حاجــــات جوايــا: 6/1/08

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Saturday, June 28, 2008

الحلقة الثامنة " تحويشة العمـــــــر "

(الحلقة (8

تحويشة العمـــــر

على منتدى " الصفوة " قهوة البؤساء سابقا

عايش : السلام عليكم يا حاج صبحى .. مبارك على التعديلات اللى عملتها فى القهوة دى

الحاج صبحى : وعليكم السلام ورحمة الله وبركاته .. الله يبارك فيك يا أستاذ عايش .. هنعمل إيه يعنى ؟ كل حاجة دلوقتى بتتغير .. اشمعنى احنا اللى هنفضل واقفين .. قلت اعمل للقهوة نيولوك زى ما بيقولوا وأخليها منتدى ههههههههه

عايش : هههههههههههه ماشى يا حاج .. وصفوة بقى ونظام وأضواء خافتة وموسيقى هاديه .. انت ناوى تصفى القهوة .. قصدى المنتدى من البؤساء ولا إيه ؟

الحاج صبحى : هههههههههه لكل وقت آذان يا أستاذ عايش .. وكل ما المكان يبقى أرقى .. كل ما زباينه برضه تبقى أرقى ورزقه يبقى أعلى .. بس ده مش معناه طبعا انى هصفى المنتدى من زباينه المحترمين حتى لو كانوا بؤساء .. كلنا بؤساء يا استاذ عايش

عايش : عندك حق يا حاج والله .. نظرية اقتصادية سليمة ميه فى الميه .. الواحد لازم يعمل اللى عليه ويطور من نفسه والأرزاق بيد الله أولا وأخيرا

الحاج صبحى : ونعم بالله .. وانت أخبار شغلك عند الحاج مصطفى ايه ؟

عايش : الحمد لله يا حاج ماشى الحال

الحاج صبحى : يارب دايما يا بنى .. وازاى الأستاذ عبده ؟ .. بقالى فترة كبيرة مشوفتوش

عايش : الحمد لله يا حاج والله .. زمانه جاى دلوقت .. كلمنى عالموبايل واتفقنا نتقابل هنا

الحاج صبحى : طيب خير .. ربنا يطمنا عليكوا يا بنى ويصلح أيامكوا .. تؤمرنى بحاجة ؟

عايش : متحرمش منك يا حاج اتفضل حضرتك متعطلش نفسك

الحاج صبحى : طيب عن إذنك يا ابنى .. السلام عليكم

عايش : وعليكم السلام ورحمة الله وبركاته

انصرف الحاج صبحى وجلس عايش يفكر فى كلمات هذا الرجل الذى يبدو بسيطا فى مظهره و لكنه عميقا فى خبرته وتفكيره وتعايشه مع الحياة

وأثناء ذلك قطع تفكيره صوت يقول : ايه يا عم روحت فين ؟؟ انت مش سامعنى ؟؟

انتبه عايش على الصوت والتفت إلى مصدره ليجده عبده طناش

عايش : أهلا يا عبده .. انت جيت .. حمدا لله على السلامة

عبده طناش : الله يسلمك يا عايش .. كنت بتفكر فى ايه ؟

عايش : أبدا .. بفكر فى حالنا واننا لسه واقفين محلك سر مش بنتقدم ولا خطوة وكل اللى بييجى بيروح

عبده طناش : انت هتقوللى على اللى بيروح ده ؟ ده بيروح حتى من قبل ما ييجى

عايش : إحنا لازم نعمل حاجة .. الشغل لوحده كده مش كفاية

عبده طناش : شغل ايه اللى مش كفاية يا عايش .. انت عايز تقتل نفسك ولا إيه ؟؟ ده انت يا ابنى بتشتغل من 10 الصبح لواحدة بالليل يوميا ما عدا يوم الاثنين .. عايز تشتغل تانى إمتى ؟

عايش : أنا بتكلم عالفلوس يا عبده .. تحويشة العمر .. عايز اعمل بها مشروع أو اى حاجة تزودها شوية

عبده طناش : وانت تضمن منين ان المشروع ده هينجح ومش هياخد تحويشة العمر ويطير ؟؟؟؟؟؟؟؟؟؟؟

عايش : لازم نجرب يا عبده .. لازم نغامر .. الرسول عليه الصلاة والسلام أمرنا بالتجارة .. لو حطينا فلوسنا جمبنا وقعدنا عمرها ما هتكسب ولا تزيد .. بالعكس دى قيمتها هتقل يوم عن يوم

عبده طناش : عليه الصلاة والسلام .. بس حكاية التجارة دى صعبة شوية خصوصا ان مفيش فائض رأس مال تتسند عليه .. يعنى هتغامر بكل فلوسك وتحولها لبضاعة وتفضل قاعد جنبها مش عارف هتروج ولا هتبور .. حاجة تخوف وتقلق

عايش : طالما راس المال حلال .. والبضاعة حلال .. وانت بتتاجر بالحلال عمرها ما هتبور ان شاء الله

عبده طناش : طب انت بتفكر فى مشروع ايه ؟؟

عايش : لغاية دلوقت لسه مش عارف .. بس هاقعد مع الحاجة كده إن شاء الله أشوف حوشتلى أد إيه وآخد رأيها وعلى الأساس ده اتوكل على الله وأبدأ فى اللى ربنا ييسرهولى

عبده طناش : ربنا معاك يا عايش .. ربنا معاك بجد

عايش : الله يكرمك .. وانت يا عبده هتعمل ايه ؟؟

عبده طناش : أنا بفكر احط فلوسى فى البورصة .. مكسبها سريع وكبير ومش محتاج تعب

عايش بفزع شديد : البورصة يا عبده !!!!!!!!!!!! .. بقى انت قاعد تخوفنى من التجارة وعايز ترمى فلوسك فى البورصة ؟؟؟؟ مين قالك ان مكسبها كبير وسريع ؟؟؟

عبده طناش : معايا واحد فى الشغل كان كحيان زى حالاتى ودخل البورصة وزهزهت معاه عالآخر .. جاب عربية وبيقسط لشقة تمليك ربنا يزيده

عايش : بس دى مش قاعدة .. صحيح فيه ناس بتزهزه معاها زى ما بتقول .. بس برضه فيه ناس بتبيع اللى وراها وقدامها بسبب البورصة دى .. يوم فى السما ويوم فى الأرض .. متتهورش يا عبده وتضيع فلوسك .. مش هتعرف تجيبهم تانى

ينظر إليه عبده طناش بنظرة توحى بالعزم والإصرار وهو يقول : لا لا هجرب ان شاء الله .. هخسر ايه يعنى .. يمكن تلعب معايا أنا كمان مين عارف .. مهو الشغل مش نافع .. والسفر مش نافع .. والجواز مش نافع .. ولو فكرت فى مشروع برضه مش نافع .. هعمل ايه يعنى ؟؟ مفيش قدامى إلا الحل ده ؟

عايش : انت تقدر بفلوسك تبدأ مشروع صغير .. بس انت اللى مش عايز .. كل اللى أقدر أقولهولك ربنا يسترها معاك وحاول على أد ما تقدر تسيب حاجة للزمن .. على رأى الحكمة اللى بتقول " لا تضع البيض كله فى سلة واحدة "

عبده طناش : ربنا يعمل اللى فيه الخير

عايش : اللهم آمين .. طيب انا هقوم بقى ألحق الحاج مصطفى أصله سبقنى عالمحل .. مش عايز منى حاجة يا عبده

عبده طناش : متحرمش منك يا عايش ربنا معاك .. مع السلامة

عايش : ومعاك يا عبده .. السلام عليكم

عبده طناش : وعليكم السلام ورحمة الله وبركاته

انتظرونا فى الحلقة القادمة ان شاء الله مع عايش وعبده طناش

دمتم بكل الخير

Thursday, June 19, 2008

فرررررح فى دمياط ... إحنا اللى نقلنا المصنع

تحديــــــــــث

************

نزلت النهارده راس البر .. وبجد كنت ماشية فرحانة جداااااااااااااا فرحة محستهاش من زماااااااان لا فى عيد ولا فى اى مناسبة تانية

الشارع الرئيسى كله مزين بالأنوار من اول البوابة ولغااااااية اللسان

وانتشرت الكثير من البوابات التى تحمل لافتات تهنئة لدمياط وشعبها وشكر للسيد المحافظ على وقفته الجريئة مع شعب دمياط وللسيد رئيس الجمهورية على الوفاء بعهده مع الدمايطة

وعند مسجد الرحمة " الجامع الكبير الموجود فى السوق "تم رص عشرات البالونات الكبيررررررررررة المكتوب عليها عبارات الفرحة والشكر والتهانى لدمياط وأبناءها ووقف احد الشباب بدى جى علا صوته على أصوات المارة الذين تخلصوا من حالة السخط والغضب ضد انشاء مصنع أجريوم وانتابتهم حالة من الرضا والمصالحة الوطنية والشعور بالآدميه ............... وبالأمان

مهما اتكلمت مش هعرف أعبر

والصور أبلغ من اى كلااااااااااااام

وأدينى نزلتها أهه زى ما وعدتكوا

يارب تعجبكووووووووا

=*=*=*=*=*=*=*=*=*=**=*=*=*=*=*=**=*=*=*=*=*=*=*=

أخيراااااااااااااا وبعد كابوس طويل عشنا فيه أكثر من نصف عام .. أصدر السيد الرئيس محمد حسنى مبارك قراره بعدم انشاء المصنع فى دمياط ونقله منها
هتقولولى وهيروح فين ؟؟
هقولكوا لسه مش عارفه والله بس اول ما هعرف هقولكوا على طووووووووووول

أما عن دمياط فقد خلعت ثوب الحداد ولبست ثوب العرس
أضاءت دمياط كلها بالأنوار على طول كورنيش النيل
وتجمع المواطنون يشاركون بعضهم البعض الفرحة والسرور
وانطلقت السيارات مدندنة بأبواقها أحلى سينفونيات الفرح

وعلا صوت الدى جى مدويا فى سماء دمياط بكل أغانى الفرح والسعادة

وجاءت فرقة محفوظ للزفة الدمياطى لتعزف احلى مقطوعاتها

وانتشرت الدباديب الكبيررررررررررررة وداعبها الهواء لتتراقص على الألحان وعلى الاغانى الدمياطية التى جاءت من وحى اللحظة ومن وحى الفرحة

بجد الفرحة لا توصف
وزى ما شاركتكوا فى أحزاننا
حبيت برضه أشارككوا فى أفراحنا
ويارب يكمل فرحتنا على خير
الف مليووووووووووووووون مبرووووووووووووك لدمياط وأهلها وولادها ومحبيها

وكل الشكر للسيد الرئيس / محمد حسنى مبارك على استجابته لنداء اهالى دمياط
وللسيد المحافظ الدكتور / محمد فتحى البرادعى لمساندته لأبناء دمياط
ولكل أبناء دمياط الشرفاء الذين ناهضوا المشروع الضار بأبناء دمياط

على فكرة الصور الجميلة دى بعدسة أختى ... سحــــــــر فوزى
لكم منى ومنها كل التحية والإحترام

دمتم بكل الخير

Saturday, June 14, 2008

فخورة لأنى اتحدث العربية

السلام عليكم ورحمة الله وبركاته

أحباء القلب
تضامنا مع حملة لغتى .. هويتى كتبت هذا الموضوع والذى أرجوا منكم أن تفسحوا لى صدوركم وتكملوه حتى النهاية

ولكى أبدأ معكم من البداية لابد وان أُعرف نفسى إليكم
دعونى أغض الطرف عن الإسم والسن والمهنة .. وأتطرق إلى الجنسية والديانة والهوية

فكما تعلمون أو كما يعلم البعض منكم فإنى مصرية الجنسية .. إنسانة عربية مسلمة .. كتابى القرآن الكريم .. ولغتى اللغة العربية

وإجلالا وتقديرا للغة كتابى العظيم .. فقد قررت أن أحذف من قاموسى كل الكلمات اللاتينية
ليس معنى ذلك أننى سأقاطع الإنجليزية والفرنسية .. لكننى أقصد أننى لن أُدخل كلمات أجنبية بين كلماتى العربية طالما أن هناك كلمة عربية تحل محلها

وليس معنى ذلك أيضا أننى سأقاطع اللغة العامية .. فاللغة العامية هى وسيلة الاتصال والتفاعل السريع بين أبناء الشعب الواحد .. وكما نعرف جميعا فشعبنا المصرى يشتهر بلغته العامية التى يعشقها الجميع

لكننى سأحذف محتويات قاموس الروشنة من كلماتى وإن كنت لا أستخدمها كثيرا .. لكننى مع ذلك أستخدمها
وخاصة الكلمات الإنجليزية الأصل والتى تم تعريبها وكتابتها باللغة العربية
مثل : كنسل – سيف – فرمت – هيك
والتى انتشرت كثيرا بين أوساط الشباب الذين يتعاملون مع الحاسب الآلى بصفة خاصة ومعناها لمن لا يعرفها
كنسل : " الغى "--- سيف : " احفظ " --- " فرمت " : أعد تجزئة ..---" هيك " : اخترق

كما سأتوقف عن الاستعانة بالحروف الأجنبية والأرقام لكتابة الكلمات العربية .. وللأسف كنت افعل ذلك فى اسم الظهور الخاص بى للمدونة الأخرى
أم دودو حبيبى <----------- Om dodo 7abiby
ولنبدأ جميعا بتغيير اسم الظهور الخاص بكل منا إلى اللغة العربية

وهناك كارثة أخرى بدأت فى الظهور منذ فترة ليست بالقليلة .. ألا وهى الاستخدام الخاطئ شكلا وموضوعا للنفى
على سبيل المثال
" مش كنت اعرف ان ...."
والمقصود : لم اكن اعرف أن ...
وبالعامية : مكنتش عارفه إن ....

إيه " مش كنت " دى ؟؟؟؟؟؟؟؟؟؟؟؟؟

وقس على ذلك كل الافعال

don't والتى أشعر وانا أسمعها أننى أسمع جملة انجليزية تم نفيها بـ

ne…..pas او جملة فرنسية تم نفيها بـ
ومترجمة ترجمة حرفية غير متسقة مع باقى الحوار

أحباء القلب

قد حان الوقت لنفخر بعروبتنا ولغتنا وديننا وننصرهم وننتصرلهم
قد آن الأوان لنتحد ضد الغزو الفكرى واللغوى لكياننا العربى والذى يطمس هويتنا ويشوهها
لقد بدأت أشعر أننا من كثرة استخدامنا للغة الأجنبية – والتى باتت هى اللغة الأساسية لدى الطبقة الراقية أو هكذا يسمونها – أننا أصبحنا نفكر من اليسار إلى اليمين كما نكتب تلك الحروف اللاتينية
أشعر بحالة من الضياع وفقدان الهوية

فإذا كنا عرب ............ فلغتنا هى اللغة العربية
وإن كنا من الغرب ........ فلغتنا هى اللغة الاجنبية
لكن هذه اللغة المعدلة التى نستخدمها .. إلى أى منهم تنتمى ؟؟؟؟؟؟؟؟

أحباء القلب

أتمنى أن نعيد جميعا النظر إلى لغتنا الجميلة والتى يصعب على أبناء اللغات الأخرى تعلمها ويتكبدون المشقة لأجل ذلك لمجرد فهم الإسلام .. ولنحمد الله سبحانه وتعالى أن خلقنا بلسانٍ عربىّ وأن اصطفانا بلغة القرآن الكريم عن سائر شعوب العالم بلا حول منا ولا قوة

أتمنى ان يجد ندائى صداه لديكم

دمتم جميعا بكل الخير

Monday, June 2, 2008

الحلقة السابعة " عايش يمر بأزمة عاطفية "

(الحلقة (7

عايش يمر بأزمة عاطفية

يجلس عايش وحيدا فى غرفته .. ووالدته بالخارج تتأسف على حاله

صوت طرقات تفتح على إثرها والدة عايش الباب ليدخل عبده طناش محييا بتحية الإسلام

عبده طناش : السلام عليكم يا حاجة .. إزاى صحتك ؟

الحاجة : أهلا يا عبده يا ابنى .. الحمد لله بخير اتفضل يا ابنى البيت بيتك

يدخل عبده طناش وهو يهمس : ربنا يكرمك يا حاجة
ثم يرتفع صوته قليلا : أخبار عايش إيه .. عديت عليه فى المحل قالولى أنه تعبان شوية ومنزلش فجيت أطمن عليه

الحاجة : تسلم يا ابنى ده العشم برضه ما انتوا اخوات وأصحاب طول عمركوا
ثم تستطرد : الحقيقة عايش مقريف شوية ومتضايق عشان موضوع كده
تخفض صوتها وهى تقترب برأسها منه وتقول : عارف البنت اللى ساكنة قصادنا اللى عايش كان بيحبها وناوى يخطبها ؟

عبده طناش : أيوه يا حاجه عارفها مالها ؟

تمط الحاجة شفتيها وهى تحرك يدها بحركة توحى بالحزن وتقول بتحسر : اتخطبت وهتتجوز كمان 3 شهور

يرتفع حاجبا عبده طناش باندهاش وهو يهتف متأثرا بصوت يحرص أن يكون منخفض : اتخطبت ؟ ... امته ؟.... وليه ؟.... مش كانوا متفقين عالخطوبة من سنين ؟؟

الحاجة : اتقرت فاتحتها الجمعة اللى فاتت وهو عرف امبارح بالصدفة من الحاج حسين جارهم

عبده طناش : يعنى كمان مقالتلوش ؟؟

الحاجة : لا يبنى والله ولا حتى شافها كأنها كانت ناوية على كده من زمان .. ده احنا حتى مسمعناش زغرودة طالعة من بيتهم ولما قال كده للحاج حسين قاله انهم قروا الفاتحة فى بيت أختها اللى فى الشارع اللى ورانا

عبده طناش : وهو إيه أخباره دلوقت ؟

الحاجة بحزن شديد : والله يبنى حاله يقطع القلب .. قافل على نفسه بابه لا بيكلم حد ولا عايز حد يكلمه .. حتى الأكل مش راضى ياكله

عبده طناش : لا حول ولا قوة إلا بالله .. بس ليه يعمل فى نفسه كده هى متستاهلش أصلا .. اللى يبيعنا نبيعه وكل واحد بياخد نصيبه

الحاجة : ادخلله يا ابنى الله يصلح حالك عقله بكلمتين .. قوله ميعملش فى نفسه كده عشان صحته وعشان خاطرى

عبده طناش : من عنيا يا حاجة .. بعد إذن حضرتك

الحاجة : اتفضل يا ابنى

يتوجه عبده طناش لغرفة عايش .. يطرق الباب عدة طرقات فيأتى صوت عايش آذنا له بالدخول

عبده طناش : السلام عليكم .. ايه يا عم عايش .. المحل مضلم من غيرك .. انت هتبتدى الكسل ولا إيه ؟؟؟

عايش : وعليكم السلام يا عبده اتفضل .. لا كسل ولا حاجة بس معادليش نفس أعمل حاجة فى الدنيا

عبده طناش : لالالالالالالالالا مش مصدق ودانى .. عايش اللى يقول كده .. عايش اللى كله حماس يعمل كده .. سيبت ايه بقى لأمثالى ؟؟؟ههههههه

عايش : الدنيا مش مستاهلة ان الواحد يضيع عمره فيها فى الشغل .. نشتغل ليه ونتعب نفسنا ليه .. عشان مين كل ده ؟ طالما كل تعبنا بيروح هدر .. انت اللى صح يا عبده .. انت اللى صح

عبده طناش : ايه الكلام ده يا عايش .. صحيح انا مش بحب اتعب نفسى زيادة عن اللزوم وعايش وخلاص وزى ما تيجى بس مش معنى كده انى صح .. ليه بتقول كده ؟؟؟؟؟؟؟

عايش يغالب البكاء وهو يقول : عشان حلم عمرى اللى عشت أحلم بيه طلع وهم .. كابوس .. ضيعت عمرى فيه وطلع ميستاهلش

يزفر بأسف ثم يستطرد : أميرة احلامى باعتنى لاول واحد جاهز عشان معاه فلوس وانا لسه بكون نفسى .. باعتنى رخيص .. رخيص أوى

عبده طناش يربت على كتفه وهو يقول بصوت منخفض : واللى يبيعنا رخيص نبكى عليه ولا نبيعه احنا كمان .. ونبيعه ببلاش

عايش : أنا مش ببكى عليها .. أنا حزين عالوهم اللى كنت عايش فيه وضيعت فيه سنين عمرى وفاكر نفسى فى حلم جميل .. أنا كنت بشتغل عشانها وبحوش عشانها .. بنيت فى خيالى بيت صغير جميل يجمعنا واتهد .. حزين من الغدر والكدب والخيــــــانة حاسس ان الدنيا معدش فيها امان .. وان كل اللى حواليا مش بيحبونى وهيغدروا بيا زيها .. أنا تعبان ومش قادر .. حاسس ان روحى بتتسحب منى .. حاسس انى متكتف ومخنوق وعاجز وفقير وصغير .. صغير اووووى

عبده طناش متأثرا : عايش انا مش عايز أشوفك فى الحالة دى .. مش عايزك تستسلم للاحساس ده .. انسى كل حاجة وابدأ من جديد .. ارمى كل حاجة ورا ضهرك وبص لقدام وانت قدها وقدود .. بكره تثبتلها وتثبت لكل الناس انك أحسن مما كانوا يتوقعوا .. وأحسن من اللى هيا اختارته .. هى ضيعت نفسها .. عمر الفلوس ما تعمر بيوت ومحدش هيقدر يحبها زيك .. دى بتبقى فرصة فى العمر يا تستغلها يا تضيعها من ايدك للأبد
أنا عارف انك قوى .. وهتقدر .. وعايز أقولك حاجة من الآخر .. هى مش نصيبك .. نصيبك لسه فى علم الغيب .. لو كانت نصيبك مكانتش ضاعت منك أبداااااااااا مهما حصل
قوم يللا اتوضى وصلى وافتح المصحف واقرا قرآن وادعى ربنا يفك كربك ويفرج همك ويبدلك خيرا منها .. ونام ومتفكرش فى حاجة والصبح ان شاء الله هجيلك المحل

يحاول عايش الاعتراض فيقاطعه عبده طناش : ولا كلمة دلوقت .. لما تعمل اللى قلتلك عليه قلبك هيرتاح ويطمن وهتنزل الشغل من بكره وتبدأ من جديد بقلب جديد وعقل جديد .. أقوى واكبر .. وعلى راى المثل " الضربة اللى متموتش .. تقوي " والحمد لله على كل حال
أسيبك بقى دلوقت واعدى اطمن عليك بكره ان شاء الله .. مش عايز منى حاجة

عايش : متحرمش منك يا عبده .. ربنا يكرمك

عبده طناش : أشوفك على خير ان شاء الله .. السلام عليكم

عايش : وعليكم السلام ورحمة الله وبركاته .. مع السلامة

انصرف عبده طناش بعد ان ألقى السلام على الحاجة والدة عايش .. واتجه عايش ليتوضأ استعدادا للصلاة .. تفتكروا بعد الصلاة والأخذ بنصيحة عايش قلبه هيطمئن ويهدى ولا هيرجع تانى لألمه وجرحه ؟؟؟

انتظرونا مع عايش وعبده طناش فى الحلقة القادمة ان شاء الله

دمتم بكل الخير

---------------------------------------------------------------------

تحديث هااااااااام جداااا

-----------------

يا أصحابى يا أهلى يا جيرانى .. إليكم النبأ الهام

انتظروا إذاعة حلقة عن مدونتى يوم السبت ان شاء الله الموافق 7/6/2008 على محطة البرنامج العام الإذاعية .. فى برنامج انت تسأل والكمبيوتر يجيب للإنسان الجميل أ/ صلاح حجازى .. والجميلة / عبير صبرى فى تمام الساعة التاسعة وعشر دقائق صباحا على اذاعة مصر الرئيسيه اى البرنامج العام وقبل برنامج الى ربات البيوت مباشرة فى القاهره على موجه اف ام 107 وسته من عشره كما يمكن الأستماع اليها وقت اذاعتها بالضغط على رابط لذلك فى موقع الإذاعة والأنتظار قليلا

والموقع

http://dear.to/cairo

الحاضر يعلن الغايب .. والجاى يعلن الرايح .. والصاحى يعلن النايم .. وركزوا جاااااااااامد عشان هعملكوا امتحان مفاجئ ههههههههههههه

ملحـوظـة صغنـونــه

=========

اللى يحب يسمع الحلقة هيلاقيها فى مدونة البرنامج هنا..........> " أنت تسأل والكمبيوتر يجيب " على الجانب الايسر فى الارشيف

sally ana wa alnet بعنوان

حملوها واسمعوها

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.