حاجــــات جوايــا

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Monday, April 4, 2011

حزينة من قلبى بجد .. هو فيه كده ؟؟

مش عارفة أقول ايه بجد ..؟

مش فاهماكوا يا مصريين

انتوا مع مين وضد مين ؟

مين عدوكم ومين حبيبكم ؟

الكلام طبعا مش للمصريين كلهم

المقصود الناس اللى مش فاهمالهم موقف ..مرة مع الثورة ومرة ضد الثورة

أيام الثورة يقولوا كفاية كده وبعد الثورة يقولوا هو كده كان لازم يحصل ده من زمان

كل ما نسعى ورا المطالب يقولوا كفاية كده عايزين استقرار ..تتحقق المطالب يقولوا والله برافو ونعم الرجال

تحصل انجازات فى المستوى المحلى والدولى يقولوا كنتى فين من زمان يا ثورة رجعتيلنا قيمتنا وكرامتنا

تحصل مشاكل وحاجات مقصودة او حتى خارجة عن الارادة يقولوا هى الثورة ..مفيش مصيبة جاتلنا غير من ورا الثورة

طيب الاخ ده ممكن يكون قابض ومزقوق وجاى مخصوص عشان يقول الكلمتين دول قدام الكاميرا تمهيدا لمليونية طلب عودة مبارك فى 25 ابريل ..وده الاحتمال الاقرب للصواب فى رأيى

لكن الاخ المخرج والاخ المعلق دول ايه نظامهم ..؟

ليه كده ؟ !!!!!!!!

بجد مش فاهماكوا

حددولكوا موقف

اثبتوا على راى خنقوتى

يا تكونوا مع الثورة .. يا تكونوا مع الثورة المضادة

لكن زجزاج رايح جاى كده مينفعش

لكِ الله يا مصــر

.......................

اللى حصل فى مباراة الزمالك والنادى الافريقى التونسى مهزلة بكل المقاييس

واللى هيقول ان شباب الثورة هما اللى عملوا كده يبقى سورى يعنى مبيفهمش

لأن شباب الثورة ناس راقية ومسئولة وشايلة هَم الثورة وهَم صورتها قدام العالم وهَم تحقيق مطالبها

وشايلة هَمكوا كلكوا يا مصريين واحد واحد

اللى نزل التحرير واتعرض للموت فى سبيل مصر عمره ما يرمى ورقة حتى فى الشارع مش يكسر استاد ويضرب لاعيبة

اللى نزل فى ميادين مصر كلها وعرض نفسه للضرب والاعتقال والاختفاء فى ظروف غامضة عمره أبدا ما يسيء لسمعة مصر

اللى عمل كده بلطجية ومأجوريين ومصر وشبابها وشعبها وثورتها بريئة منهم ولا يشرفنا كونهم مصريين

كل الاعتذار والأسف البالغ لتونس الحبيبة وشعبها ولاعبيها وأبناء ثورة الياسمين الملهمة لثورتنا المصرية

بنعتذر ليكوا واحنا كشعب مصرى متحضر مغلطناش ابدااا فيكوا ومكانتكوا عندنا عالية وعلاقتنا الطيبة بيكوا غالية علينا جدا جدا ..لكن بنعتذر عما فعله السفهاء منا لأنهم للاسف مصريين وعايشين على أرض مصر..واللى حصل للاسف فى وش مصر

أرجوا ان تتقبلوا اعتذار شعب مصر

...

مصر دلوقتى بتنادينا ..تختاروا ايه؟؟

هتلبوا الندا وتقفوا صف واحد ضد الثورة المضادة بفوضتها وبلطجتها وفتنها التى لا تعد ولا تحصى

هتقفوا ضد الفاسدين وتطالبوا بمحاكمتهم وحسابهم

وتصروا على مطالبكم

ولا هتسدوا ودانكم وتهدوا كل التعب اللى راح هدر وتفرطوا فى كل الدم اللى سال وكل الاسر اللى اتيتمت واتشردت ..وتنادوا باستقرار الفساد ؟؟

آه مهو دلوقت مفيش استقرار غير للفساد

يعنى بلد بعد ثورة لسه مرجعتش حقوقها ولا حاكمت فاسديها

هتستقر ازاى ؟

مصر لسه نارها مبردتش .. لسه بتغلى

و كل ما تهدا هترجع تفور تانى

يبقى نتوحد ونستحمل شوية وبعدين نستقر مرة واحدة

ولا نفضل كده كل واحد برأى وندى للثورة المضادة الفرصة الذهبية لتفكيكنا وتشتيتنا وتضييع تعبنا وتشويه صورتنا واشاعة الفتنة بينا

فى بوست ( ثورة الشرفاء )..قلتلكوا المشاركة فى الثورة شرف متحرموش نفسكوا منه

ودلوقتى بعد نجاح الثورة بقولكوا ..الوقوف ضد الثورة خيانة عظمى لبلدكوا إنئوا بنفسكوا عنه

والوقوف ضد الثورة مش بس بمحاربتها

لأ ..ده كمان بالسلبية

والاستهانة

والمطالبات الغير منطقية بالاستقرار الفورى

مش معنى كده انى ضد الاستقرار

أبدا أبدا

ده الاستقرار منتهى الآمال ..لكن فى الوقت المناسب

يعنى انت لو بتوضب شقتك بتشيل عفش وتجيب عفش وتدهن وتركب سيراميك وكهرباء و..و..الخ

تفتكر اول ماالكهرباء تدخل والدهان يخلص والسيراميك يركب هتبقى كده شقتك خلصت وتقدر تعيش فيها باستقرار ؟؟؟

ولا لازم تركب النجف والكشافات وتنضف مكان العمال لمدة اسبوع عالاقل تمسح وتكنس عما اثار الدهانات وروايحها تختفى وبعد كده تبقى تفرش براحتك وتبدأ فى الاستقرار واحدة واحدة ؟؟؟

مصر دلوقت فى حالة الشقة بعد ما تخلص وقبل ما تتوضب

فلازم نوضب ونشيل اثار الفساد ويتحاكموا واهمهم مبارك وابنه وثلاثى الشر سرور وعزمى وصفوت

دول فين ؟؟؟

فلوس مصر المنهوبة فين ؟

ليه المماطلة معاهم

لأ الحقيقة المماطلة مش معاهم ..المماطلة معانا احنا

الشعب المصرى بيطالب ومحدش معبره ..ليه مش فاهمة ؟؟؟

إيدك فى ايدى يا بن بلدى بعيدا عن المسميات والفئات والاحزاب والجماعات واصحاب الشعارات نقف ونساند مصر

ونساعد على استقرارها بدعمها مش بهدمها

بمحاربة الفساد .. مش بمحاربة البلاد .

بدعم الشرفاء ..مش بالتشكيك فيهم والتقليل من دورهم وشأنهم .

أنا مع مصر

.مع شباب الثورة

مع الجيش المصرى العظيم

مع د.عصام شرف

مع اللواء .منصور العيسوى

مع وزير الخارجية .نبيل العربى

مع كل شريف وكل مصرى حر

إيد واحدة وهدف واحد

نحمى مصرمن البلطجية والفاسدين وقادة الثورة المضادة وتابعيهم فى كل مجال .

تحيــــا مصـــــر

Thursday, March 24, 2011

رد الشيخ يعقوب عما اثير عنه بمقطع غزوة الصناديق

السلام عليكم

حبيت انزل البوست ده بعد ما اثير من جدل على مقطع غزوة الصناديق للشيخ محمد حسين يعقوب
واللى مش هعرضه عشان مديش للامر اكبر مما يستحق
منكرش انى اتضايقت جدااا لما سمعته ..جدااا جداااا لأنه كان بمثابة تشكيك فى ايماننا واخلاصنا لديننا خصوصا انه من حد ذو ثقل ومكانة وكلنا نحبه ونحترمه ونجله زى الشيخ محمد حسين يعقوب .. وخصوصا ان موضوع الاستفتاء على التعديلات الدستورية مكانش ليه اى صلة من قريب او بعيد بالدين

يعنى كنا بمثابة متهمين بلا قضية
..
المقطع كنت جبته ورفعته عاليوتوب وشيرته عالفيس بوك وفى اقل من 11 ساعة لقيت عليه الالاف التعليقات
وطبعا انا فى غنى عن وصف محتواها
والحقيقة ان التعليقات اللى عالفيديو ضايقتنى اكتر بكتير جداااااااا من الفيديو نفسه فخليته برايفت
لانى حسيت انى شاركت فى مهزلة خلقية وأدبية وتذكرت الحديث القدسى

عن أبي هريرة - رضي الله عنه - قال: قال رسول الله: إن الله تعالى قال: من عادى لي وليا، فقد آذنته بالحرب، وما تقرب إلى عبدي بشيء أحب إلي مما افترضته عليه، ولا يزال عبدي يتقرب إلي بالنوافل حتى أحبه، فإذا أحببته، كنت سمعه الذي يسمع به، وبصره الذي يبصر به، ويده التي يبطش بها، ورجله التي يمشي بها، ولئن سألني لأعطينه، ولئن استعاذني لأعيذنه رواه البخاري.

وانا أحسب الشيخ محمد حسين يعقوب على خير ومن الأولياء الصالحين
..
وألتمس له العذر فيما بدر عنه من رد فعل عفوى على نتيجة الاستفتاء
وعشان كده حبيت أعرض هنا رد الشيخ يعقوب عما أثير عنه بمقطع غزوة الصناديق
لان احتمال كبير انه مينتشرش نفس انتشار الفيديو الأول ..لانه ليس ذو طابع فضائحى

أعزائى .. اذكر نفسى واياكم
..
بضرورة ان نعطى أنفسنا فرصة لفهم الآخر قبل ان نحكم عليه
وان حكمنا فليكن حكمنا خاليا من التعصب والاندفاع
وان اندفعنا فلتكن أقوالنا وأفعالنا لا تخرج عن نطاق الأدب والخلق مهما كانت درجة الاختلاف مع الطرف الآخر

دمتم بكل الخير

Saturday, March 19, 2011

الترقيعات الدستورية أكبر مضاد للثورة

تحديث
19/3/2011
النهارده اليوم الفصل بين لا ونعم
عن نفسى قلقانة وخايفة وبحلم بلجنة الاستفتاء طوووول الليل
خايفة على مصر وثورتها
خايفة من المنتفعين والانتهازيين واصحاب المصالح
خايفة من المغيبين اللى فاكرين ان( نعم )معناها الاستقرار و( لا )معناها الدمار
خايفة نرجع تانى ندور فى دايرة مفرغة توصلنا لنقطة الصفر

نعم لتعديل الدستور = انتخابات برلمانية سريعة لا تمثل كل الاحزاب لان الجاهز حاليا لنزول الانتخابات الوطنى والاخوان فقط = مجلس شعب لا يعبر عن ارادة الشعب = دستور جديد غير مختار من الشعب = الله يرحمك يا ثورة

لا لتعديل الدستور = اعلان دستورى مؤقت =فرصة لتكوين احزاب = انتخابات برلمانية تعبر عن الشعب= مجلس شعب مختار من الشعب= دستور جديد قام بوضعه اهل ثقة ممن اختارهم الشعب = تحقيق أهداف الثورة

أمانة عليكوا فكروا كويس جدااااا
متستعجلوش فى القرار
ومتدلوش بصوتكم وانتم مش عارفين تختاروا ايه؟
صوت واحد هيفرق كتير

النتيجة أيا كانت هنقبلها طالما تعبر عن ارادة الشعب

يااااااااااااااارب
اكتب الخير لمصر
.................................................................

من البداية كده ومن غير لف ودوران أعلن موقفى برفضى للترقيعات الدستورية
ليـــه ؟؟؟
وبرضه من غير كتر كلام عندى سبب واحد أكبر واعم وأشمل من اى أسباب اخرى للرفض مجتمعة
وهـو
ان التعديل الدستورى التفاف على شرعية الثورة
يعنى بحدوث الثورة سقط النظام بدستوره
لان معنى الثورة هو التغيير الشامل
ملهاش معنى تانى
ومعنى انى اطنش سقوط الدستور واقبل ان يتم ترقيعه وتعديل بعض مواده سواء كانت للأفضل او للأسوأ ..أنى بعلن الغاء شرعية الثورة وبحولها لمجرد احتجاج أو على راى الفريق شفيق تعبير حاد عن الراى
ببساطة
الثورة تعنى دستور جديد
الاستفتاء يعنى سؤال واحد : هل هذه ثورة أم لا ؟؟؟؟
ان وافقت على ترقيع الدستور .. فأنت تقر بانها لم تكن ثورة

فهل تقبل ذلك ؟؟؟؟؟؟؟

أنـــا لا أقــبــــــــــل
...............

طيب

نشوف شرح مبسط للتعديلات الدستورية عشان نفهم ولك حرية القرار ..ان لم يكن الرفض لديك مسألة مبدأ مثلى

وتذكروا أن التعديلات الدستورية هى مجرد تعديلات لدستور قائم
الدستور اللى تم وقف العمل به هيرجع تانى لو قلت نعم
وزى ما فى التعديل مادة بتحدد ان مدة الفترة الرئاسية الواحدة 4 سنوات وتجدد لمدتين فقط
فيه برضه المادة 190 اللى لسه موجودة فى الدستور ومحدش جاب سيرتها لا بالتعديل ولا بالالغاء اللى بتحدد مدة فترة الرئاسة 6 سنوات وتنتهى
يعنى الدستور هيبقى فيه مادتين ضد بعض

صلاحيات الرئيس فى الدستور المرقع هى

بموجب الدستور الحالى :
الرئيس هو رئيس الدولة فى المادة 73
و رئيس السلطة التنفيذية فى المادة 137
و المجلس الأعلى للهيئات القضائية فى المادة 173
و قائد القوات المسلحة فى المادة 150
......و رئيس هيئة الشرطة فى المادة 184
...و رئيس مجلس الدفاع الوطني فى المادة 182
و رئيس مجلس الوزراء إذا حضر اجتماعاته فى المادة 142
و له سلطة حل مجلس الشعب فى المادة 136
وله سلطة حل مجلس الشورى فى المادة 204

هاااا ايه رأيكم؟؟
موافقين لسه على تأليه الرئيس ؟؟
...
أنا هسكت لانى لست فقيهه دستورية ورافضة من حيث المبدأ مش محتاجة أتعمق فى تفاصيل
وهسيبكم مع الناس اللى بتفهم تقول رايها

....
المستشارة القاضية الشجاعة / نهى عثمان الزيني .. نائبة رئيس هيئة النيابة الإدارية في مصر (في العاشرة مساء ) : حين أرى اتفاقا بين الإخوان والوسط على نعم .. أتحسس عقلي ، وحين أرى معهم السلفيون .. أتحسس ضميري ، وحين أسمع فلول الوطني تتناغم مع دعوات بقول .. نعم .. لتدخل الجنة .. أتحسس مسدسي ... أرفض التعديلات الدستورية
- حاصلة على درجة الدكتوراة في القانون الدستوري من جامعة السوربون بفرنسا
- أشهر من قالت لا للفساد

منقول

أنا هقول لأ ... لانها أول خطوة نحو الديموقراطية
...

آخر فيديو..شوفوه لأنه مهم جدااا وهيوضحلكوا ببساطة احنا رايحين على فين ؟؟

بثينة كامل والثورة المضادة ومنعها من أوربت بسبب رفضها للتعديلات الدستورية

أعتقد المنع ده يوضح ان اللى هيقول لأأأأأأ هو اللى هيمشى فى الطريق الصح
منع بعد الثورة ..ازاى ؟
حكر على الآراء ...ازاى ؟
أمال فين أهم مبادئ الثورة .. الحرية والديموقراطية ؟؟
اللى بيحصل ده شئ مريب
وملوش غير معنى واحد بس
ان الثورة فى خطرررررر
وبيتم مهاجتمها بشراسة وعنف

أنا هقول لأ واتمنى لو كنت 85 مليون مش فرد واحد بس عشان أقدر احافظ على الثورة من الضياع بعد طوووووووول الانتظار

امانة عليكوا فكروووووا كويس جداااا

مصر أمانة فى رقبتكم
الثورة امانة فى رقبتكم
مستقبل أولادكم امانة فى رقبتكم

متضيعوش كل حاجة فى لحظة وبعدين تندموا يوم لا ينفع الندم

اللهم أرنا الحق حقا وارزقنا اتباعه.. وأرنا الباطل باطلا وأرزقنا اجتنابه

Wednesday, March 16, 2011

الثورة المصرية .... للذكرى والتاريخ

لاقت الثورة المصرية اهتمام العالم كله
ولاول مرة احس ان العالم الخارجى بينظر لنا بانبهار وتقدير وحب واحترام
لأول مرة أحس بالحضن العربى
والرغبة فى الانتماء لأم الدنيا اللى بعد عنها اولادها كتير وحاولوا قبل كده مرارا وتكرارا يتبرئوا من بنوتهم لها بدافع الضيق والغضب .. وربما الحزن الشديد

قناة الجزيرة عملت تقرير جميل جداااااا عن الطريق الى ثورة 25 يناير
وضحت فيه الأسباب اللى وصلت المصريين لان يثوروا
وأن ثورتنا دى مش وليدة اللحظة وإنما كنا على شفا ثورة منذ احداث السادس من ابريل 2008

التقرير طويل أوى .. بس هيعجبكم اوى اوى

هو تقرير شامل لكل الاحداث المرهقة والمستفزة والمحبطة اللى مر بيها الشعب المصرى من سنوات واللى كان لازم تنتهى بأى شكل من الاشكال .. وانتهت بثورة 25 يناير 2011

..............

تقرير تانى عملته قناة البى بى سى اللندنية
تقرير عن الثورة المصرية من بدايتها وحتى خلع مبارك من الحكم

التقرير هايل ويدعو كل مصرى لأن يحيا أبد الدهر رافعا رأسه عالياااالأنه مصرى ومن جيل الثورة
أسيبكم مع التقرير لتعوا الثورة المصرية جيدا .. وتقفوا على أرضا صلبة بكل فخر وعزة وتعاهدوا انفسكم على عدم التفريط فى ثورتكم المجيدة ودماء شهدائكم الاطهار أبدا أبدا مهما كانت الضغوط والاغراءات

والبوست القادم عن التعديلات الدستورية
انتظرونى

Saturday, February 19, 2011

عاش وانتصر الشعب العربى

2011

عام التغيير

عام الحرية

عام الديموقراطية

كنتى فين من زمان يا 2011

.................

تونس كانت البداية ... ومصر استلمت الراية

الدور على مين ....؟؟

اليمن

ليبيا

البحرين

الجزائر

؟؟؟؟؟؟؟؟

مش مهم مين قبل مين

المهم النتيجة النهائية بنجاح كل الثورات العربية

ربنا ينصرهم جميعا يارب

ويحققوا أهدافهم ويسقطوا الديكتاتورية والظلم

ونتنفس جميعا عبق الحرية

...

تحيــــا مصـــر

وتحيـــا تونــس

ويحيـــا الوطـــن العـــربى

الاستعمار على ايدنا نهايته
راح من الدنيا زمانه ووقته
لا فى الجزائر ولا فى عمان
تهدى الثورة على الطغيان
الا بصبر الشعب العربى

Saturday, February 12, 2011

رجالة وطول عمر ولادك يا بلدنا رجالة

بجد مش عارفة اقول ايه

عايزة اكتب من بدرى ومش لاقية كلام يوصف احساسى وفرحتى

سعيدة ببلدى وولاد بلدى وشباب بلدى وفخورة بمصريتى وممتنة لأبناء عروبتى

الشعب قال كلمته

وكل الدنيا ساندته

التلاحم الشعبى أبهرنى

والتلاحم العربى أبكانى

شكرا ياربى انك أحيتنى لليوم ده وأشوف بعينى نصر بلادى وطرد الظلم والفساد منها

شكرا يا مصر انك اديتيلنا الفرصة نرجعك لينا تانى

شكرا يا شباب مصر يا جذوة الثورة يا شعلة الوطنية على كل حاجة جميلة عملتوها وكل حاجة وحشة محيتوها

شكرا يا أبناء وطننا العربى لدعائكم ومساندتكم ودعمكم الصادق والواضح والملموس

تحية وتقدير للقائد الانسان المحترم اللى يعرف يعنى ايه وطن ويعنى ايه دماء أبناء الوطن

رحمهم الله جميعا وغفر لهم ما تقدم من ذنبهم وما تاخر وأسكنهم فسيح جناته وتقبلهم من الشهداء بفضله ورحمته
اللهم آمين

ثورة مصر الشعبية كما سيسجلها التاريخ

بدأت فى

25/1/2011

وانتهت بالنصر المبين فى

11/2/2011

استغرقت 18 يوما فقط لا غير وانتهت باسقاط كامل للنظام دون رواسب

ميدان التحرير لحظة تنحى مبارك

مصـــــــر اليـــــوم فى عيــــــــد

اللهم لك الحمد حمدا كثيرا طيبا مباركا فيه كما ينبغى لجلال وجهك ولعظيم سلطانك

الله اكبر كبيرا والحمد لله كثيرا وسبحان الله بكرة وأصيلا ..لا إله إلا الله وحده صدق وعده ونصر عبده واعز جنده وهزم الاحزاب وحده .. لا إله إلا الله ولا نعبد إلا إياه مخلصين له الدين ولو كره الكافرون ..اللهم صلى على سيدنا محمد وعلى آل سيدنا محمد وعلى أصحاب سيدنا محمد وعلى انصار سيدنا محمد وعلى ازواج سيدنا محمد وعلى ذرية سيدنا محمد وسلم تسليما كثيرااا

ألف مبرووووووك لمصر وشعب مصر وحبايب مصر

وان شاء الله شعلة الثورة يتسلمها منا شعب عربى آخر ليضيئ بها ظلام الدكتاتورية ويحرق بها الفاسدين وينير الطريق أمامه نحو الاصلاح والديموقراطية

كلمة السر

إذا الشعب يوما أراد الحياة فلابد ان يستجيب القدر

ولابد لليل ان ينجلى ولابد للقيد ان ينكسر

دمتم فى فرح ونصر وعزة وعزيمة وإباء وكرامة وفخر وإيمان

تحيــــــــــــــــــا مصـــــــــــــــــر

Sunday, February 6, 2011

ثورة الشرفاء

بتعيش مصر حاليا حالة ميلاد .. مصر بتتولد من جديد على ايدينا .. والأم لحظة الولادة من شدة الالم ومن شدة الخوف بتكون مشاعرها مضطربة .. عايزة وليدها ييجى الدنيا بفارغ الصبر .. استنته تسع شهور بحالهم وبآلامهم وحضرتله كل حاجة حلوة وحلمت بيه كتير وفكرت فى مستقبله اللى بتحلم له بيه.. ولما حانت لحظة الولادة .. نسيت فرحتها لما عرفت انها حامل .. نسيت حلمها لابنها .. وسيطر الخوف على تفكيرها .. الخوف من الألم .. الخوف من الوجع ..وفى لحظة رعب تقول ياريتنى ما حملت .. وناسية انها بعد دقايق بس هتبقى أم لطفل جميل .. والالم الشديد هيروح بالتدريج بمجرد ما تشوف طفلها ثمرة تعبها وتاخده فى حضنها وتملى عنيها بيه

اللى بنمر بيه حاليا شبه حالة الام لحظة الولادة بالضبط .. كتير خافوا من التغيير رغم انهم حلموا بيه كتير مع كل لحظة شافوا فيها فساد وظلم وسادية وديكتاتورية

بس عايزة اقولكوا حاجة ..مش كل حاجة خايفين منها نتحجج بالدين ..اللى بيقولوا ( الفتنة نائمة لعن الله من أيقظها ) اسمحولى اختلف معكم .. لأن دى مش فتنة ..ده واجب وطنى

الشعب المصرى كان نايم بقاله 30 سنة .. يائس وخايف وعايش يومه ومش عارف هيعيش بكره ازاى ولا هيكفى مصاريفه منين ولا .. ولا.. ولا.. لما بدأ يصحى ويفوق ويشوف فين حقوقه ويطالب بآدميته وانسانيته اللى أهدرها النظام وزبانيته جوه وبره وخلى المصرى أقل قيمة من أقل حد فى الدنيا عايزينه يرجع ينام تانى ...؟؟

لما بدأ يصرخ من الظلم ويرفض التعذيب والفقر والبطالة والرشوة والفساد عايزينه يرجع سلبى تانى ..؟؟

لما بدأ يحلم بالنور والفرحة والكرامة والعزة عايزينه يرجع للذل تانى ..؟

ليه كده .. انتوا بتخافوا من الحق ليه .. بتخافوا من النصر ليه ..؟؟

كان عاجبكم حالكم وراضيين بيه ؟؟؟ مش انتوا اللى كنتوا بتشتكوا من كل حاجة وبتحلموا بالتغيير .. مش انتوا اللى اتخرجتوا وقعدتوا عالقهاوى ومعرفتوش تشتغلوا عشان معندكوش واسطة ؟؟.. مش انتوا اللى كبرتوا ومش عارفين تتجوزوا لسه ولا قادرين تفتحوا بيت ؟؟..خدتوا عالخنوع والسلبية والتزوير .. خدتوا على اهدار الكرامة .. ؟؟

احنا مش عبيد لحد إلا الله عز وجل .. ومش من حق أى حد غير الله يستعبدنا .. فوقوا بقى ولو مش هاممكم نفسكم فكروا فى مستقبل ولادكم .. ولادكوا عمرهم ما هيرضوا يعيشوا فى المهانة دى وهيحاسبوكوا ويقولولكوا ليه سكتوا ليه قبلتوا تضيعوا حقوقنا وكرامتنا .. ليه خلتونا لقمة طرية فى إيد اللى يسوى واللى ميسواش ..؟؟

لما مخبر ولا عسكرى ملوش قيمة ولا عنده دين يضرب ولادكوا برصاصة ولا يدوسهم بعربية بكل استهتار وجبروت عشان بيقولوا رأيهم متلوموش غير نفسكوا .. كفاية بقى سذاجة وكل ماحد يتكلم كلمة حق تقولوا عليه عميل (وبيعمل لاجندات خاصة ) .. انتوا اللى عملا للنظام الفاسد وخاينين لبلدكوا وولادكوا وامنكوا لو فضلتوا ساكتين عالظلم وغمضتوا عنيكوا عن نور الحق

الثورة دى شرف اوعوا تحرموا نفسكوا منها

هتندمووووووا

لو مشاركتوش بالنزول شاركوا بالايجابية

بلاش تبقوا معول هدم ومثبطين من همم الشباب ومحبطين لجهودهم

انسوا وهم الجاسوسية اللى مسيطر على تفكيركم شوية

الجواسيس اللى خايفين منهم دول هما اللى خافوا منكم دلوقتى وعملولكوا الف حساب

بفضل الله ثم بفضل شباب الثورة

لما شافوا قوتهم واصرارهم وعزيمتهم اتفاجئوا

خافوا من شباب عزل ممعهمش سلاح

ما بالكوا بقى لو دخلوا معاهم فى حرب

شوفوا الصحافة الاسرائيلية بتقول ايه وانتوا تعرفوا قد ايه هزيتوهم

محدش يقول كفاية كده .. كفاية ايه ..هو احنا بنشحت ؟؟

دى حقوقنا .. حقوقنااااااااااااا

عارفين يعنى ايه حقوق ولا نسيتوا الكلمة دى من كتر متاخدت منكم

وأصلا أصلا لسه مفيش ولا وعد اتحقق ..ولو سكتوا وهديتوا مش هيتحقق

وهتضيعوا تعب الشباب وصمودهم ونومهم فى العراء وفى البرد وفى المطر

هتعرضوهم للاعتقال والتعذيب

هتضيعوا دم الشهداء اللى راحوا غدر بإيد النظام اللى بتأييدوه

وياريتكم بتأييدوه عن اقتناع ومؤمنين بيه

لا بتأييدوه عشان قدر يهزكم ويوهمكوا انكوا ضُعفا وولا تسووا من غيره

الأيام اللى فاتت دى صحيح شوفنا فيها رعب رهيب وحاولوا يخوفونا ويهزونا ويعاقبونا عشان يحسسونا انهم صمام الامن والامان

بس تقول ايه بقى فى عدل ربنا

لما سحبوا الشرطة وخرجوا المساجين وتآمروا علينا

الشعب كله وقف وقفة رجل واحد وشكلوا لجان شعبية وقاموا بدور كل أجهزة الامن من حراسة مساكن لتنظيم مرور لتأمين منشآت

فى مشهد من اروع المشاهد اللى شوفتها فى حياتى كلها

حسيت ساعتها ان مصر كلها رجالة ..من أصغر طفل لأكبر شيخ

بجد رجالة ووقفتوا وقفة رجالة

مينفعش ترجعوا دلوقت وتفقدوا ايمانكوا بالثورة وتقولوا عليهم قلة مندسة

قوتنا فى وحدتنا

اسلوب شق الصف اللى بيعملوه معانا واللعب على وتر العواطف والحلوة والمرة والخوف من البعبع لا يجى ياكلنا لو سابنا ومشى انتوا مش صغيرين ولا ساذجين عشان تصدقوه

شق صفنا بيضعفنا .. ويقويهم

بيسحقنا .. ويعليهم

بيذلنا .. ويفرعنهم

نصيحة لوجه الله

بلاش تتفرجوا عالتليفزيون المصرى

كبيركم بلدنا بالمصرى على اون تى فى

أما التليفزيون الحكومى بقنواته فهم مضللين .. مضللين وهما بجد اللى ليهم أجندات خاصة مع الحكومة وضد الشعب

واكبر دليل

اعتذار محمود سعد عن تقديم مصر النهارده لرداءة التغطية

واستقالة اسامة الشيخ رئيس اتحاد الاذاعة والتليفزيون وغيرهم مذيعتين رفضوا يشاركوا فى مهزلة التغطية المزورة اللى بتقلب الحقايق وتكدب بشكل فاضح ومقزز

آخر الكلام

ارجعوا لعقلكوا ومتضيعوش نجاح الشباب

متضيعوش تعبهم هدر

وكونوا ايجابيين فى كشف الفساد

انسوا الخوف .. امحوه من قاموسكم

مفيش مجال دلوقت لا للخوف .. ولا للتراجع

والا النتيجة هتكون هزيمة ساحقة بدلا من النصر المبين

ربنا يقوى شباب مصر ويحميهم ويوحد صفهم

اللهم آمين

Wednesday, February 2, 2011

مصر يارب

ياااااااااااارب
احفظ مصر
واحفظ المصريين
يارب وحد صفنا
وانزع الفتنة من بيننا
يارب ارزقنا القوة والعزيمة
والعقل والحكمة
وجنبنا كل ما يزعزع أمننا واستقرارنا
واجعل قلبنا كما كنا منذ يوم واحد
قلب رجل واحد

يارب احفظنا من بلطجية النظام

احفظنا من الفاسدين والمفسدين

ورد كيدهم فى نحرهم

وأزل الكرب عنا

آمين يارب

..........

سيادة الرئيس

بكل الرقى والادب

التى لم نرها أبدا من رجالك البلطجية

نداء أخير نوجهه اليك

ان كنت تحب مصر ويهمك امنها واستقرارها كما قلت

ان كنت مصريا وتحب وطنك

ان كنت قائدا عظيما هماما عبر بنا الى السلام

أرجوك

أرجوووووووك

اتركنا الآن وارحل

ارجوك

دعنا نتنفس الحرية والامن والامان الذى فقدناه بعنادك معنا وتمسكك بالسلطة

مصر أكبر من اى فرد

والشعب لا يريدك سيدى

فهل تحارب شعبك ؟؟

كفانا ما لاقيناه من مؤامرات ضدنا

من رجالك الفاسدين ويدك الباطشة

كفانا ما سقط منا من شهداء برصاص جنودك الحى والمطاطى

كفانا من اصابهم منا عاهات مستديمة

ومن اختنق بغازات قنابلك المسيلة للدموع المنتهية صلاحيتها

كفانا سهرا كل يوم لحماية شوارعنا ومساكنا من البلطجية والمخربين والسارقين الذين فتحت لهم السجون ليرهبوننا ويحيلون ليلنا نهارا

كفانا منك ما حدث

وشكرا لك على كل خير قدمته لنا

وليسامحك الله والشعب والتاريخ .. ان ارادوا .. على كل ما فعلته بنا

سيدى الرئيس

انتظر منك كلمة وداعا

Friday, January 21, 2011

مصر التى فى خاطرى + تحديث هام جدااا

تساؤلات منطقية يطرحها المصريون ولا يجدون لها اجابة ؟

لماذا ؟؟؟؟؟؟؟

وغيرها الكثير والكثير والكثير

لماذا يتسترون على الفاسدين والمفسدين والمرتشين ان كانوا من كبار رجال الدولة ؟وان كان مواطن فقير يزج به الى السجون ؟

لماذا يزورون .. ويخدعون ؟

وعلى الاحكام القضائية يتحايلون ؟

لماذا من الشعب المصرى يسخرون ويتهكمون ويتطاولون ؟

وفى خطبهم الشعبية يتندرون (ويتسلون )؟

لماذا لرغبة الشعب لا يستجيبون ؟

ولمطالبه لا يلبون ؟

ولآلامه لا يشعرون؟

ولشكواه لا يسمعون ؟

لماذا يُنكل بالمُصلحون .. ويُحاكم المدنيون ..ويُعذب الناشطون ؟

لماذا يُسيس الاعلاميون والصحفيون وفى ارزاقهم وأمنهم يتهددون ؟

لماذا هم باقون ان كانوا للشعب كارهون ؟

يا مصــــــر

يا أعز ما نملك .. انهم لكِ سارقون

سامحينا واغفرى لنا تخاذلنا .. فقد كانوا فى بطشهم جبارون

اخرسوا السنتنا وقصفوا اقلامنا وحطموا منابرنا لنكون صم عميون

لكننا لم نكن وكنا نرى ونسمع لكن للاسف خائفون

أو قولى يائسون

يا مصـــــــر

لا تحزنى فالخوف قد زال عندما فاض الكيل بنا

وتشجعنا عندما تحطمت اصنام الطغاة المتجبرون

يا مصـــــر

انتظرينا .. فإننا لكِ قادمون

ثورة 25 يناير

اصبحت الآن حتمية ولا مفر منها ولا داعى لتجاهلها او انكارها

ومؤيديها يزدادون بالالاف يوما بعد يوم

لذا ارجوا من جميع المشاركين اعمال العقل وعدم التهور

هناك نداءات على الفيس بوك باستخدام زجاجات حارقة اذا ما تعرض للمتظاهرين الأمن بالضرب والعنف

الحق يقال ان هذه النداءات قوبلت فى الاغلب بالاستنكار والرفض

لكن مع ذلك لا يمكن تجاهلها لأن لها مؤيدون

وهذا ليس ببعيد خاصة فى هذه الأجواء الغاضبة والثائرة واليائسة

فمن يصل به الغضب واليأس لأن يشعل النار فى نفسه ويتعذب بالشواء حيا حتى الموت من السهل جدا عليه أن يشعل فى بلده وفى أى شئ تطاله يده

فتعذيب الغير أهون كثيرا من تعذيب النفس

وان حدث ذلك فستتحول مصر الى محرقة جماعية لأبنائها وبدلا من ان يحرروها ويستمتعون بحريتها سيدفنون بها ولن يذكرهم احدا بالخير لانهم سيخربون البلد بدلا من ان يصلحونها

الاصلاح له قواعد وشروط وآليات يحكمها العقل والحكمة والمنطق

وليس التهور والاندفاع والتخريب والبلطجة

فان كنتم تريدون اصلاحا فاختاروا قائدا يتحدث باسمكم ويطرح مطالبكم كما علمنا التاريخ من قبل

اما الفوضى والعبث والاحتجاج بالشغب فلن يزيد الامور الا سوءا وتعقيدا

وسيقع ضرره على رؤوس الجميع ولن تنالوا مطالبكم فى النهاية بل سيزج بكم الى غيابات السجون لتكديرالامن العام والتحريض على العصيان المدنى

معظمنا ان لم يكن كلنا نكره الحكومة بفسادها وتراخيها واهمالها وعدم مراعاتها للشعب وآدميته وكرامته

لكننا جميعا بكل طوائفنا وفئاتنا مجمعون على حب مصر

وحبنا لمصر أكبر كثيرا من كرهنا للطغاة المحتلون

مصـــر الوطن الذى لا بديل لنا عنه

ولا نقبل المساس بأمنه ولا باستقراره

لا بأيدينا ولا بإيدى غيرنا

....

تحديث

شوفوا الفيديوهات دى ضرورى

حفظ الله مصر وأبنائها من كل سوء ووحد صفنا ووقانا شر الفتن والعابثين

اللهم آمين

Monday, January 17, 2011

أول الغيث ..... ولا آخره ؟؟؟

عبده عبد المنعم يشعل النار في نفسه أمام مجلس الشعب وهو يهتف ضد "أمن الدولة .. يا امن الدولة يا امن الدولة...؟. حقى ضايع فى الدولة .. حرس مجلس الشعب يطفوه بطفايات الحريق وينقلوه فى سيارة اسعاف على مستشفى المنيرة .. ده اليوم السابع بتقول كده ..

بس مصراوى بقى بيقول ان اللى جرى عليه سائق تاكسى وحاول يطفيه بطفاية الحريق اللى معاه الخاصة بالتاكسى بمساعدة المارة .. وبعد استقرار حالة الرجل، قامت النيابة بسماع اقواله في الواقعة، حيث قال إنه يملك مطعم بمدينة القنطرة شرق بمحافظة الإسماعيلية، وأنه أقدم على إشعال النار في نفسه احتجاجا على عدم صرف حصة الخبز الخاصة بمطعمه، مما تسبب له في البطالة

وصول فريق من النيابة لمستشفى المنيرة للتحقيق مع المصاب لتبين أسباب حرقه لنفسه

المستشار الإعلامي لوزير الصحة يجتمع مع مدير مستشفى المنيرة ويعقد مؤتمرا صحفيا بعد قليل

إصابات عبده عبد المنعم سطحية وتتركز بالوجه والرقبة واليدين واحتمالات بخروجه بعد يومين

وصول أيمن نور لمستشفى المنيرة محاولا زيارة عبده عبد المنعم ... تويتات ايمن نور على تويتر بتقول :

الاسم عبده عبدالمنعم حماد من قنطره غرب ونسبه الحروق 30 فى المائه والأصابات فى الوجه واليدين وعمره 49 سنه ويقول لجهات التحقيق الان انه لم يتمكن من الحصول على رغيف العيش وذهب لرئيس المجلس المحلى فلم يساعده أحد ونتيجه ظروفه الاقتصاديه وضع بنزين على رأسه وأشعل النيران .... المحامى العام يحقق معه الان وهناك اتجاه بأن يكرر نفس السيناريو المعتاد بأنه مريض نفسى ... حصار أمنى لكل أبواب المستشفى وإجراء التحقيق معه دون وجود ايه محامين ومنع دخول اى شخص إلا الأمن قسم الحروق .. مسؤلين بالمستشفى والامن لم يقصد الانتحار فسالتهم هل كان يجرب حلاقه ذقنه بالبنزين ؟ ... تذكره المواطن عبده عبدالمنعم تم سحبها من قسم الحروق لأحد المكاتب الإداريه فى حضور الأمن لكتابه أسماء عقاقير طبيه نفسيه حيث يتجه الامن لذلك ... مشاورات بين الأمن والنيابه لاحاله المواطن المحترق لأحد المصحات النفسيه لإثبات مدى قواه العقليه ... المواطن المحترق يقول فى التحقيقات ان له نشاط سياسى سابق ويتحدث عن مشكله لوالدته فى التأمينات وصعوبه الحصول على رغيف العيش

تواجد أمني كثيف داخل مستشفى المنيرة والأمن يمنع دخول الصحفيين

الاهرام : المواطن الذي أحرق نفسه يعالج نفسيا في مستشفى العباسية .. !!!!

البرادعى مقالش حاجة لسه :)

زوجته : رفضوا صرف الخبز له فاشعل النار فى نفسه

صديق مقرب لعبده : حالته النفسية طبيعية .. ومصدر طبى :الحروق 30%
.....

حرقت نفسك عالفاضى يا عبده

أديك طلعت مجنون

يعنى ولادك ذنبهم ايه .. ابوهم يبقى محروق وكمان مجنون

روح يا شيخ ربنا يسامحك

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.