Rss
twitter

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Thursday, June 10, 2010

أنا والإكتئاب والفارم فيل وحاجات جوايا




وحشتووووووونى جدااااا

ووحشتنى مدونتى وكيبوردى وفايلاتى عالوورد .. رغم انى باشتغل عالكمبيوتر وبتابع حاجات كتير الا انى حسيت لما رجعت اكتب فى المدونة ان الكيبورد وحشانى ومشوفتهاش من زماااااااااان حاجة غريبة جدا

والشئ الاغرب واللى ما زال مسببلى صدمة انى لما بصيت على اخر بوست كتبته " مهى مامتك اللى جايبهالك يا روش " لقيته مكتوب من اربع شهور وزيادة

معقول الايام بتجرى بالسرعة الرهيبة دى ..ده انا كنت فى الكهف بقى .. مش مجرد كسل تدوينى

من فترة كبيرة وانا عايزة ارجع اكتب ومش عارفة .. بحاول ومش قادرة .. احساس غريب بيتملكنى بانى لو مسكت القلم هيتعوج فى ايدى .. زى بالضبط اللى بيحاول يتكلم وصوته مش بيطلع .. احساس صعب الحقيقة مش عارفة ايه سببه ولا عارفة ليه طول معايا كده .. السنة اللى فاتت جالى بعد رمضان .. والسنة دى جالى مع بداية 2010 بس طول المرة دى .. وحسيت انى مش هعرف اكتب تانى .. ولا اخفى عليكم فقدت الثقة فى نفسى

كنت بدخل اشوف الجديد من الريدر وادخل كام مدونة اتابعهم فى صمت من غير تعليق .. حتى تعليقاتكم عندى مكنتش قادرة خالص ارد عليها .. احساس بانى فقدت مفردات اللغة ومعدتش قادرة اكون جملة مفيدة ..مش عايزة اقول شكرا ليكم وامشى .. نفسى اتواصل واتفاعل معاكم ومش عارفة

فى الوقت ده كنت بدأت اتابع بشكل يومى الاكونت بتاعى عالفيس بوك .. بحاول اكتشفه واعرف سر انجذاب الناس ليه .. مدونين كتير سابوا التدويين وركزوا مع الفيس بوك .. وده بقدر ما ضايقني وحسسنى بغيرة على المدونات وكأن الفيس بوك ضرتها بقدر ما اثارنى انى اعرف السبب


والفيس بوك يا سادة يا كرام عامل زى مدينة الملاهى ان صح التعبير .. فيه كل حاجة واى حاجة .. وان كان تأثيره مش قوى زى المدونات .. لكن ملل الحياة وروتينيتها بيكونوا الدافع الأكبر لتحريك مواقع زى دى .. هو لغاية دلوقت مشوفتش منه حاجة وحشة بصراحة وبيعاملنى معاملة الأخ لأخته .. بس مجرد انه قيدنى وخلانى اول ما اقعد عالكمبيوتر افتحه اول حاجة على امل انى هبص بصة سريعة وارجع اشوف المدونة والدنيا ومعرفتش .. وربطنى بالعاب وتوقيتات وخدنى وشغلنى .. ده فعلا اللى خلانى اعلن العصيان المدنى والجوى واعتصم فى مدونتى الحبيبة واقول بأعلى صوتى نعم للتغييييييييييير

مقدرش انكر انه خفف عنى كتير ومكنش مزاجى بيكون حلو غير لما ادخل على لعبة فيه اسمها الفارم فيل او المزرعة Farmville وهى عبارة عن قطعة ارض صغيرة مكونة من 6 مربعات لزراعتها وجنى محصولها والتكسب من بيعها وكل ما تجنى وتكسب تزود الارض وكل ما تزود عدد الجيران عندك تزود المساحة وتكبر المزرعة اكتر واكتر وتشترى ماكينات زراعية تساعدك بدل الشغل اليدوى ..وحاجات تانية كتير زى الحيوانات وبيوتها وغيرها من اشياء لا تنتهى بجد لعبة ممتعة اعتقد انى وصلت فيها لمرحلة الادمان خصوصا انها دائمة التجدد وتشعرك دائما انك تنتج وتربح تجد وتجتهد وتنال ثمن جهدك واجتهادك من انتاج المزرعة اليومى واموال طائلة افتراضية وصلت للملايين

دى صورتها للتوضيح



حاولت بقدر استطاعتى الاقلاع عنها .. حاولت وحاولت ونجحت ولله الحمد بعد ان وصلت للمستوى 68 .. كان فاضل مستويين بس واوصل للقمة ( 70 ) لكن عقدت العزم على الرحيل وتوكلت على الله وتركتها لأعود الى مدونتى الحبيبة ولهذا اطالب بجعل الفارم فيل من الالعاب المحظورة التى تهدر الوقت العام وتساهم فى زيادة مشكلة البطالة والعنوسة والتوحد.. اه طبعا اكيد .. مهو طول ما الشباب بيلعبوها هيفضلوا قاعدين قدامها يشيروا كوليكشن ويجمعوا جيفت وماتريال ويبنوا فى بيوت واسطبلات .. لا هيعرفوا يشتغلوا ولا هيدوروا على شغل

وطووول ما البنات قاعدين قدامها لا حد هيشوفهم ولا هيعرفهم وسنين عمرهم هتضييع هدر

ده غير انهم هينسوا اللى حواليهم ويعيشوا بس مع نفسهم ومع الفارم فيل

ومن هنا أحب أنصح كل شاب وفيتاة بأن الفارم فيل لا تفيد ... وشوفوا مستقبلكم قبل ما العمر يجرى وترجعوا تدعوا عالفيس بوك والفارم فيل وزنجا وعالكل كليلة

اللهم انى قد بلغت .. اللهم فاشهد

طولت انا فى الموضوع ده اوى .. سبحان الله .. يخلق من العدم

كل ما كنت انوى ارجع كنت اقول اغير القالب الاول عشان ارجع بنيولوك للمدونة .. ابقى عالاقل عملت تجديد .. وفين وفين طبعاعما لاقيت قالب بعد عناء ورضا يتظبط معايا .. ويوم ما غيرت القالب كتبت جزء من البوست ده عالوورد ( منا ضفت عليه حاجات كتير دلوقت عشان مبقاش اول بوست بعد العودة ) ولما جيت انسخه عالمدونة مرضيش .. نمت ولما صحيت سمعت عن اسطول الحرية واللى حصل .. تفاعلت مع الحدث بس مش من خلال المدونة .. من خلال اليوتيوب والفيس بوك .. وبعدين رجعت للمدونة اشوف هى مش راضية تعمل paste ليييييييه .. وللاسف معرفتش وكتبت البوست لايف عالبلوج .. مكنش كبير الحمد لله بس اكتشفت بعدين انى ممكن احدد الكلام عالوورد وبعدين اشده وارميه فى المدونة بطريقة drag & drop .. قلت أقولكم لو مش عارفين .. اكسب فيكم ثواب هههههههه

حاجة حلوة اووووى حصلت فى غيابى ... حملة 30 يوم تدويين .. الحملة دى عجبتنى جدا .. ومن يوم ما شوفتها كان نفسى اشارك فيها .. بس بصراحة خفت مقدرش عالتحدى خصوصا انى غايبة بقالى فترة ولازم اسخن قبل ما العب ولا ايه ؟؟ .. بس ان شاء الله هعملها .. هى كانت لشهر مايو .. بس مش هتفرق لو عملتها فى اى شهر تانى المهم اكون أد التحدى

كمان عجبتنى فكرة د اسلام مدونة ( هنعيش يعنى هنعيش ) .. اشترك مع مجموعة جميلة من المدونين فى تأليف رواية اسمها ( ليالى مصرية ) اهداء لروح الكاتب الكبير اسامه انور عكاشه رحمه الله على غرار ليالى الحلمية .. د اسلام هو صاحب الفكرة .. والرواية بدات من مدونته لو تحبوا تتابعوها هتلاقوها فى الريدر عندى .. بجد اتمنى لو اشارك فيها .. بس ان شاء الله اول ما أحس انى بقيت فى الفورمة

رغيت جامد اوووووى .. معلش استحملوووونى .. الحنفية كانت مسدودة صلحناها وهتغرقكم هههههههههههههه بس قولوا يارب

بجد بجد وحشتونى جدااااااااااااااااا

17 comments:

رحلتنا في الحياة said...

حمدلله على السلامة نورتى بلوجر من تانى
الفيسبوك فعلا بيسرق الناس من مدوناتهم وانا مرت عليا فترة بالشكل دا
بس الحمدلله دلوقتى بحاول نوعا ما اوفق بين الاتنين وشغفى بالفيسبوك قل عن زمان :)

حاجات جوايا said...

ايوشة
.........
الله يسلمك يا قمر ده نورك والله ونور المدونين اللى بلوجر عامر بحسهم هههههه
نزوة وعدت على خير الحمد لله
هههههههه
الفيس بوك بدخله برضه تخاطيف كده اطمن عالاخوة الفيسبوكيين وارجع
ربنا يهدينا
بس بلوجر من يوم ما رجعت وهو بيعمل معايا حركات بايخة وبيبوظلى تنسيق البوست
عاااااااااا
استقبال ولا أسوأ يعنى
نورتينى يا جميل متحرمش منك ابدا

Mafrousa said...

ازيك يا قمرة
و الله انتى و كل المدونين و المدونات و حشونى بجدب
بس عاوزة اقولك
ان حالة الإكتئاب دبه عامة
ماشية على الكل
و الفيس بوك برضه بيخليكي تتواصلى مع بعضهم ، يعنى بتعرفي اخبارهم و تعلقى على الاستيتس بتاعتهم
اما الألعاب
فساعات مخ الواحد بيبقى عاوز يتشد لحاجة مختلفة، علشان مش يفكر فى اللى يفرسة، ولا ينكد عليه
بس بعد كده بيكون ادمان
لانك كل لما تنجحي فى انك توصلى للفل اعلى
بتحسي بالتصر الداخلى و انك نجحتى و عاوزة اكتر
و ده طبيعي
لان حالة الانهزام العام،وعدم التوفيق على ارض الواقع تفرس الصراحة

هههههههه
بس يا قوتك
فاضلك 2 لفل و حتسيبي؟؟؟؟؟؟
ده انتى جبارة
ههههههههههههه
تحياتي ليكي

هوبتي said...

حمد لله علس سلامتك وكويس انك رجعتلنا بخيررررررر

اما موضوع الفيس بوك
بصراحه المدونه هي الي سرقتني من الفيس مش عارفه ليه
يمكن لاني مش بحب اضيف حد انا مش عرفاه وجه لوجه فا بقي علاقتي بكل الناس الي عرفاهم وحفظاهم علاقه عاديع يعني مش محتاجين يتكلموا
لان خلاص حفظنا بعض وزهقوا مني وزهقوا من كل شويه اقولهم ادعولي انا وعبد الفتاح نتجوز بقي ههههههههه
ادعيلي انتي كمان

د/على خميس said...

السلام عليكم و رحمة الله و بركاته
حمدا لله على سلامتك
و الله أنا حتى الآن مقاوم للفيس بوك مش عارف حاسس انه فعلا بيضيع الوقت و مش بدخل عليه إلا نادرا..
بارك الله فيك
تحياتى

حاجات جوايا said...

واحدة مفروووووسة
-----------------
اهلا حبيبتى ازيك انتى يا قمر
الفيس بوك فعلا فيه تواصل بس مش قوى زى المدونات .. تحسي انك فيه عابر سبيل كده وبعدين حكاية لايك دى بتفرسنى الصراحة هههههههههههه
ده غير انه مقفول اووووووى
خصوصا لو عاملة خصوصية لصفحتك للاصدقاء فقط
موضوع غزة واسطول الحرية ومواضيع تانية شبيهة حسسونى اوى بالفرق
تحسى انك بتدورى فى دايرة مفرغة
بتكلمى نفسك وببتفكى مع اصحابك ومش بتأثرى فى الاحداث
غير المدونة اللى ممكن توصلي لمحتواها من جوجل بكل بساطة

اما بقى عن الفارم فيل .. فكنت بحاول ابعد عنها من زمان اووووى .. يمكن من ليفيل 50 او اقل ومش عارفة خالص
لغاية ما وصلت للقرار النهائى وبعدت الحمد لله
انتشلت نفسى من الفارم فيل واتعالجت من الادمان هههههههه
من ناحية قوية وجبارة عشان سيبتها ومعادليش غير 2 ليفيل فمش عايزة اقولك انى اصلا معايا فوق المليون كوينز يعنى اقدر ببساطة اشترى فيللا واعدى المستوى واوصل لل 69 بس مليش مزاج هههههههههه

يمكن شوية كده ارجع اخلصهم بس دلوقت معتقدش عايزة اعوض المدونة عن غيابى واحسسها انى لسه عايشة متيتمتش بدرى ولا حاجة هههههههههه

نورتينى يا قمرة
ميرسى يا جميل على سؤالك
ويارب كل اللى بعدوا عن التدويين يرجعوا بقى لانى بجد لما رجعت حسيت بفراغ كبير اوى
مووووواه

حاجات جوايا said...

هويتى
-----------
أهلا يا قمر
الله يسلمك يا جميل متحرمش منك
المدونة فعلا تستاهل انها تاخدك من الفيس بوك
ادينا اهه خير مثال نلف نلف ونرجع تانى للتدويين
بيتنا ومطرحنا
عندك حق بخصوص اضافة الاصدقاء
بس لو كنتى لعبتى الفارم فيل زينا كنتى هتضيفى ناس كتير جدا متعرفيهاش لمجرد بس انهم بيلعبوا الفارم فيل عشان عدد الجيران والحاجات اللى بتتشير عالوول
الموضوع ده بصراحة كان موترنى جدا
خصوصا انك متعرفيش اى حاجة عن اللى انتى ضايفاهم دول وبيطلعوا على بروفيلك
يعنى بالنسبة للمدونات كنت بضيفهم وانا مغمضة لمجرد ان عندهم مدونة .. فيه الفة حتى لو مش عارفاهم
بس فيه ناس لا اعرفهم ولا عندهم مدونات فبيبقى الموضوع مقلق شوية

ربنا ييسرلك امرك يا قمر انتى وعبد الفتاح وتتجوزوا قريب ان شاء الله ونفرح بيكم يارب العالمين

نورتينى يا قمر

حاجات جوايا said...

د. على خميس
--------------
وعليكم السلام ورحمة الله وبركاته
أهلا بك اخى الفاضل
الله يسلمك يارب
الفيس بوك فعلا صعب ومحسيتش انه اضافلى حاجة .. حتى الجروبات اللى عليه انا مش عارفة هى مؤثرة فى ايه ؟؟؟
فيه حاجات فيها كتير صدمتنى
زى جروب كان بيدعو لتجميع اكبر عدد من المسلمين بيحبوا النبى وفجأة بعد العدد ما زاد غيروا اسمه وبقى اكبر تجمع للملحدين والعياذ بالله
وطبعا مش كل الناس اللى فيه عرفت انه اتغير لان محدش بيتابع
وحاجات من دى كتير
الحمد لله ربنا سلم

ميرسى على سؤالك يا فندم
شرفتنى يمرورك

أم الخـلـود said...

موجة الاكتئاب موجة جارفة وجافة ولكن الجو كدا يوم صحو ويوم ممطر

أما مدينة الملاهي ما لقتش نفسي فيها كتير عشان كدا قلت أركز على مملكتي الخاصة

ربنا يصلح الحال

سواحة said...

او مرة اشوف انسة بتلعب الفارم فيل
مش انسة برضه ؟؟
اصل قبل ما اقلب تدوين كنت نشيطة فيس بوكيا:-)))
بس حسيت انه فاضح الناس قصادى بشكل
اعرف الناس فاضية امتى زقهانه و لا بتحب و لا بتتخانق
اشوف صور و تعليقات و علاقات
و المشكلة لما الا فى بروفيل اكثر من شاب اعرف حاطط انه راغب فى علاقات نسائية و التعرف و خصوصا المتجوزين

اما المتزوجات بقى يختفى شوية و هب بعد الخلفة شوية صور للنونو و هب تلاقى الفارم فيل جخلت لعبت و كسبت قد ايه
مؤشر لفرغها و مللها
الزوج بقى تلاقيه هارى الحبيبة حب و غرام لحد الجواز و هس و تلاقيه نشط فى مواضيع ثانية و بعد شوية تقرى تعليقاته عند البنات الثانية فيها طابع المعاكسة و هب شوية و تلاقى البروفيل ضمت جملة راغب فى التعرف و اهتماماته النساء

مش مصيبة بذمتك
انا قفشت منه

بصى لو ركزتى شوية فى يومك حتلاقى حاجات كثيرة تكتبى عنها و تلاحطى ان النهاردة غير امبارح غير اول امبارح :-) و ممكن تلاقى احداث متكررة فى حياتك كل كام شهر :-)

يخرب بيت المجونة عجبك كده انا رغيت عندك رغى
اما اروح اكمل رغى عندى بقى :-) و اخذ الزيترد بتاعتى معايا :-))

حاجات جوايا said...

ام الخلود
-----------
اهلا يا قمر
عندك حق ربنا يخلى الجو دايما دافى فى الشتا و لطيف فى الصيف عشان ميأثرش على مزاجنا التدويينى
نورتى مملكتك من جديد
فعلا المدونة هى المملكة واى شئ اخر منتجع صيفى ليس الا
نورتينى يا جميلة

حاجات جوايا said...

wanda
--------
اهلا يا قمر
من اولها كده احراج
همشيها انسة يا ستى بس عندى ولد وزوج
ههههههههههههه

فعلا الفيس بوك فاضح للناس
انا فاكرة فى اول عهدى بالفيس بوك كتبت فى الاستيتس
وما الدنيا الا فيس بوك كبيرررررر
تحسى فعلا ان الناس بتبان على طبيعتها هناك اكتر

بس عايزة اقولك انى لما بشوف الحاجات اللى بتقولى عليها دى بفهم الدنيا اكتر
الدنيا مش مثالية للدرجة اللى احنا راسمينها فى خيالنا
اللى عايز يعرف الدنيا بجد يدخل الفيس بوك وميعملش خصوصية للبروفيل بتاعه
مولد وصاحبه غايب
ولا الجروبات والمناقشات اللى فيها اللى تحسسك انك مش فى مصر ولا حتى فى دولة عربية مسلمة او حتى قبطية

اسلم حاجة اننا نبعد عن مواطن الفتن ربنا يسلمنا جميعا يارب

نورتينى يا قمر

سواحة said...

ايوه كده طمنتينى على نفسى :-)))
انا قولت برضه اللعبة تخصص مداماتى اكثر من انساتى :-))
بصى اصلى انا مخذتش بالى من البروفيل ازى كنت ذاكرة الحالة الاجتماعية بس فى البوست اوحيتى انه مؤذى للانسات و خصوصا العانسات :-)))
عموما لو البنات برضه خرجوا و شافوا كل الناس
مبيصيبش الانسان الا نصيبه :-)

اقولك حاجة الناس ساعات على طبيعيتها و احيانا اكثر على طبيعة المجتمع العايشين فيه
و ناس كثير اعرفهم بيعملونى بالاسلوب الى يناسبنى من الاحترام لكن لما بيتحطوا فى مجتمع شعبى قوى ضوابط الاحترام والذوق فى الكلام مرحرح :-) بتستغربلهم قوى و لو قلبوا قصادى بعدين بيتكسفوا منى انى شوف ليهم وش ثانى غير محترم (بالنسبة لى)

الفيس بوك الاغلبية بتنسى ان انها مش مفضوحة و انهم مرة واحدة بقوا سكنين بيوت زجاجية
ياما هما يحطوا ستاير يا اما انا اغمض عينى :-)) و اختارت اغمض عينى
او ممكن نقول اغض بصر
علشان اعرف اكلم الناس ديه بعدين لما اقبلهم منغير ما انطباعى الفيس بوكى يضغيى عليا

متقلقيش
كده كده ابنك كان حيتوبك عن حاجات كثير بعد شوية :-)
حسب النمط انت حتنعزلى لحد ما يدخل حضانة و بعدين تظهرى و لما يعيى كثير حتنعزلى ثانى و هب يدخل الابتدائى و انسى ان ليكى وجود غير فى المدرسة او المذاكرة و الدروس :-) حتى لو بتشتغلى و المناسبات العائلية الاضرارية
و بعدين تقوليله ضحيت هنايا فدك :-))
علشان متكئبيش كثير سستيمى حياتك بدرى بدرى انك عايشة مع ابنك و جوزك مش بس علشانهم
لا الانسان مبيحبش التضحيات الكثير لا يقدم و لا يستقبل

حاجات جوايا said...

wanda
--------
ربنا يطمنك ده انا مصدقت اخرج من الحالة وارجع المدونة
تقوليلى هنعزل تانى
ابنى خلاص هيدخل الحضانة السنة دى ان شاء الله
انسونى بقى احسن هههههههههههه

حلوة حكاية عايشة معاهم مش بس ليهم دى بس مين يحسسك بكده كله بيدور على نفسه وبس

اكتر حاجة بتضايقنى عالنت عموما ان احس ان الشخصية اللى قدامى غير مفهومة ياعنى لا تبقى عارفة ده حد كويس ولا تبقى عارفة انه وحش
عالمدونة الغالبية العظمى محترمين وخلوقين يمكن لان المدونة مش مجال تعارف اوى بقدر ماهى مساحة مخصصة للموهوبين فى مجال محدد .. يعنى مش لاى حد

فيه مواقع تانية مش شرط الفيس بوك تحسى انهم مش كده الغالبية العظمى وحشين وغير محترمين زى موقع تاجد مثلا
انا معرفش حد منهم معرفة شخصية ولا حتى عابرة بس اللى بيضايقنى ان الشخصية دى مش ممكن تكون كده عالطبيعة مش ممكن كمية السوء اللى فيها تبقى عايشة بيها وسط الناس

يعنى تلاقى حد كاتب قى البروفيل ايات قرانية وعلى بروفيله صور واصدقاء مينفعش حد يحطهم كده ولا يشوفهم اصلا


انا نفسى بس الانسان يبقى له شخصية واحدة وجه واحد عشان محدش ينخدع فيه واكيد كل حد هيلاقى فى الدنيا اللى شبهه واللى يقدر يتحمل عيوبه .. بلاش نتجمل ونمثل على بعض عشان كل حاجة هتنكشف فى وقت من الاوقات ويمكن تظلم ناس تانية زى مثلا ان حد من دول يخطب واحدة بنت ناس تبقى صعبة اوى بجد لما هيبان على حقيقته بعد الجواز


ربنا يهدينا جميعا يارب ويجعل اللى جوانا افضل من اللى الناس بتشوفه

نورتينى يا قمر

رفقة عمر said...

حمدا لله على سلامتك
وحشتينى جدا جدا جدا
الحمدلله انك هاترجعى تنورى مدونتك تانى
يارب دايما

حاجات جوايا said...

رفقة عمر
-----------
الله يسلمك يا رفقتى
انتى وحشتينى اكتر والله وكل حبايبنا المدونين
انتى اللى ووجودك نور المدونة اكتر واكتر
متحرمش منك يا قمر ربنا يخليكى

لحاف وبطانية ومخدة said...

حمد الله على سلامتك,على فكرة انا متابعة مدونتك من فترة وبيعجبني اسلوبك جدا
ولاحظت في البوست الاخير انك بتحبي تكسبي ثواب,فياريت لو تكسبي فيا ثواب وتعرفيني عالم التدوين ده لان لسه جديدة عليه بحبي يعني انا ليا مدونات في منتديات كتير لكن لسه لانج على بلوجر
d:
ياريت فعلا لو تفهميني شوية أصل حاسة اني في متاهة هكون فرحانة جدا لو وافقتي وهنيالك يافاعل الخير والثواب:
سارة





اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون


Free CursorsMyspace LayoutsMyspace Comments
كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.
 
Powered :blogger