر وافضل
عشان يكون مقدر اجتماعيا

فعلا خطير
وربنا يستر بجد

نورتنى أخى الفاضل

حاجات جوايا said...

د. توكل مسعود
-----------------
وعليكم السلام ورحمة الله وبركاته
حمدا لله على سلامتك أخى الفاضل وزوال الغمة
الشكر لله اولا واخيرا
دمت بخير وصحة

نورتنى أخى الفاضل

حاجات جوايا said...

simple girl.. ..simple dream
---------------------------------
أهلا يا جميل
أنا عارفة مدونتك فعلا وكنت علقت عندك قبل كده
انتى شيماء صح ؟
مدونتك مختفية ليه يا جميل
بتظبطيها ولا لغيتيها
فى انتظارها من جديد

بالنسبة لكلامك صح تمام
الام فعلا لازم تهتم كويس جدا بتربية ابنائها
ودى رسالتها الحقيقية فى الحياة

نورتينى يا قمر

حاجات جوايا said...

جنى
-----
وعليكم السلام ورحمة الله وبركاته
أهلا بك أخى الفاضل
أسأل الله ان تكون قد تماثلت للشفاء بفضل الله
والعلاج سيدى الفاضل يبدأ من مؤسسات التنشئة الاجتماعية باختلاف أدوارها ومستوياتها بدءا من المنزل وجماعة الأقران والمدرسة وانتهاءا بالمسجد ووسائل الاعلام المسئولة عن توجيه الشباب الا ما يستحق ان يؤخذ من العادات واردة الغرب وما لا يستحق
الحل يحتاج الى تضافر كل هذه المؤسسات
والذى ارى للاسف انه حلم بعيد

نورتنى أخى الفاضل

حاجات جوايا said...

محمد فارس
---------
أهلا بك اخى الفاضل
حمدا لله على السلامة .. الحمد لله انك بخير
لا شكر على واجب يا فندم

رؤية حضرتك صح جدا
فعلا للظروف الاقتصادية المتدنية عامل مؤثر فى المشكلة

لا حرمنا الله اطلالتك اخى الفاضل

حاجات جوايا said...

المنسى
-------
وعليكم السلام ورحمة الله وبركاته
أهلا بك اخى الفاضل
حمدا لله على السلامة
انا الحمد لله بخير شكرا لك
الحمد لله انك بخير وده الاهم
ربنا يوفقك فى امتحاناتك يارب وييسر لك كل عسير

نورتنى اخى الفاضل

حاجات جوايا said...

مجداوية
--------
وعليكم السلام ورحمة الله وبركاته
أهلا بكِ اختى الفاضلة
شكرا حبيبتى لثنائك على الموضوع
وجهة نظر حضرتك سليمة جدا احنا فعلا ما زلنا تحت وطئة الاحتلال
ليس الاحتلال العسكرى وإنما الاحتلال الفكرى والثقافى الذى هو اسوا بمراحل من الاحتلال العسكرى ويصعب التخلص منه إلا بإرادة شخصية قوية لكل فرد على حدى .. وللأسف هذا ليس واردا فى هذه الظروف الاقتصادية والثقافية السائدة

نورتينى اختى الفاضلة

حاجات جوايا said...

mostafa rayan
--------------
اهلا بك اخى الفاضل
عندك حق فعلا
وواضح ان فيه اجماع ان الاسباب مادية واقتصادية
بس قبل ما نقول الشباب خدوا ايه من البلد .. نقول اهلهم ربوهم ازاى ؟
للاسف ربوهم انهم ياخدوا وبس
من اى حد
ينتظروا الاخذ دايما من غير ما يفكروا هيدوا مين ولا يقدروا يدوا ايه ؟؟
الاهل برضه مسئولين منقدرش نبرأهم
بس مننكرش ان الاهل بقوا كده نتيجة للمجتمع وافكاره الغريبة
الموضوع بجد محتاج ثورة تصحيح
على كافة الاصعدة

نورتنى أخى الفاضل

حاجات جوايا said...

امبارح كان عمرى عشرين
----------------------
أهلا بك اخى الفاضل
طبعا انا آسفه جدااااااا ان الكلام استفذك .. لكن بعيدا عما يفعله السابقون واللاحقون .. ألا ترى ان الأمر أصبح أكثر استفزازا

صدقنى بلدنا فى حالة أشد من حالة الحرب ومحتاجة لكل ابنائها عشان تقدر تقاوم وتثبت نفسها و تنهض لتواكب التطور العالمى السريع واللحظى

نورتنى أخى الفاضل

حاجات جوايا said...

واحدة مفروسة
---------------
اهلا يا قمر
ههههههههه يارب دايما كده تفضلى لابدالنا فى الدره ههههههههه

أنا قلت راحت فين دى هو قلبها كان حاسس ولا ايه
ههههههههههههه

وبعدين لما انتى لاقيتى لعبة حلوة مش تشاركينا فيها ولا مبتفتكريناش غير فى الحاجات اللى تفرس بس
ههههههههههههه

نورتينى يا قمر

حاجات جوايا said...

طعميه سخنه
-------------
أهلا بك أخى الفاضل
البوست الجديد نزل الحمد لله
ما شاء الله ربنا يديم عليك صداقاتك

نورتنى اخى الفاضل

حاجات جوايا said...

مجنوووون
---------
أهلا بك اخى الفاضل
ربنا يكرمك يارب
ألف شكر يا فندم

أيام زمان كانت احلى كتير .. كان فيه احساس عالى بالمسئولية .. وكان فعلا العمل عبادة

دلوقتى محدش عايز يتعب نفسه فى الشغل اصلا ومرتاحين ان مفيش شغل وقاعدين فاضيين للتفاهات والتسكع والتحرش
مش كلهم طبعا .. بس العينة دى منها كتير للاسف

مش كل العائلات على فكرة بتهتم بالحاجات دى
لو اسرة البنت ميسورة الحال بتساعد الشاب لاقصى درجة صدقنى المهم الشاب المتقدم يكون يستاهل وشارى

اللى مش بيرضى فى الغالب مش بيقتنع ان الشاب ده يستاهل التضحية عشانه بالحاجات دى


نورتنى اخى الفاضل

حاجات جوايا said...

assafo anaroze
----------------
اهلا بك اخى الفاضل

مفيش اختلاف فى الرأى ولا حاجة
صدقنى اللى بقوله ده بيحصل فعلا فى طبقات فقيرة .. مش لازم يكون فى المظهر ( لبس وموبايلات ومنظرة ) لكن موجود فى الجوهر
فيه فراغ عقلى وخواء فكرى حتى رغم الجوع والفقر المدقع اللى المفروض يكون حافز للوصول لمكانة اعلى فى المجتمع
يمكن يكون سببه اليأس
وسبب اليأس طبعا الحال اللى احنا فيه
وسبب الحال طبعا معرووووووف

ربنا كبير

نورتنى اخى الفاضل

حاجات جوايا said...

شكرا لكم جميعا لمشاركتكم الرائعة

نورتونى وشرفتونى وأسعدتونى بحضوركم

سالى

Blackwell said...

simple girl.. ..simple dream --------------------------------- أهلا يا جميل أنا عارفة مدونتك فعلا وكنت علقت عندك قبل كده انتى شيماء صح ؟ مدونتك مختفية ليه يا جميل بتظبطيها ولا لغيتيها فى انتظارها من جديد بالنسبة لكلامك صح تمام الام فعلا لازم تهتم كويس جدا بتربية ابنائها ودى رسالتها الحقيقية فى الحياة نورتينى يا قمر





اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون


Free CursorsMyspace LayoutsMyspace Comments
كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.
 
Powered :blogger