ازيكوا يا جماعة الخير .. أخباركوا ايه ..كل سنة وانتوا طيبين و بكل الخير والهنا .. والسنة الجاية ان شاء الله نكون على عرفات جميعا ..آمين يارب
.
فكرت النهارده أستغل نزعاتى الصحفية المكبوتة وأشارككم فى حوار حددت له عدة محاور يدور حولها الحوار والمناقشة .. ونظرا لاننا لا نملك خاصية التحاور وجها لوجه فى عالمنا الافتراضى فاحببت أن يتم الحوار فى صفحة التعليقات .. الدعوة عامة للجميع .. والحاضر يعلن الغايب
.
ندخل بقى فى الجد ..ونبدا باسئلة بسيطة وبعدين نصعب شوية
.
بسم الله الرحمن الرحيم
.
س 1 : فى رأيك من / ما أفضل
محاور / محاورة / برنامج // صحفى / صحفية / صحيفة ؟
>
س2 : اى نوع من البرامج تفضل
(الحوارية .. الفنية .. السياسية ..الثقافية .. الاجتماعية .. الدينية ) ؟
?
س3: ما رأيك فى سياسة العصيان المدنى التى تسود المجتمع المصرى حاليا بكافة طوائفه من اضرابات واعتصامات ..؟؟ وهل ترى ان لها تاثير ايجابى أم مجرد تفريغ لشحنات الغضب ؟
>
س4 : انتشرت على صفحات الانترنت وخاصة المدونات والفيس بوك دعاة إلى الالحاد .. والعلمانية .. كما يوجد دعاة الى البهائية .. وآخرون يدينون بديانة غير التى يعتقدون بها .. كمسلمين فى البطاقة وميلهم الى المسيحية والعكس .. فأيهما تفضل اعتراف كل فرد بعقيدته والجهر بها ام التكتم على ما يبطنون ؟؟ ولماذا ؟
?
س5 : إذا قدر لك ان تكون قيادى ذو شأن عظيم .. وبيدك التغيير .. فما اول شيء تحلم بتغييره فى مصر ؟ ولماذا ؟
>
س6 : من تتمنى ان يرشح نفسه للرئاسة ... وينجح فى لمح البصر ..( كما حدث مع السيد البدوى وحزب الوفد )؟
.
س7 : ما أكثر المواقف التى أثرت فيك بالسلب أو بالايجاب فى الفترة الماضية ؟
.
س8 : ما رأيك فى وصف الفنانين واللاعبين لأنفسهم بصفوة المجتمع .. ومن فى رأيك يستحق هذا الوصف ؟
..............................
كفاية عليكوا كده الرحمة حلوة برضه J
واللى عنده اسئلة غيرها يكتبها ويشاركنا عشان الفايدة تعم على الجميع وكلنا نتعلم من افكار بعض
.
مستنياكم
كل الحب لكم
.jpg)
.jpg)
14 comments:
مني الشذلي
-
بحب البرنامج يكون منوع
مثال بحب اتفرج علي قناة الرسالة لما افتح التي في فبتلاقي مثلا فيه برنامج زي " خواطر " فيه مادة ثقافية - دينية - ..... "
الخلاصة مش بحب اتفرج علي حاجة كدا عاملة زي الجلي ملزق ولوحده لازم يكون كوكتيل .
----
طبعا لها تاثير ، أحيانا الحكومة تستجيب ودا ايجابي ، ولها تأثير سلبي علي البلد المثقلة بالحمول ومش مستحملة أي يوم عصيان .
-----
الجهر ، لأن أن أبين من أمامي خير لي من أي يكون خافي العقيدة ويحاول إذائي بسبب عدم اعترافي بما يعتقد ، وفي نفس الوقت مع أي حد يقره اجماع أأمة المسلمين عن الخارجين من الإسلام .. سواء في حد بالردة أو لا " لا إكراه في الدين ... "
-----
نفوس الناس ، لأنها بقت وحشه ، لكن في أمل لتغيرها .
----
بجد وبدون تريقة نفسي أن اللي اكسب
--
لما اتعينت وسط الموظفين لقيت نفسي بدأت اكره وقلبي يغل لأني بتأذي أو يُسخر مني دون أن اصنع شيء سيء .
---
طبعا دول ..... المجتمع ، الوصف الحقيقي للعلماء ، ديني وعلمي .. لأنهم من يحدث تغيرات جذرية للمجتمع .
---
Mr Presedent
.............
أهلا ياريس
أنا كمان بحب منى الشاذلى .. وعمرو اديب ( ربنا يرجعه بالسلامة ) .. ومحمود سعد - وابراهيم عيسى
متفقة معاك فى حاجات كتير خصوصا فى افضلية الجهر بالعقيدة .. لانى احب اعرف انا بتعامل مع مين .. مش قادرة اتخيل مثلا ان مدرس ابنى ممكن يكون له اتجاه تانى يغرسه فيه من ورانا واحنا مآمنين ومعتقدين انه مسلم موحد ..لو مسيحى هبقى عارفة انه مسيحى وعادى مدرسين مسيحين كتير درسولنا ومأثروش علينا لان المسيحية ديانة معترف بيها دوليا وظاهرة فى البطاقة لكن لو بهائى ولا ملحد هعمل ايه وقتها
نفوس الناس فعلا محتاجة تغيير
خلاص ياريس توكل على الله ورشح نفسك .. مين عارف
معاك فعلا فى وصف صفوة المجتمع وغيرهم كمان من كتاب وصحفيين ومفكريين وسياسين
الفنان الوحيد اللى اعتبره من صفوة المجتمع هو محمد صبحى
نورتنى يا ريس
شد حيلك الانتخابات قادمة :)
الابراشي- مني الشاذلي - 1 واحب البرامج الدينيه والسيا سيه والثقافيه- 3 -بالنسبه لسياسه العصيان المدني فالمجتمع المصري في عصيان مدني من زمان فهو يعمل قليلا ولايتقن عمله ويتكلم كثيرا وليس لها اي تاثير فعلي 4 - لاافضل ان يجهر احد بانحرافه عن عقيدته لعدم اشاعه الفاحشه الفتنه والا يكون موهوباومحبوبا فيكون له تاثير علي من حوله5 -اذا قدر ان اكون قيادي وبيدي الامر ساطبق عقوبات مشدده جدا علي اولا الرشوه ثانيا النفاق ثالثا الدعوه الي مشروع قومي ينهض بالبلد 6لااتمني شخص بعينه ينجح في الانتخابات فلو انتخبنا اي شخص وكان لنا ان ننتخبه ونحاسبه وننتخب غبره انتخابات حره نزيهه فسيعمل جاهدا لمصلحه الشعب لان الشعب سيكون قادرا علي محاسبته 7واكثر المواقف التي يؤثر في بالسلب هي الدعوه الي التبرع لمستشفي بعينها كمعهد السرطان او دور الايتام واري ان الدوله مسئوله مسئوليه كامله علي الانفاق علي هذه الدور وان هذا تخلي من الدوله عن التزاماتها8 ورايي في وصف اللاعبين والفنانين انهم صفوة المجتمع اري ان لهم مريدين من هذا الشعب الساذج يرفعونهم علي الاعناق فيغرونهم ويعطونهم حجما ليس علي قدرهم ويستحق عذا الوصف كل ماهر في عمله ومهنته ومتقن فيها
شكرا على البوست المميز
أفضل محاور: الدكتور عباس الجنابي في قناة المستقله
أفضل برنامج:الرأي الحر في قناة الحوار، مع ان مقدم البرنامج ليس حرا ولكنه عبد لمن يدفع له المال، ولكن أرى من خلاله رأي الشارع العربي في كل شيء وخاصة مصر
أما الصحفيين ففي رأيي كلهم مطبلين لا أحب أحدا منهم
2- البرامج السياسيه
3- العصيان المدني لا يصلح في مصر، لأن اللي مش هايروح الشغل هايترفد لأن مفيش رقابه على القطاع الخاص وبيعملوا اللي هما عاوزينه في الموظفين
4- لو كان يشعر أنه بيعمل حاجه صح لجهر بمعتقده الجديد، لكن مع الاسف لا يجرؤ احدا منهم على التصريح بأنه كان مسلم ولكنه ألحد
5- الله لا يحكم عليا بان أكون قيادي، أصلي مش بحب حد يدعي عليا
6- لا يوجد من يصلح للرئاسه من بين المرشحين، ربما هناك من يصلح ولكنه غير ظاهر على الساحه
7-مفيش- أصل كل حاجه زي ما هي من فتره
8- الفنانين واللاعبين صفوة المجتمع، كنت ممكن اوافقهم لكن بشرط، عدم سخريتهم من الآخرين، لكن اللي انا شايفه ان واحد فنان يطلع يشتم شيخ او يتريق عليه، فبكده انا اقول عليه صفوه ازاي؟
وواحد يطلع لمؤاخذه في منظر مش تمام مع ممثله من الصفوه بردو في فيلم، احترمه ازاي؟
انا جايه احجز مكان
بس راجعه تانى :):)
سواح فى ملك الله
..............
اهلا بك اخى الفاضل
اجابات كلها منطقية وعقلانية
احب التعليق فقط على اجابة سؤال الجهر بالالحاد.. لان الموضوع ده شاغلنى جدا
انا متفقة جدا مع حضرتك بخصوص خطرها على اشاعة الفتنة خصوصا لو شخص محبوب
بس برضه من الناحية التانية شايفة انها تعتبر اخف الاضرار
يعنى انا لما اعرف ان (س )من الناس اللى كنت بحبه وبقدره ملحد.. اكيد وجهة نظرى فى الالحاد مش هتتغير لكن وجهة نظرى فى الشخص نفسه هتتغير ولما هيتكلم هبقى عارفة هو يقصد ايه ؟؟وبانى رأيه على اى عقيدة ؟
بعيدا عن الالحاد
كان فيه محامية حقوقية مسلمة معروفة ومشهورة وبتظهر بشكل دائم فى الاعلام أكيد تعرفها.. المحامية دى كان ليها افكار عجيبة غير متفقة مع شريعتنا الاسلامية لدرجة ان البعض ان لم يكن معظم الناس كانت بتسخر من افكارها وتتهمها بالجنون
فجأة
قرانا فى الصحف انها اعلنت تنصرها فى غرف البالتوك
وبالمتابعة اكتشفنا انها كانت بتبحث فى المسيحية من سبع سنين
يعنى موضوع تنصرها مظهرش فجاة
يعنى بقالها سبع سنين بتبطن للاسلام الشر
عايشة بين مسلمين بتضلهم
وفيه ناس بتقتنع بأفكارها على اساس انها مسلمة ليبرالية وحقوقية ومثقفة
فاهم قصدى
يعنى انا افضل انى اعيش مع عدو .. ولا افضل انى اعيش مع صديق بيكرهنى
عدوى هبقى عارفة انه عدو وهتجنبه
لكن صديقى هآمن له وهيطعننى فى ظهرى
انا مش عارفة راى الشرع فى الموضوع ده
لكن دى مجرد وجهة نظر مقتنعة بيها خصوصا فى زمن الفتن اللى عايشين فيه ده
خوفا على اولادنا من التأثير عليهم واللعب فى رؤوسهم
فى انتظار رد حضرتك
تحياتى
يوميات شحات
...........
شكرا يا فندم
فى انتظار مشاركة حضرتك
تحياتى
لورنس العرب
............
أهلا بك اخى الفاضل
للاسف فعلا مصر محكومة بيد من حديد.. ان كان فى الخاص ولا فى العام
السكينة على رقبة كل حد يعلى صوته شوية
كل متمرد
والاسلحة كتير
الرفد - الاعتقال .. كله موجود وفيه بركة كمان ههه
للاسف فيه ناس بتجهر بالالحاد فعلا .. لكن المجتمع هو اللى مش بيعترف بيهم
يعنى هما يقولوا احنا بلا دين .. والمجتمع يقولهم لا انتوا مسلمين
ويتعامل معاهم على هذا الاساس
من تتمنى ان يرشح نفسه للرئاسة
يعنى حد لسه مرشحش نفسه
ويمكن ميرشحش نفسه
بس انت نفسك يكون هو رئيسك القادم
مين هو اللى تتمناه ؟؟؟؟
فى انتظار ردك
نورتنى اخى الفاضل وشكرا للمشاركة
همسات وبحر الحياة
..............
مكانك لسه محجوز يا قمر
يلا شدى حيلك وتعالى قبل ما يتاخد
:)
نورتينى يا جميلة
اختي الفاضله اكيد وجهه نظرك صح بس اخنا عندنا مسلمين لاينتمون الي الاسلام الا يمجرد اسم في البطاقه ولايؤدون الفروض وقد لايعلمون هذا التصرف او ذاك حلال ام حرام وهذا النوع من الناس عرضه للتاثر باي احد عنده موهبه القدره علي الاقناع وحينما يحس صاحب هذه الموهبه انه لو جاهر بدينه الذي يدعوا اليه انه سيحاسب علي فعلته فلن يجرؤ ان يدعوا احد احنااتفقنا في البوست اللي فات ان مسرحيه مدرسه المشاغبين كانت البدايه في افساد التعليم في مصر يعني حب الاطفال للمسرحيه ونجومها خلاهم تلقائيا يقلدوا مايحدث فيها علي ارض الواقع ويعتقدوا ان اللي بيعملوه ده صح وبعدين احنا عندنا بيئه خصبه اقرب مايكون الي الميل الي اتجاه او اخر حسب موضه العصر ففي فتره من الفترات مثلا كان في مصر شباب يطلق عليهم عبدة الشيطان ولو لم يتم القيض عليهم لكانوا اثروا في ناس كتير وكنتي هتلاقي شباب كتير يتبعون هذا المنهج اما فالاعلان له ضرر ونفع والاخفاء له ضرر ونفع ولكني اري ان اشاعه الفتنه اشد ضررا اما بالنسبه للمحاميه فانا بشوفها انسانه مهووسه بالشهره وحينما وجدت نفسها مهمله لااحد يلتفت اليها فقالت اعمل فرقعه اعلاميه عشان الناس تتكلم عنها يعني لم تستطيع ان تنال الشهره الا علي حساب دينها وبشوفها مريضه وعلي فكره دي نازله انتخابات مجلس الشعب السنه دي ناويه وربنا يهديها او يشفيها تحياتي ليكي
سواح فى ملك الله
-------------
وجهة نظر حضرتك صائبة جدا بالفعل
والله انا مرعوبة جدا من الموضوع ده
اى حد عنده اولاد هيخاف عليهم من الفتن
صحيح التربية بتفرق
بس احنا فى زمن صعب التربية لوحدها مش كفاية
ربنا يحفظ اولادنا واولاد المسلمين يارب
شكرا لتفاعل حضرتك
نورتنى يا فندم
السلام عليكم ورحمة الله وبركاته
لى تعليق على نجاح د/ السيد البدوى والذى كما جاء بحوارك نجاح فى لمح البصر...
هذا النجاح سيدتى أزعج النظام فكان ولابد من هدمه وبصورة درامية
فكان فخ جريدة الدستور والذى وقع فيه. وللأسف خسر الكثير وأعتقد أن الإصلاح صعب جداً
وتقبلى تقديرى واحترامى لقلمك الراقى
محمد الجرايحى
------------
وعليكم السلام ورحمة الله وبركاته
أهلا بك اخى الفاضل
توقفت سيدى عند جملتك
هذا النجاح سيدتى أزعج النظام فكان ولابد من هدمه وبصورة درامية
فكان فخ جريدة الدستور والذى وقع فيه. وللأسف خسر الكثير وأعتقد أن الإصلاح صعب جداً
فنجاح السيد البدوى لا اعتقد ابدا انه كان بعيدا عن اعين الدولة .. بل كشفت لنا الايام انه كان بمباركتها وكانه تم الزج به لاستئناس المعارضة ..والا لما ظل باقيا كل هذا الوقت ولم يتم الاطاحة به .. فمن يحميه ويقف خلفه
وارى ان اكبر انجازات الدولة به هو هدم كيان صحفى عريق ومعارض اصيل كجريدة الدستور الاصلب والاشد معارضة على مستوى الصحافة المصرية لتكميم الافواه فى المرحلة الحرجة التى نمر بها والتى ستشهد آخر صيحات التزوير
نورتنى اخى الفاضل واسعدنى مرورك
Post a Comment