حاجــــات جوايــا

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Sunday, January 9, 2011

وبعدين ..؟

وبعدين ..؟

هنفضل ساكتين لامتى

عمل ايه السكات؟؟

كل يوم ضحية جديدة من ولاد بلدنا

كل يوم قهرة جديدة وحسرة جديدة ووجع جديد

كل يوم بنتضامن مع مصرى جديد

مظلوم جديد

قلبى واجعنى

ومعدتش قادرة اتكلم

Sunday, January 2, 2011

وجاءت 2011

فى القلب غصة .. وفى العين الدمعة .. لا قادرة أبلعها ولا عارفة أنزلها

تعازيا الحارة لأسر ضحايا الارهاب الغاشم على كنيسة القديسين بالاسكندرية

ودعواتى بالشفاء العاجل للمصابين

ربنا يحفظ مصر وأبنائها مسلمين وأقباط من شر كل معتدى

اللهم آمين

Wednesday, December 29, 2010

سنة جديدة يارب تكون سعيدة

كل سنة وانتم طيبين

ساعات ونودع سنة كاملة مليانة بالاحداث

الحـلوة والمـرة

السعيدة والحزينة

المهمة والهامشية

أحداث كتير شكلت أيامنا وأسابيعنا وشهورنا

وأثرت على نظرتنا للحياة وللناس وللأولويات

كشفت نضجنا أو سذاجتنا

طيبتنا أو قسوتنا

قوتنا أو ضعفنا

إيماننا أو ضعف ايماننا

...

ساعات قليلة ونبقى قدام خيار من اتنين

إما نمد ايدينا ونودع 2010 بكل المحبة والود ونعانق اللى باقى منها ونقوله .. نسيانك صعب أكيد

أو ندور وشنا الناحية التانية ونعد الدقايق والثوانى بكل لهفة على الفراق بدون دمعة حزن أو ألم

ونحمد ربنا على نعمة النسيان

...

2010

كنت مستبشرة بقدومها وشايفاها سنة شيك

عشرين عشرة

وكنت اتمنى تحصل عندى اى مناسبة يوم عشرين اكتوبر

عشان يبقى تاريخها

20/10/2010

عشرين عشرة عشرين عشرة

بس محصلش :)

...

مقدرش اقول انى فرحانة انها ماشية

لانى بقيت بخاف

وعندى يقين اننا فى زمن تنطبق عليه مقولة

استمتعوا بالسيء .. فالقادم أسوأ

فمش هقدر افتح ايدى للحياة واهتف أهلا 2011

لأن فى القلب غمة وفى الحلق غصة

لكن يقينى بالله أكبر .. وعندى امل لو ساءت كل الحياة نكون بعيد عن موضع الاذى

أتمنى ... ياااارب

...

واخيــرا

المايك معاكوا للى عايز يقول كلمة توديع لـ 2010

وكلمة استقبال وتمنى لـ 2011

ايه اللى زعلكوا فى 2010 ؟

وايه اللى فرحكوا فى 2010 ؟

وايه اللى اتمنيتوه يحصل ومحصلش فى 2010 ؟

وايه اللى ماتمنيتوش انه يحصل وحصل فى 2010 ؟

مين شخصية العام من وجهة نظركوا ؟

وايه اهم حدث فى 2010" على المستوى الشخصى " ؟

وايه اللى تتمنوا انه يحصل فى 2011؟

....

كل سنة وانتم طيبين

ويارب تكون السنة الجاية أحلى واجمل واسعد وأخف

وتتحقق فيها كل أمانينا الطيبة

وتتحرر فلسطين وكل البلاد الاسلامية

وينصلح حال مصر والدول العربية

ونرجع تانى نعيش فى أمان وننسى الخوف والجوع والظلم والفقر

قولوا آمين

Friday, December 24, 2010

الواجب

نكبر نصغر.. الواجب ورانا ورانا .. مفيش فايده ههههه
الواجب المرة دى جالى من أختى العزيزة وتوأم الفكر مس نوجا مدونة خواطر شابة
وطبعا زى ما اتعلمنا قبل كده .. الواجب وااااااااجب ولازم يتعمل

الواجب زمان كان بيبقى كتير وياخد وقت طويل وفين وفين عما نخلصه ومنلاقيش وقت للمذاكرة
الواجب المرة دى بسيط
سؤالين بس
بس سؤالين ايه بقى
فى الجووون

نبتدى على بركة الله

السؤال الاول : هل انتِ فضولية ؟

واه واه واه يا بووووووى
انا فضولية
كلا البتة والوزة
ده اللى يقول عليا فضولية اطخه بالبندقة
ههههههه

مش كلام والله ولا تجمل
عن جد .. انا ابعد ما اكون عن الفضولية
ودى ميزة وعيب فى نفس الوقت
الميـــزة
انى مش بحب احشر نفسى فى حاجة متخصنيش يعنى مثلا
لو اتنين بيتكلموا وانا دخلت عليهم مش هقولهم بتقولوا ايه الا لو هما قالولى
لو دخلت بيت حد مش بحب اتحرك من مكانى ولا اقلب فى حاجاته ولا اشوف دى جديدة ولا قديمة ودى غالية ولا رخيصة ودى منين ودى من مين والكلام الرخم ده
بحترم جداا جدااا جدااا خصوصية الاخرين وشايفة ان ده المفروض والأصح والأليق
وده اللى بنتظره من الاخرين
بس طبعا ليس كل ما يتمناه المرء يدركه
!!!
العيب
انى بعتمد على نفسى اعتماد كبير فى الاكتشاف دون اللجوء للاخرين
يعنى لو عايزة اتعلم حاجة حد عارفها اتكسف اسأله
اكيد لو سألت مش هتبقى بايخة أوى.. وهوفر على نفسى وقت وجهد وهكتسب خبرة.. بس متعرفوش بقى انا كده
حساسة جدا ومش بحب اكون عبء على حد ولا اشغله بيا
وده برضه ميزة وعيب
ميزة الحساسية انى بتعلم بنفسى وبكتسب خبراتى لوحدى وبكون واثقة من مصادرى ومش بتقل على حد
وعيبه انى اتأخر فى الوصول للمعلومة عما ادور واتعلم وكده

وبعدين يعنى احنا فى زمن الانترنت .. يعنى اى حاجة هحتاجها هجيبها ببساطة ببحث سريع فى جوجل

وبينى وبينكم برضه انا بتخنق من الناس الفضولية اللى مش بتبطل اسأله عن اى حاجة وعن اى حد خصوصا لو حاجة هايفة
فمش بحب الوم تصرف واعمل زيه
كما قال احمد شوقى
لا تنه عن خلق وتأت مثله ... عـــــــــــــار عليك إذا فعلت عظيم

......................

السؤال التانى : ما هى الأسئلة التى تستفزك؟

ممممممم .. السؤال ده مستفز

عشان عايزنى اتكلم فى الحاجات اللى بتستفزنى

هههههههههههه

مبحبش الاسئلة الشخصية عموما

الشخصية جدا

خصوصا الاسئلة اللى بتبدأ بكلمة لسه ؟ .. وتنتهى بكلمة ليـــــــــه ؟؟؟

ومن هنا

من هذا المنبر

أحب اجاوب كل حد حشرى وفضولى واقوله بكل صراحة متناهية

وانت ماااااااااااااااااااااالك ؟

لما تكون حاجة تخصك جدا .. من الصعب انك تقبل ان حد يستجوبك بخصوصها

ولا يعمل عليك فاهم كل حاجة وبيديك نصايح على اساس انه خبرة يعنى

خصوصا لما تكون دى رغبتك

او يكون مفيش فى ايدك حاجة تعملها

...................

السؤال الثالث : تمرر الواجب لمين ؟

حقا وصدقا .. الواجب ده من اصعب الواجبات رغم بساطته

واحب انى مديهوش لحد

بس لو ممررتوش وغيرى ممرروش هيقف عندنا ومش هيكمل المسيرة

فهضطر اسفه انى امرره

واسأل الله ان يلهمكم الصبر والسلوان

دموع القمر

عاشقة الرومانسية

محمد عتلم

فارس على طريق الدعوة

شكرا يا نوجا

يلا صححى الواجب بقى وادينى ممتازة يا سالى ............. ونجمــــــــة

Thursday, December 9, 2010

الشعب بيتكلم !!!

كليب يوجع القلب

الشعب بيتكلم بصوت عالى

يصرخ ويشجب ويدين ويستنكر ويبحث عن حلول

يلوم المؤسسات .. ويدين الفساد .. وينكل بالمزورين

ويرفع رموزا إلى أعلى القمم ويتوسم فيهم الاصلاح

وانه على ايديهم سيستحى الظلم وسيكون الحق مباح

الشعب ثائر .. غاضب.. هائج

يتبادل السباب و الكلمات النابية على نظام فقد شرعيته فى عينه وصار وجوده كابوسا خانقا يثقل على القلوب والانفس

ويتطاول بلسانه ( وبلسانه فقط ) على من يخدعونه ليل نهار

يتلقى الخداع وينوم تنويما مغناطيسيا ويصمت .. يصمت .. ربما لانه لا يستطيع سوى الصمت .. أو لانه ما زال يصدق المخادعين ويتوسم فيهم صدق الخدعة فى كل مرة !

الشعب طيب .. ورغم ذلك عنيف

تجلى عنفه فى دوائر الانتخابات التى انتهجت التزوير منهجا لا بديل له

فكسر .. واحرق .. وهشم

الشعب مخيف

ومع ذلك احذره

فالقائمون على التزوير كانوا أيضا من الشعب

الشعب الكادح المسلوبة حقوقه الذى يحيا تحت خط الفقر والذى لم يجد غضاضة فى المشاركة فى مسرحية الفساد الهزلية

بقلب ثابت وبعين لا تطرف وبلا أدنى تردد شارك فى التزوير

ومع ذلك فالشعب ضعيف

يُرهبه مخبر قادم من بعيد غير مسلح .. يرتعب اذا راى تعذيب مواطن مدنى أمام أعين المارة فى الطريق .. لا يتدخل .. وان تدخل لا ينصف المظلوم

كما حدث مع خالد سعيد .. حدث مع مصطفى عطيه وقبلهم وبينهم وبعدهم كان الكثير وسيبقى الاكثر والاكثر

طالما ان الشعب يرى نفسه أرنبا وكل همه الاحتماء والاختباء حتى يمر الخطر

الشعب غريب

لا تفهم له موقف .. أحيانا محارب ومناضل .. واحيانا جبانا ومذعورا .. وفى أغلب الأحيان صامت ومستسلم

ومع ذلك ينادى بالتغيير

ربما بوقفة احتجاجية .. أو بتعليق على مقال بجريدة الكترونية أو ببوست فى مدونة

غير معلومة الهوية أو ببرنامج جرئ على قناة فضائية

=========

آخـــر الكـــلام

.........

الشعب بسيط عايز حياة كريمة والسلام

عايز يعيش فى بلده كرامته متصانة مش متهان

عايز يلاقى قوته وقت حاجته وميباتش جعان

عايز يجيب العيش من غير طابور يوقف ميدان

ولما يشتريه يلاقيه نضيف لا عليه تراب ولا دبان

عايز لما يسافر يحس انه انسان

عايز لما يتجوز ما يمدش ايده لاحسان

عايز لما يخلف ولاده يتعلموا ويكبروا ويعيشوا فى أمان

مش عايز يلاقى فى الشارع تحرش ولا امتهان

ولا مخبر ملوش قيمة يعامله كأنه جربان

عايز مرتبه يكفيه وميضطرش للسلف والزوغان

ولا ايد حرامى تسرقه ويرجع بعد الصبرغلبان

لا يهمه حزب ولا انتخابات ولا تغيير ولا برلمان

الشعب مش عايز غير رحمة ... وإنسانية كمان

واكيد يوم ما تحصل .. هيكون الزمان غير الزمان

Wednesday, December 8, 2010

شموع مضيئة 8

من يمتلك قلبك يسلب ارادتك .. فحاول منح قلبك بإذن من العقل

الزواج رحلة بالسيارة .. الزوجة قائدها .. والزوج بنزينها .. إذا نفد عطاء الزوج .. عجزت الزوجة عن القيادة .. واحتاجوا الى ( زقة )

· العطاء المقصود هو المشاعر وليس المال

حب الوطن كالحاجة إلى الهواء .. قد لا نشعر به دائما .. لكننا لا نستطع العيش بدونه .. وإذا حرمناه نموت

ما اقسى ان تمنح قلبك لمن تختار فيقوم بتجميده .. فلا هو اطلق سراحه ليختار من يشاء .. ولا حتى تركه على وضعه الأول

الحياة بلا حرية حياة لا معنى لها ولا مذاق .. والحياة بلا إرادة حياة لا حياة فيها

القلب يميل إلى كل ما يشتاق إليه .. والعقل هو من يحدد أى الأشياء احق بالاشتياق .. فاحرص على جعل عقلك متدين دائما

الاحساس بالخطر رغم قسوته الشديدة هو أول الطريق لمعرفة أبجديات الأمان

النضج العقلى والفكرى والسياسى فى وطن لا يعترف بالناضجين هو بداية الطريق لليأس والاكتئاب والموت

أن تخدع شخصا فأنت تعلو فى نظر نفسك فقط بتصديق خداعك .. وتسقط فى نظر الآخرين لفقدان الثقة فيك

عندما تضطرك الظروف لفقد مكانك والاحتماء بمكان ليس لك .. تدرك جيدا قيمة مكانك وعلو شأنه عما سواه

الرضا والثراء وجهان لعملة واحدة هى الإكتفاء

Monday, December 6, 2010

عام هجرى جديد ياااارب يكون سعيد

كل سنة وانتم طيبين وبكل الخير

داخلين خلاص على عام هجرى جديد 1432 هـ

يارب ينصر فيه الإسلام ويعز فيه المسلمين ويعيد الدين مرة أخرى قويا متينا

ويحفظنا من شر الفتن ما ظهر منها وما بطن

اللهم آمين

بمناسبة العام الهجرى .. يأخذنا الحديث للهجرة

هجرة الرسول من مكة إلى المدينة

حبيت أذكر نفسى واياكم بظروفها وتفاصيلها ودروسها

فاخترت لكم هذه الفيديوهات لنشاهدها معا

علها تكون لنا دافعا وداعما ومساندا لنا فى ظروفنا العصيبة الحالية

................

1/4

التخطيط للهجرة

2/4

بيعة العقبة

3/4

الهجــــرة

4/4

دخول المدينة

................................

قصة الهجرة للأطفال

1/2

2/2

يارب تنال إعجابكم

كل عام وانتم بكل الخير

كل عام وأنتم إلى الله أقرب وعلى طاعته أدوم

اللهم اهله علينا باليمن والإيمان والسلامة والإسلام

اللهم إنا نسألك خيره وخير ما فيه ونعوذ بك من شره وشر ما فيه

اللهم اعذرنا فى جهلنا ،ولاتؤاخذنا بغفلتنا عنك..ولابسوء ادبنا معك
ومع الملائكة الكرام الكاتبين
اللهم اغفر لنا ذنوبنا وغفلتنا وجهلنا بنعمك
واقبل علينا بوجهك..ولاتفتنا بشئ
انك على كل شئ قدير
اللهم انا نتوسل بك اليك ونقسم بك عليك

فكما كنت دليلنا عليك فكن شفيعنا اليك
اللهم ان حسناتنا من عطائك ..وسيئاتنا من قضائك
اللهم لولا عطائك لكنا من الهالكين

ولولا قضائك لكنا من الفائزين وانت اجل واعظم من ان تطاع الا باذنك ورضاك

وانت اعز واكرم من ان تعصى الا بحكمك وقضائك

اللهم انا لم نأت الذنوب جرأة منا عليك ولااستخفافا بحقك

ولكن جرى بذلك قلمك ونفذ به حكمك واحاط به علمك ولا حول ولا قوة الا بك

"لااله الا انت سبحانك انى كنت من الظالمين "

Saturday, December 4, 2010

رب ضارة ناااافعة + فلتُحرق اسرائيل

الخبر من اليوم السابع

بعض السياح أكدوا عدم زيارتها مرة اخرى

الجارديان : السائحون هجروا شواطئ شرم الشيخ بعد هجوم سمك القرش

........................

بجد بجد أنا سعيدة جدا بالخبر ده

نياهاهاهاهاهاها

هتقولوا عنى ارهابية وعايزة اضرب السياحة ولا ايه ؟؟

لا لا متفهمونيش غلط .. هتودونى فى داهية

ههههههههه

بعيدا عن أهمية السياحة وشرم ( مشروعنا القومى اللى بيدخل عملة ) اكبر مدينة ساحلية سياحية فى مصر

وكلام المناهج التعليمية ده

انا كنت متضايقة جدا جدا جدا ان مصر (أم الدنيا ) فيها مكان زى شرم الشيخ دى

طبعا مش من حيث الجمال والرقى والتصميم الاوروبى .. دى حاجة تحسب لشرم الشيخ

لكن من حيث الانحطاط الخلقى اللى بيحصل فيها سواء من مصريين أو من أجانب وطبعا من الاجانب أكتر

يعنى بأى حق وبأى دين مصر تسمح للأجانب بالفجور اللى بيعملوه فى بلدنا ده

هو احنا بقينا بلد بلا نخوة .. ولا احساس

احنا فعلا اللى بيحصل لنا ده قليل عشان مش بنطالب بوقف المهزلة دى

باى حق نسيب الاجانب يمشوا فى الشارع اشباه عرايا .. ويبقى ده العادى ومحدش يستغرب حتى هما كده ليه

بأى حق تنتهك فيها حدود الله .. وتبقى حاجة كوووول يا مان

بأى حق تُراق فيها الخمور .. وتُرتكب فيها الفواحش جهارا نهارا فى الشوارع والطرقات ومحدش من الامن يفتح بقه

ده لو مكانوش بيحرسوهم كمان

طيب على الأقل لو مش عشان حرام .. يبقى عشان احترام السيادة المصرية اللى بنتغنى بيها ليل نهار

مش مصر دى دولة عربية وفيها قيم ومبادئ وتقاليد واعراف

ومش بتسمح بالتجاوزات دى لأبنائها وبتلاحقهم ببوليس الآداب وبالسيديهات

اشمعنى يعنى بتسكت وبتبارك للأجانب

فى الوقت اللى أى دولة فى العالم بتحافظ على سيادتها بشكل صارم ومحدش يجرؤ انه يخترق أى قانون مهما كانت بساطته

دى حتى الحرية الشخصية اللى متمسش سيادة اى دولة زى الحجاب مثلا بيحاربوها بشراسة :(

الخلاصة

شرم الشيخ فى عيون المصريين مدينة مشبووووهة

لو مقالوهاش بلسانهم .. بيقولوها بقلوبهم وباستنكارهم للقرف اللى بيحصل فيها ده

شرم الشيخ ودهب وطابا الاسرائيلين رايحين جايين فيها كانها بلدهم التانى

شرم الشيخ جايبالنا الكلااااااام

يعنى احنا ربنا رزقنا بقطعة جمييييلة وراقية وفيها الخير كله جو جميل وبحر نقى والحكومة صرفت عليها دم قلبنا نقوم ندنسها بالشكل ده ؟

!!!!!

مهو اللى بيبقى عنده نعمة و يعمل فيها كده تزوووووووول منه

وشكلها هتبدا تزول

القروش اللى هاجمت السياح دى فى نظرى جنود مجندة من ربنا

ورسالة لحكومتنا اللماحة اللى بتفهمها طبعا وهى طايرة ان ربنا مش راضى عاللى بيحصل ده

وغضباااااااااااااااااااااااااااااان

وما ادراكم بقى لما ربنا يغضب على حد ولا على بلد .. وكوارث العالم تشهد بكده

اللهم ارفع مقتك وغضبك عنا يارب

بجد سعيدة لانى شايفة اللى حصل ده آية من آيات الله

واتمنى من كل قلبى اننا نفووووووق بقى و شرم الشيخ ترجع فى عيوننا زى ما بدات

المدينة الساحرة الخيالية الراقية

وتكون قطعة من أوروبا برضه مسلمة ومسيحية باخلاق مصرية معتدلة مش أجنبية متحررة

........................

منظر يفرح بجد .. صورة تشفى القلب العليل .. يارب زيد وبارك

خبر بقى أجمل واجمد وأروع وأسعد

استمرار اندلاع حرائق اسرائيل واقترابها من جامعة حيفا

مسئولوا اطفاء اسرائيليون : الحرائق بحاجة إلى اسبوع لاطفائها

فيه صور هنا هتعجبكم أوى

نياهاهاهاهاهاهاهاهاهاهااااااااااااااا

يا مساء الاخبار السارة

ايه يا ولاد الهنا ده

دى أخبار عالمية غطت على كل حاجة

دى لو الانتخابات اتزورت تانى بكره والمجلس بقى كله وطنى فى وطنى وشالوا الكام واحد معارضة اللى باقيين مش هزعل بعد الخبر ده

هههههههههههههههه

يارب ولعهم كمان وكمان وكمان وكمااااااااااااااااااااااااااان

الحرائق بقالها 3 أيام ولسه قدامها كمان اسبوع

وجالهم مساعدات من كل العااااالم

والنيران مش بتنطفى وحتى لو انطفت بالنهار الرياح الشديدة بتخليها تنتشر بسرعة اكبر بالليل

أحمدك يارب لانك خليتنى اعيش لليوم ده

يارب تبقى نار ابادة ولو طفوها بماء البحر متنطفيش

ياااااااااااااااارب

يارب اجعلها تأكل الاخضر واليابس

يارب تحرقهم كلهم واحد واحد

يارب احنا مش قادرين عليهم فأرنا فيهم عجائب قدرتك

يااااااارب

يااااااااااارب

يااااااااااااااااارب

هااارتس : حرائق الكرمل أعادت ذكريات حرب أكتوبر

اللى يفرس بقى فى الموضوع ان اسرائيل عندها خلل فى جهاز الدفاع المدنى

ومش قادرة لوحدها على اطفاء الحرائق من بدايتها

وانها اتهزمت فى حرب اكتوبر 1973 ومعرفتش تصد

وانهزمت وانسحبت فى حرب لبنان ومعرفتش ترد

ودلوقتى بتقول انها من الأفضل انها متدخلش حرب مع ايران لان ايران هتبهدلها صواريخ ومش هتستحمل

امال اسرائيل دى راعبانا ليه

مخوفانا ليه

عاملة علينا جامدة وعمالة تشن حروب على غزة وتبهدل فيهم عشان هما بيحاربوها بالحجارة

متشطرة عليهم عشان مفيش معاهم امكانيات

لو حاربوها بالصواريخ كانوا محوها

العرب بعد ما عرفوا كده وعرفوا ان اسرائيل غلباااااااااانة ومتقدرش تصد ولا ترد هيفضلوا ساكتين برضه ؟

الأمة العربية دى لو فيها رااااااجل كان جمع زعماء العرب ووقفوا ضد اسرائيل وقفة رجل واحد وضربوها فى وقت واحد انشاله كل دولة تضرب صاروخ واحد

كانت اسرائيل دى اتمحت من الوجود فى لحظة

لكن للاسف مفيش

وللاسف هيفضلوا ساكتين

ومش بس ساكتين لا كمان بيمدوها بالامدادات عشان تطفى الحرائق

اقول ايه بس

خلونى ساكتة احسن

!!!

أخبار جديدة من الصحافة الاسرائيلية

شمال اسرائيل يزداد اشتعالا وألسنة اللهب تصل للمستوطنات الكبرى فى حيفا ..وتدمير محمية طبيعية بالكامل .. ونتينياهو يشكر مصر لمساعدتها فى اطفاء الحريق !!!

لليوم الرابع على التوالى استمرار اشتعال حرائق اسرائيل .. وواشنطن ترسل طائرة عملاقة للمساهمة فى اخمادها ..ونتينياهو يستغلها لكسب ود تركيا .. والخسائر تصل إلى 1.65 مليار شيكل

Friday, December 3, 2010

صعب جدااااا

صعب جدا تبقى شايف قدام عنيك حد انت بتعشقه مليان آلالام

صعب جدا تبقى شايف كل دمعة من دموعه نازلة حايرة من عنيه من غير كلام

صعب جدا تبقى واقف بين ايديه شايف ايديه حاضنة الألم من غير انين

تبقى مش عارف تروح فين ولا فين تبقى ناسى حتى انت تبقى مين ؟

صعب جدا .. صعب جدااااااااا

.............

أكيد صعب جدا

أصعب الالم هو انك تحس ان حد عزيز عليك فى محنة

سواء كان مرض او شدة

احساس فظيع انك تكون متكتف وعاجز ومش عارف تعمله حاجة

احساس رهيب انك تشوف دموع قلبه قبل دموع عنيه

وتبقى مش عارف تمسحهاله او تساعده انه يبقى افضل

صعب جدا خصوصا لو كان مخبى عنك تعبه وألمه

وانت بحدسك حسيت

او سمعت من غيره

لأنك لو كنت عارف منه فانت عالأقل هتقدر تطبطب عليه

تسأل عليه باستمرار عشان تحسسه بغلاوته عندك

تهون عنه اللى هو فيه بأى طريقة

لكن لو مكنتش عارف ومكتفى باحساسك وظنونك

أو لو مكنتش قريب منه للدرجة اللى تخليه يحكيلك ويشكيلك بس هو غالى عليك

فانت بالتأكيد فى موقف صعب

صعب جدااا

لا انت قادر تطبطب وتهون وتساعد لو تقدر

ولا انت مكتفى بأنك تتابع من بعيد وتسأل من بعيد

طيب الحل ايه ؟؟

تعمل ايه لو كنت عايز تساند حد عزيز عليك فى شدته

بس هو مقالكش حاجة عنها

وميعرفش حاجة عن قلقك عليه

وانت مش عايز تسأله عشان متضايقوش ولا تفرض نفسك عليه ولا تحسسه بالضعف

تعمل ايه عشان تتخلص من احساس العجز والألم اللى ماليك

تعمل ايه عشان تشوفه

افضل

وأقوى

وأسعد

تعمـــــل ايــــــه ؟؟؟

Wednesday, December 1, 2010

أسيبك لميـــــن ؟؟

أسيبك لميــــن

كلمات : جمال بخيت

غناء : محمد عباس

ألحان: صهيب شكرى

رؤية واخراج : سالى حاجات جوايا

يارب تعجبكم

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.