آآآآآآآآآآآآه يا دماغى

تراتاتاتاتارا تيراراتتتتاراا تيراراتتتتتارتاراتيرارريرارارا
ههههههههه متستغربوش .. ده انا بس بدندن بمقدمة " انا قلبى خالى ولا انشغل بك " لليلى مراد ما انا أصلى فى ساعات التجلى تلاقينى اشتغلت دندنة كده مع نفسى .. وانا بنضف الشقة ولا بغسل الاطباق

أحلى حاجة فى الدنيا دى لحظات الصفا والهدوء النفسى ولو انها قليلة جدا ونادرة أوى فى حياتنا .. ويمكن اهميتها جاية من ندرتها .. إيه ده ؟ خدوا بالكم دى نظرية اقتصادية عشان بس تعرفوا إنى مش زى اى حد ولا اى سبت وكلامى كله حكم هههههههههه وعشان تعرفوا سبب الروقان .. تعالوا معايا واسمعوا الحكاية

يحكى فى قدييييييم الزمان ......... لا لا لا مش دى
استنوا استنوا لقيتها أيوووووووه هى دى الحكاية .. صحصحوا معايا
بعد يوم شاق من الأشغال الشاقة المؤبدة الاسبوعية ونظام " اكنسى امسحى سيقى نفضى اكحتى اغسلى نضفى روقى .. اوعى تهلفطى او تتلكعى ولا تتجرمى شهلى لمعى " على رأى بنات المؤسسة فى مسرحية هالة حبيبتى

أصابنى صداع .. شرير .. متآمر .. صهيونى أخدت له سيتال أقراص500 .. انه يسيبنى فى حالى أبدا ابدااااااااا .. خالص خاااااااااالص

وطبعا السيتال العجيب معملش حاجة .. واستمر الصداع فى الدق والهبد طااااااخ طييييييييخ طوووووووخ فى رأس الغلبانة اللى هى انا .. طب أعمله إيه ده عشان يرحل عنى ؟؟ .. أعمله زار وأجيبله شمهورش وحبشتكاناته ولا أخبط راسى فى الحيط ولا اعمل ايه ؟؟؟الرحمة من عندك يااااااااارب

قووووووووووم إيه ؟؟؟؟؟؟؟؟؟

واحدة جارتى بنت حلال قالتلى ان فيه واحد بيعدى كل يوم جمعة بعد الصلاة ومعاه ادمغة سليمة مش بتصدع .. أنا بينى وبينكوا مكدبتش خبر.. وفحصت ومحصت وعملت استبيان بين الجيران أكدولى الخبررررر

قعدت استنى يوم الجمعة .. وإذ فجأتن وأنا واقفة فى المطبخ ألاقى صوت عربية ماشية بتنادى .. " ادمغة سليمة للبيييييييييع .. بيب بيب بييييييييييب " قمت جريت على البلكونة وبصيت .. لقيت عربية نص نقل ملياااانة ادمغة .. بس المشكلة انى فى الدور الرابع ومش هاعرف أنقى كويس .. ولو نزلتله السبت ممكن يخمنى ويدينى دماغ مش مقاسى ولا تكون مصدعة ولا مخبوطة ولا حاجة .. قلت مبدهاش .. كان ابو دودو لسه مارجعش من بعد الصلاة .. رحت آخده دودو ونزلت تحت البيت وتوجهت للعربية ودار بينى وبين البائع هذا الحوار

أنا : إزيك يا حاج .. انا سمعت عنك كل خير .. عايزاك كده تنقيلى دماغ حلوة على مقاسى بس تكون زيرو .. " لا مش صلعة يعنى ههههههههه قصدى تكون لسه بالتيكيت بتاعها "

الحاج : كل ادمغيتنا ميه ميه يا مدام .. شاورى انتى بس على اى دماغ تعجبك وهديكى عليها ضمان 6 شهور

أنا : بجددددددد .. خلاص هاتلى دى بس عرفنى طريقة الاستخدام .. وشاورتله على واحدة كده على يمينى

راح فاكيكهالى من كيسها وقاللى : ودى بتتلبس كده من الرقبة وقعد يشرحلى .. ودى طبعا يا مدام زى ما انتى شايفة فيها تجاويف خالية للعين والانف والفم والأذن .. ده غير انها مش بتغطى الشعر .. يعنى زى الماسك اللى بيغطى البشرة بس

أنا : ودى بتتلبس على طول ولا إيه ؟؟

الحاج : أيوه يا مدام البسيها على طول ما هو زى ما انتى شايفة كل دماغ لها لون بشرة مختلف .. وعلى حسب لون كل واحد بياخد اللون اللى يناسبه .. الأبيض بياخد الأبيض .. والأسمر بياخد الأسمر .. يعنى مش هتبان ده غير إنها مش بتتأثر بالماء ولا بالحرارة وتعمل على تلطيف حرارة الجسم .. والاهم أنها بتمنع وصول القلق والتوتر للعقل وتخلى اللى لابسها فى حالة انسجـــــــام

أنا قلت فى بالى : الراجل ده حافظ ولا فاهم ؟؟؟ معقول الكلام ده ؟؟؟

لقيته بيكمل .. وياريته ما كمل : واعتبريها زى طقم الأسنان

أنا : إيييييييييييه ؟؟؟ طقم الاسنان ؟؟؟؟؟؟ انت شايفنى هاتمة ؟؟؟؟؟؟؟ لا بقولك إيه خلى بالك .. ده انا أقرقشك وانت واقف

الراجل لحق نفسه وقاللى : مقصدكيش يا مدام العفو .. أنا بس قصدى انها سهلة فى التعامل معاها

أنا : خلااااااص .. أدينى هجرب ولو نفعت معايا .. هابقى آخد منك تانى لماما وزوجى .. واعين لإبنى فى جهازه .. مهو الصداع ده مش بيسيب حد

وأدينى أهه بكلمكوا وانا لابسة الدماغ العجيب ومتسلطنة عالآخر وبدندن " انا قلبى خالى ولا انشغل بك " يا سلاااااااااااام .. مفيش احلى من روقان البال
تحبوا اشتريلكوا المرة الجاية .. ها مين قال هات ؟؟؟؟؟

العرض سارى حتى نفاذ الكمية أو نفاذ الصداع من الكره الأرضية

كانت معكم

سالى هانم المهيسة

من وحى صداع شرير متآمر
--------------------------------------------

سامحونى يا جماعة على التقصير فى حقكم والتأخر فى الرد على تعليقاتكم وزيارة مدوناتكم لإنشغالى فى الفترة اللى فاتت فى كذا حاجة أولها كان عطل الكمبيوتر وقطع النت واكتئابى الشديد لضياع كل ملفاتى الخاصة على الهارد وصور دودو وفيديوهاته من يوم سبوعه لغاية دلوقت وحاجات كتير جدا ضاعت كلها ومش عارفة هينفع ترجع تانى ولا خلااااااااص

وتانيها كان خطوبة أخويا والتحضير لها.. وبعدها مباشرة تعب دودو بدور برد فى المعدة كان مبهدله ومبهدلنا معاه على الآخر بس الحمد لله بقى أحسن .. واخيرا عيد ميلاد دودو حبيبى اللى عملناه الحمد لله يوم الجمعة ويدوب بدأت افوق

كان المفروض أبدا بالرد على التعليقات

بس طلبت معايا انزل البوست ده النهارده

وكنت نزلته قبل كده على مدونة الضاحكون .. ولما كل ملفاتى ضاعت حبيبت أضم لمدونتى كل الشارد والوارد وربنا يستر ويحفظ المدونة يارب

راجعالكم ان شاء الله أرد على تعليقاتكم فى البوست اللى فات واللى قبله

وانتظرونى قريبا جدا فى مدوناتكم إن شاء الله

وحشتوووووووووووووووونى

مدينتى الفاضلة

جئت إليكم اليوم لأحدثكم عن أجمل مدينة ممكن أن ترونها ألا هى ؛ مدينتى الفاضلة

كم أنا سعيدة بالحياة بها ولو كان الأمر بيدى لعشت بها أعمارا وأعمارا

إن مدينتى الفاضلة غاية فى الروعة والجمال

سماؤها صافية زاهية وشمسها شعلة دافئة تبث دفئا ونورا لا هى محرقة ولا تحجبها غيوم ولا سحابة سوداء

وقمرها بدر فى كل الليالى كانه ملك متوج على عرشه ،يتلألأ من حوله النجوم كالدر المنثور، وماؤها عذب رائع المذاق

لا لون له ولا رائحة ... ولا كلور

وان تحدثت عن طعامها سأكتب أشعارا ودواوين فما ذقت ألذ ولا أروع ولا أطيب منه فليس به كيماويات ولا مسرطنات

اما أهلها فأناس طيبون محبون متسامحون بشوشون ، ترى فى جوههم الضياء وفى عيونهم الصفاء ، لا يعرفون العبوس

والتكشير ولا النميمة ولا الظلم ولا البهتان .. ولا أر الجيران

وفى التجارة من انزه ما يكون .. يعطون أطيب ما لديهم لا يغشون المكيال ولا يطففون الميزان وأسعارهم فى متناول الجميع

أما طرقها فواسعة ومريحة ليس بها مطبات ولا حركات وغير مزدحمة على الإطلاق وعلى كلا جانبيها تجد حدائق غناء تملؤها

زغاريد العصافير وهدير السواقى

اما حاكمها فرجل من اعظم الرجال .. يرتدى على رأسه تاج من الماس ويمسك بيده عصا من الذهب الخالص صنعهم له أهالى

المدينة الفاضلة من فرط حبهم له ومبايعتهم له .. وهو كذلك يحبهم ويحنو عليهم ولا يشغله عنهم شاغل .. فلا يستطيع النوم

وهناك جائع أو فقير أو مريض من رعاياه .. ولا عجب فى ذلك فهو سيسئل عنهم يوم القيامة

والمدهش فى مدينتى انها لا يوجد بها سرقة ولا قتل ولا تحرش ولا اغتصاب ، فالجميع بها أسرة واحدة ، إذا نقص من عند

أحدهم شيئا اكمله له الآخرون .. فلا مجال للجرائم ولا حتى للتباغض

كما ان مدينتى لا يوجد بها نواب .. فكل مواطن بها نائبا عن كل اهله ، وبيت الحاكم مفتوح دائما لسماع شكوى الاهالى التى

نادرا ماتحدث بدون أن يعرقلهم وزراء ولا مدراء ولا حتى غفراء

فلا مجال للمواعيد والتليفونات ..فقد تستغربون أن مدينتى لا يوجد بها تليفون ارضى ولا موبايل ولا حتى الشبكة العنكبوتية

فلا احد بها يحب الضوضاء أو العناكب !!

فالجميع مسالمون ونشيطون وكل من يريد الوصول إلى شئ يذهب بنفسه .. لا يوسط فلانا ولا علانا ليقضى له شئ حتى لا

يُحمله أعباءا اضافية على كاهله ..ولم الوساطة وكل شئ مباح ومتاح فى أى وقت بدون زحام ولا تعقيد ولا تهديد ولا وعيد ولا

رشاوى ولا تبديد

والآن ما رأيكم فى مدينتى الفاضلة ؟

هل هى فاضلة حقا كما أرى ؟

أم أن مدينتكم أفضل منها ؟

سؤال ينتظر إجابة

دمتم بكل الخير

Sally