حاجــــات جوايــا: أجريوم

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Showing posts with label أجريوم. Show all posts

Thursday, June 19, 2008

فرررررح فى دمياط ... إحنا اللى نقلنا المصنع

تحديــــــــــث

************

نزلت النهارده راس البر .. وبجد كنت ماشية فرحانة جداااااااااااااا فرحة محستهاش من زماااااااان لا فى عيد ولا فى اى مناسبة تانية

الشارع الرئيسى كله مزين بالأنوار من اول البوابة ولغااااااية اللسان

وانتشرت الكثير من البوابات التى تحمل لافتات تهنئة لدمياط وشعبها وشكر للسيد المحافظ على وقفته الجريئة مع شعب دمياط وللسيد رئيس الجمهورية على الوفاء بعهده مع الدمايطة

وعند مسجد الرحمة " الجامع الكبير الموجود فى السوق "تم رص عشرات البالونات الكبيررررررررررة المكتوب عليها عبارات الفرحة والشكر والتهانى لدمياط وأبناءها ووقف احد الشباب بدى جى علا صوته على أصوات المارة الذين تخلصوا من حالة السخط والغضب ضد انشاء مصنع أجريوم وانتابتهم حالة من الرضا والمصالحة الوطنية والشعور بالآدميه ............... وبالأمان

مهما اتكلمت مش هعرف أعبر

والصور أبلغ من اى كلااااااااااااام

وأدينى نزلتها أهه زى ما وعدتكوا

يارب تعجبكووووووووا

=*=*=*=*=*=*=*=*=*=**=*=*=*=*=*=**=*=*=*=*=*=*=*=

أخيراااااااااااااا وبعد كابوس طويل عشنا فيه أكثر من نصف عام .. أصدر السيد الرئيس محمد حسنى مبارك قراره بعدم انشاء المصنع فى دمياط ونقله منها
هتقولولى وهيروح فين ؟؟
هقولكوا لسه مش عارفه والله بس اول ما هعرف هقولكوا على طووووووووووول

أما عن دمياط فقد خلعت ثوب الحداد ولبست ثوب العرس
أضاءت دمياط كلها بالأنوار على طول كورنيش النيل
وتجمع المواطنون يشاركون بعضهم البعض الفرحة والسرور
وانطلقت السيارات مدندنة بأبواقها أحلى سينفونيات الفرح

وعلا صوت الدى جى مدويا فى سماء دمياط بكل أغانى الفرح والسعادة

وجاءت فرقة محفوظ للزفة الدمياطى لتعزف احلى مقطوعاتها

وانتشرت الدباديب الكبيررررررررررررة وداعبها الهواء لتتراقص على الألحان وعلى الاغانى الدمياطية التى جاءت من وحى اللحظة ومن وحى الفرحة

بجد الفرحة لا توصف
وزى ما شاركتكوا فى أحزاننا
حبيت برضه أشارككوا فى أفراحنا
ويارب يكمل فرحتنا على خير
الف مليووووووووووووووون مبرووووووووووووك لدمياط وأهلها وولادها ومحبيها

وكل الشكر للسيد الرئيس / محمد حسنى مبارك على استجابته لنداء اهالى دمياط
وللسيد المحافظ الدكتور / محمد فتحى البرادعى لمساندته لأبناء دمياط
ولكل أبناء دمياط الشرفاء الذين ناهضوا المشروع الضار بأبناء دمياط

على فكرة الصور الجميلة دى بعدسة أختى ... سحــــــــر فوزى
لكم منى ومنها كل التحية والإحترام

دمتم بكل الخير

Saturday, May 24, 2008

لا أجريوم .. ولا أجر سنة .. دمياط هى اللى باقيه لنا

كلنا طبعا شوفنا الموقف البطولى اللى شعب دمياط وقفه امام جبروت أجريوم والمنتفعين بإنشائه
وصقفنا وهللنا وقولنا ده الاعتراض ولا بلاش
ده التحضر ولا بلاش
هى دى المدنية ... ولتسقط الهمجية
عرفتوا تاخدوا حقكوا يا دمايطة من فم السبع بالإرادة والعزيمة والوحدة
وقلنا والله بلدنا بخير
وريسنا طيب وأمير
والمحافظ ربنا يكرمه ويعمر بيته ويخليه واقف جنبنا وشايل همنا
ونظيف هينظف بلدنا من أجريوم وينقله السويس وتحديدا فى العين السخنة " وبصراحة انا اعتقدت ان المكان ده بعيد عن السكان وفرحت ان المشكلة اتحلت " وهنخلص بقى
والجرايد ووسائل الإعلام مكانش لها سيرة غير إشادة الدولة بدمياط وشعب دمياط .. والريس قال انه مش هيسمح بإنشاء المصنع على أرض دمياط إلا بموافقة الشعب الدمياطى الغالى عليه جدااااااااا وبيقول عليه يابان مصر

:
:
:
يا سلاااااااااام حلم جمييييييييييييل عشنا فيه

:
:
:

وفجأأأأأأأأأأأة
.

صورة جديدة من صور البؤس اللى اتكتب عالدمايطة تبان

المدير التنفيذى لأجريوم صرح كذا مرة ان مفيش نية لنقل المصنع .. طب ليه ؟ قال البيه : ان أهالى السويس بيستعدوا لاجريوم ورافضين انشاؤه على ارضهم ولو مشوا من عندنا هيقابلوا هناك نفس المشكلة ومش هيلاقوا مكان يبنوا عليه المصنع

يعنى كل اللى فات ده كان مجرد حلم .. أو بالمعنى الأوسع والأشمل والاعم وهم
وهم كبير عيشونا فيه وضحكوا علينا وكلوا بعقلنا حلاوة .. زى ما كلوا العلاوة
حلم جميل نايمين صاحيين نحلم بيه .. وهما شغالين لسه مفاوضات ومحاولات اقناع فى الرؤوس الكبيرة فى دمياط عشان ينيمونا أكتر وأكتر ونشد الغطا عالآخر

وعود كتيرة جدا تدوووووووووخ بصراحة و كأن أجريوم هيبقى بالنسبة لدمياط العصا السحرية لحل كل مشاكلها واحلامها المعقولة والمستحيلة

بس الحمد لله أبناء دمياط لسه بعقلهم ومحدش يقدر يبيع بلده وولاد بلده .. وعلى حد قول واحد من الرؤوس الكبيرة فى دمياط .. المصنع مش هيتعمل إلا على جثثنا

وبدأ القمع جزئيا

عميدة كلية عندنا حذرت الطلبة أثناء الامتحانات انها هتحول اى طالب شايل أو بيوزع ورق التنديد بأجريوم لمجلس تأديب وكانها منشورات محذورة .. بينى وبينكوا مش عارفة مين اللى المفروض يتحول لمجلس تاديب ........؟؟؟

لو شوفتوا دمياط دلوقتى هتفتكروا ان كل ولادها ماتوا
كمية كبيررررررررة جدااااااااا من اللافتات السوداء مُعلقة على كل البيوت والمحلات بلا مبالغة وفى شوارع المدينة الرئيسية والجانبية وعلى السيارات
منظر محزززن جداااااااا ومقبض فوق ما تتخيلوا فى بلد كانت هادية ومستقرة وفى حالها زى دمياط
بس المكتوب فى اللافتات المرة دى مختلف عن الاول

فى الاول كان مكتوب
لا لأجريوم .. لا للمصنع المسرطن
لا للمصنع القاتل
لا تقتلوا اطفالنا

بعد كده بشوية اللهجة اتغيرت والناس قالت

لو محدش رد علينا هنشيل المصنع بإيدينا
لا للمصنع .. لا للموت .. لا لتدميرنا
يا مبارك خد قرار الدمايطة فى الانتظار

ودلوقتى مكتوب بشكل مكثف جداااااااااااااااااااااا

انتهى وقت الحوار .. لا حوار .. لا نقاش .. لا تفاهم
خائن كل من يعمل لدى أو لمصلحة أجريوم
أجريوم تستعين بالدعاية الدولية ونحن نستعين بالله
لن نسمح لكم بتلويث جزيرتنا رأس البر

وكتير جدااااااااااا من اللافتات مش فاكره الباقى

الموضوع طبعا مش هيتحل باللافتات .. بس ده اللى يقدر الشعب البسيط يعمله دلوقتى عشان صوته يوصل وعشان الكل يعرف موقفنا .. وان كنت أعتقد ان فيه حالة من الصمم منتشرة فى انحاء الجمهورية .. يمكن يكون فيروس .. الله اعلم

زى ما انتوا شايفين اللهجة بتتغير مع الوقت ومشاعر الغضب لو كانت فى الاول اتمكنت من نصف الشعب .. فدلوقتى اتمكنت بكل تأكيد من الشعب كله

لسه الندوات شغالة والوقفات الاحتجاجية شغالة ومحاولات أجريوم برضه شغالة

الدمايطة الاول كانوا بيواجهوا موقف
لكن دلوقتى بنواجه حرب .. حرب ضد احتلال المرض والموت والسرطان والخراب لبلدنا ولاولادنا ولحياتنا ... لا وجود فيها لاحتمال الخسارة بإذن الله

ولا انتوا رأيكوا إيه ؟؟؟؟؟؟؟؟؟
.
.
.
=*=*=*=*=*=*=*=*=*=*=*=*=*=*=*=*=*=*=*=*=*=*=*=*=*=*=
.
26/5/2008 تحديث بتاريخ
.
نقلا عن جريدة البديل
.
وفي دمياط شهد المؤتمر الذي عقد، أمس الأول، بنادي المحامين، في رأس البر، بالتنسيق بين النقابات والأحزاب والجمعيات والقوي السياسية، لرفض مصنع أجريوم، هجوماً شديداً علي حكومة أحمد نظيف واتهم المشاركون الحكومة بالتحالف مع الشركة الكندية علي حساب أهالي دمياط.وتضمن البيان الختامي الصادر عن المؤتمر، تأكيداً علي الرفض التام والنهائي لإقامة المصنع، والتمسك بعدم التفاوض مع الشركة الكندية، كما تضمن البيان تأكيداً علي أن المؤتمر يمثل الرسالة الأخيرة التي يبعث بها المجتمع الدمياطي إلي الحكومة، وأن القادم بعد ذلك مزيد من التصعيد.واستبق الجماهير بداية المؤتمر بالتظاهر، حاملين النعوش، ومرددين هتافات تندد بالصمت الحكومي تجاههم. كان من أبرز الهتافات: «إن ما حدش رد علينا.. هنشيل المصنع بإيدينا» و«يا مبارك فين قرارك.. الدمايطة في انتظارك».
=*=*=*=*=*=*=*=*=*=*=*=*=*=*=*=*=*=*=*=*=*=*=*=*=*=*=
.
تحديث تانى بتاريخ 27/5/2008
.
استفزنى جدااااااااااا أ/ سمير موسى عضو مجلس الشعب الدمياااااااااااااطى فى برنامج 90 دقيقة على قناة المحور أمس لما سأله المذيع معتز الدمرداش ايه المشكلة بالضبط لأبناء دمياط هل هى مشكلة بيئية ولا سياحية عشان الارض دى هتدر دخل كبير على راس البر ودمياط .. فقاله لا مشكلة سياحية
تخيلوووووووووووووووووووووووووووووووووووووووا
انا هتجنن بجد
سياحية ايه ؟؟؟؟؟؟؟؟؟؟؟؟ اذا كان المصنع ده عمالين نقول ونعيد اننا رافضينه عشان ملوث للبيئة وعشان هيجيبلنا السرطان وعشان هيلوث البحر والنيل ويموت السمك وعشان متخصصله ملايين الأمتار المكعبة من حصة مياه الرى والشرب وهيضر بماء الشرب وبالأرض الزراعية
الناس دى كانت نايمة ولا ايه ؟؟؟؟؟؟؟؟؟؟؟؟؟
ولا هو بيقول كده لما لقى ان المواطن رخييييييييييييييييييييص فى بلده ومحدش هيهتم بصحته ولا بالهوا الملوث اللى هيشمه ولا بالأكل المسموم اللى هياكله عشان كده حب يجيبها من ناحية السياحة عشان مصر بتخاف على فلوسها و مش بتخاف على اولادها ...؟؟؟
انا بجد اتخنقتتتتتتتتتتتتتتتتتتتتتتتتتتتتتتت
حسبى الله ونعم الوكيل
.

دمتم بكل الخير

Tuesday, April 29, 2008

لو محدش رد علينا .. هنشيل المصنع بإيدينا

تدفق حشد من أبناء مدينة دمياط من الساعة العاشرة والنصف صباحا وحتى الساعة الواحدة ظهراعلى طول كورنيش النيل وحتى مبنى محافظة دمياط .. هاتفين " بالروح بالدم نفديكِ يا دمياط " .. وبعد قرابة الساعة من التجمع خرج إليهم محافظ المدينة معلنا إياهم عبر الميكروفون بأن سيادة الرئيس محمد حسنى مبارك أبلغه بوقف العمل فى مصنع السماد على أرض دمياط وتحديدا بالقرب من مدينة رأس البر نزولا على رغبة الشعب الدمياطى الذى يرفض وباصرار إقامة هذا المصنع القاتل وسيتم نقل المصنع إلى منطقة العين السخنة بمدينة السويس ..وبناء على هذا تم إلغاء زيارة معالى رئيس الوزراء والوفد المصاحب له لاقناع الشعب بالمشروع

كل الشكر لسيادة الرئيس : محمد حسنى مبارك

و لمحافظنا الراااائع : محمد فتحى البرادعى

ولأبناء دمياط المخلصين ونوابهم الشرفاء

وكل من ساندنا وساهم معنا فى رفض المشروع قولا وفعلا

سالى

بنت دمياط

29/4/2008

===============================================================

لمزيد من التفاصيل اقرءوا ما كتبت أختى الدمياطية بنت الإسلام " فى مدونتها

والتى قمت بنقله عنها إليكم

بالــــــــــــــروح بالــــــــــــدم نفديــــــــــكي يادميــــــــــــــــاط
يامبــــــــــــــارك خد قرار الدمايطـــــــــة في الانتظــــــــــــار
لو محدش رد علينا هنشيل المصنــــــــــــع بايدينــــــــــــــــــا
لا للمصنـــــــــــــــــــــــــــــــــع لا للمصنـــــــــــــــــــــــــــع
لا للمـــــــــــــــــــــــــــــــــــــــــــوت لاللمــــــــــــــــــــــــــــوت
يميــــــــــــــن شـــــــــمال المصنـــــــــــــــــــــــع هيتشــــــــــــــال

النهاردة بجد كان يوم تاريخي لشعب دمياط كله
في ناس مش فاهمة هو في ايــــــــــــــــــه؟؟؟؟؟؟؟؟
أقول تاني ليه لاء؟؟؟؟ كل دمياط معترضة علي اقامة مصنع تابع لشركة اجريوم الكندية بالقرب من مدينة راس البر الدمياطية الساحلية نظرا للاخطار والاثار السلبية علي البلد كلها
وبعديــــــــــــــــــن
يوم الثلاثاء الموافق29 ابريل كان يوم الثورة والغضب وفعلا كانت ثورة وكان الغضب
صحيت الصبح بدري الساعة 10 ونص لبست أسود في أسود ونزلت ركبيت المكروباص قلتله البوسطة ياأوسطي نزلت عند البوستة لاقيت الدنيا فاضية الا مجموعة سيدات لابسين اسود في اسود زيي ندهوا عليا
قلتلهم انتم هنا عشان المصنع قالوا ااااااااااه قلت خير قعدنا كلنا علي الارض نتكلم في الموضوع وبعدين بدات الناس تيجي رجالة كتيرة شايلين يفط مكتوب عليها تنديدات باقمة المصنع في دمياط لافيت بعنيا في المكان لاحظت حاجة غريبة مفيش محل الا وعلق ورقة علي بابه لا للمصنع الموت في دمياط مفيش عمارة الا ونازل منها قماشة طويلة مرسوم عليها علامة الموت لا للموت لا للمصنع مفيش عربية او تاكسي او حتي ميكروباص الا والورقة موجودة وملزوقة فيه
المهم فضلنا واقفين وسيدات كتيرة جداا بصراحة ام جاية ومعاها اربع اطفالها صغيرين جدااا سيدة عجوووووووووزة جدااااااااااا موجودة معانا المهم بدا الامن ييجي علينا يالا ياجماعة من هنا المصنع خلاص اتلغي وصدر قرار بكدة روحوا هاتوا المصري اليوم هتلاقوا الخبر طبعا محدش صدق وفجاة صرخت اول سيدة من الخلف لاللمصنع لا للمصنع والكل وراها يهتف وبدانا المسيرة من حديقة البوسطة متوجهين ناحية مبني المحافظة الامن حاول يعمل ستار حاجز لكن معرفش واستمرينا في المشي والاعداد تتزايد بسرعة رهيبة عينيا مكانتش قادرة تحصر الاعداد لانها فعلا كانت بالالاف والاعلام كان موجود ومكثف جدااا لغااااااية ماوصلنا مبني المحافظة واحنا بنهتف وعند المحافظة بدات عظمة شعب دمياط تظهر بكل طوائفه وعلي راسهم محافظ البلد
وصلنا المحافظة وقفنا وصوت هتافنا بيعلي
وفجأة
لاقيناه خارج بنفسه قدامنا بقي واحد مننا واقف وسطنا مين هو المحافــــــــــــظ الدكتور فتحـــــــــي البرادعي بنفسه وقف يكلمنا ويهتف فينا الحقيقة انا كنت بعيد مكنتش سامعة هو بيقول ايه ومن بعده وقف نواب الشعب يكلمونا وبرده مكنتش سامعة والهتاف استمر وتعالت الاصوات عاوزين قرار عاوزين قرار لومحدش رد علينا هنشيل المصنع بايدينا والناس كلها قالت مش ماشيين لغاية مايصدر قرار وقعدوا علي الارض كلهم والظهر اذن صلوا جماعة
موقف غريب لاقيت رجل عجوووووز بلامبالغة لما ااقول 80 سنة صوته مش طالع وبيزعق جامد في ايه ياحاج بيكذبوا علينا بيقولوا انه وقف وكل يوم الساعة 2 باليل نسمع اصوات المعدات شغالة فرحت بيه قوي فرحت بكل الدمايطة
فجأة لاقيت تصقيف عالي وصفيروالناس بتوسع الطريق ودخل مجموعة اطفال في قلب الاعتصام رافعين نعش اه والله لاء كمان نعشين مغطينهم بالاسود ومكتوب عليهم مدينة دمياط مدينة رأس البر أغيثووووووووونا
والصراحة كان مشهد راااااائع اثار الحماس في الناس اكتر واكتر دخل المحافظ مبني المحافظة ساعتها انا كنت قربت جدااا من الصوت وبدا يتكلم من مكبر صوت واعلنها رسمي

يا اهالى دمياط الكرام انتم ضربتم اعظم مثل وبفضل جهودكم واتحادكم صدر قرار نهائي بوقف المصنع مش هيقام في راس البر ولا في اي جزء من مدينة دمياط وسمعنا كلام ان يوم السبت واحد مايو يوم عيد العمال الريس شخصيا هيذيع ان المصنع اتنقل من دمياط

رسميا وقعد يحمس الناس ويشجعها ترجع لشغلها وماتضيعش وقتها

وبدأت الناس تهدا وقعدنا نقول لبعضنا احنا نصدق كلام المحافظ ونمشي لانه بجد راجل محترم واكيد بيحترم كلمته ولو طلع كلام بيضحكوا بيه علينا المرة الجاية بقي علي المصنع فورااااااااااا
وفعلا بدانا ننسحب بهدووووء روحت البيت مش قادرة من التعب والهتافات لسة بتتردد في دماغي
للاسف مكانش معايا كاميرة اصور ولا حتي موبايل بكاميرة لكن اكيد في صور كتير جدااا هحصل عليها وهنشرها
نسيت ااقول ان احنا قررنا يوم الغضب يكون النهاردة لان كان في لجنة صحة من مجلس الشعب مقرر ليها انها تيجي النهاردة تعاين الموقف لكن للاسف اللجنة مجاتش سمعنا اقاويل بتقول انها اتمنعت من المجيء واقاويل تانية بتقول ان قرار النقل صادر من امبارح عشان كدة مجيئها مابقالوش لازمة الله اعلم الحقيقة فين بالظبط
المهم ان شعب دمياط كله ضرب اعظم مثل واحترم كلمة محافظه وانصرف ولعلها تكون الاخيرة لان الصرخة القادمة ان كانت هناك معارك قادمة ستكون صرخة الدمــــــــــــار

بنت دميــــــــــــاط أنــــا
سعيــــــــــــــدة
بشعبـــــــــــــــي
المتحضــــــــــــــر
وخصوصـــــــا
بالسيــــــــدات

لبنت الإسلام كل الشكر على هذه التغطية الراااااائعة

دمتم بكل الخير

Sally

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.