Rss
twitter

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Wednesday, July 14, 2010

أغرب من الخيال


والله الدنيا دى فيها كوميديا طبيعية ارتجالية كده من غير لا سيناريو ولا حوار ولا تلاكيك مخرجين



الفنانة صابرين السنة اللى فاتت – بعد حجابها – عملت مسلسل اسمه الفنار .. دورها حسبما رات هى كان يستلزم انها تكون غير محجبة فى بعض المشاهد معللة ان ده ضرورى لمصداقية العمل عشان الجمهور يصدقها .. على اساس ان مينفعش المراة تبقى قاعدة فى البيت بالحجاب .. كده احنا كجمهور مش هنصدق ونقول دى بتمثل علينا .. قال يعنى احنا مش عارفين انها بتمثل فى مسلسل ولاحاجة ... قوم ايه بقى استقر رأيها انها تلبس باروكة فى المشاهد اللى المفروض تظهر فيها بشعرها



اللى يغيظ فى الموضوع انها لما سألوها هل استشرتى علماء الدين فى حكم لبس الباروكة كان ردها انها مخدتش رأيهم عشان تتحجب .. هتاخد رأيهم فى لبس الباروكة ليه .........؟؟؟

كلام غريب جدا ميطلعش منك يا صابرين وانتى كنتى هاريانا برامج دينية .. طيب الحجاب فرض وانتى عارفة انه فرض عشان كده اتحجبتى فمش محتاجة تسألى علماء الدين .. بس لما تنوى انك تقربى لربنا بفريضة فرضها عليكى المفروض تشوفى ايه الخطوات الصح اللى تخليكى دايما فى الطريق السليم عشان اللى عملتيه ميروحش هدر .. مش كده ولا ايه ؟

الغريب والعجيب والبايخ جدا جدا جدا ان صابرين أعلنت الكلام ده فى برامج على الهوا .. وفى أحاديث للصحف ومفيش شيخ فيك يا وطن يا عربى فكر أنه يتصل بيها عشان يعرفها الحلال والحرام ويقنعها بالحسنى


يعنى نفسر سكوتهم ده بإيه ؟؟؟


هى مقتنعة بوجهة نظرها .. واحنا عارفين ان ده غلط .. نسيبها ليه من غير ما ننصحها فى الله .. هما الشيوخ مش بيتكلموا إلا لما حد يسألهم ؟؟.... مش القول الحق امانة .. مش تبليغ الرسالة امانة .. ولا إيه .........؟؟



ولا عايزين البنات المحجبات تاخدها قدوة وتلاقوهم ماشيين فى الشارع بباروكات بدل الحجاب على أساس انه مش الشعر الحقيقى



طيب انتى نفسك يا صابرين طالما مقتنعة بالباروكة للدرجة دى .. ليه متقلعيش الحجاب وتكتفى بالباروكة طالما انها بتغطى الشعر الاصلى ... انا عايزة بس أفكرك بالحديث الشريف

قال صلى الله عليه و سلم : " من سن سنة حسنة فعمل بها كان له أجرها و أجر من عمل بها لا ينقص من أجورهم شيئا و من سن سنة سيئة فعمل بها كان عليه وزرها و وزر من عمل بها لا ينقص من أوزارهم شيئا"رواه مسلم

نتيجة صمت علماءنا الأجلاء .. ان الفنانة صابرين صورت مسلسل شيخ العرب اللى هيتذاع فى رمضان بالباروكة برضه فى معظم مشاهده حسبما قرات .. يعنى دلوقت هى ذنبها فى رقبة مين ..............؟؟؟؟؟



أنا حبيت اخلص ذمتى وأقول اللى عندى لأنى بالتأكيد سأُسأل على صمتى طالما انى عارفة وكاتمة

يقول الله تعالى في كتابه المحكم
( وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الْأِثْمِ وَالْعُدْوَانِ )


و يقول الرسول الكريم صلى الله عليه و سلم : " الدين النصيحة ... الدين النصيحة . قيل : لمن يا رسول الله ؟ قال: لله و لكتابه و لرسوله و لأئمة المسلمين و عامتهم " رواه مسلم

عملت سيرش عن حكم لبس الباروكة بالادلة وجبته يمكن صابرين او اى حد من اللى اقتنع بفكرها يقرأه فى يوم من الأيام ويعرف الصح فين .. وربنا يتقبل

حكم لبس الباروكة وزراعة الشعر لمن سقط شعرها

36 comments:

همسات وبحــ الحياه ــر said...

يابنتى انا هتحسد كدا

همسات وبحــ الحياه ــر said...

ايه دا الاول كدا على مرتين نونونو

دا انا هجيب خرزة زرقاء هعلقها على باب المدونة هههههه

همسات وبحــ الحياه ــر said...

هروح اقرأ واجى

همسات وبحــ الحياه ــر said...

نو كومنت

مش هقول غير ربنا يهدى

حاجات جوايا said...

دموع القمر
-------------
أهلا بالقمر اللى نفسى يبطل دمووووووع
منورة حبيبتى اول وتانى وتالت ورابع تعليق
لا لا بلاش خرزة زرقا كفاية تقرى المعوذتين
ربنا يهدينا جميعا يارب
نورتينى يا قمر بلا دموووع

Story pain said...

لو فكرتي شوية في حال بلادنا العربية مش هتستغربي أبدا من سكوت علماء الدين عن باروكة صابرين..لأن للأسف بعد ما كان علماء الدين بتقوم بيهم ثورات دلوقتي أغلبهم بيكتفي بالدعاء على الظالمين رغم ان سكوتهم أكبر ظلم وكمان بيعرفوا يحللوا ده لنفسهم..
ربنا يستر وصابرين ماتحصلش باقي الفنانات ..اللي كانوا محجبات

Story pain said...

شكراً علي الرابط اللي فيه الفتوى الخاصة بلبس الباروكة.
ربنا يبارك فيكِ

Anonymous said...

عزيزتي
كنت قرات الخبر من عدة أسابيع و تعجبت لتفكيرها العبقري
و لما وضعت الرابط على الفيسبوك
وجدت تعليقا يقول أننا نشهر بها
فلم أشا ان اكتب تدوينة عما تفعله الممثلات أمثالها
الله يهديها و يرجعها عما تفعله
أو ما تقوله
ليتها فعلت و سكتت
نحن لا نشهر بها لكن للأسف تشهر هي بنفسها
أشكرك على التدوينة
مع تحياتي

د/على خميس said...

السلام عليكم و رحمة الله و بركاته
الأخت الكريمة ..
زين لهم الشيطان سوء عملهم..
ربنا يهديها
الصراحة أنا مش عارف هل فيه علماء اتصلوا بها و لا ايه ؟؟ بس أنا أعرف إن رأى العلماء فى الباروكة واضح و ا؟ن أنه متفق عليه
جزاك الله خيرا
تحياتى

حاجات جوايا said...

story pain
-------------
أهلا يا قمر
والله ما انا عارفة ايه اللى بيحصل ده
ولو صابرين حصلت غيرها مش مشكلة خالص وزرها على نفسها
المشكلة انها بتحلل حرام وهى مش عارفة
والخوف انها تبقى قدوة
الشكر لله حبيبتى
نورتينى يا قمر

حاجات جوايا said...

sonnet
---------
اهلا د ايمان
بالعكس احنا مستغربين من تصرفها وعايزن نوصلها ده مش بنشهر بيهاولا بنتريق عليها ولا حاجة معاذ الله
كلنا اصحاب ذنوب ومحدش يعرف مين افضل من التاتى عند ربنا
لكن اننا نشوف الغلط ونسكت يبقى بنظلمها ونظلم نفسنا ونظلم اى حد ممكن يقتدى بيها
ربنا يهديها ويهدينا ويحفظنا من فتن الدنيا والاخرة
نورتينى حبيبتى الشكر لله

حاجات جوايا said...

د / على خميس
---------------
وعليكم السلام ورحمة الله وبركاته
أهلا بك اخى الفاضل

ونعم بالله ده فعلا تزيين شيطان وخطوة خطوة هتبعد عن الطريق السليم لو مشيت فى نفس الاتجاه

أنا برضه مش عارفة هل اتصل بيها علماء ولا لأ بس كلامها انها مسألتش رجال الدين بيوضح انه لأ

هو الحكم واضح بالنسبة لنا فعلا عشان كده انا مستغربة من كلامها ده احنا كنا بندرس الحاجات دى فى مادة التربية الاسلامية واحنا فى المدرسة

لكن للاسف احنا بقينا فى عصر المشككين فى كل حاجة
واحتمال كبير يكون حد منهم عملها غسل مخ
ربنا الهادى
نورتنى اخى الفاضل
جزانا واياكم

مذكرات زوجة said...

أحترم رغبات البشر وسلوكياتهم ما دامت لا تؤذينى ولا تؤذى الآخرين

كل واحد حر فى حياته وفى ما يأكله او يرتديه طالما لا يمسنى بسؤ ولا يمس حريتى الشخصية بسؤ

علمتنى الحياة ألا أنتقد أحدا مهما ارتكب من أفعال ... لأنى كتير وانا صغيرة كنت بأنتقد ناس كتير ولما بقيت مكانهم عرفت انى ممكن اتصرف زيهم برضه عشان كدة بطلت انتقد الناس وبقيت استغرب وادع الخلق للخالق

حاجات جوايا said...

مذكرات زوجة
--------------
أهلا يا قمر
حبيبتى انا مش بنقدها لشخصها
انا بنقد موقف
موقف عناد فى الباطل من ناحية صابرين
وموقف صمت سلبى من ناحية العلماء ورجال الدين
صابرين لو كانت قلعت الحجاب مكنتش هتكلم عليها خالص هى حرة وتشيل ذنب نفسها
لا هى اول ولا اخر فنانة
المشكلة فى موضوع الباروكة ده انه ممكن ينتشر وناس تاخدها قدوة وتقتنع بفكرها وتلاقى المحجبات بيلسبوا باروكات فى الشارع وفى المناسبات بدل الحجاب على اساس انه بيغطى الشعر الاصلى
دى فتنة ولازم نقف لها مش مجرد تصرف شخصى
يا تتحجب يا متتحجبش
لكن اللعب على الحبل ده مينفعش لأنه مضلل لغيرها
وانتى عارفة الفنانات والفنانين فى مصر الاضواء عليهم أد ايه والناس بتحذو حذوهم فى حاجات كتير

نورتينى يا قمر

باحث عن حب said...

السلام عليكم
اولا حضرتك
انتى كده
بتعملى اللى عليكى فى تغيير المنكر اكتر من كده لآ
ثانيا الدين اصلا لا يؤخذ من الفانانين اصلا الدين يؤخذ من متخصص (ازهرى ) من رأيىء
وللاسف مفيش واحد ازهرى او غيره
نطق
وممكن تتاخد قدوة للاسف
ثالثا ربنا يحفظ بناتنا علشان بناتنا دول فيهم حاجات كويسه بتنطمس لمجرد انها تمسى او تسمع كلام الفانانين دول
ربنا يحفظنا طبعا والشباب طبعا مش معصومين ربنا الحافظ
مدونه رائعه
اخيتى اسمحى لى بالضافه \


للمتابعه

حصان المرجيحة said...

والله ما عارف اقول ايه
بس للاسف ده اللي اسمه التزيين
بمعني ان الشيطان بيخلينا نعمل حاجات و بيزينها و بيقنعنا انها حلال و مش بس كده ده احنا ممكن ندافع عن الراي ده كمان
ربنا يعافينا و يهدينا و يهدي بينا
شكرا ليكي

حاجات جوايا said...

محمود (باحث عن الحب)
....................
وعليكم السلام ورحمة الله وبركاته
أهلا بك أخى الفاضل

بالضبط كده متفقة مع حضرتك بس للاسف المصدر ( الازهرى) غير متوفر وفى برج عاجى

والفنانين قوة مؤثرة على شخصية الشباب فى حاجات كتير
وابرزهم جمهور تامر وعمرو وحماقى
فى اللبس فى طريقة تصفيف الشعر وغيره

ومتنساش ان الطرحة الاسبانيش اللى بتكشف الرقبة مثلا مكانتش موجودة قبل كده ومنتشرتش الا لما الفنانات لبسوها
زى عبير صبرى مثلا وغيرها كتير

من كل ده لازم نحس بالخطر
وعشان نضمن ثبات الشباب .. اما اننا نقنعهم ان الفنانين مش قدوة حسنة .. ورغم انهم عارفين كده الا انهم بيحبوا يمشوا ورا الموضة

واما اننا نقنع الفنانين نفسهم ان اللى بيعملوه مضلل خصوصا لو كان بنية الستر واتعكست الننتائج


واما اننا ندعى ربنا يقينا شر الفتن وده الشيء الوحيد اللى فى ايدنا

نورتنى اخى الفاضل
تشرفنى بالطبع اضافتك جزاك الله خيرا

حاجات جوايا said...

حصان المرجيحة
------------
أهلا بك اخى الفاضل
بالضبط عندك حق
وخطر التزيين انه بيسحب خطوة خطوة ناحية الحرام
من غير ما يبان انه حرام
ربنا يهدينا جميعا
نورتنى اخى الفاضل

علاء المصرى said...

أعزك الله بما تفعلينة من وصايا رد الفتن عن الأسلام وما فعلتة الفنانه هو الفتنة بعينها

بماذا تقتدى بناتنا إذا

بكتاب الله وسنة رسولة
أو
كما قال رسول الله صلى الله عليه وسلم

"تركت فيكم ما إن تمسكتم به لن تضلوا من بعدي أبداً كتاب الله وسنتي "

تحياتى واسلام عليكم

دعوة للتواصل *** كاتب مصرى

Lady E said...

سهير البابلي لما كانت بتعمل حوار مع مفيد فوزي قالتله حجابي الصح اني أقعد في البيت وممثلش خالص بقى قالها ازاي بقى قالتله انتو عندكو الراهبات بيمثلو ؟ قالها لأ قالتلو واحنا كمان

الباروكة مينفعش تبقى استغناء عن الحجاب وانا قبل كده قرأت في الموضوع ده كتير لما كنت في اوائل لبسي للحجاب لكن عرفت ان الباروكة ممكن تتلبس في الضرورة بس ومع احترامي للموقع اللي موجود في موضوعك الا انه متشدد اوي واللي بيتشدد في الدين الدين بيغلبه

وحشاني بجد :)

الفقيرة إلى الله أم البنات said...

حبيبتى شوفى متستغربيشس لو شفتى صابرين قلعت الحجاب فعليا"

لان الوسط ده اذا دخلت فيه ومكنتيش قويه لازم تتاثرى ..والعين اللى هتاخد على العرى..مش هتحس بفارق فى موضوع الباروكه

هو بس تعليق صغير ..هو اللى هى بتلبسه دلوقت حجاب؟ انت زعلانه على الباروكه
والله العظيم لبسها رهيب
يعنى زين لهم الشيطان
وهى كل ما حد يقول لها ليه لبستى باروكه هو انت قلعتى الحجاب تقول لهم ما انا اهوه لابساه
على كل حال
صابرين تلبس الحجاب تقلعه هى شايلها وزرها
وكمان وزر البنات اللى هتقلدها
ولازم نستكنر الافعال الغير مقبول والمضر بالاسلام
والسكوت مشاركه
انت لا تملكى غير قلمك
برافوا عليك وأكيد ناس كتيير هتقرأ
وده هيكون حجه عليهم يوم القيامه لو قلدوها

ربنا يخرجنا من هذه الدنيا بسلام

مؤنس فرحان said...

السلام عليكم

إللى أقدر أقوله ان مفيش عقل ومفيش تفكير ومفيش منطق

الحكمة من الحجاب هى ستر المفاتن .. يعنى لما واحدة يبقى شعرها باين فدا فتنة .. يعنى ايه فتنة ..؟؟

يعنى حاجة تجذب او تسترعى انتباه الرجال ليها

فلما تلبس باروكة .. فهى ماعملتش حاجة .. هو انا اعرف منين دى باروكة ولا لأ ..؟؟ ويمكن كمان تكون الباروكة أحلى من شعرها الطبيعى .. يعنى عامل الفتنة لسه موجود

زى اللى بتلبس محزق وتقولك انا موش لابسة عريان ..؟؟ طيب مانتى بينتى تفاصيل جسمك يبقى ايه الفرق ..؟؟

والشئ التانى

ان معظم الفنانين للأسف جهلة
ودا بيظهر لما يتفلسفو ويحبو يتكلمو فى السياسة والمجتمع ومشاكله والدين

فدوول موش ناس ناخد منهم او نقلدهم او نقتدى بيهم .. لازم نفرق ونقول دا شخص بيمثل كويس ودا بيهلس كويس ودا بيرقص كويس ودا كاتب كويس ودا عالم ودا سياسى الخ
-----------------------------
مدونتك جميلة وان شاءالله ححاول اقراها كلها

Anonymous said...

دعوه عامه للتجمع فى الاسكندريه

ودعوه خاصه ليكى
البوست موجود فى المدونه
الحب الجميل

Tarkieb said...

كل انسان الزمنه طائره فى عنقه
هي اللي حتحاسب مش انت....بس انا باستغرب من كلامك....يعنى لو لبست حجاب ومثلت بقى كدة حلال وقبلها كان حرام ؟؟؟؟؟ماللي يلبس يلبس زي ماهو عايز...ربنا هو اللي بيحاسب مش المشاهد التلفزيوني....يمكن ايمانها وتقوتها اجدع من مليون واحدة لابسة حجاب ....

علاء المصرى said...

من أراد رسول الله فاليتبعنى

أبو ريان said...

يزن الناس في زماننا هذا بموازين مغلوطة لكن يظهر جليا أن أفعالهم ليست عن اقتناع بل هو اختيار للشهرة و المال

لكن صدمتنا تكون في من ظننا أنه يعرف الصواب
تحياتي

حسن ارابيسك said...

الحقيقة ده حال تركيبة العرب كلهم هناك دائماً اكثر من وجه وأكثر من قرار واكثر مصائبها الازدواجية مع النفس ومع الأخرين
تحياتي
حسن أرابيسك

حاجات جوايا said...

علاء المصرى كل يوم
-------------------
أهلا بك أخى الفاضل
لابد ان يقتدى شبابنا بالكتاب والسنة
بالطبع
لكن للاسف الشبهات كثيرة
ومن يمشون وراها اكثر
ربنا يحفظنا من شر الفتن ما ظهر منها وما بطن
اللهم امين
وعليكم السلام ورحمة الله وبركاته
نورتنى اخى الفاضل

حاجات جوايا said...

lady-E
--------
أهلا انوس
اخبارك ايه واخبار عمان معاكى
ترجعى بالسلامة يا قمر ان شاء الله

أنا معاكى حبيبتى ان ممكن فى وقت الضرورة

الضرورة اللى بتقولى عليها يكون لاقدر الله سقوط مرضي للشعر

وتكون فى البيت ومع المحارم
يعنى تكون للظهور بالمظهر الطبيعى للبشر ولا تحل محل الحجاب والله اعلم
لأن الشعر سواء كان طبيعى او صناعى فهو فتنة


مع احترامى لرأيك يا جميل مش شايفة ان الموقع ده متشدد خالص
ده موقع ما شاء الله تلاقى فيه كل حاجة كما يجب ان تكون الفتوى
يعنى الفتوى فيه بتكون بشكل متكامل وغير منقوص


اللهم ارنا الحق حقا وارزقنا اتباعه وارنا الباطل باطلا وارزقنا اجتنابه

امين يارب

نورتينى حبيبتى

حاجات جوايا said...

أم البنات
-------------
أهلا حبيبتى
المدونة نورت باطلالتك بعد غياب

عندك حق والله
وفعلا لا نملك سوى اقلامنا
ادعو الله ان تكون لنشر الحق والخير

نورتينى حبيبتى

حاجات جوايا said...

مؤنس فرحان
------------
أهلا بك أخى الفاضل
متفقة معك تماما
المشكلة مش فى الفنانين اصلا كل واحد حر فى تصرفاته ويمكن يكونوا عند ربنا افضل مننا الله اعلم
لكن الشباب الصغير بيشوف ويقلد ودول بالنسبة له القدوة والمثل خصوصا ان فيه بعد عن التربية الدينية فى اسر كثير
والخوف عليهم من التقلييد الاعمى المنتشر جدا بين اوساط الشباب

ربنا يهدى شباب الامة ويبارك فيهم يارب ويقويهم على فتن الدنيا

الف شكر يا فندم
تسعدنى متابعتك بالتأكيد

نورتنى اخى الفاضل

حاجات جوايا said...

الحب الجميل
-------------
أهلا يا جميل
والله نفسى احضر اى تجمع
بس مش بينفع
شكرا حبيبتى عالدعوة الخاصة
وان شاء الله يكتب لنا اللقاء ذات يوم

نورتينى يا قمر

حاجات جوايا said...

tarkieb
-----------
أهلا بك اخى الفاضل
يا فندم انا مش مشكلتى خالص فى الحجاب
تلبسه او تقلعه هى حرة
تمثل ولا تعتزل هى حرة برضه
هى اللى هتتحمل وزرها او هتاخد ثوابها
كل المشكلة عندى فى استبدال الحجاب بالباروكة
فى تعميم الفكرة وانتشارها
فى اقتداء بنات صغيرين بيها
فى عدم اللجوء لرجال الدين لاستشارتهم
فى عدم تطوع رجال الدين بفتواهم


يا فندم ليس لنا الا الظاهر والله يتولى السرائر

انا بتكلم عن الظاهر بس
اما السرائر فاحتمال كبير جدا تبقى افضل من اى حد .. وده شيء لا اكرهه لها ولا لغيرها على الاطلاق

ربنا يحسن خاتمتنا جميعا ويتجاوز عن كل ذنوبنا كبيرها وصغيرها

نورتنى اخى الفاضل

حاجات جوايا said...

علاء المصرى كل يوم
----------------
اللهم صلى وسلم وبارك على سيدنا محمد وعلى آله وصحبه وسلم تسليما كثيرا

سأتبعك بالتأكيد ان شاء الله

حاجات جوايا said...

ابو ريان
----------
اهلا بك اخى الفاضل
متفقة معك تماما
فعلا صدمتنا تكون اكبر فيمن نتوقع منهم الصواب
نورتنى اخى الفاضل

حاجات جوايا said...

حسن ارابيسك
-------------
أهلا بك اخى الفاضل
للاسف كلامك صحيح
لكن بالتاكيد ليس الحال هكذا عند العرب وحدهم
ربما تكون سمة من سمات البشر جميعا
والامثلة كثير

نورتنى اخى الفاضل





اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون


Free CursorsMyspace LayoutsMyspace Comments
كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.
 
Powered :blogger