Rss
twitter

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Saturday, March 19, 2011

الترقيعات الدستورية أكبر مضاد للثورة

تحديث
19/3/2011
النهارده اليوم الفصل بين لا ونعم
عن نفسى قلقانة وخايفة وبحلم بلجنة الاستفتاء طوووول الليل
خايفة على مصر وثورتها
خايفة من المنتفعين والانتهازيين واصحاب المصالح
خايفة من المغيبين اللى فاكرين ان( نعم )معناها الاستقرار و( لا )معناها الدمار
خايفة نرجع تانى ندور فى دايرة مفرغة توصلنا لنقطة الصفر

نعم لتعديل الدستور = انتخابات برلمانية سريعة لا تمثل كل الاحزاب لان الجاهز حاليا لنزول الانتخابات الوطنى والاخوان فقط = مجلس شعب لا يعبر عن ارادة الشعب = دستور جديد غير مختار من الشعب = الله يرحمك يا ثورة

لا لتعديل الدستور = اعلان دستورى مؤقت =فرصة لتكوين احزاب = انتخابات برلمانية تعبر عن الشعب= مجلس شعب مختار من الشعب= دستور جديد قام بوضعه اهل ثقة ممن اختارهم الشعب = تحقيق أهداف الثورة

أمانة عليكوا فكروا كويس جدااااا
متستعجلوش فى القرار
ومتدلوش بصوتكم وانتم مش عارفين تختاروا ايه؟
صوت واحد هيفرق كتير

النتيجة أيا كانت هنقبلها طالما تعبر عن ارادة الشعب

يااااااااااااااارب
اكتب الخير لمصر
.................................................................


من البداية كده ومن غير لف ودوران أعلن موقفى برفضى للترقيعات الدستورية
ليـــه ؟؟؟
وبرضه من غير كتر كلام عندى سبب واحد أكبر واعم وأشمل من اى أسباب اخرى للرفض مجتمعة
وهـو
ان التعديل الدستورى التفاف على شرعية الثورة
يعنى بحدوث الثورة سقط النظام بدستوره
لان معنى الثورة هو التغيير الشامل
ملهاش معنى تانى
ومعنى انى اطنش سقوط الدستور واقبل ان يتم ترقيعه وتعديل بعض مواده سواء كانت للأفضل او للأسوأ ..أنى بعلن الغاء شرعية الثورة وبحولها لمجرد احتجاج أو على راى الفريق شفيق تعبير حاد عن الراى
ببساطة
الثورة تعنى دستور جديد
الاستفتاء يعنى سؤال واحد : هل هذه ثورة أم لا ؟؟؟؟
ان وافقت على ترقيع الدستور .. فأنت تقر بانها لم تكن ثورة

فهل تقبل ذلك ؟؟؟؟؟؟؟

أنـــا لا أقــبــــــــــل
...............

طيب

نشوف شرح مبسط للتعديلات الدستورية عشان نفهم ولك حرية القرار ..ان لم يكن الرفض لديك مسألة مبدأ مثلى




وتذكروا أن التعديلات الدستورية هى مجرد تعديلات لدستور قائم
الدستور اللى تم وقف العمل به هيرجع تانى لو قلت نعم
وزى ما فى التعديل مادة بتحدد ان مدة الفترة الرئاسية الواحدة 4 سنوات وتجدد لمدتين فقط
فيه برضه المادة 190 اللى لسه موجودة فى الدستور ومحدش جاب سيرتها لا بالتعديل ولا بالالغاء اللى بتحدد مدة فترة الرئاسة 6 سنوات وتنتهى
يعنى الدستور هيبقى فيه مادتين ضد بعض

صلاحيات الرئيس فى الدستور المرقع هى
بموجب الدستور الحالى :
الرئيس هو رئيس الدولة فى المادة 73
و رئيس السلطة التنفيذية فى المادة 137
و المجلس الأعلى للهيئات القضائية فى المادة 173
و قائد القوات المسلحة فى المادة 150
......و رئيس هيئة الشرطة فى المادة 184
...و رئيس مجلس الدفاع الوطني فى المادة 182
و رئيس مجلس الوزراء إذا حضر اجتماعاته فى المادة 142
و له سلطة حل مجلس الشعب فى المادة 136
وله سلطة حل مجلس الشورى فى المادة 204
هاااا ايه رأيكم؟؟
موافقين لسه على تأليه الرئيس ؟؟
...
أنا هسكت لانى لست فقيهه دستورية ورافضة من حيث المبدأ مش محتاجة أتعمق فى تفاصيل
وهسيبكم مع الناس اللى بتفهم تقول رايها

....
المستشارة القاضية الشجاعة / نهى عثمان الزيني .. نائبة رئيس هيئة النيابة الإدارية في مصر (في العاشرة مساء ) : حين أرى اتفاقا بين الإخوان والوسط على نعم .. أتحسس عقلي ، وحين أرى معهم السلفيون .. أتحسس ضميري ، وحين أسمع فلول الوطني تتناغم مع دعوات بقول .. نعم .. لتدخل الجنة .. أتحسس مسدسي ... أرفض التعديلات الدستورية
- حاصلة على درجة الدكتوراة في القانون الدستوري من جامعة السوربون بفرنسا
- أشهر من قالت لا للفساد
منقول
..









أنا هقول لأ ... لانها أول خطوة نحو الديموقراطية
...

آخر فيديو..شوفوه لأنه مهم جدااا وهيوضحلكوا ببساطة احنا رايحين على فين ؟؟

بثينة كامل والثورة المضادة ومنعها من أوربت بسبب رفضها للتعديلات الدستورية



أعتقد المنع ده يوضح ان اللى هيقول لأأأأأأ هو اللى هيمشى فى الطريق الصح

منع بعد الثورة ..ازاى ؟
حكر على الآراء ...ازاى ؟
أمال فين أهم مبادئ الثورة .. الحرية والديموقراطية ؟؟
اللى بيحصل ده شئ مريب
وملوش غير معنى واحد بس
ان الثورة فى خطرررررر
وبيتم مهاجتمها بشراسة وعنف

أنا هقول لأ واتمنى لو كنت 85 مليون مش فرد واحد بس عشان أقدر احافظ على الثورة من الضياع بعد طوووووووول الانتظار


امانة عليكوا فكروووووا كويس جداااا

مصر أمانة فى رقبتكم
الثورة امانة فى رقبتكم
مستقبل أولادكم امانة فى رقبتكم

متضيعوش كل حاجة فى لحظة وبعدين تندموا يوم لا ينفع الندم


اللهم أرنا الحق حقا وارزقنا اتباعه.. وأرنا الباطل باطلا وأرزقنا اجتنابه



13 comments:

مدونه ما كفايه بقى said...

قرأت كلامك كله وشوفت الفيديوهات

لكنبرده لسه مقتنعه بنعم

تحياتى لك

كلمات من نور said...

حنقول لا لهذا الترقيع لدستور متهالك مريض

Mahmoud Ahmed said...

انا قرأت كل كلام
و احترم رايك جدا
و لكني سوف اقول نعم ان شاء الله

حاجات جوايا said...

مدونة ما كفاية بقى
..............
أهلا يا جميل
برضه مفيش فايدة هههه
طيب ممكن اعرف اسبابك
تحياتى ليكى

حاجات جوايا said...

كلمات من نور
................
أهلا يا جميل
الحمد لله بقينا 2/2 كده
ربنا يكتر من امثالنا يارب ههههههه
نورتينى يا قمر

حاجات جوايا said...

سبايدرمان
..........
أهلا يا فندم
شكرا لك
ربنا يرزقنا جميعا قول الكلمة الحق فى الوقت المناسب
نورتنى يا فندم

حاجات جوايا said...

يا ترى ((( الاخوان))) عاوزينا نقول (( نعم )) لييييييه ؟؟؟؟؟؟
أول حاجه لازم نعرفها مين اللى عاوز يقول نعم ومين اللى عاوز يقول لأ .
نقدر نقول ان اللى بيقولوا لأ هما : (حزب الوفد ، الكرامه ، الغد ، التجمع حركة كفايه ، شباب 6 ابريل ، ائتلاف شباب ثورة 25 يناير ،محمد البرادعي ،عمرو موسى ،رئيس نادي القضاه الاسبق المستشار زكريا عبد العزيز ، عمرو حمزاوي ، عمرو خالد ،وطبعا اشخاص معروفين كتير لا حصر لهم زي عمرو واكد و معز مسعود واحمد حلمي و...يعني نقدر نقول المعارضه كلها اللى كانت ضد مبارك وحكمه ونظامه ،بس لو تلاحظم احنا ماذكرناش حاجه مهمه جدا ومننكرش انها كانت من اشد المعارضين للنظام السابق وهي جماعة الاخوان المسلمين ودي الحقيقه ان جماعة الاخوان اعلنت انها بتقول نعم وتحث افرادها على انهم يقولم نعم . طيب ومين تاني هيقول نعم معاهم طبعا مفيش باقي غير الحزب الوطني وبرده الحزب الوطني أعلن رسميا انه هيقول نعم ، طيب مش غريبه ان الاخوان والحزب الوطني يجتمعم مع بعض مع اننا عارفين مدى العداوه بينهم على مدار 30 سنه من النظام الاسبق . حاجه تانيه مهمه الاخوان غير انهم اعلنم انهم هيقولم نعم بيدعم الشعب انه يقول نعم ؟؟؟؟ وبيعملم مؤتمرات واعلانات وبيقعدم مع الناس يقنعوهم انهم يقولم نعم وطبعا مصاريف جامده اوي بتتصرف على جعل الشعب انه يقول نعم ؟؟؟؟؟ لييييه
طيب هل ممكن يكون فيه سبب لكده ، اكيد طبعا السبب واضح جدا ان لما هتكون نتيجه الاستفتاء بنعم يبقى تاني مرحله هندخلها علطول انتخابات مجلس الشعب ، يعني تاني يوم نلاقي كل شوارع مصر مليانه مرشحين اخوان وحزب وطني نازلين يرشحم نفسهم ، طيب ولو اتقال لا طبعا هيتعمل دستور مؤقت وهتأسس جمعيه تأسيسيه لعمل الدستور وطبعا كل يوم هيعدي هتتكون احزاب وهيعرف المرشحين المستقلين ينزلم يقولم للشعب احنا اهو والشعب يعرفهم لكن سرعة انتخابات مجلس الشعب بتخلي الكوره في ملعب الاخوان بس، لان هما بقالهم 30 سنه بيلعبم اللعبه دي ولهم مرشحين وناخبين جاهزين انهرده مش بكره ودي أساس الموضوووع ، ولكن اي يوم تاخير هينزل مرشحين جداد على الساحه وطبعا حقي كمواطن مصري لا انتمي للاخوان ولا الوطني اني اسمع واشوف برامج مرشحين كتير جداد عشان صوتي غالى عليا ولازم اكون راضي وانا اضع صوتي.
طيب تيجي نعرف هما بيقولم ايه عشان يقنعونا بان احنا نقول نعم :
يقولك الاستقرار والبلد تمشي . طيب تعالم نفتكر لما مبارك قال خطابه بتاع أنا هكمل فترتي السته اشهر وبعدها اسلم امانه مصر ، بعد الخطاب ده الشعب انقسم لمؤيد للاستقرار ومعارض لمبارك، وهما الاخوان كانم معارضين طبعا وكان المؤيد يقولهم عشان استقرار البلد يقولم لا لازم يمشى وطبعا احنا كلنا كنا مع بعض انه يغووور ، طيب سؤاال بقى ليه ساعتها مفكرتش في استقرار البلد ؟؟؟؟؟؟؟؟
وبعدين استقرار البلد هيقف في خلال شهرين يتعمل فيهم الدستور ، للعلم بقى كليه حقوق جامعه القاهره قالت ان عندهم دستور جديد من الألف للياء جااهز وهيرضي كل مطالب الشعب ، و أجمع الفقهاء الدستوريين زي رئيس نادي القضاه الأسبق المستشار زكريا عبد العزيز وكلهم ان بناء دستور جديد نهائي و دائم لن يأخذ أقل من شهرين ، يبقى ازاي نسمح بتعيين مجلس شعب ورئيس على دستور مرقع وفيه صلاحيات غير محدوده وايه اللى يخلي الرئيس بعد مايتعين انه يلغي صلاحياته ،ولو حتى قدرنا نجبره على كده مش هيلغيها كلها وعلى قدر استطاعته هيترك لنفسه صلاحيات يبقى الصح ان احنا نضع دستور والرئيس يأتي عليه مش العكس، بجد من بعد مبارك لما حكم مصر في اول حكمه كان الشعب بيقول عليه كويس ، خلاص لم نعد نأمن لمبارك ااخر.
نقطه أخرى بيقنعوا الناس بيها الماده التانيه ويقولم ان لو اتغير الدستور الماده التانيه هتتغير.
اولا انا كمواطن مصري مسلم والحمدلله اول ما اسمع شخص يتحدث عن تغييرها استغرب لان في قناعتى مستحيل ده هيحصل ، طيب خلينا معاهم للاخر ، الاول البابا نفسه اعلن ان الماده التانيه استحاله هندعو لتغييرها ، ومجموعه من الكنائس في مصر قالت نفس الكلام ، طبعا الكلام ده ما يقنعهمش ، اقولهم بقى انتم بتضحكوا على الشعب؟؟ ليييه؟؟؟؟ لان هوا الشعب المصري ده غالبيته العظمى اييييه؟؟؟؟؟؟؟ مسلم ولا مسيحي ، هل يعقل ان مصر اللى هتصوت على دستورها انها تقبل بتعديل الماده التانيه لاااا يعقل انتم كده بتستخفم بينا نحن الشعب ،وفي مدى حبنا لديننا اللى هوا فوق كل شئ ، وفي انكم الوحيدين اللى خايفين عليه واحنا عديمي الخوف عليه .




دي الورقه اللى انا كتبتها
انا شااايف انها هتقنع ناس كتير
انا بحاول انشرها على قد ما اقدر
وياريت تتوزع بكره
وعالعموم انا هطبعها برده وهوزعها

ياريت نساعد في نشرها كتبها احد الشباب الي بيقول لا

Asmaa mahaba said...

مع اختلافى معكى فى انى حقول نعم ان شاء الله لكنى عاوزه اقولك شىء ليس هناك اى دليل على ان نعم هى الاصح من لا او لا هى الاصح من نعم فكلها تكهنات والحقيقه لا يعلمها الا الله فادعى ديما ربنا ان ربنا يعمل الخير والصالح لبلادنا ويرشدنا للصح والخير
وفى النهايه انت تريد وهو يريد والله يفعل ما يريد

حاجات جوايا said...

سومه
......
اهلا يا جميل
الدليل يا حبيبتى ان كل من حاربوا الفساد وكل الخبراء القانونيين موضع الثقة زى نهى الزينى وهشام البسطويسى والبرادعى وأيمن نور وغيرهم اتفقوا على رفض التعديلات من بدايتها خالص
التعديلات دى لو اتوافق عليها هترجعنا لنقطة الصفر تانى
هتسلمنا للوطنى والاخوان على طبق من فضة
الانتخابات البرلمانية هتتعمل من غير متكون ممثلة للشعب تمثيل حقيقى
يبقى عملنا ايه
احنا عايزين احزاب تتشكل ومن خلالها ييجى مرشحين بموافقة شعبية واختيار شعبى
لكن بقبول التعديلات الفرصة هتبقى صفر
ومحدش جاهز للانتخابات غير الوطنى والاخوان
واحنا مش عايزين حد منهم
فكرى يا جميل تانى
وربنا يهدينا للقرار السليم

حنعيش يعنى حنعيش said...

مدونتك من العشر مدونات الاولى طبقا لعدد التعليقات ... منشور فى اهرام النهاردة ... يالا ياعم طلعنا فى الجرايد ... مين قدنا ... والله تستاهلى كل خير

حاجات جوايا said...

حنعيش يعنى حنعيش
...............
أهلا د اسلام
بجد والله
العشرة و لا العشر الاف ؟؟؟
اصلها تفرررررق
دورت عالخبر عالنت ملاقيتش غير الخبر ده
http://www.ahram.org.eg/479/2011/03/21/51/68643/219.aspx
هى فى الورقية بس ؟
ياريت لو فيه توضيح اكتر تبلغنى
شكرااا جدااا لحضرتك

حنعيش يعنى حنعيش said...

العاشرة ... فى الورقية مش على النت .. انت وستيتة كمان ... والله وباضت لكزا فى القفص ..هههههههههههه

حاجات جوايا said...

حنعيش يعنى حنعيش
...............
ده انا هجيبها من سابع ارض ان شاء الله
ولو انى كنت مقاطعة الاهرام من زمان بس كلمتى تقع المرة دى مفيش مشكلة ههههههه
الله يبشرك بالخير يا دكتور
باضت لنا فى الاهرام ههههه
عقبال عندكم يا حبايب ههههه
شكرا جزيلا يا دكتور عالبشرى والاهتمام
^_^





اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون


Free CursorsMyspace LayoutsMyspace Comments
كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.
 
Powered :blogger