حاجــــات جوايــا: الحلقة الثامنة " تحويشة العمـــــــر "

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Saturday, June 28, 2008

الحلقة الثامنة " تحويشة العمـــــــر "

(الحلقة (8

تحويشة العمـــــر

على منتدى " الصفوة " قهوة البؤساء سابقا

عايش : السلام عليكم يا حاج صبحى .. مبارك على التعديلات اللى عملتها فى القهوة دى

الحاج صبحى : وعليكم السلام ورحمة الله وبركاته .. الله يبارك فيك يا أستاذ عايش .. هنعمل إيه يعنى ؟ كل حاجة دلوقتى بتتغير .. اشمعنى احنا اللى هنفضل واقفين .. قلت اعمل للقهوة نيولوك زى ما بيقولوا وأخليها منتدى ههههههههه

عايش : هههههههههههه ماشى يا حاج .. وصفوة بقى ونظام وأضواء خافتة وموسيقى هاديه .. انت ناوى تصفى القهوة .. قصدى المنتدى من البؤساء ولا إيه ؟

الحاج صبحى : هههههههههه لكل وقت آذان يا أستاذ عايش .. وكل ما المكان يبقى أرقى .. كل ما زباينه برضه تبقى أرقى ورزقه يبقى أعلى .. بس ده مش معناه طبعا انى هصفى المنتدى من زباينه المحترمين حتى لو كانوا بؤساء .. كلنا بؤساء يا استاذ عايش

عايش : عندك حق يا حاج والله .. نظرية اقتصادية سليمة ميه فى الميه .. الواحد لازم يعمل اللى عليه ويطور من نفسه والأرزاق بيد الله أولا وأخيرا

الحاج صبحى : ونعم بالله .. وانت أخبار شغلك عند الحاج مصطفى ايه ؟

عايش : الحمد لله يا حاج ماشى الحال

الحاج صبحى : يارب دايما يا بنى .. وازاى الأستاذ عبده ؟ .. بقالى فترة كبيرة مشوفتوش

عايش : الحمد لله يا حاج والله .. زمانه جاى دلوقت .. كلمنى عالموبايل واتفقنا نتقابل هنا

الحاج صبحى : طيب خير .. ربنا يطمنا عليكوا يا بنى ويصلح أيامكوا .. تؤمرنى بحاجة ؟

عايش : متحرمش منك يا حاج اتفضل حضرتك متعطلش نفسك

الحاج صبحى : طيب عن إذنك يا ابنى .. السلام عليكم

عايش : وعليكم السلام ورحمة الله وبركاته

انصرف الحاج صبحى وجلس عايش يفكر فى كلمات هذا الرجل الذى يبدو بسيطا فى مظهره و لكنه عميقا فى خبرته وتفكيره وتعايشه مع الحياة

وأثناء ذلك قطع تفكيره صوت يقول : ايه يا عم روحت فين ؟؟ انت مش سامعنى ؟؟

انتبه عايش على الصوت والتفت إلى مصدره ليجده عبده طناش

عايش : أهلا يا عبده .. انت جيت .. حمدا لله على السلامة

عبده طناش : الله يسلمك يا عايش .. كنت بتفكر فى ايه ؟

عايش : أبدا .. بفكر فى حالنا واننا لسه واقفين محلك سر مش بنتقدم ولا خطوة وكل اللى بييجى بيروح

عبده طناش : انت هتقوللى على اللى بيروح ده ؟ ده بيروح حتى من قبل ما ييجى

عايش : إحنا لازم نعمل حاجة .. الشغل لوحده كده مش كفاية

عبده طناش : شغل ايه اللى مش كفاية يا عايش .. انت عايز تقتل نفسك ولا إيه ؟؟ ده انت يا ابنى بتشتغل من 10 الصبح لواحدة بالليل يوميا ما عدا يوم الاثنين .. عايز تشتغل تانى إمتى ؟

عايش : أنا بتكلم عالفلوس يا عبده .. تحويشة العمر .. عايز اعمل بها مشروع أو اى حاجة تزودها شوية

عبده طناش : وانت تضمن منين ان المشروع ده هينجح ومش هياخد تحويشة العمر ويطير ؟؟؟؟؟؟؟؟؟؟؟

عايش : لازم نجرب يا عبده .. لازم نغامر .. الرسول عليه الصلاة والسلام أمرنا بالتجارة .. لو حطينا فلوسنا جمبنا وقعدنا عمرها ما هتكسب ولا تزيد .. بالعكس دى قيمتها هتقل يوم عن يوم

عبده طناش : عليه الصلاة والسلام .. بس حكاية التجارة دى صعبة شوية خصوصا ان مفيش فائض رأس مال تتسند عليه .. يعنى هتغامر بكل فلوسك وتحولها لبضاعة وتفضل قاعد جنبها مش عارف هتروج ولا هتبور .. حاجة تخوف وتقلق

عايش : طالما راس المال حلال .. والبضاعة حلال .. وانت بتتاجر بالحلال عمرها ما هتبور ان شاء الله

عبده طناش : طب انت بتفكر فى مشروع ايه ؟؟

عايش : لغاية دلوقت لسه مش عارف .. بس هاقعد مع الحاجة كده إن شاء الله أشوف حوشتلى أد إيه وآخد رأيها وعلى الأساس ده اتوكل على الله وأبدأ فى اللى ربنا ييسرهولى

عبده طناش : ربنا معاك يا عايش .. ربنا معاك بجد

عايش : الله يكرمك .. وانت يا عبده هتعمل ايه ؟؟

عبده طناش : أنا بفكر احط فلوسى فى البورصة .. مكسبها سريع وكبير ومش محتاج تعب

عايش بفزع شديد : البورصة يا عبده !!!!!!!!!!!! .. بقى انت قاعد تخوفنى من التجارة وعايز ترمى فلوسك فى البورصة ؟؟؟؟ مين قالك ان مكسبها كبير وسريع ؟؟؟

عبده طناش : معايا واحد فى الشغل كان كحيان زى حالاتى ودخل البورصة وزهزهت معاه عالآخر .. جاب عربية وبيقسط لشقة تمليك ربنا يزيده

عايش : بس دى مش قاعدة .. صحيح فيه ناس بتزهزه معاها زى ما بتقول .. بس برضه فيه ناس بتبيع اللى وراها وقدامها بسبب البورصة دى .. يوم فى السما ويوم فى الأرض .. متتهورش يا عبده وتضيع فلوسك .. مش هتعرف تجيبهم تانى

ينظر إليه عبده طناش بنظرة توحى بالعزم والإصرار وهو يقول : لا لا هجرب ان شاء الله .. هخسر ايه يعنى .. يمكن تلعب معايا أنا كمان مين عارف .. مهو الشغل مش نافع .. والسفر مش نافع .. والجواز مش نافع .. ولو فكرت فى مشروع برضه مش نافع .. هعمل ايه يعنى ؟؟ مفيش قدامى إلا الحل ده ؟

عايش : انت تقدر بفلوسك تبدأ مشروع صغير .. بس انت اللى مش عايز .. كل اللى أقدر أقولهولك ربنا يسترها معاك وحاول على أد ما تقدر تسيب حاجة للزمن .. على رأى الحكمة اللى بتقول " لا تضع البيض كله فى سلة واحدة "

عبده طناش : ربنا يعمل اللى فيه الخير

عايش : اللهم آمين .. طيب انا هقوم بقى ألحق الحاج مصطفى أصله سبقنى عالمحل .. مش عايز منى حاجة يا عبده

عبده طناش : متحرمش منك يا عايش ربنا معاك .. مع السلامة

عايش : ومعاك يا عبده .. السلام عليكم

عبده طناش : وعليكم السلام ورحمة الله وبركاته

انتظرونا فى الحلقة القادمة ان شاء الله مع عايش وعبده طناش

دمتم بكل الخير

107 comments:

Empress appy said...: بجد حرام شدتنى قوى وعاوزة اعرف هيعمل ايه فى البورصه
بس والله فيها حكم
بس مش عارفه ليه بجد بتفكرنى بالمسلس الاذاعى وانا بقراها بجد
حلوة قوى; June 29, 2008 at 9:30 AM
حاجات جوايا said...: appyyy
~~~~~~
أهلا يا قمر
ادعيله ربنا يكرمه

بس اوعى تكون فكرتك بمسلسل عائلة مرزوق اللى بقالها ييجى 15 سنة شغالة دى
هههههههههههههههه
تسلميلى يا قمر كلك رقة والله
نورتيــــــــنى; June 29, 2008 at 2:56 PM
همس الاحباب said...: جميلة قوى يا سالى
بجد كل مرة بتزيدنا اشتياق ولهفة على الجديد
بس الحلقة دى عجبتنى قوى لانها بتناقش قضية مهمة جدا
واختلاف فى وجهات النظر
وبتهدف اننا نطور من انفسنا واعمالنا وبلاش نقف محلك سر
تسلم ايديكى
ودمتى دائما مبدعة; June 29, 2008 at 5:12 PM
مواطن مصرى نايم said...: الله بجد جميلة
بس القهوة دى تبعى مش تبع حد تانى
البورصة فى انتظار اخبارها
تحياتى
eslam; June 29, 2008 at 5:27 PM
حاجات جوايا said...: همس الأحباب
~~~~~~~~~
أهلا بك أخى الفاضل
ربنا يكرمك دايما رافع من معنوياتى كده ههههههههههههه
احنا عندنا شباب عقليته متفتحة وواعى ومثقف وماهر فى نواحى كتير بس المشكلة اننا مش بنطور نفسنا ومش بنحاول نتقدم وخدنا على الكسل
ربنا يصلح الحال واتمنى ان حكايات عايش وعبده طناش متكونش مجرد قصة نقراها وننساها بجد نفسى تعمل حاجة للشباب

نورتنى اخى الفاضل; June 29, 2008 at 5:30 PM
حاجات جوايا said...: مواطن مصرى نايم
~~~~~~~~~~~~~~~
اهلا بك اخى الفاضل
انت عايز تستحوذ على قهاوى البلد كلها ولا إيه ؟؟
وبعدين يا سيدى أدينى سيبتلك القهوة وقلبتها منتدى بدل ما تضربنى بطربيزة ولا كرسى ولا حاجة
وهمنع فيها التدخين والشيشة كمان
هه بقى
ههههههههههههههههه
تابعنى وان شاء الله هتعرف اخبار البورصة

نورتنى اخى الفاضل; June 29, 2008 at 5:40 PM
Unknown said...: ايه الجمال دى هى القهوه دى فين بالضبط علشان عايز أروح هناك أهوا أستفيد شويه من الحاج صبحى ولا الأستاذ عايش

ننظر التكمله

مصطفى; June 30, 2008 at 12:19 AM
على الزيبق said...: الدعوة لحظر الحزب الوطنى

لماذا لا نقوم بعمل حملة قومية من أجل حظر وحل ما يسمى بالحزب الوطنى
ولماذا لا نقوم برفع دعوى قضائية امام المحاكم المختصة
نتهم فيها الحزب الوطنى بأنه حزب يهدد الدستور ويعطل الدستور
وبأنه حزب يزور ارادة الشعب ويستغل ما لديه من سلطات ونفوذ من أجل البقاء فى الحكم لأجل غير مسمى

قد يقول قائل من الصعب أو من المستحيل أن يحدث هذا الأمر ومن المستحيل أن ننجح فى حظر الحزب الوطنى
وانا غرضى ليس حظر الحزب كأجراء قانونى .. وإن كان هذا ممكن .. ولكن غرضى هو مهاجمة هذا الحزب الفاسد الفاشى الفاشل المزور
مهاجمته قضائياً وشعبياً وإعلامياً
فلنتخيل سوياً هذا الخبر على صدر صفحات الجرائد وفى مقدمة النشرات الأخبارية
قوى حزبية وشعبية واعضاء معارضين بمجلس الشعب المصرى
يطالبون بحظر الحزب الوطنى الحاكم ومحاكمة اعضائه

ان مثل هذا الخبر كفيل بزلزلة عروش وقصور
هذا الخبر فقط يستطيع أن يفكك أوصال السادة اعضاء هذا الحزب وقياداته

اتمنى أن نناقش هذه الفكرة وأن نبحث فى سبل تحقيقها
والباب مفتوح لتقديم مقترحات وأفكار أخرى من أجل أنجاح هذه الفكرة
ومعاً من أجل حظر الحزب الوطنى ( الديمقراطى; June 30, 2008 at 12:59 AM
صباح الخير يا مصر said...: حاجات جوايا
***********
القصه حلوه و مسروده كويس اوي
بس اللى عايز اقوله :ربنا يكرم و يوفق كل انسان يريد ان يأكل حلال و يعيش مستور
وفى التجاره عبر كثيره فقد يجتهد الانسان و يسعى لموضوع معين حتى يصبح على يقين ان هذه الصفقه من نصيبه و فجأه يحدث غير ذلك...ولمن رضى بهذه النتيجه و لم يجزع الثواب الكبير
وبعد كده يلاقى صفقه تانيه مبعوته له من اتجاه لا يعرفه من عند ربنا لان الاساس هو السعى و الرزق من عند الله
فلا حيله فى الرزق و لا شفاعه فى الموت

و فى انتظار تكملة القصه عشان الموضوع شدنى
تحياتى; June 30, 2008 at 2:12 AM
المـــفـــــــقــــــــوعـــــة مــرارتـهــا said...: شعره هايبيض بدري لو دخل البورصة
دي عايزة واحد اعصابه في تلاجة; June 30, 2008 at 10:16 AM
الميكروباص said...: انا نفسي أعرف الآخررررررررررررررر
هايعمل ايييييييييييييه؟
هو تفكيره في البورصه يمكن يكون سليم
لأنها لو ضربت معاه هايطلع لفوق في لحظه
أصلها عامله زي القمار

لما نشوف هايعمل ايه; June 30, 2008 at 10:49 AM
admelmasry said...: بجد عندك كبيرة جدا علي السياق الدرامي بشكل يبهر
.
.
ماعرفشي بتكتبي سيناريوهات ولا لا .. بس انت عندك القدرة بشكل مبهر جدا
.
.
بحيكي ومنتظر جديدك
تحياتي والسلام
ادم المصري; June 30, 2008 at 1:19 PM
حاجات جوايا said...: egyboy
~~~~~~~
أهلا بك أخى الفاضل
الحقيقة القهوة دى موجودة فى مدونة حاجات جوايا بس هههههههههههه
ممكن تبقى تيجى تقعد معاهم كل شوية كده .. الدعوة عامة
نورتنى اخى الفاضل; June 30, 2008 at 1:40 PM
حاجات جوايا said...: على الزيبق
~~~~~~~~~~
!!!!!!!!
فكرة غريبة بصراحة
نورتنى اخى الفاضل; June 30, 2008 at 1:41 PM
حاجات جوايا said...: صباح الخير يا مصر
~~~~~~~~~~~~~~~~
أهلا بك اخى الفاضل
ربنا يكرمك جزاك الله خيرا
أنا متفقة جدا مع كلام حضرتك
بارك الله فيك

نورتنى اخى الفاضل; June 30, 2008 at 1:48 PM
حاجات جوايا said...: المفقوعة مرارتها
~~~~~~~~~~~~~~~
أهلا يا سحورة يا قمر إزززززيك
هو حر يا ستى
ربنا يسترها معاه بقى

نورتينى يا قمر; June 30, 2008 at 1:49 PM
حاجات جوايا said...: لورنس العرب
~~~~~~~~~~~~
أهلا بك اخى الفاضل
أدينا هنشوف
ادعييييييييييييييييله
ربنا يستر

نورتنى اخى الفاضل; June 30, 2008 at 1:58 PM
حاجات جوايا said...: آدم المصرى
~~~~~~~~~
أهلا بك اخى الفاضل
ربنا يكرمك على الكلام الجامد ده كله واللى انا مش أده خالص
لا مكتبتش سيناريوهات قبل كده كانت محاولات قصصية كده بس وانا فى ثانوى وتوقفت من يومها ورجعت بحكايات عايش وعبده طناش

ادعيــــله
نورتنى اخى الفاضل; June 30, 2008 at 2:05 PM
snohe said...: اسلوبك جميل
وبرافو لكل اهل دمياط
على نجاحهم
باى; June 30, 2008 at 9:02 PM
جنّي said...: بالله عليكي أوعي تخليهم يخسروا في البورصة دول ناس غلابة ..

--------------------------------

حبا فى رسول الله

نجتمع دائما معا لنطبق منهجه صلى الله عليه وسلم فى كافة أمور الدين والدنيا فنكن بإذن الله خير أمة أخرجت للناس كما وصف الله أمة خير الأنام فهل نكون خير أمة ؟؟
هل نلبى الدعوة لنجمع جهودنا ونصطف معا كالبنيان المرصوص و نشد بعضنا بعضا كلٌ فى مجاله بفكرة أو نصيحة أو مساهمة فعلية

هل نثبت حبنا لرسول الله فعلا لا قولا ؟؟

فالحب أفعال لا أقوال

هلموا معا نجتمع ونتفاعل ونصلح من شأننا كله

حباُ فى رسول الله

http://www.7obnferasolallah.blogspot.com

http://www.facebook.com/group.php?gid=18625528460

http://la3lahakhier-2.blogspot.com/

ساهم معنا ولو بوضع إعلان الحملة فى مدونتك; June 30, 2008 at 11:57 PM
المنسى said...: أولا حمدالله على السلامة
إيه الغياب ده كله

فعلا كل حاجة بقت مش نافعة
لا جواز ولالاشغل ولا دراسة

والناس بقت فى يأس تحت الفظيع

ههههههههه

بس الحكاية بدات تأخد طابع الجدية

الأول كانت بضحك

دلوقتى بقيت متجفز

ومنتظر النهاية
الواقعية

والمؤلمة

تحياتى; July 1, 2008 at 12:45 AM
Hosam Yahia حسام يحيى said...: بوست جميل اوى ماشاء الله

مبروك على التعديلات

:d

وننتظر عبده طناش لانه هوا اللى هيحل المشاكل على مااعتقد

لان الطناش هو الحل

:d; July 1, 2008 at 3:00 PM
فاتيما said...: اليأس بيقتل أى حذر جوه البنى آدم
حاسس إنها خسرانة خسرانة و العمر بيعدى
فبيعمل حركة تهور
لعل و عسى تجيبله الفرح
أما نشوف هيعمل إيه
بس عارفة مقدما
أنه راجع على جمل
معاه خيبةالآمل; July 1, 2008 at 7:45 PM
Mafrousa said...: لا حول الله
الناس عايزه تتغني ...يعني فكرة عايش يمكن احسن شويه فيهاامل شويه و توكل على الله
ان فلوسة حلال و الشغل حلال و التجارة حلال فربنا حيبارك
اما طناش افندي ربك يستر عليه من البورصه و العائد السريع
الناس مش عايزه تتعب
وهو ده بالظبط حالنا; July 1, 2008 at 9:07 PM
رفقة عمر said...: ارجوكى سالى اوعى تحبطيهم خاليها مره تفرج عليهم
انا تعبانه علشانهم
على فكرة انا حاسه انهم موجودين
ومتعاطفه معاهم جدا; July 1, 2008 at 11:36 PM
بنت الاسلام said...: اعيط يعني

عاوزة اعرف هتزهز معاه ولا هيموت بالسكتة القلبية

كمليها بسرعة بقي

جميييييلة; July 2, 2008 at 10:45 PM
rovy said...: جميله يا سالى و بجد كان عليش واحشنى
المهم ما تتأخريش فى بقية الحكايه
لحسن انتى عملتى زى المسلسلات وقطعتى سرد الحكايه فى الوقت اللى شدتينا فيه

دمتى بخير فى حفظ الله

تقديرى و تحياتى

rovy; July 3, 2008 at 3:38 AM
حاجات جوايا said...: 931
snohe
~~~~~~
أهلا بك اخى الفاضل
ربنا يكرمك ويبارك فيك
نورتنى اخى الفاضل; July 3, 2008 at 5:18 PM
يوميات فنانه مفروسه جداا said...: وحشتييينييييييييي يا احلي ساليييييي

جميله اوي الحلقه رهيبه

يلا عايزين نعرف الباقي

مستنين علي نااااااار

دومتي بخير يا احلي سالي

سلامز; July 3, 2008 at 5:21 PM
حاجات جوايا said...: جنى
~~~
أهلا بك أخى الفاضل
ربنا يسهل ان شاء الله
ويستررررررر

سأشارك بإذن الله
نورتنى اخى الفاضل; July 3, 2008 at 5:22 PM
حاجات جوايا said...: المنسى
~~~~~
اهلا بك اخى الفاضل
الله يسلمك ويكرمك
جميل ان الحكاية بدأت تشدك .. كلامك أسعدنى والله
بس ليه متوقع ان النهاية مؤلمة ؟؟؟؟

نورتنى اخى الفاضل; July 3, 2008 at 5:24 PM
حاجات جوايا said...: hosam yehia حسام يحيى
~~~~~~~~~~~~~~~~~~~~~

أهلا بك اخى الفاضل
ربنا يكرمك .. ده بس من ذوقك
الله يبارك فيك
انت شايف ان الطناش هو الحل ولا إيه ؟؟؟
صحيييييييح .. ما انت شعارك هاكونا مطاطا ههههههههههههه

نورتنى اخى الفاضل; July 3, 2008 at 5:27 PM
حاجات جوايا said...: فاتيما
~~~~~~~
أهلا يا قمر
اليأس يعمل اكتر من كده كمان
بس ليه تفولى عليه كده يا فاتيما
ما يمكن المعجزة تحصل وربنا يكرمه
ادعيله بس
نورتينى يا قمررررر; July 3, 2008 at 5:29 PM
حاجات جوايا said...: واحدة مفروسة
~~~~~~~~~~~~~
أهلا يا قمر
الناس فعلا مش عايزة تتعب
وعايزة الرزق ينزلها من السما أو يخرج لها من الارض من غير ما تتحرك
وناسيين ان كل واحد بياخد على اد تعبه
ربنا يكرم الجميع

نورتينى يا قمررررر; July 3, 2008 at 5:31 PM
حاجات جوايا said...: رفقة عمر
~~~~~~~~~
أهلا باحلام الجميلة
بجد بتفرحونى بإيمانكوا بيهم وتعاطفكوا معاهم
كنت فاكره ان الاحساس ده عندى لوحدى
هههههههههههههه
دعواتك بقى
نورتينى يا جميلة; July 3, 2008 at 5:37 PM
حاجات جوايا said...: بنت الإسلام
~~~~~~~~~
بطووووووووووووووط
اهلا يا قمر
مممممم تفتكرى هيحصلهم ايه بعد كده ؟؟؟
لو عرفت الحل اتصل على 747120 إذاعة والجايزة على حساب الفايز وهيسلمها دودو باشا طبعا
هههههههههههههههه
نورتينى يا قمررررررر; July 3, 2008 at 5:42 PM
حاجات جوايا said...: rovy
~~~~~
أهلا يا قمرررر
أنا آسفه والله على الفواصل الاعلانية " قصدى التدوينيه "اللى بتقطع الاحداث .. ولو انها غير مدفوعة الاجر ..إلا انها بتبقى ضرورية
يلا ادينى بنزلها والاجر والثواب على الله
واستحملونى شوية
ههههههههههه

نورتينى يا قمررررررر; July 3, 2008 at 5:47 PM
حاجات جوايا said...: يوميات فنانة مفروسة جدااا
~~~~~~~~~~~~~~~~~~~~~~~~~~
أهلا يا ياسمين يا سكر
ربنا يخليكى يا حبيبتى انتى كلك ذوق والله
بس معلش هدى النار شوية عشان الموضوع الجاى تاج .. وانا مش عارفة نمرة المطافى
ههههههههههه

نورتينى يا جميلة; July 3, 2008 at 5:50 PM
Eldebug said...: انا جاى متاخر اوى معلش

تصدقى انا نفسى من وانا صغير اجرب نفسى فى موضوع البورصة ده ... حتى من قبل ما اعرف يعنى ايه بورصة اساسا
اما نشوف عبده هيعمل ايه بقى ونمشى على نهجه بقى ....

منتظر باقى القصة; July 3, 2008 at 10:48 PM
ريمان said...: سالى

ايه ده انا اخر من يعلم انك عملتى بوست جديد

مممممممممم
يادى الكسوف

ياكسوووووووووووفى

اخبى وشى منك فين بس يا سالى

طب عشان خاطر دودو سماح المرة دى يا قمر

بس ايه الحوار الجميل ده وكمان مفيد كده ودمه خفيف

بحبك يا سالى والله وبحب دو دو

بس مش تقولى لبطه عشان مش تموتنى; July 4, 2008 at 6:27 AM
Desert cat said...: اصدقائى الأعزاء المدونين والمدونات
غدا السبت 5/7 يتم اذاعه الحلقة الخاصة بشحن بطارية المحمول
فى برنامجنا الإذاعى
أنت تسأل والكمبيوتر يجيب
والذى يذاع يومياً الساعه 9.10 صباحا على إذاعة البرنامج العام ما عدا يوم الجمعة
وسيتم اذاعه اجابات كل من
ام احمد المصرية
صبرنى يارب
أيوية
متنو
انجى البوهى
هارت بيت
الجده فصيحه
حاجات جوايا

يمكنكم سماع الحلقة مباشرة فى نفس موعد إذاعتها الساعه 9.10 صباحا من خلال موقع البرنامج
http://dear.to/cairo

تمنياتنا بدوام التواصل; July 4, 2008 at 6:09 PM
محمد مارو said...: طيب منتظررررررررررررين اللى هيحصل; July 4, 2008 at 6:37 PM
mostafa rayan said...: في انتظار الحلقة القادمة
بخصوص المصنع يقال ان الحكومة هتنقلهفي العين السخنة في السويس
يعني خراب مستعجل علي السياحة اللي صدعو دماغنا بأنها خير لينا كلنا
رغم ان المصنع ممكن يتبني في الصحراء خصوصا ان 96% من مساحة مصر صحراء
لكن تعملي ايه في الدماغ الحكومية
اللي كل همها انها تنكد علي الشعب وتاخد منه ضرايب
تفتكري بكرة ممكن ياخد مننا ضرايب علي المدونات يقولولك بعضكم بيطلع في التلفزيون وممكن يكون بياخد فلوس وبتحطوا اعلانات ممكن تجيب لكوا فلوس
والضرايب مصلحتك اولا ومحمد شومان يدخل عند مدون قاعد بيدون او بيقرأ التعليقات يقوله الكلمتين دول
وانا اسف لو كنت رغيت كتير في غير السياق
وسلام بقي; July 5, 2008 at 3:36 AM
حاجات جوايا said...: eldebug
~~~~~~~~
أهلا بك اخى الفاضل
مش متاخر ولا حاجة يا فندم المهم انك شرفتنى
اما بخصوص البورصة فلا انصحك بها على الاطلاق
احنا لسه امبارح بس خسرانين 5000 ج وربنا يستر على الباقى

نورتنى اخى الفاضل; July 5, 2008 at 5:27 AM
حاجات جوايا said...: ريمااااااااااان
~~~~~~~~~~~~~~
أهلا يا حبيبة قلبى
والله انتى بتنورينى يا ريمو
ولا يهمك يا قمر بعد كده هعمل تنويه عشان متزعليش

ربنا يكرمك ويخليكى ويباركلى فيكى
وحاضر من عنيا هبوسلك دودو بس خليها بينى وبينك ههههههههههههه

نورتينى يا ريمو يا جميلة; July 5, 2008 at 5:32 AM
حاجات جوايا said...: desert cat
~~~~~~~~~~~
أهلا يا حنان
شكرا على التنويه
أخبار الرز باللبن ايه ؟؟
عايزاه بالمكسرات لو سمحتى

نورتينى يا حنان; July 5, 2008 at 5:34 AM
حاجات جوايا said...: محمد مارو
~~~~~~~~
أهلا بك اخى الفاضل
ربنا يسهل ان شاء الله
دعواتك

نورتنى اخى الفاضل; July 5, 2008 at 5:39 AM
حاجات جوايا said...: mostafa rayan
~~~~~~~~~~~~~
اهلا بك اخى الفاضل
بالنسبة لموضوع اجريوم فالاقوال متناثرة
و النهارده كان عندنا وقفة احتجاجية فى دمياط ضد رغبة اجريوم فى الالتفاف على توصية مجلس الشعب
يعنى ممكن فى الآخر يعملوه فى المينا عندنا
ربنا يسترررررررررررررر

أجريوم دى اصلا عقريت اتحضر لمصر وخصوصا دمياط ومحدش عارف يصرفه

أما عن ضرايب المدونات فوطى صوتك بعدين حد يسمعك وينفذها مهم بيتلككواااااااا

نورتنى اخى الفاضل; July 5, 2008 at 5:48 AM
دكتور بهــدوء said...: بجد عايش ده بحس انه واحد بشوفه كل يوم واحد مننا
اسلوبك هاديء جداااااا
*****************************
بالنسبه للتأخير فاتني بوست مارديتش عليه
بس بجد كان عندي امتحان الاسبوع اللي فات
ادعيليىىىىى; July 5, 2008 at 6:51 AM
حاجات جوايا said...: دكتور بهدوء
~~~~~~~~~~
أهلا بك أخى الفاضل
ولا يهمك يا فندم ربنا معاك يارب ينجحك وأسمع عنك كل خير ان شاء الله

أما عايش فهو فعلا يشبه ناس كتير مننا
وعبده طناش كمان
ادعيلهم

نورتنى يا دكتور; July 5, 2008 at 7:21 AM
اسلام الحضرى said...: جميله جدا تسلم ايدك
ومبروك على التغيير فى القهوه وعقبالنا يارب
وفعلا عامله زى حوار المسلسلات اللى فى الاذاعه; July 5, 2008 at 3:40 PM
ابراهيم العشرى said...: ماشاء الله حلقه جميله

فى انتظار باقى الحلقات

وخصوصا الاخيرة

ابيات مقدمه لكم

حاجات جويا لها معانى
اكتمها او اقولها من تانى
وان قلتها حد هيترجانى
انى مكتبش عنها تانى
ولا هتقرأوها وتقدموا التهانى
انا فى انتظاركم بكل امانى; July 5, 2008 at 6:31 PM
Anonymous said...: اسلوبك جميل جدا
وبيوصل للناس بسرعه
احسنتى واتقنتى
عجزت عن التعبير بمدى ابداعك
اول زياره
بس هتتكرر اكيد ان شاء الله; July 5, 2008 at 11:47 PM
حاجات جوايا said...: إسلام الحضرى
~~~~~~~~~~~~
أهلا بك اخى الفاضل
ربنا يكرمك يارب كلك ذوق
الله يبارك فيك وعقبالنا فعلا

مين عارف يمكن تنزل فى الاذاعة فى رمضان الجاى وعايش وعبده طناش يتشهروا
كل شئ جايز
ههههههههههههه

نورتنى اخى الفاضل; July 6, 2008 at 4:26 PM
حاجات جوايا said...: ابراهيم العشرى
~~~~~~~~~~~~~~
أهلا بك أخى الفاضل
أسعدنى مرورك يا فندم ولننتظر سويا باقى الحلقات
أشكرك كثيرا على هذه الكلمات الجميلة

نورتنى اخى الفاضل; July 6, 2008 at 4:35 PM
حاجات جوايا said...: مواطن زهقان
~~~~~~~~~~~~
أهلا بك اخى الفاضل
أسعدتنى كلماتك غاية السعادة
أشكرك كثيراااااا
واتمنى ان تشرفنى دائما

نورتنى اخى الفاضل; July 6, 2008 at 6:18 PM
محبط افندى said...: سلامو عليكو

عازين نعرف ايه اللى هيحصل

انا كدا ممكن من لانتظااار
الاحباط عندى يزيييد
وانا مش ناقص
كفاية الاحباط اللى عندى

بس بجد

حاجة جميلة جدا ...ولذيذة جدا

وتشد كدا

تخلى الواحد يبقى عاوز يعرف ايه اللى هيحصل بالظبط

ربنا يسهل ونشوف ايه اللى هيحصل; July 6, 2008 at 8:20 PM
حاجات جوايا said...: محبط أفندى
~~~~~~~~~
وعليكم السلام ورحمة الله وبركاته
ان شاء الله هتعرف قريب ايه اللى هيحصل وعما تنزل الحلقة الجديدة بإذن الله ممكن تتسلى بقراءة الحلقات السابقة عشان بس الاحباط ميزيدش

أشكرك جداااااااا
أسعدنى مرورك يا فندم
ونورتنى; July 6, 2008 at 9:40 PM
سبهللة said...: ربنا يوفقك
بس كان لازم تعملى زى المسلسلات وتقفلى الحلقة فى حته مهمة
مش كنتى كملتى وعرفنا هاعملواايه الاتنين; July 7, 2008 at 6:20 AM
حاجات جوايا said...: سبهللة
~~~~~~
أهلا يا جميل
اقتراحك فى محله بس الحقيقة حكايات عايش وعبده طناش حكايات منفصلة متصلة يعنى كل حلقة لها تتمتها
لو قرأتى الحلقات اللى فاتت هتفهينى يا جميل

نورتينى يا حبيبتى; July 7, 2008 at 6:46 AM
Unknown said...: بصراحة جميلة جداا شدتينا بقوة
اسلوبك حلو اوى
فى انتظار تكلمت القصة
ونشوف هيعمل اية

كل الود; July 7, 2008 at 7:16 PM
Hosam Yahia حسام يحيى said...: مستنين تدوينات حضرتك الجديده

:d; July 8, 2008 at 12:13 PM
حاجات جوايا said...: نهر الحب
~~~~~~~
أهلا يا قمر ربنا يخليكى
مش عارفة اروح فين والله من كلامكوا الجميل ده
متحرمش منك يا قمر
ولا منكوا كلكوا
شرفتينى بمرورك يا قمر وهستناكى دايما ان شاء الله; July 9, 2008 at 12:50 AM
حاجات جوايا said...: hosam yehiaحسام يحي
~~~~~~~~~~~~~~~~~~
أهلا يا حسام
ربنا يسهل بإذن الله وتنزل قريب
نورتنى يا حسام; July 9, 2008 at 12:54 AM
دعوة للأمل said...: اسلوبك رائع و شيق و القصة شدتنى الى النهاية و ربنا يوفقك; July 9, 2008 at 2:42 AM
حاجات جوايا said...: دعوة للأمل
~~~~~~~~~
أهلا يا قمر
ربنا يخليكى .. سعيدة والله ان القصة شدتك
ياريت تتابعينى وتنورينى دايما يا قمر; July 9, 2008 at 5:03 AM
snohe said...: صديقتى
اتمنى ان تنصحيه بعدم استثمار كل ما يملك فى البورصه لاسباب
1- يجب ان يكون على درايه بتعاملات البورصه
2- اذا اراد ان يدخل البورصه فلا يجب ان يشترى باكثر من ربع نقوده على الاكثر تحسبا للخساره المحتمله
3- يجب ان يحدد مساحة مكسب ومساحة خساره يتحرك فيها كل سهم يشتريه
وفى النهايه الموضوع مش سهل والسماء لا تمطر ذهبا ولا فضه
الافضل ان يشترى عقارات او اراضى لان مكسبها مضمون بلا مخاطره
وشكرا; July 10, 2008 at 12:00 AM
Unknown said...: السلام عليكم

ازيك يا سالي
المسلسل ده تحفه انا قرأت الحلقه دي وشدتني اوي وحاسس اني عايز ادخل علي اي موقع انزل كل الحلقات ههههههههه

بجد تسلم ايدك بس هو كام حلقه عشان ابقي عارف

برقش; July 11, 2008 at 5:50 AM
موناليزا said...: هو يعمل استخارة قبل اى مغامرة; July 11, 2008 at 10:37 PM
أحمد بكر said...: اله اله ده بقى فى تحويش و فلوس و مشاريع هيه هتزهزه معاهم ولا ايه ولا شكلهم هيتحبسوا
انا مش بحسد على فكره بس حوشوه ازاى هو فى حد بيعرف يحوش اليومين دول; July 12, 2008 at 8:26 PM
Desert cat said...: اصدقائى الأعزاء المدونين والمدونات
تمت اليوم إذاعة باقى اجابات سؤال السيارة الطائرة فى برنامجنا الإذاعى
أنت تسأل والكمبيوتر يجيب
الذى يذاع يوميا الساعه 9.10 صباحا على اذاعة البرنامج العام ماعدا يوم الجمعه
من زوارنا الكرام التى تمت اذاعة اجابتهم
مدحت محمد
كشكول المورق
صبرنى يارب
ام احمد المصرية
غمض عينك
جيهان على
امل
روفى
حاجات جوايا
الطائر الحزين
عبده الرايق
يمكنكم الآن سماع الحلقة من البوكس يسار المدونة
http://netonradio.blogspot.com
او من خلال الموقع
http://dear.to/cairo
تمنياتنا بدوام التواصل; July 13, 2008 at 1:49 PM
أنفاس الصباح said...: حبيبتى سالى
كيف حالك
وحشانى
رجعت من السفر
وجيت اطمئن عليك
ايه التقدم ده كله
الحالة الماديه بتتحسن مع ابطال مسلسلك الممتع
يارب تزهزه معاهم انا قلقاتة قوى على تحويشة العمر
ربنا يستر; July 13, 2008 at 10:35 PM
مواطن مصرى نايم said...: فين الجديد يا سالى
انتى اتأخرتى اوى المرة دى
فى انتظار البوست الجديد; July 14, 2008 at 2:40 PM
ياسر said...: السلام عليكم
اول واحد بجد عجبني تفكيرة
الحاج/صبحي
هيجدد محل اكل عيشة ومش هيسيب
او يزعل الناس الغلابة ياريت كلنا نبقي
زية يارب
اما عايش بردة
تفكيرة تمام التجارة مش عيب ولاا حرام وفكرة صائبة
طالما راس المال حلال
والبضاعة حلال
وانت بتاجر بالحلال عمرها ما هتبور
انشاء الله.......
اما عبدة طناش/مبداءة في الحياة غلط
وهو النظر للناس دة اشتري عربية
وبيقسط لشقة تمليك
تحياتي; July 15, 2008 at 8:14 AM
أم أحمد المصرية said...: حبيبتي سالي
وحشتيني جدا جدا و كنت ناوية اعاتبك و اقول لك ما سألتيش عني ليه وجدت انك كنت غايبة زي بالضبط يارب خير ترجعي بألف سلامة يعني تعلقينا بالقصة و تغيبي ماشي يا سالي; July 16, 2008 at 11:02 AM
Unknown said...: ابشروا .. هنقفل المدونات ونقعد فى البيت
يوم الاربعاء 9/7/2008

فى المصرى اليوم كتب الاستاذ / مجدى الجلاد عن مشروع جديد

لتقييد الحريات واليكم المقال
---------------------------------------

قانون «ذبح» الفضائيات .. والـ «فيس بوك»!

ادعوكم لبحث هذا الموضوع الخطير قبل فوات الاوان; July 16, 2008 at 11:12 AM
حسن حنفى said...: يارب يسهل حاله وينجح في تجارته
هههههههههه
تقبلوا مروري; July 17, 2008 at 3:11 PM
Hosam Yahia حسام يحيى said...: ننتظر بوستات حضرتك

اتمنى ان حضرتك تكونى بخير; July 17, 2008 at 4:13 PM
عروسة ننوسة said...: حلوة اوى اوى اوى......بتكتبى هايل....مستنيه الحلقة الجديدة; July 18, 2008 at 2:06 AM
Unknown said...: ازيك ياقمر
طيب انتى فين بقى الوقت وفين جديدك ؟؟
طمنينا عنك
لا تغيبى كدة ولا راس البر حلوة ؟
وخدتك مننا; July 20, 2008 at 10:47 AM
Anonymous said...: ساااااااااااااالي
انا مادخلتش عندك من زمان
انتي كويسة؟؟

مها ميهوووو; July 21, 2008 at 12:29 AM
جنّي said...: إخواني أخواتي الأعزاء

السلام عليكم ورحمة الله وبركاته

استودعكم الله الذي لا تضيع ودائعه

إجازة من التدوين ...

ولكني سأكون على تواصل معكم بزيارة مدوناتكم ...

أرجو أن تسامحوني على تقصيري في حقكم ...

وتفضلوا بقراءة البوست الأخير ...

إلى اللقاء والسلام عليكم ورحمة الله وبركاته

أخوكم

said; July 21, 2008 at 2:21 AM
حاجات جوايا said...: ازيكو يا جماعة وحشتونى جداااااااااااااااااا
أنا آسفه على التاخير بس مش بإيدى والله
الروتر اتحرق ومفيش عندى نت
أنا النهارده عند ماما
وان شاء الله هرد عليكوا كلكوا
و سامحونى عن الـتقصير فى زيارتكوا لغاية ما ربنا يفرجها والنت يرجع وهرجع ابات عندكوا ان شاء الله هههههههه

فرحت جداااااااا بسؤالكم عنى
ربنا ميحرمنيش منكم أبداااااا

وحشتووووووووووووووووووووونى

هرجعلكوا ان شاء الله بعد الغدا

اتفضلوا معانا

سالى; July 21, 2008 at 4:40 PM
حاجات جوايا said...: snohe
~~~~~~
نصائح غالية فعلا ومنطقية جدا
وتنم عن خبرة كبيرة فى مجال البورصة
اتمنى ان يعمل بها كل مضارب ومساهم فى البورصة
نورتنى أخى الفاضل; July 21, 2008 at 7:53 PM
حاجات جوايا said...: bar2ash
~~~~~~~~~~
ربنا يكرمك يا فندم دايما رافع معنوياتى كده
مرة تقوللى زى بريزون بريك ومرة عايز تنزل الحلقات ههههههههههه
ده كتير والله

بالنسبة لعدد الحلقات فلسه غير معلوم لانها زى ما انت شايف متابعة لواقع الحياة المصرية

تشرفنى متابعتك دائما

نورتنى; July 21, 2008 at 7:58 PM
حاجات جوايا said...: موناليزا
~~~~~~~~~
عين الصواب عزيزتى
بس للأسف مش كل الناس بتعمل استخارة فى كل الأمور
خاصة اذا كان عندهم رغبة شديدة وميل شديد لتنفيذها
وبيعملوها بس فى الامور المشكوك فيها
رغم ان الاستخارة واجبة فى كل الامور

نورتينى يا قمر; July 21, 2008 at 8:01 PM
حاجات جوايا said...: بيكر
~~~~~
اللى عايز يحوش بيحوش
والبركة فى ست الحبايب
والجمعيات اللى بتعملها والفلوس اللى محوشاها فى صورة ذهب
والقرش الأبيض ... بيعوم فى البحر المتوسط
هههههههههههههه

ادعيلهم بس

نورتنى اخى الفاضل; July 21, 2008 at 8:06 PM
حاجات جوايا said...: desert cat
~~~~~~~~~~~
شكرا يا حنان على التنويه
نورتينى; July 21, 2008 at 8:22 PM
حاجات جوايا said...: أنفاس الصباح
~~~~~~~~~~~~~
حمدا لله على السلامة يا قمر
نورتينا من تانى
ادعيلهم ربنا يستر عليهم
سلامى لكِ ولاولادك
نورتينى يا قمر; July 21, 2008 at 8:27 PM
حاجات جوايا said...: مواطن مصرى نايم
~~~~~~~~~~~~~~~
أهلا بك أخى الفاضل
انا بعتذر عن التاخير لان الروتر اتحرق
و فى انتظار اصلاحه او تغييره
شكرا على السؤال يا اسلام
نورتنى; July 21, 2008 at 8:30 PM
حاجات جوايا said...: ياسر
~~~~~
وعليكم السلام ورحمة الله وبركاته
جميل اتفاقك مع هذه النماذج
واتمنى فعلا ان تكثر بيننا
نورتنى اخى الفاضل; July 21, 2008 at 8:36 PM
حاجات جوايا said...: أم أحمد المصرية
~~~~~~~~~~~~~~
والله يا قمر انتى اللى وحشتينى جدااااااااا
وكلكوا والله وحشتونى
بس الروتر عملها واتحرق
وخلانا فى عزلة عن حبايبنا
ادعيله ربنا يشفيه ههههههه
انا برد عليكوا من عند ماما النهارده ومش عارفه النت هيرجع تانى امتى ؟؟
دعواتكوا
سلام كبير لغاية ما ارجع يا قمر
نورتيــــــنى; July 21, 2008 at 8:49 PM
حاجات جوايا said...: حسن محمد توفيق
~~~~~~~~~~~~~
أهلا بك سيدى الفاضل
الحقيقة انا معنديش معلومات عن الموضوع ده
هتابعه بإذن الله
نورتنى سيدى الفاضل; July 21, 2008 at 8:54 PM
حاجات جوايا said...: desert cat
~~~~~~~~~~~
شكرا يا حنان
هسمعه ان شاء الله
نورتينى; July 21, 2008 at 9:01 PM
حاجات جوايا said...: حسن حنفى
~~~~~~~~
ربنا يتقبل منك
نورتنى أخى الفاضل; July 21, 2008 at 9:04 PM
حاجات جوايا said...: hossam yehia حسام يحيى
~~~~~~~~~~~~~~~~~~~~~~
بعتذر يا حسام عن التاخير لعطل فى الروتر
وانا الحمد لله بخير
شكرا على سؤالك واهتمامك
نورتنى يا حسام; July 21, 2008 at 9:06 PM
حاجات جوايا said...: عروسة ننوسه
~~~~~~~~~~~
ميرسى يا قمرررر
ربنا يخليكى
وانا منتظراكى دايما
نورتينى; July 21, 2008 at 9:07 PM
حاجات جوايا said...: نهر الحب
~~~~~~~
أهلا يا قمر
أنا اسفه والله على التأخير بس مش بإيدى
ومش بصيف على فكرة
هههههههههه
أنا الحمد لله بخير واول ما نصلح الروتر هرجعلكوا على طول ان شاء الله

نورتينى يا قمر; July 21, 2008 at 9:10 PM
حاجات جوايا said...: أحسن تستاهل
~~~~~~~~~~~
أهلا يا قمر يا مهاميهو
انا بخير يا حبيبتى تسلمى على سؤالك
الروتر هو اللى تعبان شوية
ادعيله ربنا يشفيه
نورتينى يا مها والله; July 21, 2008 at 9:46 PM
حاجات جوايا said...: جنى
~~~~
وعليكم السلام ورحمة الله وبركاته
أجازة سعيدة اخى الفاضل

أنا كمان فى اجازة اضطرارية أو كما تسمى فى المصالح الحكومية .. اجازة عارضة
لكن للاسف لأجل غير معلوم
واتمنى ان تنتهى قريبا جداااااااااا

نورتنى اخى الفاضل; July 21, 2008 at 9:54 PM
NAGWA said...: جميلة أوى مدونتك يا حبيبتى يسعدنى تبادل الأراءؤ بالمدونات

نجوى; July 22, 2008 at 12:56 PM
NAGWA said...: مش عارفة تالت مرة ابعت تعليقي مدونتك رقيقة جدا

نجوى; July 22, 2008 at 12:57 PM
ريمان said...: سالى

وحشتينى اوى انتى فين

مش بتفتحى اميلك ليه حبيبتى

وحشاااااااااااانى جدا

طمنينى عليكى; July 24, 2008 at 5:48 PM
حاجات جوايا said...: nagwa
~~~~~
أهلا يا قمر
متحرمش منك كلك ذوق والله
نورتينى يا جميلة وان شاء الله نتواصل دائما

دمتى بخير حبيبتى; August 1, 2008 at 6:17 AM
حاجات جوايا said...: ريمان
~~~~
ريمو يا قمر وحشتينى جدااااااااا
مكنش عندى نت والله .. عشان الروتر اللى كنا شغالين عليه اتحرق
اخبارك انتى ايه ؟؟
يارب تكونى دايما بكل الخير والسعادة

نورتينى يا حبيبتى وشكرا على سؤالك; August 1, 2008 at 6:19 AM
Ana said...: مدونتك بديعة الشكل والمضمون وأحييك على بساطة الأسلوب وتلقائيته وتمنياتى بمزيد من التألق ويسعدنى تشريفك مدونتى دخل الشتا; August 6, 2008 at 9:33 PM
حاجات جوايا said...: إيهاب رضوان
~~~~~~~~~~~
أهلا بك اخى الفاضل
جزاك الله كل الخير
أسعدتنى زيارتك لمدونتى المتواضعة

نورتنى; August 9, 2008 at 4:37 PM