حاجــــات جوايــا: تيجانى

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Showing posts with label تيجانى. Show all posts

Friday, December 24, 2010

الواجب

نكبر نصغر.. الواجب ورانا ورانا .. مفيش فايده ههههه
الواجب المرة دى جالى من أختى العزيزة وتوأم الفكر مس نوجا مدونة خواطر شابة
وطبعا زى ما اتعلمنا قبل كده .. الواجب وااااااااجب ولازم يتعمل

الواجب زمان كان بيبقى كتير وياخد وقت طويل وفين وفين عما نخلصه ومنلاقيش وقت للمذاكرة
الواجب المرة دى بسيط
سؤالين بس
بس سؤالين ايه بقى
فى الجووون

نبتدى على بركة الله

السؤال الاول : هل انتِ فضولية ؟

واه واه واه يا بووووووى
انا فضولية
كلا البتة والوزة
ده اللى يقول عليا فضولية اطخه بالبندقة
ههههههه

مش كلام والله ولا تجمل
عن جد .. انا ابعد ما اكون عن الفضولية
ودى ميزة وعيب فى نفس الوقت
الميـــزة
انى مش بحب احشر نفسى فى حاجة متخصنيش يعنى مثلا
لو اتنين بيتكلموا وانا دخلت عليهم مش هقولهم بتقولوا ايه الا لو هما قالولى
لو دخلت بيت حد مش بحب اتحرك من مكانى ولا اقلب فى حاجاته ولا اشوف دى جديدة ولا قديمة ودى غالية ولا رخيصة ودى منين ودى من مين والكلام الرخم ده
بحترم جداا جدااا جدااا خصوصية الاخرين وشايفة ان ده المفروض والأصح والأليق
وده اللى بنتظره من الاخرين
بس طبعا ليس كل ما يتمناه المرء يدركه
!!!
العيب
انى بعتمد على نفسى اعتماد كبير فى الاكتشاف دون اللجوء للاخرين
يعنى لو عايزة اتعلم حاجة حد عارفها اتكسف اسأله
اكيد لو سألت مش هتبقى بايخة أوى.. وهوفر على نفسى وقت وجهد وهكتسب خبرة.. بس متعرفوش بقى انا كده
حساسة جدا ومش بحب اكون عبء على حد ولا اشغله بيا
وده برضه ميزة وعيب
ميزة الحساسية انى بتعلم بنفسى وبكتسب خبراتى لوحدى وبكون واثقة من مصادرى ومش بتقل على حد
وعيبه انى اتأخر فى الوصول للمعلومة عما ادور واتعلم وكده

وبعدين يعنى احنا فى زمن الانترنت .. يعنى اى حاجة هحتاجها هجيبها ببساطة ببحث سريع فى جوجل

وبينى وبينكم برضه انا بتخنق من الناس الفضولية اللى مش بتبطل اسأله عن اى حاجة وعن اى حد خصوصا لو حاجة هايفة
فمش بحب الوم تصرف واعمل زيه
كما قال احمد شوقى
لا تنه عن خلق وتأت مثله ... عـــــــــــــار عليك إذا فعلت عظيم

......................

السؤال التانى : ما هى الأسئلة التى تستفزك؟

ممممممم .. السؤال ده مستفز

عشان عايزنى اتكلم فى الحاجات اللى بتستفزنى

هههههههههههه

مبحبش الاسئلة الشخصية عموما

الشخصية جدا

خصوصا الاسئلة اللى بتبدأ بكلمة لسه ؟ .. وتنتهى بكلمة ليـــــــــه ؟؟؟

ومن هنا

من هذا المنبر

أحب اجاوب كل حد حشرى وفضولى واقوله بكل صراحة متناهية

وانت ماااااااااااااااااااااالك ؟

لما تكون حاجة تخصك جدا .. من الصعب انك تقبل ان حد يستجوبك بخصوصها

ولا يعمل عليك فاهم كل حاجة وبيديك نصايح على اساس انه خبرة يعنى

خصوصا لما تكون دى رغبتك

او يكون مفيش فى ايدك حاجة تعملها

...................

السؤال الثالث : تمرر الواجب لمين ؟

حقا وصدقا .. الواجب ده من اصعب الواجبات رغم بساطته

واحب انى مديهوش لحد

بس لو ممررتوش وغيرى ممرروش هيقف عندنا ومش هيكمل المسيرة

فهضطر اسفه انى امرره

واسأل الله ان يلهمكم الصبر والسلوان

دموع القمر

عاشقة الرومانسية

محمد عتلم

فارس على طريق الدعوة

شكرا يا نوجا

يلا صححى الواجب بقى وادينى ممتازة يا سالى ............. ونجمــــــــة

Wednesday, October 27, 2010

تاج دموع القمر

التاج ده وصلنى يا سادة يا كرام من الحبيبة دموع القمر .. ( همسات فى بحر الحياة ) صاحبة مدونة دموع القمر من قبل رمضان .. ونظرا لان حالتى النفسية كانت مش ولا بد فمقدرتش اجاوب عليه فى وقتها .. بس انا عند وعدى يا قمر بلا دمووووع .. وادى اجابة تاجك الغالى

السؤال الاول

ابتدينا بقى

رتب الاتى حسب اهميتها بالنسبه لك

الصداقه _ الحب _ العائله_ المستقبل _ المال

بحب انا اسئلة رتب دى

الحب _ العائلة _ الصداقة _ المال _ المستقبل

ولمزيد من التفصيل عشان آخد الفول مارك

الحب هو اصل العائلة وأساس العلاقة بين أفرادها .. والصداقة بلسم الحياة .. والمال قوة الحياة وضرورى للحاضر والمستقبل بيد الله

.............................

السؤال التانى

الحمد لله ان الاول عدى .. يا مسهل

اجب عما يلى

يا ساتر يارب .. صيغة الاسئلة دى بتجيبلى مغص .. بتفكرنى بالامتحانات

ربنا يستر بقى وملقيش علل وبم تفسر وما النتائج المترتبة على

................................

عرف الحب فى جمله صغيره ( حب الحبيب و الحبيبه )

الحب أخذ وعطاء

مفيش جملة اصغر من كده .. اجابة نموذجية يعنى من الاخر

...............................

وهل يمكن ان نعيش بدون حب (الحبيبه او الحبيب برده )

ليه لا .. ناس كتير بتعيش من غير حب .. وعايشين عادى

للحب شروط عشان يبقى اسمه حب .. مش اى علاقة ثنائية بين رجل وامرأة تتخللها دقات قلب او ارتعاشة يد أو فرحة باللقاء تبقى علاقة حب

الحب شعور وجدانى وروحانى وعقلى .. انجذاب وامتزاج وتناغم بين كيانين يكمل كل منهما الاخر ويبقى للأبد

ان حدث .. فاهلا بالحب

وان لم يحدث .. فأى شيء آخر غير الحب .. وكله ماشى

..................................

ما الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش ؟

الحياة حلوة بس نفهمها

..............................

ياترى إيه أكتر حاجة بتكرهها فى الحياة ؟؟؟

القهر بكل انواعه ومسمياته وما يندرج تحته .. والكذب

..................................

لو هتتمنى أمنية قبل ما تموت هتبقى إيه<뭬ѷ>

افرح بابنى فى كل حاجة .. خلق .. دين .. دراسة .. شغل .. جواز .. ذرية طيبة

وحسن الخاتمة لنا جميعا بس قولوا امين
................................

مين أكتر حد محتاج تشوفه وترتاح فى حضنه أو تبص فى عنيه ؟؟<뭬ѷ>

؟؟؟ مش عارفة والله حبايبى كلهم حواليا ربنا يخليهوملى يارب
.........................

مين أكتر حد نفسك تخسره ؟؟؟

مفيش حد نفسى اخسره .. اللى مش بيعجبنى ببعد عنه ببساطة.. مش بضغط على اعصابى عشان استحمل حد مضايقنى .. الدنيا مش مستاهلة وجع قلب

...............................

من وجهة نظرك ... إيه هى الحياة ؟؟؟

رسالة طالت او قصرت لا يهم .. المهم تكون ذات قيمة

....................................

ياترى هتقع فى الحب تانى لو حبيبك/حبيبتك سابك أو لو كان سابك بالفعل ؟؟؟؟

طالما الحياة مستمرة تبقى المشاعر مستمرة

..................................

ياترى تقول إيه للعالم كله ؟؟

اتقـــوا الله يجعل لكم مخرجا

...................................

ياترى لو هتخسر كل اللى حواليك فى سبيل حلمك ؟؟؟ هتكمل وتحاول تحققه حتى لو كان مستحيل ؟؟؟

اخسر كل اللى حواليا عشان احقق حلمى !! .. ليه هو انا بحلم اشتغل رقاصة ؟؟؟

معنديش حلم يستدعى خسارة لا كل ولا بعض من حولى

........................

ياترى إيه أكتر إحساس عشته الايام اللى فاتت ؟

الايام اللى فاتت دى سقفها لحد فين ؟؟

عموما هقول شوية احاسيس .. فاضيين ولا وراكوا حاجة ؟؟

فى رمضان حسيت ان ده اخر رمضان هيعدى عليا وكان عندى الاحساس ده من قبلها لدرجة انى مكنتش مصدقة انى بلغته.. والله اعلم

· فى التعليم حاسة ان فيه لبخ كتيروالقائمين على التعليم بيطوروه بطريقة عكسية .. يعنى لما نيجى نطور لازم الاول نطور المعلم ونؤهله انه يتعامل مع منهج متطور ومن ثم يوصله للطلبة بطريقة جيدة وسلسة .. لكن العكس هو اللى بيحصل .. المنهج هو اللى بيتغيرللأصعب والاسوأ والمدرسين والطلبة بيخبطوا فى بعض .. عشان كده نفسى نفسى ابنى يتعلم فى امريكا .. بس طبعا مستحيل

فى الحرية والديموقراطية .. حاسة بغدر كبير واضطراب سلوكى ونفسى عند مسئولين كتير

· حاسة ان الاسلام فى خطر .. الاسلام فى حد ذاته بعيدا عن التنصر او خلافه .. اللى عايز يتنصر ولا يتهود ولا حتى يلحد والعياذ بالله هو حر ربنا اللى هيحاسبه

لكن شايفة ان الاسلام حاليا اصبح بين جبهتين .. إما متشددين .. وإما متحررين

والمعتدلين الوسطيين تايهين فى النص .. يسمعوا للاتنين .. وكل جبهة بتحاول تقنعهم انها الاصوب

· وأخيــــــــرا حاسة بيأس انى اشتغل حاجة تناسبنى ماديا وعمليا ومهاريا

..............................

بتمررى التاج دا لمين ......

تقريبا التاج ده مر على كل المدونين

وبناء عليه بهديه لكل اللى لسه مجاوبش عليه

وبالهنـــ والشفا ـــا

Tuesday, August 18, 2009

رمضان جانـــــــا

بمناسبة شهر رمضان .. جانى التاج الجميل ده .. اللى حاسه كده ان ريحته بخور .. وطعمه خشاف .. من الأخ الفاضل أبو صهيب .. صاحب مدونة فارس على طريق الدعوة .. ألف شكر يا فندم .. ورمضان كريم

ماذا يمثل لك رمضان في كلمتين؟؟
شهر انتقاء الصالحين وتثبيتهم على الطاعة .. اللهم اجعلنا منهم وثبت قلوبنا على طاعتك

هل كتبت خطتك التي تنوي تطبيقها في رمضان؟؟

لا الحقيقة مش متعودة اخطط .. بس فيه حاجات كتير فى دماغى اتمنى ربنا يقدرنى احققها .. اهمها انى مش عايزة اتقل فى الفطار عشان مدوخش وانام بعده واقدر انزل اصلى التراويح السنة دى فى المسجد أصل الصلاة فى المسجد احلى كتير من الصلاة من البيت وبتحسسنى برمضان بجد.. واهو الحمد لله دودو كبر شوية ومش هيعمل قلق .. المهم هو كمان مينامش .. استرها يارب..

ايه احسن حاجة لك في رمضان ؟

رمضان كله على بعضه الحقيقة احسن حاجة فى السنة كلها وفى الدنيا كلها .. بحب كل حاجة فيه
بمجرد قدومه بتحس ان قلبك طاير وبيرفرف ولما بتبدأ فى الطاعات بتحس انك مش ماشى عالأرض اصلا
لما بتقرأ القرآن بيبقى مش هاين عليك تخلص
وكل ما يخلص حزب تقول لنفسك هخلص الربع ده كمان واقوم اشوف اللى ورايا .. طب كمان صفحتين .. طب هانت اهه الجزء هيخلص هههههههه
بيكون عندك تسامح غريب .. ورضا بكل شئ .. ولسانك رطب بذكر الله فى كل وقت
بتتصل وبتستقبل اتصالات كتير لناس مشوفتهومش من زمان .. مش شرط يكونوا قرايب .. بس بتحس فى رمضان انهم فاكرينك وانك حد قريب منهم عشان كده بيكلموك او انت بتكلمهم .. فبتفتكرهم طول السنة
اللــــــــــه عليك يا رمضان .. ياريتك السنة كلها .. اللهم بلغنا ومن نحب رمضان وتقبله منا

ايه الحاجة اللي انت جربتها رمضان اللي فات وناوي تكررها السنة دي ؟

ممممم .. والله ما انا فاكرة .. انا مكنتش راضية عن نفسى رمضان اللى فات .. وقعدت شهرين عندى اكتئاب بسبب الموضوع ده .. حسيت انه ضاع منى من غير ما احس بس اقدر اقولك اللى مش ناوية اجربها السنة دى .. او على الاقل مش هتابعها بضمير .. المسلسلاااااااات .. بجد دمار لأغلى ساعات وأيام فى السنة .. ربنا يعافينا يارب
والسنة دى السباق بادئ من بدرى أوى .. ومفيش حاجة حصرى .. كله عالتليفزيون المصرى
قوينا ياااااااارب

شعارك السنة دي في رمضان ايه؟

رمضان بلا مسلسلات .. بلا قطيعة .. بلا نوم بعد الإفطار

ناوي تفطر كام واحد في رمضان؟

ربنا يسهل .. قولوا يارب

ايه الطاعة اللي انت ناوي تداوم عليه بعد رمضان ؟

ان شاء الله صلاة القيام
امرر التاج الى

كل المدونين المسلمين
فـــــردا فــــردا
مش هذكر اسماء لان العدد كبير قوووووووى ما شاء الله ومش عايزة انسى حد
بس اى حد يشوف البوست واى حد يعلق واى حد يعدى صدفة واى حد يزورنى لأول مرة واى حد بعتله تاج قبل كده وخصوصا اللى مشافش اسمه المرة اللى فاتت وكل الموجودين فى الريدر- وطبعا هما عارفين نفسهم - لازمن وحتما يجاوب عالتاج
اتفقنــــــــا .. مش عايزة تزويغ .. ده تاج رمضان .. لو مجاوبتهوش دلوقت هتجاوبوه امتى يعنى ؟؟.. ولا يعنى لازم انده الاسامى واحد واحد عالملأ هههههههههه

يلا شدوا حيلكم .. واللى يحل التاج يبلغنى عشان آجى اشوفه
وكل تاج وانتوا طيبين .. وكل رمضان وانتوا صائمين وقائمين وللقرآن قارئين ومرتلين ولله ذاكرين وحافظين وتائبين وفى الصلاة خاشعين

آه على فكرة فيه بوست حلو اوى هنا عن اللى ممكن نعمله فى رمضان بجانب الصوم والصلاة لاكتساب الحسنات والصدقات الجارية . روحوا شوفوه

كل سنة وانتم طيبين
ورمضان كريم

Thursday, August 13, 2009

لحظة صـــــــــدق + تحديث

اذكر عشرة أشياء صادقة فى حياتك ؟؟

.
التاج ده وصلنى من دودو عاشقة الرومانسية
أسأل الله ان يفرج همها ويشفى لها خطيبها ويقرب فرحتها

.
مش عارفة ليه حاسة ان التاج ده صعب
صحيح هو سؤال واحد .. بس مش من المنهج عااااااااااا
فكرت انزل نتايج الكويزات اللى عملتها فى الفيس بوك .. واللى فيها منى كتير
بس تراجعت
وقلت هخلى البوست تلقائى .. مش مقيد بارقام ولا نقاط .. لانى مش عايزة اكرر اجاباتى عن التاجات السابقة
واتمنى انى اقدر اعبر عن نفسى بشكل كويس وغير ممل

اول حاجة جت فى بالى
انى بحب ابنى جدا .. وخايفة عليه جدا من الدنيا و من الزمن
نفسى ربنا يقدرنى أنا وزوجى ونربيه كويس
مش عايزاه يكون تافه ولا فاشل ولا عايش اليوم بيومه من غير هدف
عايزاه يبقى اقوى من الزمن .. من الصدمات .. من التحديات .. من المغريات .. من الفتن
عايزاه يقدر يقول لأ ويكون أدها .. لأى حاجة غلط .. ولنفسه أولا عشان يهذبها ويقومها
عايزاه يحفظ القرآن ويعمل به ليردعه ويحفظه من كل سوء
عايزاه يكون من سعداء الدارين .. الدنيا والآخرة
مش مهم يكون دكتور .. ولا مهندس .. المهم يكون انسان صالح وتقى ويتقى الله فينا وفى كل من سيُسئل عنه يوم القيامة .. فالدار الآخره خير وأبقى
رجاء .. ادعولى ربنا يقدرنى .. وادعوا لابنى ربنا يجعله من الصالحين

من امتع اللحظات اللى بتسببلى هدوء نفسى غريب .. انى اكون راكبة عربية فى وقت حلو مش حر لمسافة طويلة .. وسامعة موسيقى حلوة خصوصا صوت فيروز وفاتحة الشباك اللى جنبى وجايب هوا .. بحب السفر جدا بس من زماااااااااااااااااااااااااااااااااااااااان مسافرتش .. تقريبا من 9 سنين .. كتير برضه

اكتشفت فى نفسى عيب مكنتش آخده بالى منه .. أقولكوا عليه ولا اخليه سر ؟؟؟
مممممم .. لا هقول وعايزة رأيكم فيه .. وعايزة روشتة للعلاج منه كمان
لما برسم صورة فى خيالى عن حد نتيجة حلم من احلامى مثلا
او حاجة بتمناها فى الانسان اللى قدامى
او موقف من المواقف بنيت عليه رأيى وبعدين يطلع مش بالصورة اللى انا تخيلتها
وبعيد كل البعد عن الصورة دى .. والموقف اللى عجبنى منه ده كان مجرد صدفة .. خصوصا لما تكون حاجة تمس مبادئى أو مرتبطة بالسلوكيات الدينية او الاخلاقية
بنهاااااار داخليا وتنهار صورته جوايا
ولما بنهار بتقع منى حاجات كتير فى الطريق
بيكون فيها حلو كتير بس الوحش بيطغى والدنيا بتسود فى عينى
ومش بلاقى مفر غير البعد ..اللى ممكن اوى يكون بعد أبدى
انا عارفة ان مفيش حد مثالى .. وعارفة ان كل البشر فيهم عيوب واولكم انا
بس مش بقدر استحمل اضغط على مشاعرى واقبل حاجات مش عاجبانى رغما عنى
ولما بيحصل .. واكيد بيحصل .. مش بعرف اغير نظرتى ليهم اللى بقت دون المستوى خالص
وغصب عنى بتتغير معاملتى ليهم .. وده فى حد ذاته بيضايقنى جداااااا ويخلينى مخنوقة طووووووول الوقت
أغيثونى اغاثكم الله .. انا مش ملاك .. بس مش بستحمل .. قولولى اعمل ايه عشان ارضى بعيوب الناس ؟؟؟؟؟؟؟؟؟؟؟؟؟؟؟

آخر حاجة بقى
أنا اول ما فكرت اجاوب عالتاج ده .. قلت هكتب ايه جديد يعنى .. هما أكيد بقوا عارفينى اكتر من نفسى
وبناء عليه عايزة اتاكد منكم
انتوا فعلا بقيتوا عارفينى ؟؟ .. وقادرين تحكموا على ّ ؟؟ ولا انا بيتهيألى ؟
طب لو عارفين .. ممكن تقولولى شايفينى ازاى ؟؟؟

فى انتظار رؤيتكم .. بأقصى درجة صراحة ممكنة

ممكن يكون فيا حاجة غلط مش آخده بالى منها

والمفروض ان المسلم مرآه لأخيه المسلم

اتمنى انكوا تكونوا مرايتى

معلش يا جماعة كنت نسيت امرر التاج

وش مكسووووووووف

بس ملحووووووقة

أمرر التاج لــــ

حنين القلب

حنين همس الاحساس

ام مالك

كيارا

pink dreams

ديالا

سماء

rovy

شريكة فى المطعم

ريمان

بنت الاسلام

طالبة الفردوس

المعلم محمد صاحب المطعم - طعمية سخنة

حازم النبراوى

لورنس العرب

همس الاحباب

محمد عتلم

د. ابراهيم سماحه

محمد غاليه

معتز شاهين - مدونة احنا وهما

assafo anaroze

ابو صهيب ( الجمعاوى الاصيل ) سابقا

هعزف لنفسى

ذو الوجه المبتسم

وكل عام وانتم إلى الله أقرب وعلى طاعته أدوم
اللهم بلغنا ومن نحب رمضان وأعنا على صيامه وقيامه واغفر لنا وارحمنا واعتقنا من النار وبلغنا ليلة القدر وتقبله منا يارب العالمين

Tuesday, May 12, 2009

قــال تــــــاج قــال

إزيكوا يا جماعة .. وحشتونى
فاصل قصير لغاية ما ربنا يفرجها فى باب افتح قلبك .. ونرجع نكمل مع المشاكل الكتير جداااااا اللى جت .. أصل الواحد تعب بصراحة من قلة .. احم .. قصدى من كتر المشاكل .. وقلت آخد فاصل عشان أقدر أواصل هههههههه

المهم بقى دودو الجميلة ... عاشقة الرومانسية .. البنوتة الجميلة الطيبة الشقية اللى كلكوا عارفينها طبعا .. أهدت لى .. وخدوا بالكوا كويس من أهدتنى دى .. أهدتنى ايه بقى ؟؟
أقولكوا
أهدتنى تاج مش عارفة إسمه ايه بصراحة
بس هو تاج يعنى
وهو ده المهم

ويلا بقى نجاوبه ويا نخلص عليه يا يخلص علينا هههههههههههههههه

.

من أنت ؟ وما الذى تفعله هنا ؟

.
لا إله إلا الله
قال يا قاعدين يكفيكوا شر الجايين
واحدة وقاعدة فى مدونتها تعباكى فى ايه انا ؟؟ ههههههه
أنا واحدة من الناس .. عادية خالص حاصلة على ليسانس بطالة شعبة قعاد فى البيت – كان زمان اسمها ليسانس تربية شعبة لغة فرنسية بس دى موضة قديمة طبعا متخدوش فى بالكم- متفائلة وصبورة وعندى أمل كبير فى بكره
بعمل ايه هنا ؟؟ بجاوب عالمحضر اللى قدامى ده ههههههه

.
إسرائيل تقصف كل جنوب ممكن بحثا عنك ، أى شمال ستقصد؟

واسرائيل هتبحث عنى ليه اصلا .. ؟؟
على أساس انى خطر على امنها التدوينى مثلا ههههههه
أوووووووك هروح شمال أمريكا وتبقى تقصفها بقى نياهاهاهاها

أنت مكلف بحذف حرف من حروف اللغة العربية .. أيها ستختار ولماذا ؟

.
والله انا مش بحب حرف ( ظ) .. بيفكرنى بالظلم والظالمين والظلام . بس طبعا الكلمات دى ذكرت فى القرآن الكريم .. و حروف اللغة العربية اصلا مصدرها القرآن الكريم .. فمينفعش افكر مجرد تفكير انى اغيرها او احذف منها

لو قدر لك أن تدخل السجن فما هي القضية التي تتمنى ان تدخل بها إليه؟

حلوة تتمنى دى هههههههههه .. كأنى هروح دريم بارك مثلا ههههههههههههه
والله لو قدر لى ادخل السجن يبقى قدر لى .. وساعة القدر يعمى البصر .. مش هلحق اختار التهمة ههههههههههه هتبقى القضية جاهزة ومتظبطة ومستنيانى .. بس عموما ( اتمنى ) مدخلوش هههههههه

بالمناسبة.. منذ متى اكتشفت نفسك؟

والله لسه مكتشفتش نفسى .. بجد يعنى
شايفة فى نفسى طاقات مهدرة .. وحاسة انى ممكن اعمل حاجة لو وظفتها فى مكانها .. بس .....؟؟

معندكوش حد يكتشفنى ؟

على مفترق طريق الافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

مش عارفة ليه حسيت ان المسيخ الدجال هو اللى بيسألنى وجنته نار .. وناره جنة ههههههههههههه
انا هختار اليمين واتوكل على الله .. لأنه اليمين .. مش لانه حلمى

نحن لا نعيش حياتنا بل نتعلم فيها كيف نعيش ما تعليقك؟

لا احنا بنعيش حياتنا .. بس مبنتعلمش غير بعد ما نمر بمواقف الحياة المختلفة على مدار الحياة

بجملة واحدة فقط أكتب تعريفاً لكل كلمة من الكلمات التالية

الوطن
مصر – دمياط – بيت العيلة
الأم
حنان وعطاء ودفء واحتمال
الليل
هدوء ورومانسية وجراح وآلالام
الحب
وهم نخدع به أنفسنا ونجرح به أو ( يجرحنا به )غيرنا
أمريكا
مراة أبو العالم الشريرة
المرأة
حمالة الاسية
الصمت
لغة لا تقل اهمية عن الكلام
الانترنت
ضيف دخل بيوتنا واحتلها وبقينا احنا الضيوف :).. مقدرش اقول انه سئ جدا .. أو انه جميل جدا .. لأن اللى بيستخدمه هو اللى بيضفى عليه الصفات دى

ز
أخترمنصباً واتخذ قرارا ؟

.
رئيسة تحرير و صاحبة دار نشر .. الاتنين هههههههه

مش بقولكوا طاقات مهدرة هههههههه

قرارى

تعيين معظم المدونين كتاب وصحفيين بمرتبات مجزية .. عشان بجد فيه ناس عندها موهبة رائعة فى التعبير والنقد والسرد وكلها مواهب مدفونة خلف الشاشات .. هضبطكم متخافوش هههههههههه

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

تغييب ايه ؟؟
كان زمان الكلام ده .. ما ياما .. يامااااااااا ستات قالوا شعر .. مقريتش ليهم ولا مرة الحقيقة هههههههههه .. بس شغالين يعنى ههههههههههه
يمكن لأن المرأة اكثر خجلا من الرجل قى التعبير عن مشاعرها .. أكيد كانوا بيكتبوا شعر برضه بس مخبينه فى درج المكتب

أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل

أعلل ؟؟
والله ما انا عارفة ده تاج ده ولا كلبشات
مرة اسرائيل بتبحث عنى
و مرة تدخلونى السجن
ومرة مطلوب فى جريمة
ناقص تسألونى تحب تموت ازاى .. بالاعدام شنقا ولا بالموت حرقا هههههههههههه
لا طبعا مش عايزة حد يطلبنى .. ولو حد طلبنى مش هرد أصلا.. النمرة غلط ههههههههههه

.
إلى أين تمضي كلمات الحب .. بعد أن نقولها؟

من القلب للقلب رسول .. المهم ان يكون الحب صادق.. وليست مجرد كلمات

هل تجد علاقة بشكل أو بآخر بين المرأة وقطاع الطرق ؟

ممممممم أكيد اللى عمل التاج ده رجل
طييييييييب .. قاطع الطريق يسرق أموالك .. والمرأة تسرق قلبك

هذا فراق بيني وبينك .. متى ولمن تقولها ؟

.
أتمنى مقولهاش لأى حد بحبه .. واى حد بيحبنى مش هيخلينى أقولها .. وبكده سهل اقولها لاى حد طالما مش بيحبنى ولا بحبه

.
كيف هو غداً ؟
والله لو عشت إلى غدا هابقى أقولك .. عموما اتمنى ميكونش حَر هههههههه

أمرر التاج الى

معلش بقى يا جماعة ياللى همررلكم التاج
هو تاج رخم صحيح بس لذيذ ههههههههههه
وانا معرفش يبقى معايا حاجة وموزعهاش على الحبايب .. معلش بقى استحملونى ومحدش يدعى عليا .. ماشى
توكلنا على الله

محاسن صابر
أم أحمد المصرية
رفقة عمر
موناليزا
Soul .o.0.o .whisper
Aidy
rovy
ملكة بحجابى
نهى الوكيل
محمد عتلم
جنى
همس الاحباب
امبارح كان عمرى عشرين
طعميه سخنه
تامر على

اللى يجاوبه يعرفنى
واللى عايزه يتفضله

يارب البوست يكون خفيف عليكوا .. ومكونش ضيعت وقتكم فى الفاضى

سلااااااام
ومتنسوش باب افتح قلبك
Eftah.2albak@yahoo.com

Thursday, December 4, 2008

هو العيد لسه فرحة ...؟؟

تحديث هااااااااااااااااااااااااام

...........................

نزلت إجابتى عن التاج فى الكومينتس للى يحب يشوفه

كل سنة وانتوا طيبين .. وبالعيد فرحانين .. وللحم البقر آكلين .. (( أصلى مش بحب الضانى هههههه )) وطبعا طبعا طبعا .. للعيدية قابضين .. أو متورطين ودافعينها ومتدبسين .. على حسب يعنى

ونظرا لهذه الأيام اللطيفة .. والأجواء الخفيفة .. قررنا نحن الموقع أدناه وحاجاتي اللي جوايا .. عمل بوست لطيف ظريف دمه خفيف نسترجع فيه ذكرياتنا .. وندردش فيه عن حكاياتنا ومغامراتنا ورحلاتنا في العيد

ولما للنفس البشرية من طابع الزوغان .. والدخول ثم الرجوع للخلف بانتظام
قررنا نحن برضه .. الموقع أدناه وحاجاتي اللي جوايا .. في اجتماع مغلق استمر لعدة ساعات من المناقشات والمباحثات والاعتراضات والموافقات وانتهاءً بالمقترحات والتوصيات .. بإنشاء تاج جديد .. وأسميناه .." تاج العيد " وذلك لتدبيس المدونين .. ومحاصرتهم بين تاء وألف وجيم .. واللي مش هيجاوب يقول على نفسه .. يا رحمن يا رحيم

أما بعد .......... وصلنا إلى أسئلة التاج الميمون المطلوب أن يجيب عنها السادة المدونون

ماذا يمثل لك العيد ؟ وما أكثر شئ يبهجك في مظاهر العيد ؟
اوصف لنا طقوسك في العيد .. من ليلة العيد لآخر يوم ؟
احكي لنا أطرف موقف حصلك في العيد ؟
بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
مين أول حد تزوره أو تكلمه في التليفون /الموبايل عشان تهنيه بالعيد ؟
إيه الفرق بين العيد الحالي .. وعيد (أيام الطفولة )؟
كلمنا عن ذكرياتك في العيد
تفتكر الحياة من غير عيد .. هتفرق كتير ؟؟؟
إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟
احم احم .. لسه بتاخد عيدية ؟؟ من مين ؟؟ وبتديها لمين ؟
إيه رأيك في التاج ؟
تحب تمرره لمين من المدونين ؟ اذكر على الأقل 10

انتهى بحمد الله

والآن مع تمرير التاج إلى :

محاسن صابر
آبى هانم بتنجانى
رفقة عمر
موناليزا
روفى
أنفاس الصباح
عاشقة النقاب
فاتيما
محمد غاليا
همس الأحباب
رئيسة حزب الأحلام
أبو يحيى وآدم
مواطن مصرى نايم
لورنس العرب
بنت الاسلام
ريمان
صبرنى يارب
رئيس جمهورية نفسى

المستنصر بالله
جنى
نهر الحب
مولان
Dr. Ibrahim samaha
كلمات
أحسن تستاهل
واحدة مفروسة
فنانة مفروسة
المفقوعة مرارتها

original heart

Mostafa rayan

نور الدين

نور شاهين

اهو ده عيبه

عاليا حليم- عندلبيات

لماضة

عايش ولكن

hossam yahia

ساسو

زنوبيا

blue wave

البوست ده الحقيقة مش مجرد تاج خفيف ..إنما الهدف الأساسى منه هو الدعوة للفرح .. كتير بتمر علينا أعياد ورا أعياد مش بنحس بيها ومش بنفرح فيها .. بتيجى وتروح من غير ما تأثر فينا ولا تحسسنا بتجديد عشان كده حبيت أسلط الضوء على الحاجات الايجابية اللى فى العيد .. اللى بمجرد ما بنفتكرها بنفرح ونتمنى العيد ييجى عشان نرجع نعمل الحاجات دى أو نحس بالاحاسيس دى

عشان كده بدعوكم نستقبل العيد بالفرحة .. بلاش نتجهم ونشيل الهم ونزعل ونقول أهى أيام كلها شبه بعضها .. عايزين السنة دى نحاول نفرح .. ولو حتى نمثل على نفسنا وعلى بعض اننا فرحانين .. عايزين ننسى شوية الهموم اللى مش بتخلص ونأجلها لبعد العيد مهى ورانا ورانا هنروح منها فين ؟ نخرج .. نزور قرايبنا واصحابنا .. نضحك .. من زمااااااان مضحكناش من قلوبنا .. مش كده برضه ؟

كل سنة وانتوا طيبين .. و يارب تفرحوا بالعيد وتعيدوا وتتبسطوا ويعدى عليكم العيد في خير وأمان واطمئنان .. تقبله الله منا ومنكم

ملحوظة صغنونة :

..................
التاج مش بس للى ذكرت أسمائهم .. التاج لكل المدونين .. وآسفه جدااا لو كنت نسيت حد وانا فعلا حاسة انى نسيت حد .. فياريت كل اللى يدخل المدونة يقبله منى .. حتى لو مش من أعضاء بلوجر ممكن يستعمل خاصية (الغير معرف) ولو حد من الأعضاء اللى ذكرت أسمائهم أو اللى سقطوا سهوا أو الزوار لأول مرة مش عايز ينزله فى مدونته لأى سبب ياريت يجاوب عندى فى صفحة التعليقات .. المهم اننا ننشط الذاكرة ونفتكر مع بعض ذكرياتنا السعيدة فى العيد

منتظرة إجاباتكم عشان أعيد معاكم .. ومتنسونيش في العيدية .. أو حتة لحمة مشوية ههههههههه

على هامش البوست " هدية العيد "
.............................
أفكار لتقديم العيدية
رسائل عيد الأضحى

كود أغنية يا ليلة العيـــــد

أترككم فى رعاية الله وأمنه وأدعو الله أن يجمعكم بأحبائكم ويجمع شملكم
وكل عام وأنتم بكل الخير
Sally

Friday, August 1, 2008

حل الواجب .. واااااااااااااجب .. علموهالنا كده

وحشتونى جدااااااااااااا

ووحشنى التدوين والمدونة وعايش وعبده طناش .. وبلوجر شخصيا

وغيابى عنكم كان بسبب الروتر اللى اتحرق .. واللى منفعش يتصلح واشترينا واحد جديد ربنا يديله الصحة وطول العمر

المهم انى رجعت الحمد لله وبجد انا بشكركم جدا على سؤالكم ومتابعتكم لغيابى

ربنا ميحرمنيش منكم أبدا

ودلوقتى مع الواجب اللى بقاله ييجى شهر وشوية عندى ومش عارفة انزله

وحل الواجب ... واااااااااااااجب ... علموهالنا كده

يا تلامذة مصر تعالوا اتعلموا ازاى يتعمل الواجب أو اقعدوا فى بيوتكوا

ويا مدرسين مصر هاتوا اقلامكوا ودفاتركوا .. الليلة ليلتكوا .. والفرحة فرحتكوا
جالكوا واجب تصححوه بعد ما الطلبة استهانوا بواجبكوا

الواجب ده جانى من حبيبتى الغالية الاستاذة الرقيقة مدرسة الكيمياء والطبيعة / أم أحمد المصرية
والحمد لله انه مفيش فيه معادلات ولا مسائل تعجيزية ...لانى أصلاااااااا كنت أدبى .. وحتى لو كنت علمى مكنتش هفتكر حاجة أساسا ههههههههه

أولا قوانين الواجب

==========
. أذكر اسم من طلب منك حل هذا الواجب. " حصل يا فندم

. أذكر القوانين المتعلقة بهذا الواجب " حصل يا فندم

. تحدث عن ستة أسرار قد لا يكتشفها من يقابلك للمرة الأولى

. حول هذا الواجب إلى ستة مدونين، وأذكر أسماءهم مع روابط مدوناتهم في موضوعك
. اترك تعليق في مدونة من حولت الواجب عليهم، ليعلموا عن هذا الواجب

والآن استعدوا لكشف الأسرار الستة .. وعليهم سـر عرض خاص ولفترة محدودة هههههههههه

أحب الاستماع والقراءة والاطلاع اكثر من الكلام .. صامتة أغلب الوقت .. لكننى مستمعة جيدة ومتفاعلة

من صفاتى الخجل لكننى اجتماعية - رومانسية وتؤثر فىّ اللفتات الرقيقة ولو كانت بسيطة ولا انساها ابدا

أحب ان أتخذ الصف الثانى .. لأنى بتونس بالصف الاول واحتمى فيه .. واستند إلى باقى الصفوف و إذا اضطرتنى الظروف لاتخاذ الصف الاول احاول ان أشغله على اكمل وجه لكنى لا أسلم من التوتر الذى يسببه لى حتى أعتاده

لا أحكم على الناس من خلال ما يملكون .. فالتافهون فى نظرى فقراء حتى لو ملكوا مال قارون

حَمولة وأخفى مشاعرى السلبية .. عصبية مع المقربين فقط عندما يعجزوا عن فهم ما أريد .. أؤثر راحة الآخرين على راحتى.. وأكره الكدابين والمنافقين والمتكبرين وبيستفزونى جدااااااااااااااا

لا انسى الإساءة أبداااا .. خاصة من الأحباء وان سامحت وتناسيت لكنها تظل عالقة بذهنى ومؤلمة لقلبى

حساسة جداااااااا وممكن ازعل فى ثانية وأشيل فى قلبى واتقهر

------------------

أهديك لمين يا واجب .. أهديك لمين ؟؟؟؟
بما ان المسموح بيه 6 بسسسسس.. اسمحولى امرر الواجب للى ممررتلوش المرة اللى فاتت تاج الاحلام
حادى بادى كرنب زبادى شالوا وحطوا كله على

رفقة عمـر .. أحلام الغالية وصاحبة اول تاج اتمررلى
إيمان العزب بلدياتى بس حاليا شرقاوية
سحوره المفقوعة مرارتها من فيفى الله يسامحها
واحدة مفروسة من حاجات كتير بس أهى بتستحمل
ياسمين الفنانة المفروسة جدااا
مواطن مصرى نايم .. صاحب أول تعليق فى مدونتى

وحالا يا فندم والله هروح أبلغهم واحد واحد .. وواحدة واحدة فُريررررررررررره

أدينى خلصت الواجب أهه .. وسطرت الصفحات ولونت الخطوط وحطيت استيكرات كمان .. أما أشوف بقى
اللى هيعملى صح .. ويكتبلى نُـظُـر .. هقصفله قلمه .. انا بقولكوا أهه .. مش بعد التعب ده كله والسهر الجامد ده تكتبولى نُظُر ... انا عايزة هلال ونجمة وممتازة ومع جزيل الشكر .. وتودوا كشكولى للموجه يمضيلى عليه كمان .. ولا مستاهلش يعنى ولا إييييييه ؟؟؟؟

يارب يكون الواجب خفيف عليكوا
ويجعله عامر يا حبيبتى .. ( أم احمد المصرية ) شكرا يا قمر

وننزل بتتر النهاية بقى
تحديث هااااااااااااااااااااااااااااااااااااااااااام
***********************
نُشر لى موضوع الصداع الشريرررررر .. والدماغ الخطيررررر اليوم فى مدونة فرنسا والرايق والضاحكون
تعالوا شوفوه وقولولى رأيكوا
.
.
دمتم بكل الخير

Sunday, May 18, 2008

أول تاج .. تاج الاحلام

زغرودة حلوة رنت فى بيتنا

لا لا زغرودة ايه ... ده انا هعمل وليمة عظيمة عليها القيمة

ولا ايه رأيكوا اتبرع بنص ثروتى للجمعيات الخيرية ؟

لا لا خليها للشئون الاجتماعية

واعمل فرح جماعى لعشر عرايس وعرسان

أصلكوا مش عارفين ايه اللى حصل

عايزين تعرفوا ؟؟؟؟؟؟؟؟؟؟؟؟؟

طب صلوا على النبى عليه الصلاة والسلام

اخيرررا .. وبعد انقضاء ما يقرب من الشهر والنصف فى عالم

البلوجرية .. حدثت المعجزة الإلهية .. وجاءنى على حين غِرة .. تاج البلوجرية

المسمى بتاج الأحلام من الرفيقة الغالية الرقيقة .. رفقة عمر

بينى وبينكم مكنتش متوقعة انه يجيلى بدرى كده .. لأنى لسه جديدة فى عالم التدوين

فكان لازم أعملله حفل خاص يليق بجناب عظمة سيادته

اللى بفضله تم تدشينى بوسام البلوجرية

واصبحت بلوجرية رسمية ميه فى الميه

=*=*=*=*=*=*=*=*=*=*=*=*=*=*=*=*=*=

والآن جاء موعدنا مع إجابة التاج الميمون

أسألكم السكون

اللهم لا سهل إلا ما جعلته سهلا .. فأنت تجعل الحزن ان شئت سهلا

بسم الله الرحمن الرحيم

أذكر خمس أحلام على الاقل ..تخص ماضيك وتحلم فيها بتغيير اشياء

ماذا ستعدل وماذا ستترك؟؟

يااااااااااااه خمس احلام !!!! .. طب ادعولى افتكر أصل الزهايمر عندى من صفاتى الأساسية .. بس ربنا يسهل وافتكر

فى مرحلة االطفولة كنت بحلم زى اى طفلة انى لما اكبر ابقى دكتورة وطبعا ده اتغير اول ما وصلت للمرحلة الاعدادية .. لانى حولت حلمى على هندسة لغاية اولى ثانوى ثم ابتلانا الله بمُدرسة كيمياء الله يسامحها كرهتنى فى الكيمياء وسنينها مع انى كنت حبيتها جدا فى تالتة اعدادى على وجه الخصوص مما ادى إلى اختيارى القسم الادبى هربا من الكيمياء

وهنا تحول حلمى مرة اخرى ما انا شغالة احلام على ودنه وحلمت بكلية اعلام والصحافة وشجعنى على كده حبيبتى مُدرسة اللغة العربية اللى كانت متابعة كتاباتى وقصصى البدائية و كانت بتتنبألى أبقى حاجة فى مجال الادب .. مهو الأدب طبعا فضلوه عن العلم ههههههههه

وتم وأد حلمى لدواعى اقليمية .. فمدينتى بعيييييد عن القاهرة وغير مسموح بالسكن فى المدينة الجامعية .. وجاءت اللحظة الحاسمة لاختيار الكلية واخترت تربية لغة فرنسية لانى كنت بحبها فى ثانوى واحببتها وتفوقت فيها وكنت من اوائل دفعتى واستمرت كتاباتى الشعرية .. وبعد التخرج لم أجد عملا "" عاااااااااااادى " فدرست الحاسب الآلى واشتغلت مُدربة .. وبعد الزواج تفرغت للبيت وللبيبى ثم انضممت إلى صفوف البلوجرية ههههههههههههه

رغم احساسى انى لم احقق بعد ما تمنيت تحقيقه .. إلا انى سعيدة بالتجربة اللى خضتها والحمد لله لأنى حاولت بقدر الامكان التكيف مع كل الظروف اللى مريت بها ونجحت فيها .. وسعيدة خصوصا بمرحلة التدوين الحالية لانها جزء من احلامى القديمة

عفوا الذاكرة ممتلئة .. يرجى حفظ ما سبق فى مكان آخر وإلا سيقوم العقل بحذفه تلقائيا بفعل الزهايمر هههههههههههههه

بصراحة معدتش قادرة افتكر حاجة

=*=*=*=*=*=*=*=*= *=*=*=*=*=*=*=*=

.

أذكر خمس أحلام على الاقل ..تخص مستقبلك

المستقبل بيد الله .. بس على كلٍ

اول حاجة بحلم بها وبتمناها جدااااااا وشغلانى جدا جداااااااااا هى حسن الخاتمة .. لان زمننا ده صعب جدا وساعات كتير مش بنعرف أو بمعنى ادق مش بيكون عندنا البصيرة اننا نحدد اللى بنعمله ده صح ولا غلط .. حلال ولا حرام .. لان فيه حاجات كتير اوى دخلها شُبهات والمدنية و التكنولوجيا جابت معاها مشاكل كتير جداااااااا وذنوب كبيرة جداااااااا ممكن نكون بنعملها ومش حاسين بها زى مثلا الاختلاط فى الجامعة أو فى العمل او فى وسائل المواصلات اللى بيكون فيها خلوة زى التاكسى مثلا .. والاكرامية اللى كان اسمها زمان رشوة بس اترقت حاليا ..بجد ربنا يستر ويجنبنى واياكم شر الفتن ما ظهر منها وما بطن

بحلم أن يوفقنى الله لأكون لزوجى الزوجة الصالحة .. ولابنى الام الحنونة المعطاءة الحكيمة وأقدر أربيه بمساعدة زوجى على طاعة الله وحب رسوله وحفظ القرآن الكريم .. وعلى اكتساب المهارات المختلفة لتعينه فى حياته المقبلة ان شاء الله .. وان اكون بارة بأهلى لآخر يوم فى عمرى

بحلم ان يرزقنى الله بمال يكفى لإنشاء مشروعات خيرية لمساعدة أبناء المسلمين من تحفيظ قرآن وتعليم مهارات حاسب آلى ولغات وايجاد وظائف عمل بدخل جيد " مش محدود " وتجهيز عرايس وعرسان وتزويجهم وكفالة أيتام وتجهيز مراكز خاصة للمعاقين وللصم والبكم و..و .. و ... ياااااااااااه بس الفلوس تيجى وانا أظبطكم عالآخر

بحلم أشوف بسمة رضا على وجوه أفراد الشعب المصرى كله .. نفسى أشوف الناس ماشية سعيدة ومبسوطة وراضية ومش شايلة هم حاجة خااااااالص

بحلم بحاكم زى عمر بن الخطاب وعمر بن عبد العزيز يمشى وسط الناس فى الشارع يطمئن على احوالهم من غير لا حراسة ولا مواكب ولا أبراج عاجية .. ويكون آمن ومطمئن والناس حواليه فرحانين بيه ويتمنوا لو يفدوه بالروح والدم بجدددددددد

بحلم أحقق ذاتى من خلال مدونتى وأقدر أساهم فى حل بعض المشاكل ولو حتى بإنى أدى بارقة أمل أو دفعة ثقة بالنفس لأى شاب او فتاة

بحلم أحج أو حتى أعتمر انا وأهلى و زوجى وابنى كلنا كده مع بعض وأن يكون الحج مبرور .. والذنب بإذن الله مغفور
=*=*=*=*=*=*=*=*= *=*=*=*=*=*=
.

أذكر شخصين على الأقل .متواجدين فى حياتك حاليا
.
كنت تود وجودهم قبل الآن بزمن
.

اممممممممممم
والله انا مؤمنة جدا أنه لا تخطو قدم عن قدم إلا بإذن الله عز وجل .. وان كل شئ فى حياتنا مُقدر بأجل مسمى لا يُقدم ولا يؤخر
بس لو مصممين يعنى .. يبقى زوجى وابنى
ومدونتى .. اللى بعتبرها بجد صديقتى الانتيم
.
=*=*=*=*=*=*=*=*=*==*=*=*=*=*=*=
.
أذكر شخصين على الأقل غير متواجدين فى حياتك حاليا كنت تود وجودهم الان
.
او فى حياة اولادك مستقبلا

جدى وجدتى وحمايا الله يرحمهم
كان نفسى اوى يحضروا فرحنا ويشاركونا فرحتنا باول مولود ويكبر وسطهم ويدوله خبراتهم ونصايحهم
ويسمع حكايات جدى وجدتى زى ما كانوا بيعملوا معانا واحنا صغيرين
=*=*=*=*=*=*=*=*=*=*=*=*=*=*=*=*=
.

الحمد لله التاج خلص
بس كان تاج حلو بصراحة فكرنى باحلامى وحسسنى ان الزهايمر لسه متمكنش منى بالدرجة اللى كنت متصوراها الحمد لله يارب

أمرر التاج لمين .. استعدوا يا حلوين
هستثنى اللى عندهم امتحانات عشان مشغلهومش عن المذاكرة وربنا معاهم

روح
رئيسة حزب الاحلام
همس الاحباب
عاشقة النقاب
Monaliza
أحمد سكر
عبده الرايق
خالتى فرنسا هانم
Zianour
بنت الإسلام
المستنصر بالله
Tamer Nabil
أم أحمد المصرية
فاتيما
واحد من البلد دى
رئيس جمهورية نفسى
المنسى
جيهان على
Miss sosa
طارق الغنام
.

ابقوا عرفونى لما تجاوبوا عليه .. ماااااااااشى؟؟؟
وكل اللى عايزه يتفضله هديه بسيطة منى .. اتمنى ان تقبلوها

دمتم بكل الخير

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.