Rss
twitter
كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Sunday, October 31, 2010

بخـــــاف

الخوف
مرض العصر
لما بدات باب افتـــح قلبك .. جاتلى رسايل كتير معظمها رفض النشر
واحترمت رغبة الجميع
بس اللى استغربتله ان العامل المشترك بين كل اللى رفضوا النشر كان الخوف
الخوف من المجهول
الخوف من كلام الناس
الخوف من الزواج .. والفشل فيه
الخوف من الحسد
الخوف من السير فى الطرقات بسبب السرقة
الخوف من ركوب المواصلات بسبب التحرش
الخوف من الكلام والتعبير والافصاح
الشك فى كل المحيطين وفى نواياهم
الخوف من ارسال ايميل وتفضيل التحدث عبر الماسنجر ..باعتبار الايميل ممكن يتعرض لاختراق
عدم الشعور بالامان كان عامل مسيطر وقوى لدرجة مكنتش اتخيلها ..ولدرجة انى احيانا مكنتش بفهم المشكلة صح من كتر ما هما خايفين يتكلموا
انزعجت جدا من الحالة اللى وصلنالها دى
يعنى لما نبقى كبار كده وبنخاف .. هنغرس فى ولادنا الامان ازاى
واساسا ايه اللى يخلينا نوصل للدرجة دى
الخوف شعور طبيعى .. واللى ميخافش اكيد مجنون
بس يكون بحدود
...............................
طبيعى اننا نقلق من ناس منعرفهاش
بس لو استمر القلق باستمرار معرفتهم يوم ورا يوم واظهار حسن النوايا منهم يبقى العيب فينا احنا
مش معقول كل اللى حوالينا ممثلين جامدين
صحيح فيه ناس بتلبس اقنعة كتير بس مش هيفضلوا كده طول الوقت
اكيد فى موقف من المواقف هيتكشفوا وساعتها يبقى من حقنا نبعد خالص ونشكرهم ونشكر الظروف اللى كشفتهم لينا وعلمتنا (نحذر ) فى المرات اللى جاية ..
التجربة خير معلم .. لازم ندخل التجربة ونقبل حلوها ومرها .. لو عدت على خير يبقى كسبنا صديق وكسبنا راحة بالنا .. ولو معديتش على خير يبقى اتعلمنا حاجة تنضاف لرصيد خبرتنا فى الحياة
أمال الخبرة بتتكون ازاى .. مش من التجارب اللى بنعيشها ؟
.........
طبيعى اننا نخاف من الحسد
مهى مش كل الناس قلوبها صافية وبريئة .. وكل صاحب نعمة محسود
بس منخافش لدرجة اننا ننفى نجاحنا ..ونكبت طموحاتنا .. ونوقف كل مشاريعنا
عشان محدش يحسدنا لو نجحنا
الحسد مذكور فى القرآن .. يعنى حقيقة واقعة
وانت نفسك ممكن تحسد نفسك مش بيقولوا ما يحسد المال الا اصحابه
هتعمل ايه ساعتها .. هتقاطع نفسك ولا هتموت نفسك
يبقى نتوكل على الله فى امرنا ونعيش حياتنا واحنا مسلمين امرنا لله
ونحصن نفسنا بالاذكار .. ونستعيذ بالله من الشيطان ونبعد الوساوس والشكوك من دماغنا
وفى الاول والاخر .. ما اصابك لم يكن ليخطئك وما اخطأك لم يكن ليصيبك
يعنى كل شيء بقدر الله
" وقل لن يصيبنا الا ما كتب الله لنا "
.......................
الخوف من المستقبل
ضعف ايمان مننا اننا نخاف من بكره .. هو احنا فى ايدنا ايه غير اللحظة اللى احنا عايشينها
بكره ده فى علم الغيب .. هو احنا ضامنين نعيشه عشان نخاف منه ونعمل له حساب؟
وسبحان الله .. مفيش حاجة بتشيل همها وتخاف منها وتسلم امرك لله فيها الا وربنا بييسرها بشكل عجيب
ويذلل لك كل الصعاب اللى كانت بتدور فى دماغك وعاملالك قلق
القلق يا جماعة بيجيب المرض
اقل حاجة بيسببها الصداع والارق
ده غير طبعا ارتفاع ضغط الدم والسكر
دى اقل حاجة .. ورغم كده محدش بيقدر يستحمل حاجة منهم
يبقى ليه نموت نفسنا بايدنا
ما نسيبها على الله ونقدم حسن الظن بالله
والله الدنيا ما هى مستاهلة .. والله ما تستاهل كل ده
......................
الخوف من الفشل فى الزواج
يعنى انا عايزة اعرف .. هو مين كان واثق تمام الثقة انه هينجح فى زواجه
انت بتستخير ربنا وترضى بقضاؤه
وتدخل التجربة واللى مكتوبلك هتشوفه
للسعادة الزوجية اسباب .. وللتعاسة الزوجية برضه اسباب
خد اسباب السعادة وافهمها وادرسها وعلمها لشريك حياتك
وخلى فترة الخطوبة فترة تاسيسية لحياة زوجية سعيدة
اكيد هيبان فيها ان كان شريك حياتك متفهم ومتجاوب ولا مش فى دماغه
ولو لاقيتيه مش فى دماغه وعايز يتجوز وبس تقدرى تقررى ان كان هيناسبك ده ولا لا
وانت تقدر تقرر برضه هتقدر تستمر كده ولا لا
والخوف من فسخ الخطوبة وكلام الناس ولا العنوسة والكلام الفاضى ده متحطهوش فى دماغكوا خالص
وربنا معوض مخلف
لما الخطوبة تفشل افضل مليون مرة من ان الجواز يفشل
ولا ايه ؟؟
..........................
الخوف من المشى فى الشارع وركوب المواصلات
اتعلمنا واحنا صغيرين اننا قبل ما ننزل الشارع نقول دعاء
" بسم الله توكلت على الله ولا حول ولا قوة الا بالله .. اللهم انى اعوذ بك ان أذل أو أُذل .. أو أضل أو أُضل .. أو أظلم أو أُظلم .. أو أجهل أو يُجهل علىّ"
قلها وتوكل على الله .. والله خير حافظا وهو ارحم الراحمين
.........
التوكل على الله هو الروشتة السحرية لكل خوف يعترى القلب
التوكل على الله والتسليم لله هو الواقى والمعالج
هو الشافى
هو المعافى
لو استسلمنا لخوفنا عمرنا ما هنتحرك من مكاننا خطوة
وكل الامراض هتسكن قلوبنا واجسادنا
ربنا خلقنا عشان نسعى فى الارض ونعمرها .. وخلق برضه ناس تضيق علينا وتضايقنا.. عشان يتحدى فينا ارادتنا .. ويقوى عزيمتنا .. فنقوم من بعد سكون .. وننتصر من بعد هزيمة .. ونتقدم من بعد تأخر ..ونشفى من بعد مرض
ربنا بيبتلينا بالداء ويسخر لنا من يصنع الدواء
وعليك ان تختار اما تستسلم لداءك وتفضل قاعد مكانك لحد ما تموت
واما تنزل وتحاول وتسأل لغاية ما توصل لدواءك
وتشفى بإذن الله
...
حبيبت اتناول معكم بعض المشكلات دى
مع الحفاظ طبعا على السرية التامة لاصحابها
وعايزة اسأل
قلبك لسه بيخاف
طب بيخاف من ايه ؟؟؟
التعليقات مفتوحة للحوار
وخاصية " المجهول " مفعلة لمن يريد عدم ذكر اسمه
فى انتظار ردودكم
كل الحب لكم

16 comments:

لورنس العرب said...

مهو لو خفنا من كل حاجه مش هانعيش
لو ان الامر كده كان الواحد خاف يمشي في الشارع من العربيات
لكن انا اعرف ناس كتير كده
عندهم هوس من كل شيء لدرجة انهم دمروا حياتهم

صيدلانيه طالعه نازله said...

الخوف شعور انسانى وحياتى طبيعى

بس المشكله ان الخوف اتمكن مننا ومن حياتنا جدا

من كتر اللى بيحصل حوالينا و البلاوى اللى بنسمع عنها

انا عن نفسى بخاف من اى حاجه ممكن تبعدنى عن

ولادى

اى حاجه غير كده مبتهمنيش

بس ميمنعش برضه ان ساعات بحس بالخوف من

حاجات كتير زى الحسد والمرض

بوست جميل يا سالى

واحب اقول فى الآخر

قل لن يصيبنا الا ما كتب الله لنا

حاجات جوايا said...

لورنس العرب
------------
اهلا بك اخى الفاضل
عندك حق فعلا
الخوف مش هيخلينا نعرف نعيش
والله ياريت نقدر نعالج الناس اللى حوالينا من الخوف ده
هو فعلا مدمر
لاعصابهم ولاهلهم ولشغلهم ولكل حاجة
ربنا يديم علينا نعمة السكينة والتوكل
نورتنى يا فندم

همسات وبحــ الحياه ــر said...

الخوف طبيعى
لكن اللى يزيد عن حده يتقلب لضده
انا معاكى فى كل الكلام اللى قولتيه
بس المشكله عارفه جايه منين
ان مثلا حصل ليا موقف فببنى عليه بعد كدا
انا اتسرقت وانا فى المحاضره يبقى لايمكن هحضر تانى عشان متسرقش فامهمه
انا قررت انى اعمل حاجة وفشلت فتلاقينى لايمكن هقرر اعمل حاجة عشان خايفه لافشل تانى

بس المفروض انهم مايعمموش المواضيع
وميسمعوش لحد يقولهم دا انت مثلا لو مشيت فى الحته دى هتتخطف الله هو اتخطف ماشى
انت كمان هتتخطف ليه ......دايما يقولك لاتعمم خطريتك على كل المنطقه
يعنى لو حصلم موقف معين متبنيش عليه حاجات تخليك تخاف من اللى جاى

سواح في ملك الله- said...

هذا تراث يادكتوره لم نطلع الفضاء لخوفنا ان يكون كفرا بالله ولم ننزل الي باطن الارض لاعتقادنا ان هناك شياطين سفليه تسكن الارض وتركنا الغرب ينقب وياتي بخبرات الارض من مناجم وبترول ولم نغوص في البحار لان هناك في نداهه بتنده البني ادم وتموته ولم نكتشف ارض الله الواسعه لخوفنا من الذئاب والوحوش وليس لنتعلم صيدها وترويضها!! ونخشي المشي في الشارع لانك لو قتلتي شخصا ما دفاعا عن النفس سوف يحاكمونك ويبهدلوك وحلني لما تظهر برائتك!! وان تكلمتي في حقك فهذا ممنوع وان كنتي لا تخافين علي نفسك سوف يتم تهديدك بما هو عزيز عليكي كابنك او اخوكي او اي فرد من ذويك فمن حق مكتشف المريخ وباطن الارض ان ينعم وفعل اما نحن فكسالي اذا الايمان ضاع فلا امان ولا دنيا لمن لم يحيي دينه

حاجات جوايا said...

صيدلانية طالعة نازلة
...................
أهلا يا قمر
زمننا فعلا بقى مختلف
وانا كمان بخاف على ابنى .. خفت عليه السنة اللى فاتت وموديتوش حضضانة تمهيدى .. وخفت عليه السنة دى لما اتفقنا مع الباص وفضلت قلقانة لما راح
لغاية ما لقيته راجع
ولادنا فعلا نقطة ضعفنا
بنخاف عليهم من كل حاجة من التعب من اللعب بس نرجع ونقول اننا كنا اطفال برضه واهالينا كانوا بيخافوا علينا وربنا سلم
انا عن نفسى بحاول اظبط نفسى فى موضوع خوفى على ابنى ده
ربنا يحفظه ويحفظ ولادك وولاد المسلمين من كل سوء يارب
وفعلا " قل لن يصيبنا الا ما كتب الله لنا "
نورتينى يا لولو

حاجات جوايا said...

همسات وبحر الحياة
-----------------
اهلا حبيبتى
انا فاهمة وجهة نظرك .. انا كمان معاكى مش مع التعميم ودى مشكلة لازم نحلها
المشكلة كمان انك تكونى سمعتى من حد انه حصله حاجة فانتى كرد فعل خوفتى تعمليها او تقربى منها
يعنى الخوف جه من تجارب الاخرين مش حتى من تجربتك انتى الشخصية
نفسى بجد نطرد الخوف من قلوبنا وعقولنا ونشوف ايه بيحصل حوالينا واحنا لسه دافنين راسنا فى الرمل زى النعام
ربنا يآمن خوفنا جميعا يارب

نورتينى حبيبتى

حاجات جوايا said...

سواح فى ملك الله
................
أهلا بك اخى الفاضل
اعجبنى تعليقك جدا
الخوف فعلا مسيطر علينا منذ الازل
وزكاها جوانا الاساطير اللى اجدادنا حكوهالنا واحنا صغيرين عن جنية البحر والقطط اللى بتتكلم وحاجات كتير صدقناها ولما كبرنا عرفنا انها حواديت
بعد ما شربنا الخوف واتربينا عالرعب
...
اذا الايمان ضاع فلا امان ولا دنيا لمن لم يحيي دينه
صدقت اخى الفاضل
نورتنى يا فندم

خواطر شابة said...

بداية باب افتح قلبك موجود فين انا لاأعرفه هل هي مدونة اخرى لك
تانيا كل كلامك عن الخوف صحيح والانواع التي ذكرت موجودة وانت اعطيت الروشتة لمن اراد ان يتعافى منها التوكل على الله هو الحل السحري وهو الطمأنينة للقلوب
دمت بكل الود عزيزتي

حاجات جوايا said...

خواطر شابة
............
أهلا يا نوجا
خطوة عزيزة يا قمر :)
لا يا جميل مش مدونة تانية
هو هنا برضه
انا محددة للمدونة اقسام فى السايد بار تحت اسم حاجاتى اللى جوايا
منهم افتح قلبك
وهتلاقيه كمان فى السايد بار على شكل صورة تحت بانر ليالى مصرية .. بعنوان قلوب اتفتحتلنا .. تعالى معاهم وافتح قلبك .. اضغطى عالصورة هتوصلى

ميرسى لتواجدك يا قمر
نورتينى

شيرين سامي said...

للأسف أنا واحده من الناس الي بتخاف مش من المستقبل الحمد لله الواحد بيتوكل على ربنا لكن بخاف من الناس و الشارع من كتر الحاجات اللي الواحد بيسمعها و يشوفها
ربنا يصلح حال الجميع و يجنبنا الخوف

شيرين سامي said...

عايزه أشترك في مدونتك ومش عارفه؟

MR.PRESIDENT said...

عن نفسي بخاف الكلاب
وبكره احيانا

--
هو المشكلة لو سيطر علينا ..
--
المشكلة إنك قلتي الروشته
بس قليل اللي هيشتريها من الصيدلية الصحيحة .

حاجات جوايا said...

شيرين سامى
..........
اهلا يا قمر
منورانى والله
انا منكرش طبعا ان فيه حاجات بتقلق الايام دى بصورة كبيرة
فى الناس وفى الشارع وفى كل حاجة
بس انتى طالما متوكلة على الله ومصلية وقاريه ازكارك يبقى متخافيش من اى حاجة خالص وان شاء الله ربنا هيحرسك ويحفظك
تخيلى لما ربنا يحرسك
يعنى تكونى ماشية فى معية الله
ممكن تخافى من ايه فى الدنيا كلها
المهم نرضى ربنا ونعمل اللى علينا ونتوكل على الله
نورتينى حبيبتى

حاجات جوايا said...

شيرين سامى
.........
مش عندى يا حبيبتى والله خاصية التتبع
مش مفعلاها
هاعملها دلوقت ان شاء الله
ميرسى لاهتمامك :)

حاجات جوايا said...

Mr Presedent
.............
اهلا بسيادة الريس
الكلاب اكيد ناس كتير بتخاف منها
بس عن نفسى طول ما هى ماشية فى حالها بعيد عنى مبخافش .. بخاف يعنى بس بعمل مبخافش هههههه عشان سمعت ان الكلب بيحس باللى خايف منه ويجرى وراه
فانا طبعا اشوف الكلب من هنا ولا كانى شايفة حاجة .. اطنشه يعنى
ابنى بقى عنده اربع سنين ونص .. كان خارج معايا من كام يوم شاف كلب متوسط كده فى الحجم راح جارى عليه ويقوله هوهو

طبعا مش محتاجة اوصف شعورى وقتها :(

ربنا يآمن خوفنا دايما يارب
والصيدليات كتير .. بس اللى يروح يشترى :)

نورتنى يا ريس

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون


Free CursorsMyspace LayoutsMyspace Comments
كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.
 
Powered :blogger