Rss
twitter
كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Sunday, January 10, 2010

مامتك اللى جايبهالك يا روش

" مهى مامتك اللى جايبهالك يا روش مش تعبان فيها "

الجملة دى سمعتها فى مسلسل عبودة ماركة مسجلة فى مشهد كان فيه شاب بيسوق عربيته بسرعة وعدى جنب عبوده " سامح حسين " اللى راكب موتوسيكل الدليفرى

المهم انى اتغظت جدا من الجملة دى

ازاى يعنى يقول كده

ان كان الشاب ده متهور مثلا ايه اللى دخل مامته فى الموضوع

وايه اللى دخل اساسا مين اللى جايبله العربية فى الموضوع

يعنى لوكان هو اللى جايبها ولا باباه اللى جايبهاله كان هيتغاضى عن تهوره وسرعته ويكون اهل للاحترام

حاجة غريبة بجد

ليه فى مجتمعاتنا الشرقية بننظر للمراة النظرة الدونية دى

ليه كل حاجة وحشة بنجيب فيها سيرة الام

الام اللى الجنة تحت أقدامها .. ورضاها كفيل بانه يغير حياتك من الشقاء للسعادة

الام اللى لو ابنها قال آه .. قلبها بيقول ألف آآآآآآآآآآآآه

الام اللى بتضحى بروحها عشان تفدى بس ظفر ابنها

انا حاسة ان عيب اتكلم فى الموضوع ده فى الزمن اللى احنا فيه ده

المفروض ان المراة فيه نالت حقوقها واعتلت ارقى المناصب وتفوقت على كثير من الرجال

والمفروض ان المجتمع بيعترف بكده

مش عارفة بقى الفئة دى من الناس مش ماشية مع التطور الطبيعى للحاجة الساقعة ولا ايه بالضبط

اللى عايزة اقوله باختصار اننا كشعب راقى متعلم ومثقف ومتحضر لازم نغير الثقافة السائدة دى بايدينا احنا وبولادنا احنا

كل واحد يبدا بولاده .. لان هما بكره ..هما الامل والمستقبل

مينفعش نورثهم الجهل والتخلف الفكرى فى عصر كله سباق تكنولوجى وحضارى

ازااااااااااى ؟؟

لازم الأم تربى ابنها مش على انه ولد .. لأ .. على انه راجل .. راااااجل .. الله فاكرين الكلمة دى ههههههه

الرجولة بجد بقت عملة نادرة جدا ولو مرجعتش تانى قول على الدنيا السلام



طيب ازاى تربى الام ابنها على انه راجل ؟؟؟؟؟؟

.........................

تعلمه يكون راجل معاها ومع باباه ميعملش حاجة غلط ولو حصل " مهو مفيش حد معصوم " يكون مسئول عن تصرفاته ويتقبل عقابه .. متعودوش يهرب ويراوغ .. ولا تعوده انها تدافع عنه .. ولا حتى تسمح لحد من الاهل بكده .. عشان ميطلعش خواف ويخاف من المواجهة

تعلمه يكون راجل مع اخواته يحميهم ويحبهم ويخاف عليهم .. متسمحش للغيرة تدخل قلبه .. لأ .. لازم تحسسه انه مش ناقص حاجة وتدخل فى معتقداته الايمان بالنصيب .. وان كل واحد بياخد نصيبه ومحدش بياخد اكتر من اللى ربنا قاسمله بيه .. عشان ميبقاش غيار ولا حسود ولا حقود

تعلمه يكون راجل مع ربه ..ربنا امره بفروض يبقى لازم يأديها .. امره بمعروف يبقى لازم يأتمر بيه .. نهاه عن منكر يبقى لازم ينتهى عنه .. تعلمه انمع ربنا مفيش فصال .. ولا كسل ..ولا اهمال .. عشان ميطلعش زى ناس كتير عايشين بينا مش بيصلوا غير يوم الجمعة

تعلمه يكون راجل فى مدرسته ..ونموذج مشرف لبيئته واهله وأسرته

تعلمه يكون راجل مع زميلاته البنات فى المدرسة او الجامعة او العمل .. ويعتبر اى بنت يعرفها زى اخته ويرتضى لها ما يرتضى لاخته من معاملة بالذوق والادب و الاحترام .. حتى لو فيى يوم حب .. يكون راجل ومسئول مع البنت اللى بيحبها .. وميوعدش الا لو كان متاكد بتحقيق وعده

وتفهمه ان البنات مش بنبونى ولا مكسرات للتسالى يتسلى بيه مشوية ويشوف غيرهم .. لأ .. البنات مخلوقات بريئة رقيقة ضعيفة وقلوبهم هشة وسهل جرحها .. واللى يحاول يلعب بيهم ربنا هيردهاله فى اهله واخواته ومراته وولاده عشان ميطلعش زى شباب الايام دى بميت وش والف لون

تعلمه يبعد عن اصحاب السوء ويتجنبهم لانهم هيعلموه يعمل كل حاجة تغضب ربنا وتغضب اهله وتكره الناس فيه وتتعس حياته وتسئ خاتمته

تعلمه شغل البيت ..وتعرفه ان الرسول كان فى خدمة اهله وان مش عيب الراجل يطبخ وينضف مكانه ويغسل ويكوى .. لكن العيب اوى .. انه يحتاج كل ده ويتحوج لحد يعملهاله

الاهم طبعا فى الموضوع ان الاب يكون ماشى مع الام على نفس الخط ..منصلحش من ناحية و نبوظ من ناحية .. لان كتير الاب هو اللى بيكون السبب فى فساد ابنه ومش مهتم بكل ده .. لكن مهتم ان ابنه يكون دون جوان عصره واوانه والموبايل ميبطلش رن .. ويا سلام بقى لو طلع لعيب كورة .. يبقى كده كمل رسالته فى الحياة

آخر الكلام

ولادنا امانة فى ايدينا وهنتحاسب عليهم حساب عسير يوم القيامة .. واحنا مش ناقصين . كفاية اوى نتحاسب على ذنوبنا احنا .. هنشيل كمان ذنوب رعيتنا " كلكم راع وكلكم مسئول عن رعيته "

حتى لو مش عارفين نصلح نفسنا .. نتعلم ونحاول واحنا بنربى ولادنا نربى نفسنا معاهم

عايزين نكون سبب فى دخولهم الجنة مش النار

وعايزينهم يكونوا سبب فى دخولنا الجنة مش النار

وعايزينهم يترحموا علينا بعد ما نموت ويدعولنا وويكون دعاؤهم دعاء الولد الصالح ليقبله الله

أنا كده خلصت اللى عندى تقريبا

فى انتظار اضافاتكم آباء وامهات اليوم والغد

وربنا يوفقكم ويوفقنا



25 comments:

فشكووول said...

السلام عليك

يا بنتى ماتستعجليش .. الناس عندهم حق وانت عندك حق .. ما هو الام والاب بيتشتموا عشان خاطر الذريه قليلة الادب تجيب لاهلها اللعنه

موروثات الاف السنين
ثقافة الاف السنين
من الثافه والموروث الذكورى فاكره انهم حيتشالوا فى حوالى 20 او حتى 50 سنه .. يا بنتى الثقافه ما بتتغيرش بسرعه .. لا متجزره فى مفهوم الشعوب .. ليست العربيه فقط ولكنها كل شعوب الارض

صبرا آل ياسر فان موعدكم الجنه

فشكووول said...

وبعدين يا ست الكل

اللى بيشتم بالام دا ما يقدرش يتكلم ولا يفتح بقه قدام مراته

احنا بس الرجاله بتوع قنزحه ومنظره وساعة الزنقه بنقف قدام ستاتنا وتاج راسنا (لأ اقصد حريماتنا .. احم .. احم ) زى القطط وبنبقى نقول يا ارض اتهدى وابلعينى وياما بناخد على دماغنا لكن قدام الناس نعمل فيها الزناتى خليفه .. والله اسألى عمك فشكول وهو مش حيكدب عليكى .. واكلهم اجواز اجواز وفرد كمان ..
فرد ايه؟ .. اتحشمى يا حاجات جوايا عيب تقولى انها فرد بلغ وجزم .. عيب

تحياتى

عاشقه الرومانسيه said...

ربنا يبارك لك فى ابنك
وابقى تعالى علمينى شويه يااوختشى لما اتجوز و يجى ولى العهد تبعى
(:

رابطة هويتي اسلامية said...

السلام عليكم ورحمه الله وبركاته

جزاكى الله خيرا على هذه الكلمات فبالطبع نحتاج لتغيير هذه المفاهيم

فالام هى الاحق بالصبحبه مهما حدث من تشويه حول هذا المفهوم
ومن الاعجب ان نجد كلمه انت ابن امك كأنها سب

ربنا يرحم امتنا

تسعدنا زيارتكم للرابطه

موناليزا said...

أزيك ياقمر وحشااااانى جدا
فينك من زمان يارب تكونى بخير

بالنسبة للجملة اللى قالها ياسر حسين فانا مش شايفاها سيئة للأم لان دى فعلا الحقيقة
الابن فى مرحلة المراهقة والشباب بيبقى عايز عربية زى اللى بيشوفهم فى التليفزيون يطلبها من ابوه مش هيوافق فأمه تتصرف وتجيبهاله
وبالتالى الابن طلع معندوش اى مسئولية اللى بيعوزه بيجيله حتى لو كان الوقت مش مناسب

رؤيتى بقى
ستجدينها هنا
http://monaliza110.blogspot.com/2008/10/blog-post_19.html
و
http://monaliza110.blogspot.com/2008/12/blog-post_18.html

Dr Ibrahim said...

كل كلام حضرتك تمام ومظبوط.
بس حتة المسلسل دى من رأييى انها مش اساءة للأم
بل اساءة للى كان سايق العربية
لان معنى ان مامته جايباله العربية ومش تعبان فيها معناه انه لسه دلوعة مامته
و لان امرأة اللى بتصرف عليه ولما امرأة تصرف على راجل اظن اننا منقبلهاش هنا فى مجتمعنا الشرقى..

حصان المرجيحة said...

اولا شكرا علي الموضوع الجميل ده
بس انا شايف ان الموضوع فعلا بايد الام
يعني مثلا هي اللي ممكن تطلع راجل و ممكن تطلع حاجة تانية
و ان كان في امهات بتعمل كل حاجة علشان تصلح حال ولادها و مش بيبقي في فايدة بس دي حالات شاذة
علشان كده لما بنشوف ولد مش متربي بنرجع للام و ده اللي بيخلي مسؤلية لام اكبر و هي تربية جيل مش ابنها بس
ياريت تسمعو صيدة اسمها يا عيوني لواحد اسمه محمد السلمان عن الام هاتعجبكو
سلاااااااااااااام

noha said...

سوسو ازيك ياجميلة

موضوع جميل جدا

اصلا فى ظلم كبير مازال واقع على نظرة المجتمعات الشرقية للمرأة

مع ان الاسلام حررها من زمان

بس هنقول ايه الجهل هو اللى عامل فينا كده

محمد عتلم said...

انا جاى امسى واقول سلامو عليكوووووو

همسة حب said...

موضوع قيم فعلا
و انا برضو بتغاض اوي من الحكاية دي و الله يا اختي من كثر ما بقينا نقول لازم الولد يترب راجل رااجل الناس خذتها بمعناها الحول الي هو راجل ع البنت مش يعني راجل شيم و اخلاق و رجولة لا
بمعنى الي هو بقى الراجل و ست اقول ايه ست
و الموضوع كله بيرجع للتربية
ربنا يهديهم و يفهمهم
و ربنا يقوينا على تربية ولادنا التربية الحسنة التي نرضاها و نرضي بها الرحمان
تحياتي لك اختي

رفقة عمر said...

ازيك سالى
يارب تكونى بخير
ربنا يخليكى دودو الجميل
واهم حاجة تعلميه انه يحافظ على بنات الناس ويعتبر كل بنت اخته ويحافظ عليها
لان البنت بقت متهانه قوى من الشباب وقليل قوى اللى بيراعى ربنا فى البنات
ولو حد شافت بنت بتتعاكس ولا بيهتم ولا الشهامه والرجوله تجعله انه يدافع عنها ويحميها
وكمان البنات محتاجه تربيه مش الولاد بس
ربنا يهديهم ويصلح حالهم اللهم امين

rovy said...

السلام عليكم ..
أزيك يا سالى.. وحشانى ..
عندك حق والله يا سالى الحكاية زادت فعلا زمان كان قليل لما بنسمع حد بيشتم حد بأمه و كانت مصيبه و حاجة عيب جداا
دلوقت بيهزروا بكده و المصيبه انى بأشوف شباب شكله كويس و بيشتم بالأم عادى جدا و اللى بيتشتم يضحك و يرد عليه برضه و هو بيضحك .. بجد مهزله
ثقافة المجتمع كله بترجع لورا فى نظرته للمرأه بجد والله ده أحساسى ..
كلامك كله صح جدا عن التربيه و الرجوله اللى أفتقدناها .. ربنا يعينا يارب
دمتى بكل الخير
تحياتى

Dr.karim said...

موضوع جميل بجد
بس الجمله اللي قالها دي اعتقد هي نابعه عن حاجتين
اولا حقد الفقراء علي الاغنياء
وطبعا بقي اغلب الشعب المصري فقراء فبالتالي بنسمعها كتير في مصر
ثانيا ان فعلا اغلب اللي معاهم عربيات في سن صغير بيبقوا مرفهين زباده عن اللزوم وهم سبب اغلب الحوادث

بس كان عندي ملحوظتين

اولا الممثل اسمه سامح حسين مش ياسر حسين
ثانيا لون الخط بتاع الكومنتات مجهد جدا للعين مش عارف اقراها
good post, go on

أ / أحمد عبد المنعم said...

بسم الله الرحمن الرحيم
الأخت الفاضلة : حاجات جوايا

ما تحدثت عنه ثلاثة موضوعات

الأول : الجملة التى آلمتك وتفسيرك لها

الحقيقة أن الجملة لا تمس المرأة بشكل مباشر بل لعلها فى الغالب تعنى عند من يقولونها ( أن هذا الشخص لم يتعب من أجل أن يحصل على ما يركبه بل أتاه بلا جهد وبالتالى لا يعرف له قيمة ولا يشعر بما يشعر به الفقراء الذين يسيرون على أقدامهم فهو إن كان قد بذل جهدا من أجل شرائها كان سيشعر بقيمة الحفاظ عليها من السرعة والتهور كما أنه كان سيشعر بألم السير على الأقدام وسيرحم السائرين على أقدامهم )ولا أظن ان أحدا ممن يتلفظون بهذه الجملة يعنى إهانة مياشرة للأم
وإن كانت تحمل فى نفوسهم إهانة لها فقد تكون ضمنية بكونها لم تحسن تربيته تربية سليمة

وهذا هو الموضوع الثانى الذى تحدثت عنه : دور الأم فى التربية


وأمر التربية خطير جدا
فهو بناء شخصيات وأمم ومجتمعات
الخطأ فيه خطأ فى أجيال
وهناك مشكلة ضخمة جدا جدا فى الأبوين
أنهما يحسنان إعداد البيت المادى من أسرة وحجرات ووسائد وأجهزة
ويغفلون أمر الإعداد التربوى لنفسيهما ليكونا قادرين على تربية أبنائهما
وهنا يبرز موضوعك الثالث: دور الأب فى التربية
فالتربية ليست دور أم فقط بل أدوار مشتركة بين الوالدين

لقد كتبت مقالا عن ذلك فى مدونة أحب أسرتى ودعوتك من قبل لقراءته أرجو منك قراءته

أختى : ما رأيك فى أن نصنع مشروعا مشتركا مع مجموعة من المدونين مشروعا تحت عنوان ( كيف تربيان أبناءكما )ويكون المشروع على أساس علمى سليم
لنكسر حد التخلف التربوى القائم على الميراث التربوى بخيره وشره وظنونه واحتمالاته
ليكون أساسا سليما يغلب عليه القيام بدور تربوى حقيقى

حاجات جوايا said...

السلام عليكم ورحمة الله بركاته

اهلا بكم جميعا اخوتى واخواتى
سعيدة جدا بمشاركتكم الفعالة وارائكم القيمة متحرمش منكم ومن تواصلكم معى ابدا يارب
واسفه جدا على تقصيرى فى المتابعة
مش عارفة اضبط وقتى مع المدونة خالص
بس وعد ان شاء الله بعودة ومتابعة قريب جدا

انا عايزة اوضح بس حاجة
انا مش بس زعلانة على اهانة الام
انا زعلانة على مستوى الحوار
الحوار ده للاسف متداول مش على أد الجملة اللى فى المسلسل بس
اى حاجة وحشة دائما يدخل فيها الام
والادهى والامر ان الموضوع بقى بسيط جدا وعادى والشاب الكووووول هو اللى يقول اكبر عدد من الجمل اللى بيدخل فيها سيرة الام ولا يقابل بالتوبيخ اوالزجر بل على العكس بالضحك والهزار والرد على جملته بجملة اكبر واكثر اهانة

ليه الشباب بقى مش مؤدب كده
؟؟


اخى الفاضل احمد عبد المنعم
انا اسفه جدا والله انى مش متابعة
بالنسبة لاقتراح حضرتك انا موافقة جدا عليه
وبشكرك عليه
واتمنى يتحقق سريعا
على الاقل لو مش هنفيد غيرنا نبقبى قدرنا نفيد نفسنا
لانى كتير ببقى مش عارفة اربى ابنى ازاى
وهو من جيل تانى مختلف تمام عن جيلنا زى ما احنا مختلفين عن ابائنا


ربنا يقدرنا جميعا على حسن تربية اولادنا ويكونوا حجة لنا فى الدار الاخرة لا حجة علينا

اشكرك اخى الفاضل

واشكركم جميعا اخوتى واخواتى على المتابعة والتواصل

دمتم جميعا بكل الخير

أحــوال الهـوي said...

منظومة تربويه هايلة
و خطوط عريضه في اصول التربيه الحديثه
و اعتقد ان الام لها احترامها و حبها و اذا كانت الجمله استفذتك
وهي لا تعني التقليل من شان الام او المرأة عموما و لكنها من باب النكايه في تهور الشاب وهي استعارة مكنيه
و من فوائد هذه الجملة ايضا انها افرزت منك موضوع جميل رائع في اصول التربيه و مشاكلها في ادارة النشئ

تحياتي

شفـقــة و إحســــان said...

مش هقولك غير كلمتين
تسلمى ويسلم قلمك ايوا كده بالرغم من ان المرأة نصف المجتمع واصبحت بتنول كل حقوقها واحتياجاتها واصبحت بتشارك الرجل فى البيت وفى العمل واصبح لها دور فى تنمية المجتمع
الا ان المجتمع لا يزال ينظرلها نظرة دونية
موضوعك مهم ومثير
تحياتى

قيس بن الملووووح said...

نحن في حاجه الي رأيكم في مشاكل القراء علي مدونة "دقات قلب بعد الخمسين"

ابو صهيب ( الجمعاوي الاصيل)سابقاً said...

مثل دائماً ما كان والدي رحمة الله عليه يقوله لي

}}}} الولد...............يجيب لاهله اللعنة او الشتيمة)))

نور الدين said...

اهلا بالاخت الكريمة
هذا الامر حقيقة موروث خاطيء حيث اصبحنا ننظر للرجولة بانها البعد عن كل ما يخص النساء حتى لو كانت أما ً والامر لايخلو من حقد طبقى واإجتماعى
لكن دور الامهات أن تغرس فى الابناء الاعتزاز بدورها كام وأن تخبرهم أن امهات مثلها هن من قدمن للأمة محمد الفاتح الذى كانت تأخذه امه كل يوم لأسوار القسطنطينية وتقول لها عندما تكبر ستفتحها ياصغيرى

امهاتنا شرف لنا ومن تنصل منه فهو ليس بإنسان ناهيك عن أنه ليس برجل
تحياتى لمواضيعك المميزة اختنا الكريمة
...
نورالدين محمود

new-one said...

هو ليس تقليلا منها
ولكن تقليلا منه
فالرجل هو من يعتمد على نفسه لا على والدته

ع نوتة said...

ربنا يبارك فيكى اختى الفاضلة

وبجحد الموضوع فوق الرائع بصراحة


ويارب يجعلكى انتى الم التى ربت تربية اسلامية صحيحة ليكن ابنك رجلا مسلم غيور على دينة


اللهم يجعل هذا كله فى ميزان حسناتك

لاتنسى زيارتن فى ع نوتة

لورنس العرب said...

انتي رحتي فين؟

فشكووول said...

السلام عليكم
ازيك يا حاجات ومحتاجات

حاجات جوايا said...

بشكركم جدا على المتابعة
انا بخير الحمد لله بس عندى شوية كسل تدوينى وانجذاب كاد ان ينتهى بالفيس بوك
والمشكلة عندى انى وقتى ضيق جدا عالكمبيوتر ومش بعرف اعمل كل اللى عايزاه

ميرسى جدا للتواصل الايجابى

والف شكر لاخوتى الافاضل لورنس العرب وعم فشكول على السؤال ربنا يبارك فيكم جميعا يارب

دمتم جميعا بكل الخير
اختكم
سالى

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون


Free CursorsMyspace LayoutsMyspace Comments
كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.
 
Powered :blogger