حاجــــات جوايــا: الحلقة التاسعة " لا خاب من استخار .. ولا ندم من استشار "

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Monday, August 11, 2008

الحلقة التاسعة " لا خاب من استخار .. ولا ندم من استشار "

(الحلقة (9

لا خاب من استخار .. ولا ندم من استشار
.

اتفق الصديقان كالعادة على اللقاء فى مقهى البؤساء .. عفوا أقصد " منتدى الصفوه " بعد التجديد

عبده طناش : ألووو .. أيوه يا عايش انا وصلت خلاص ومستنيك أهه .. ماشى يللا سلام

وبعد مضى ما يقرب من الخمس دقائق

عايش : السلام عليكم .. ازيك يا عبده معلش اتأخرت عليك أصل كنت بقفل الحساب

عبده طناش : وعليكم السلام .. ولا يهمك يا عايش أخبارك ايه ؟

عايش : الحمد لله ماشى الحال .. أدينا بنعافر فى الدنيا وعلى الله يبقى بفايده

عبده طناش : ان شاء الله يبقى بفايده ربنا كبير .. عملت ايه فى مشروعك .. ناوى ولا غيرت رأيك ؟

عايش : والله يا عايش قعدت مع الحاجة لقيت كل اللى عندى أربعين ألف وشوية يعنى يدوب أشارك حد مينفعش أشتغل لوحدى .. لأنى برضه ناوى أسيب حاجة على جنب أجيب بها اجهزة كهربائية ولا أى حاجة تنفع لبعدين

عبده طناش : آه فعلا .. والحاجة رأيها ايه ؟

عايش : الحاجة خايفة عالفلوس تضيع ومنعرفش نعوضها بس أنا اقنعتها اننا لو فضلنا سايبينها كده هتبقى قيمتها كمان كام سنة زى ورق الكوتشينة بالضبط .. لأن الأسعار بتعلى كل يوم عن التانى والفلوس دلوقت معدتش بتجيب حاجة زى زمان

عبده طناش : عندك حق والله شوف المائة جنية اللى كانت من كام سنة بتجيب خزين يكفى شهر دلوقت متكفيش يومين تلاتة

عايش : أيوه ولسه .. دى بكره تديها مصروف لولادك اللى فى كى جى ون متكفيهومش وممكن يعملوا اضراب عن المدرسة ويقعدولك فى البيت ههههههههههه

عبده طناش : انت بتقول فيها .. احنا فعلا داخلين على أيام صعبة .. بكره لما نفتكر أيامنا دى نقول ده احنا كنا عايشين ملوك وبنتدلع .. على الأقل لاقيين ناكل ونشرب صحيح مش أد كده بس أدينا بناكل بغض النظر عن طوابير العيش المسلح اللى ميتاكلش أصلا ولحم الكلاب والحمير وانفلوانزا الطيور والفواكه والخضروات المسرطنه والحمى القلاعيه

عايش : ربنا يستر يا عبده والله .. الواحد مش عارف يعمل ايه ؟ ربنا يرفع مقته وغضبه عنا

عبده طناش : اللهم آمين .. طيب ايه رأيك تشارك الحاج مصطفى فى المحل ؟

عايش : لا لا يا عبده .. معتقدش انه يرضى .. وبعدين اتحرج أصلا اكلمه فى الموضوع ده ؟

عبده طناش : وايه وجه الاحراج ؟ .. انت لو شاركته المحل هيوسع ويكبر وممكن تقدموا خدمات أكتر زى صالة جيم مثلا

عايش : امممممممم مش عارف والله ممكن يكون رأيه ايه فى الموضوع ده .. أعتقد انه ملوش فى الحاجات دى ومكتفى بالمحل وبس .. بس على كل حال لو جت مناسبة هبقى أفاتحه

عبده طناش : الموضوع مش مستاهل انك تستنى مناسبة يا عايش فاتحه وخلاص عشان تشوف هتعمل ايه ؟؟

عايش : ربنا يقدم اللى فيه الخير ان شاء الله .. وانت عملت ايه مقولتليش ؟؟؟

عبده طناش : روحت يا سيدى عملت كود فى شركة التداول فى الأوراق المالية اللى محسن زميلى فى الشغل بيتعامل معاها وهو رشحلى كام سهم كدا عشان أتابعهم .. بيقول عليهم شغالين كويس بقالهم فترة منهم واحد فى قطاع الغزل .. بيقول انه كان بـ 6 ج ودلوقت فى الأربعينات .. تخيل ؟؟

عايش : ما شاء الله .. بس ده أكيد مطلعش مرة واحدة .. وأكيد خسّر ناس كتير بطلوعه ونزوله العشوائى

عبده طناش : أكيد طبعا .. بس اللى احتفظ بيه من يوم ما جابه أكيد كسب فيه كتير

عايش : اللى بقى ........ فى البورصة نادر لما تلاقى حد محتفظ بسهم لفترة طويلة .. مبدأ البورصة " اخطف واجرى " لأن اللى بيستنى ممكن يخسر كتير

عبده طناش : مممممم ... وممكن برضه يكسب كتير

عايش : والله انت شكلك ناوى تدخل تنام فى البورصة وتطلع منفض جيوبك .. يا ابنى لو مِشيت معاك امشى معاها .. متوقفش وتسيبها تجرى لتتوه منها وتتوه منك .. اتحكم فيها انت ومتخليهاش تتحكم فيك .. البورصة دى عاملة زى الفرس الجامح .. اللى محتاج فارس ذكى ولماح .. وزى العربية اللى محتاجه قائد ماهر .. دى لعبة كبيرة لو مش أدها متدخلش فيها .. وبينى وبينك أنا لغاية دلوقت مش عارف ان كانت حرام ولا حلال ؟؟؟؟؟؟؟؟؟

عبده طناش : لالالالالالالالا حلال طبعا .. منا سألت دار الافتاء قالولى تكون حلال اذا كنت مساهم فى شركات مش بتصنع الخمور والسجائر والمحرمات بكل أنواعها ولا بتتاجر فيها .. وان شاء الله مش هقرب للحاجات دى خالص .. اهم حاجة طبعا اننا نتحرى الحلال فى مأكلنا ومشربنا وربنا يبارك فى الرزق ولو كان قليل .. مش معقول هدخل بيتى فلوس حرام محناش ناقصين قلة بركة

عايش : ربنا يكتبلك الخير يا عبده ومتنساش تصلى صلاة استخارة قبل ما تشترى أو تبيع حاجة .. لا خاب من استخار ومحدش يعرف الخير فين الا ربنا سبحانه وتعالى

عبده طناش : ونعم بالله .. أكيد هعمل كده ان شاء الله كويس انك فكرتنى يا عايش ربنا يباركلى فيك

عايش : ويباركلى فيك يا عبده .. انت أكتر من اخويا ودايما بلاقيك جنبى ربنا ميحرمنيش منك

عبده طناش : ولا يحرمنى منك يا عايش .. احنا فعلا أكتر من أخوات ربنا يديم المحبة ويباركلنا فى بعض .. أسيبك بقى دلوقت عشان أروح اتفق مع السيبر اللى تحتى يدينى خط نت عشان اعرف اتابع البورصة .. دعواتك يا عايش

عايش : ربنا يكتبلك الخير كله ان شاء الله .. انا كمان عندى مشوار مع الحاجة هعدى عليها أخدها ونتوكل على الله .. أشوفك على خير ان شاء الله

عبده طناش : ان شاء الله يا عايش .. مع ألف سلامة

انتظرونا فى الحلقة القادمة ان شاء الله مع عايش وعبده طناش

دمتم بكل الخير

--------------------------------------

تحديــث هاااااااااااااااام
------------

أرجوا المشاركة فى موضوع " هل أصبحت القطط أكرم من أطفال الشوارع " على مدونتى واحة الفكر والقلم للاهمية وجزاكم الله كل خير

دمتم بكل الخير

56 comments:

المنسى said...: السلام عليكم ورحمة الله وبركاته
إزيك ياسالى يارب تكونى بخير
بلاش الغيبة الطويلة دى مرة تانية
أنا علقت على بوست الواجب بس للأسف النت كا مغلبنى شوية
حلقة النهاردة لذيذة كالعادة
بس درامية أوى
وماشية على منوال واحد ووتيرة واحدة عارفينها كلنا
مفيهاش الحاجات الحلوة بتاعة كل مرة
وخللى بالك من الصداع الشرير; August 12, 2008 at 1:00 AM
خيرالدين said...: ايوووووووووه
دمياطيه بتدون
اهلا بك يا استاذه وبمدونتك الرائعه; August 12, 2008 at 2:07 AM
حاجات جوايا said...: المنسى
~~~~~~~
وعليكم السلام ورحمة الله وبركاته
أهلا بك أخى الفاضل
انا الحمد لله بخير
ربنا يسهل ومش هغيب تانى ان شاء الله
تعليقك على بوست الواجب انا اظهرته فعلا ورديت عليك معلش كان عندى مشكلة فى التعليقات فى التدوينة السابقة
بعتذرلك للتاخير
أنا بشكرك على رأيك جدا
وان شاء الله الحلقة الجاية تكون اجمل
أما الصداع الشرير فمتخافش عليا طول ما انا لابسة الدماغ الخطير
اجيبلك واحد ؟؟

نورتنى أخى الفاضل وأسعدتنى بمرورك; August 12, 2008 at 2:19 AM
حاجات جوايا said...: e7na
~~~~~
أهلا بيك يا فندم
نورتنى ونورت المدونة الدمياطيه ؟؟
سؤال برئ : انت دمياطى ؟؟

أسعدتنى بمرورك أخى الفاضل; August 12, 2008 at 4:07 AM
Amgad said...: ماشاء الله
مدام انتي دمياطية بقي
قانا بقولك تقترحي علي عبده طناش
بفتح محل اويمة او استر
او يفتح ورشة نجارة
ويعيش يومة كيوم اي مواطن دمياطي
يصحي الصبح ينزل ياكل فول وطعمية
وبعدين يصطبح علي القهوة
يشرب حجر الشيشة
ويقوم بقي يشوف الشوغل
مع التركيز علي الواو
مهو مش هيقضي طول اليوم علي القهوة
علي حسب قول الدمياطة
يروح الورشة يعمل اليومية
وينزل الشعرا
يجيب لوازمة وهكذا دواليك
علي فكرة ده مش كلامي دي
سلسلة علي الموبايلات اسمها يوميات مواطن دمياطي
المهم
انا سعيد ان دمياط دخلت المنافسة وعقبال باقي محافظات مصر
تقبلي مروري وهزار ي التقيل; August 12, 2008 at 6:21 AM
دكتور بهــدوء said...: كالعاده
الهدوء
و الرقه
والبساطه
في نفس الوقت
عمق
وعرض خفيف
شامل

الله يبارك فيكي; August 12, 2008 at 8:25 AM
tarek alghnam said...: سالى
ماشاء الله على اسلوبك
يارب تكونى بخير
انا افتقد مرورك بمدونتى وافتقد كتاباتك الرائعه
تقبلى تحياتى
ودمتى بحفظ الله; August 12, 2008 at 2:01 PM
Empress appy said...: عارفه ان القصه بتاعتك تنفع تتعمل فى الراديو فى رمضان مش عارفه ليه
تسلمى يا قمر; August 12, 2008 at 3:17 PM
حاجات جوايا said...: amgad
~~~~~~~
ههههههههههههه
ومين قالك ان عبده طناش دمياطى
عبده طناش شخصية مصرية مطحونة
وحتى لو كان دمياطى
مين قالك ان كل الدمايطة بيشتغلوا فى الموبيليا ؟؟؟
دمياط مشهورة كمان بصناعة الجلود والحلويات والجبن الدمياطى

على فكرة فيه دمايطة كتير جدااااااااااااا مش لاقيين شغل و كتير منهم مؤهلات بيشتغلوا فى الصيدليات ومحلات الموبايل وكافيهات النت أو بيعملوا مشاريع خاصة
ومحدش بيشتغل فى الموبليا الا اللى اهله بيشتغلوا فيها أبا عن جد
فياريت متصدقوش ان دمياط مفيش فيها بطالة ولا الكلام الغريب اللى بيتقال ده .. هى بس أقل من غيرها فى الحكاية دى وده اللى مخليها أفضل من كل محافظات مصر و لله الحمد

نورتنى اخى الفاضل; August 12, 2008 at 5:10 PM
حاجات جوايا said...: دكتور بهدوء
~~~~~~~~~~
ربنا يبارك فيك أخى الفاضل
أشكرك جدااااااااا

أسعدتنى بمرورك; August 12, 2008 at 5:11 PM
حاجات جوايا said...: طارق الغنام
~~~~~~~~~~~
أهلا بك أستاذنا الفاضل
ربنا يكرمك ويبارك فيك يارب
أنا بعتذر جداااااا على تقصيرى مع حضرتك ومع ناس تانية كتير اكن لهم كل التقدير والاحترام
أرجوا ان تسامحنى وستجدنى لديك قريبا ان شاء الله

نورتنى اخى الفاضل وأسعدنى مرورك; August 12, 2008 at 5:13 PM
حاجات جوايا said...: appyyyyyy
~~~~~~~~~~
اهلا يا قمر
هههههههههههه
ربنا يكرمك يارب
يلا إيدى على كتفك

نورتينى يا سكر; August 12, 2008 at 5:14 PM
Zanooba (Zeinab sab9n) said...: السلام عليكم يالي هنا إزيك يا سالي عاملة إيه؟..أنا أسعدني جداً مرورك بمدونتي
أنا عجبتني أوي الحلقة و حتى خلتن
أدعبث شوية في مدونتك و إنشاء الله تكتبي كتير و تفضلي تكتبي على طول ...و عجبتني الحتة بتاعة الكا جي :]
دمتي بصحة و عافية
السلام عليكي; August 12, 2008 at 7:01 PM
مواطن مصرى نايم said...: بس انتى يا سالى شكلك اتعاملتى مع البورصة فى الحقيقة
صح و الا غلط ؟؟؟؟
بس جميل و الله الموضوع كله
القصة بجد لذيذة
تنفع مسلسل زى ما ايبى قالت
ربنا يوفقك يا رب
ما تغيبيش فى تنزيل بوست كده

تحياتى
اسلام; August 12, 2008 at 7:54 PM
. said...: very nice .....waiting for more; August 12, 2008 at 9:59 PM
نـــــور said...: السلام عليكم
ازيك ياسالى
اول مرور ليا عندك
حبيت احساس الحب فى الله اللى فى البوست ده لانه بقى نادر قوى فى دنيا بقت بتحكمها المصالح
تحيانى ليكى; August 12, 2008 at 10:04 PM
Anonymous said...: تلقينا من المدونه آبى/ رحاب رساله بالبريد الألكترونى تتسم بروح طيبه ورغبه صادقه فى تجاوز اى خلاف وبدا صفحه جديده ونحن نقدر هذه المبادره الشجاعه لأن الرجوع الى الحق دائما فضيله وقد اوضحنا لها انه لا يمكن ان يكون بيننا وبين اى مدون او مدونه الا الحب والتقدير المتبادل حتى لو اختلفنا معه فى الراى فليس ممكنا ولا هو مطلوب ان يتفق الجميع على راى واحد ولا يمكن ان يدعى اى طرف انه على صواب دائما ....وعلى هذا فنحن نعتبر ان الخلاف بيننا قد انتهى ....وتعود الأمور الى مجراها الطبيعى ونرحب بالكل اخوه وابناء نكن لهم كل حب وتقدير ونتمنى لهم كل الخير; August 12, 2008 at 11:42 PM
Amgad said...: ههههههههههههههه
ومالك زعلتي اوي كده
علي فكرة احنا بلديات
وعلي فكرة تلت ارباع الدمايطة بيشتغلو في النجارة كمهنة
مش تجارة الموبيليا
زي موصلك الايحاء
وكان ليا زملاء في هندسة
فخورين اوي انهم نجارين
علي فكرة الموضوع هزار
بس سعيد ان دمياط دخلت المنافسة علي ايدك; August 13, 2008 at 3:05 AM
حاجات جوايا said...: zanooba
~~~~~~~~
أهلا يا زوزو
ربنا يكرمك يا حبيبتى ويباركلى فيكى
سعيدة ان المدونة عجبتك
بس بتقولى عجبتك الحتة بتاعة ايه ؟؟؟

نورتينى يا سكر; August 13, 2008 at 6:29 AM
حاجات جوايا said...: مواطن مصرى نايم
~~~~~~~~~~~~~~~~
هههههههههه
طبعا طبعا
مش شايف القرصة اللى اتقرصتها م البورصة وارمة ازاى
يللا الحمد لله
ربنا يكرمك يا اسلام
كلك ذوق والله

نورتنى اخى الفاضل; August 13, 2008 at 6:31 AM
حاجات جوايا said...: aliaawwe
~~~~~~~~~
أهلا بك اخى الفاضل
أشكرك

نورتنى; August 13, 2008 at 6:33 AM
حاجات جوايا said...: habiba
~~~~~~~~
أهلا بك اختى الحبيبة
أجمل ما فى الخيال هو انك تستطيعين ان ترسمى به ما لا تجديه فى الواقع

أتمنى ان ينصلح الحال

نورتينى يا سكر; August 13, 2008 at 6:35 AM
حاجات جوايا said...: سكرتارية برنامج انت تسال والكمبيوتر يجيب
~~~~~~~~~~~~~~~~~~~~~~~
الحمد لله حصل خير; August 13, 2008 at 6:36 AM
حاجات جوايا said...: amgad
~~~~~~~
والله ما زعلت ولا حاجة
اصلا أجمل حاجة فى دمياط هى اتقانها لحرف عديدة .. وجميل ان نذكر كل هذه الحرف طالما ان الحديث تطرق الى احداها

وبعدين دمياط داخلة المنافسة من زمان اووووووى ههههههههههههه
خلى بالك انا دمياطية متعصبة ههههههههههههه

نورتنى أخى الفاضل وانتظر مشاركتك فى الحملة بإذن الله; August 13, 2008 at 6:42 AM
ريمان said...: هههههههههههههههه

سالى

جمييييييييييييييل

ايوة كده هما دول الدمايطه

سلمى لى على دودو; August 14, 2008 at 2:06 AM
rovy said...: اختى الحبيبه سالى ..
اولا لا شكر على واجب بالنسبه للبوست اللى فات
الحمد لله انها عدت على خير و ان شاء الله ما يحصلش اى حاجه تلغبط تانى فى مدونتك الغاليه مثلك ..

بالنسبه للبوست و القصه الجميله اللى بجد حبيت ابطالها و بأسعد وانا باقرأها
فهى كالعاده شدتنى لأخر سطر ..
و معاكى حنستنى البقيه ان شاء الله ..

دمتى بخير و سعاده و ابداع

تقديرى و تحياتى; August 14, 2008 at 4:07 AM
صالح سعيد said...: مساء الورد
انا جيت مدونتك قبل كده
وبصراحه مدونتك جميله
عشان كده جيت تانى
اسلوبك حلو فى السرد
وليا عندك سؤال
جربتى قبل كده تكتبى سيناريو كوميدى
؟؟؟؟
اتمنى اعرف الاجابه للاهميه; August 14, 2008 at 4:16 AM
حاجات جوايا said...: ريمـــــان
~~~~~~~~~~
حبيبى الجميل ريمووووووو
ازيك يا قمرى
اخبارك ايه ؟
انتى اللى جميل والله يا سكر متحرمش منك
دودو بيسلم عليكى وبيبوسك من هنا ومن هنا

نورتينى يا حبيبى; August 15, 2008 at 4:17 AM
حاجات جوايا said...: rovy
~~~~~
اهلا يا غالية
لا شكر على واجب ازاى ... ده وشكر وشكر وألف شكر كمان
ربنا يكرمك يارب ويجازيكى خير

متحرمش منك ولا من متابعتك وتشجيعك

نورتينى يا قمر; August 15, 2008 at 4:23 AM
حاجات جوايا said...: صالح سعيد
~~~~~~~~~
أهلا بك اخى الفاضل
حضرتك تنورنى يا فندم فى اى وقت المدونة مدونتك
ألف شكر على التشجيع

الحقيقة انا كتبت قبل كده موضوع المفروض انه كوميدى ومش عارفة راى حضرتك هيبقى فيه ايه على مدونة فرنسا والرايق والضاحكون
ده الرابط الخاص بيه
http://faransaraayek.blogspot.com/2008/08/blog-post_01.html

نورتنى اخى الفاضل واتمنى دوام التواصل; August 15, 2008 at 4:32 AM
Anonymous said...: حلوة القصة
في انتظار باقي الحلقات; August 15, 2008 at 3:41 PM
حاجات جوايا said...: مصطفى ريان
~~~~~~~~~~~
اهلا بك اخى الفاضل
جزاك الله كل خير

نورتنى; August 15, 2008 at 6:55 PM
كاشف الاوهام said...: انا بعتزر لحضرتك با فندم ان كان فية حاجا قلتها نرفزتك
وانا بعز اخلاصك واسلوبك الى عشقتة من كل قلبى

شكرا لمرورك واتمنا ان ربنا ما يجيب ما بنا زعل تانى

شكرا لحضرتك; August 15, 2008 at 9:25 PM
أجـمــل قـلــب said...: قصة
جميلة
هادئة
بسيطة
متناسقة
خفيفة

تقبلى تحياتى

وادعوكم جميعا لزيارة اجمل قلب
http://agml-qlb.blogspot.com/; August 16, 2008 at 1:09 AM
Anonymous said...: اختى الكريمه سالى..انا لسه منتهيه من قرايت مدونتك التانيه واحة الفكر والقلم والمواضيع الى فيها توجع طبعا مش كلها يعنى الام المفتريه وفلذات الاكباد اليى مغتصبه الحياه منهم انا مايده الحمله دى جدا يعنى انا فكرت مره الم كل اطفال الحرمان انا بسميهم كده .ونشوف رجال الاعمال الغنيه اليى هيموتوا على مجلس الشعب هيعملولهم ايه الكلام ده اتناقشت فيه مع سيده ليها باع فى العمل المجتمعى وكان الهدف يحصل فى الشرقيه طبعا قالتلى الناس دى مبترميش فلوسها فى الارض يا سلام فلوس على ارواح بريئه بالشكل ده تبقى فى الارض ربنا يلطف بينا نالحمله دى ااقل حاجه نعملها ليهم..ربنا يعينكوا ويوفقكم ..عارفه يا سالى كل ما بشوف طفل منهم كلى بتقطع وبيجى على بالى ابنى ممكن الدنيا تغدر بيه لا قدر الله ويبقى كده ده على اساس ان انا وعيلتى وكل قرايبنا هنموت ياااااه الضنا غالى قوى قوى ربنا يصلح حالهم ويلطف بينا اللهم امين ..كل رمضان وانتى واسرتك بالف خير ..اتركك فى رعاية الله وامنه..; August 16, 2008 at 1:24 AM
هانى المصرى said...: ايه المدونه الجامده دى ومن دمياط كمان اصل انا بحب مدن القناه ودمياط بحب الناس ا لسواحليه
تقبلى مرورى; August 16, 2008 at 5:00 PM
حاجات جوايا said...: كاشف الاوهام
~~~~~~~~~~~~~
ممممممممممممم
والله ما انا عارفة أقولك ليه ؟
ولا عارفة انت عايز ايه ؟
مشكلتك انك عملت مدونة لهدف معين .. وهو اصطياد أخطاء المدونين سواء كانت عن قصد او عن عمد عشان تشغل نفسك وتشغل الناس اللى يهمها معرفة الاخبار دى .. وعشان كده عمال تدور على فريسة بين صفحات المدونات ..واللى يرد عليك تستفزه .. اكيد مش لانك على حق .. لكن لانك عايز تغلطه هو كمان وتلاقى فريسة جديدة تشتغل عليها

وسبحان الله رغم انى معرفش الاخ الفاضل اللى اتكلمت عنه إلا من اسمه وسيرته الطيبة فى المدونات اللى دخلتها .. إلا ان ربنا ارسلنى وارسل غيرى للدفاع عنه .. والكل هاجمك .. لو كان زى ما بتقول كان على الاقل حد وقف جنبك وقالك كلامك صح

وعلى فكرة بقى دليل إدانة الاخ الفاضل اللى انت حطه فوق البوست " الصورة " الخاصة بحجب التعليقات من قبل المشرف على المدونة الالكترونية .. هو نفسه دليل براءته

لان المشكلة دى كانت عندى فى البوست اللى قبل ده على طول .. ولو رجعت وشوفته هتلاقينى عاملة تنويهات انى مش شايفة التعليقات ومش عارفة ارد عليها
ولما دخلت مدونة الاخ الفاضل " بعد الاعلان المجانى اللى عملتهوله ويمكن دى الحاجة الوحيدة اللى خدمته فيها " لقيته برضه عامل تنويه وكاتب ان عنده مشكلة فى التعليقات وازاى اتغلب على المشكلة دى .. يعنى دى حاجة خارجة عن ارادته ومشكلة موجودة فى موقع بلوجر اللى زى ما انت ملاحظ .. لو لاحظت يعنى بيعملوا فيه تعديلات فى المدونات

وعلى فكرة بقى الاخ الفاضل مشكرنيش لانه أصلا ميعرفنيش .. وانا مش منتظرة شكر .. انا بقول الحق وبساند المظلوم واجرى عند الله وما اعظمه من اجر

ياريت بقى تقفل مدونتك دى لانها بجد بقت مصدر ازعاج .. أو على الاقل تغير نشاطها وتخليها مدونة طبيعية

ربنا يصلح حالك وحال المسلمين; August 17, 2008 at 2:32 AM
حاجات جوايا said...: واحد ميت
~~~~~~~~~~
أهلا بك اخى الفاضل
جزاك الله كل خير
انتظرنى قريبا ان شاء الله

نورتنى اخى الفاضل واتمنى دوام التواصل; August 17, 2008 at 2:51 AM
حاجات جوايا said...: عايزة اتطلق و
~~~~~~~~~~~~~~~
اهلا بكِ اختى الحبيبة
عندك حق فعلا رجال الاعمال مش بيرموا فلوسهم فى الارض
لا حول ولا قوة إلا بالله
ناسيين ان فى اموالهم نصيب معلوم للسائل والمحروم
أطفال الشوارع دول لو اتعاملوا بآدميه اكيد هيطلع منهم ناس محترمة تخدم بلدها
لكن للاسف القطط فى الشارع بتتعامل افضل منهم على الاقل محدش بيبصلهم بقرف و لو دخلت محل اكل صاحب المحل بيحطلها اكل تاكله
لكن هما بيتعاملوا على انهم سارقين او مدمنين .. واعتقد ان دى أقل حاجة ممكن يعملها انسان مضطهد من انسان زيه لا يفرق عنه شئ الا فى المكانة الاجتماعية

محدش فيهم حمد ربنا قبل كده وقال الحمد لله انى طلعت فى اسرة مش طفل شوارع

الحمد لله الذى عافانا مما ابتلى به غيرنا

والأولى اننا نحس بيهم ونعاملهم كبشر لهم من الحقوق ما لنا

ربنا يقدرنا ونقدر نعمل حاجة المهم ايدكم معانا

ربنا يخليلك اولادك ويخليكى لهم ومتتحرموش من بعض أبدا يارب

نورتينى يا حبيبتى; August 17, 2008 at 3:04 AM
حاجات جوايا said...: هانى علوان
~~~~~~~~~
أهلا بك اخى الفاضل
ربنا يكرمك .. ويبارك فيك

نورتنى اخى الفاضل; August 17, 2008 at 3:31 AM
Zanooba (Zeinab sab9n) said...: سالي ...ليكي عندي هدية ....تعالي و خديها مستنياكي يا كميلة
باي; August 17, 2008 at 4:24 AM
حاجات جوايا said...: zanooba
~~~~~~~~~~~
زوزو الغالية
شكرا خالص يا سكر
بس تاج الأحلام الحقيقة جانى قبل كده
يلا بقى خيرها فى غيرها ان شاء الله

واعتبرينى قبلته وهتلاقى إجابته موجودة هنا فى المدونة

كل الشكر لأحلى زوزو

سالى; August 17, 2008 at 4:40 PM
Amgad said...: ميرسي علي دعوتك
واتمني تكون فكرة ذات هدف
وان تحقق ما تصبوا اليه
وان بقدرنا الله علي فعل المطلوب; August 18, 2008 at 1:26 AM
bastokka طهقانة said...: انا حاسة ان البورصة دي فيها شبهة حرام لانها بتأذي ناس و ترفع ناس مفيش احسن مت التجارة حلال بالثلث

ربنا يوفق الجميع

اوروفوار; August 18, 2008 at 6:34 PM
Anonymous said...: ازيك يا سالى انا عندى ليكى تاج بس لقيتك مجاوبه عليه قبل كده عارفه هو نفس التاج اليى زوزه بعتت ليكى وليا ...يله بقه مخدش بالى وكل رمضان وانتى بالف خير يا جميلة دمياط...فى رعاية الله وامنه.; August 19, 2008 at 9:31 AM
رفقة عمر said...: السلام عليكم سالى
كل سنه وانت بالف خير
وحشانى جدا
اسفه بجد عن التاخير بس انا كنت مسافره ومش كنت بادخل نت خالص
موضوع البورصه دة محير وبقى ادمان عند ناس كتير بجد مش عارفه هى صح ولا غلط
وخصوصا ان فيه ناس بتموت من صدمه ارتفاع او انخفاض الاسعار
بس كالعادة جميله كتاباتك
ربنا يكرمك ويوفقك اللهم امين يارب العالمين; August 19, 2008 at 12:37 PM
هانى المصرى said...: شكرا يا سالى على تعليقك عندى فى المدونه وياريت تكررى الزياره .
هانى; August 19, 2008 at 2:22 PM
أم أحمد المصرية said...: حبيبتي سالي
وحشتيني يا حبيبتي و شكرا علي سؤالك
وحشني كمان عايش و عبده طناش ربنا لا يحرمني منك و لا من كتابتك الموهوبة
اثرت المرة دي مواضيع مهمة كالعادة خصوصا موضوع البورصة اللي انا ما بفهمش فيه و نفسي اعرف اوله من اخره :); August 19, 2008 at 7:12 PM
أنفاس الصباح said...: حبيبتى سالى
وحشتينى جدا
كل عام وانت الى الله اقرب
هاهو الشهر الحبيب يقترب
اللهم بلغنا رمضان
وتقبل منا صالح الاعمال واغفر لنا وارحمنا
فى انتظار ما ستفعلة البرصة مع بطل قصتك
ربنا يجيب العواقب سليمة
تحياتى لاطيب قلب; August 20, 2008 at 12:30 AM
حاجات جوايا said...: amgad
~~~~~~~~~~
أهلا يا فندم
العفو المهم ان نستطيع عمل شئ
دعواتك
نورتنى; August 23, 2008 at 4:33 AM
حاجات جوايا said...: طهقانة
~~~~~~~~~~~
اهلا يا قمر
فعلا من وجهة النظر دى انا برضه متفقة معاكى .. وبجد عاملة زى القمار
.. واستفت قلبك ولو افتوك

نورتينى يا جميل; August 23, 2008 at 4:59 AM
حاجات جوايا said...: عايزة اتطلق
~~~~~~~~~~~~~
هههههههههههههههه
شكرا يا سنسن .. مش عارفة ايه البطر اللى انا فيه ده
عمالة افرط فى تاجات كده .. بس اعمل ايه اتجاوب قبل كده
يللا معلش اردهالك فى التاجات الجاية ان شاء الله يا سكر وشكراااااا انك فكرتى فيا مش عشان التاج لكن عشان اى حاجة

نورتينى يا جميل; August 23, 2008 at 5:02 AM
حاجات جوايا said...: رفقة عمر
~~~~~~~~~~~
حمدا لله على السلامة يا قمر
نورتى المدونة والمدونات المجاورة
وانتى طيبة يارب وبالف خير وهنا
فعلا البورصة دى لعنـــــــــــــــــة اسالينى انا يا أختى
ربنا يحفظك من شرها
ويخليكى ليا وميحرمنيش من زيارتك وتشجيعك لهلوسات قلمى

نورتينى يا غالية; August 23, 2008 at 5:05 AM
حاجات جوايا said...: هانى علوان
~~~~~~~~~~
العفو يا فندم
ما خلقت المدونات الا لزيارتها هههههههه
اتمنى دوام التواصل

نورتنى اخى الفاضل; August 23, 2008 at 5:06 AM
حاجات جوايا said...: أم أحمد المصرية
~~~~~~~~~~~~~~
أهلا يا قمرى
وحشتـــــــــــــــــينى
كنتى فين وايه الغيبة الطويلة دى
حمدا لله على السلامة يا قمر
عايش وعبده طناش كانوا قاعدين مستنينك وحاطين ايدهم على خدهم .. يللا خلاص افراج يقوموا بقى يشوفوا شغلهم بعد ما اطمنوا عليكى .. ادعيلهم ربنا يوفقهم

نورتينى يا قمرى; August 23, 2008 at 5:14 AM
حاجات جوايا said...: أنفاس الصباح
~~~~~~~~~~~~~~
أهلا يا قمر
ازيك يا إيمان اخبارك ايه
واخبار الاولاد وباباهم ؟؟ يارب تكونوا كلكوا بخير يارب
كل سنة وانتم الى الله اقرب
وبخير وصحة وراحة بال اللهم آمين
بالنسبة لبطل القصة ربنا يسمع منك ويجيب العواقب سليمة يارب

نورتينى يا ست الكل; August 23, 2008 at 5:31 AM