حاجــــات جوايــا: 6/1/10

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Tuesday, June 29, 2010

ليالي مصرية .. روايات مصرية يكتبها المدونون

التعريف بالفكرة

الاسم : ليالي مصرية

الوصف : حلقات مسلسلة من واقع الحياة المصرية – كل مسلسل يضم 30 حلقة .. وكل حلقة بقلم مدون مختلف فى نفس السياق الدرامي للأحداث والشخصيات
.

بداية الفكرة

انطلقت من مدونة د . إسلام صاحب مدونة هنعيش يعنى هنعيش ... وكانت إهداءا للكاتب الكبير أسامة أنور عكاشة قبل رحيله .. واستمرت بعد رحيله رحمة الله وغفر له

استضافت مدونة د إسلام أول عشر حلقات للرواية عرضا وإشرافا واستقبالا للحلقات من كتابها ثم اقترح فكرة تداول السلطة والإشراف على الحلقات الأخرى في مدونات أخرى اختير منهم مدونة ندى الياسمين .. ومدونة خواطر شابة .. لمدة عشرة حلقات لكل منهما وبعد ذلك يتم نقل الحلقات كلها إلى مدونة خاصة بها

حتى الآن تم نشر عشرون حلقة وفى انتظار المزيد.. وكان لي الشرف أن أكون من ضمن كتيبة الليالي الرائعة

لقراءة الحلقات حصريا............... ادخل هنا

أتمنى أن تنال الحلقات إعجابكم

وعلى من يرغب في الانضمام إلينا كتابة تعليق برغبته في مدونة خواطر شابة .. المشرفة الحالية عن الليالي .. أو مراسلتها على الايميل المدرج بمدونتها في السايد بار

دمتم بكل الخير والسعادة

Wednesday, June 23, 2010

إيه اللى جابك ...؟

البوست المرة دى مفاجأة
عارفين طبعا الشاعر و المدون العزيز .. واحد من البلد دى
كتب أغنية اسمها إيه اللى جابك .. الأغنية دى غناها أحمد سعيد أخو المطربة سوما ومعاه آيه فاروق
عملوا دويتو رومانسى هايل وجميل جدا جدا
وطبعا السبب قمة الرومانسية اللى فى الكلمات
.
حبيبت أحيى كاتبنا الجميل وأقدمله هدية بسيطة
كليب للأغنية من تصميمى
يارب يعجبه
ويعجبكم

Tuesday, June 22, 2010

الإحســـــــان

أحسن إلى النـاس تستعبـد قلوبـهم .. فطالما استعبد الإحسـان إنسـان

واعبـر فوق أسوار الأمـل .. وامحُ من أمـام عينيـك الظـلام

واشدُ بالحق أمام كل مسيـطرٍ .. اشدُ به فوق كل مكــان

واجعـل الحـق سلاحـك الذي بـه .. ترعب الظـالم سيـان من كـان

وضع هدفـك أمـام عينيـك .. واسـع إليـه تتحـقـق الأحـلام

ولا تيأس من رحمة الله علينا .. وابدأ طريقك بتلاوة القرآن

تنل رضا الله عليـك .. وييسـر لك طريـق الأمـان

وأطع والديـك ولا تغضبهما .. ترى معهما كل الاطمئنان

لأن ربـك يأمـر بالإحسـان .. فسبحـان الله الرحمان

--------------------

بمناسبة الحديث عن الإحسان في البوست اللي فات حبيت أشارككم القصيدة الصغيرة دى .. اللي كتبتها وأنا في ثانية ثانوي ، أول بيت فيها مش من تأليفي ومش عارفة مين الشاعر الأصلي .. وقع تحت ايدى بالصدفة وأنا بذاكر نصوص من كتاب الأضواء وبحل التدريبات اللي عليه والتدريبات الخارجية .. رحت طبعا سايبة المذاكرة وقعدت كتبتها

مش دى طبعا الوحيدة أنا بنيت أشعار كتير على أبيات من شعراء آخرين زى المتنبي .. وإبراهيم ناجى وجبران خليل جبران .. مهو الوحي مكانش بييجى غير وقت المذاكرة .. أعمله إيه أنا بقى ههههههههه

لكن القصيدة دى علقت معايا لأن مدرسة اللغة العربية بتاعتى " مس نادية " لما شافتها عجبتها جدا وكانت وقتها المسئولة عن الصحافة المدرسية فخدتها ونزلتها في العدد الدوري للصحيفة المطبوعة رغم انى مكنتش من جماعة الصحافة .. عشان كده لها مكانة كبيرة عندى

كل الحب والتحية والتقدير لمُدرستي الحبيبة .. مس نادية الألفي

يارب تعجبكم

Friday, June 18, 2010

هي والآخرون

تقنع نفسها كثيرا بأنها راضية

تتحمل كل شيء عن طيب خاطر

فربما من أساء إليها كان يمر بظروف نفسية قاسية .. فلتغفر له

ربنا لم يكن يعلم أن هذا الأمر سيؤذيها .. فلتغفر له

ربما ساهمت بشكل غير مباشر في هذه الحالة التي وصل إليها .. فلتغفر له

ربما هي بالفعل سيئة ولا تشعر .. فلتغفر له

فلتبدأ من جديد تخط سطوراً جديدة على صفحات خالية .. لعل الأمور تتحسن .. والجفاء يزول

دائما ما كانت تعطى للآخرين مبررات في تصرفاتهم نحوها

تنتهج حسن الظن منهجا لها في حياتها

وتقنع نفسها بان كل إنسان له رده فعل تختلف عن الآخر ، تعتمد على طريقة تنشئته وخبراته في الحياة

فليس بالضروري أن يكون رد فعل الآخرين معها هو نفس رد فعلها تجاه الآخرين

قد تحسن الظن بالآخرين بلا سبب .. وقد يسيء الآخرون الظن بها بلا سبب أيضا

هي تعودت على ذلك .. وهم تعودوا على ذلك .. فلا ضير أن تحاول

إذا فلتحاول محاولة أخيرة .. عسى أن يدركوا أنها لا تحمل في قلبها بغضا لأحد
.

تبتسم .. تضحك .. تمزح .. تبادر بالخير .. فينقلب عليها

تشاركهم أفراحهم .. وتساندهم فى أحزانهم

وتجعل من قلبها موطنا لهم

تمد يدها بالعون .. فيلوونها .. ويطعنونها في ظهرها

إذا لا فائدة

أنها بالفعل لم تعد تتحمل

لم تعد قادرة على عطاء المزيد

بل لم تعد ترغب حتى في أن تلتمس لهم الأعذار

أعطت كل شيء بمقدورها .. ولم تأخذ شيئا سوى الحزن الدائم والحيرة البالغة

إذا فلتصرخ .. فلتغضب .. فلتفعل مثلما يفعلون

لن تهتم بهم منذ اليوم .. فلم يهتم بها يوما منهم أحد

فهل ما استقرت عليه صائبا ؟؟ .. أم تستمر في إعادة المحاولة ؟؟

Monday, June 14, 2010

بقيت بتتلون يا قلبي

بقيت بتتلون يا قلبى وتدارى اللى فيك

بقيت بتعرف تضحك للى يبكى عنيك

جرالك ايه يا قلبى ؟ بقيت بتعرف تخبى

ومهما يكون جواك .. ولا حاجة تبان عليك

تعبت كتير أوى من الدنيا ومن السنين

وصاحبت الدمع ليالى .. والفرح اتبدل انين

ورغم كل حاجة .. كان فيه جواك امل

يا قلبى انا بسألك .. راح الامل فين ؟؟

بستغرب ضحكك يا قلبى وجواك من الحزن بيوت

وازاى قادر تعبر .. وصراخك صار سكوت

قسيت كتير على نفسك ..انا خايفة عليك تموت

وتكون القسوة طبعك .. والقسوة ليها شروط

ابكى واصرخ يا قلبى ..واندم على اللى كان

عيش احزانك واتحمل .. أو فجر البركان

اوعاك تعيش ميت .. أو تقتلك احزان

مسيرك فى يوم تفرح ..وتكون للهنا عنوان

Friday, June 11, 2010

خالد سعيد... شهيد الطوارئ .. وتحديث

من ساعة ما شفت الخبر امبارح عاليوم السابع وأنا مش مصدقة

لا عارفة افكر ولا قادرة اتكلم كل اللى بعمله انى قاعدة ابص لصورته بعد ما مات

مذهولة جدااااا من اللى حصل ده

مش للدرجة دى

لامتى هنفضل ندبح فى بعض

نأذى بعض وندوووووووس على بعض

وندفع بعض للانتحار

مصر هتخلص كده مننا

واللى هيتبقى يا هيعيش جبان وماشى جوه الحيط يا هيكون ساخط وينتقم بكل صور الانتقام

كتير علينا اوى اللى بيحصل ده والله

كتير اووووى اووووى اوووووى

انا مش قادرة اقول عليهم كلاب عشان مظلمش الكلاب

ياريتهم كانوا كلاب والله ما كانوا عملوا كده

انا بس نفسى اعرف هما بيستفيدوا ايه لما بيعملوا كده

يعنى التعذيب فى المعتقلات رغم انه مرفوض بكل اساليبه وحتى مبدأه مرفوض

الا انهم ممكن يستخدموه للوصول للحقيقة

ده على اساس ان اللى بيتعذب بيكون المتهم الاصلى مش متلفقاله ولا حاجة عشان يطلع حد تانى منها

طيب ده يعذبوه ليه

يموتوه ليه

ده واحد قاعد فى كافيه نت لا بيه ولا عليه

اهله للاسف ربوه على انه ميهينش حد ولا يطيق يسمع الاهانة

ربوه على أنه انسان حر وعايش فى بلد حر وله حقوق

ربوه على العزة ورفض امتهان الكرامة

يعنى كل ذنبه انه متربى

كل ذنبه انه مقدرش يسمع الاهانة ويسكت

كل ذنبه انه محترم ودمه حامى وعارف حقوقه كمواطن مصرى

والوحوش اللى عذبوه وقتلوه دول استفادوا ايه ؟؟

هما كده ارتاحوا

كده شفوا غليلهم

كده ضميرهم ارتاح وناموا ملء الجفون

كده هيترقوا وياخدوا مكافآت

بجد اعدامهم مش كفاية

رجمهم فى ميدان عام مش كفاية

بس اللى هيشوفوه بإذن الله يوم القيامة هما واللى ساعدهم على كده وادالهم الضوء الأخضر لتعذيب المواطنين وانتهاك كرامتهم وانسانيتهم وحياتهم هيبقى كفاية اوووووووى وهو ده اللى هيشفى غليلنا

وهو اللى هيبرد نار والدته واسرته

وهو اللى هيرد حق كل حد اتصدم فى بلده

وشك فى أمنه وأمانه

وحس بالغربة والوحدة والخوف فى وطنه وملاذه

........................

تحديث مش لذيذ

اخص عليكوا يا وحشين

بتغرغروا بيا وتخلونى اظلم جنودنا البواسل

تؤتؤتؤتؤتؤتؤتؤ مكانش العشم

ده خالد ده طلع وحش اوى يعينى الله يرحمه وهربان من قضايا
وبيشرب بانجو يااااااااى

اقروا الخبر بس وانتوا تعرفوا انكم ظلمتوا جنودنا البواسل اللى رافعين راس مصر عاليا جنب العلم بالضبط

إخلاء سبيل الشرطيين المتهمين بقتل شاب الاسكندرية

عرفتوا بقى انكم ظالمين ومفتريين

بس سبحان الله اسفكسيا الخنق دى بتعمل بلاوى فى وش الانسان وبتكسر اسنانه وبتجيب دم وبتعوره جامددددددد

شوفتوا عشان تبطلوا تشربوا بانجو يا وحشيييييييين

اللى يشرب بانجو ممكن يحصله زيه بالضبط لوحده كده من غير ما حد يقربله ولا يمس منه شعراية

حقيقة ما حدث بالضبط وبالصور هتلاقوها فى المدونة دى وفى لينكات الفيس بوك المرفقة بها

خالد اتقتل مع سبق الارصاد والترصد

خالد يوسف بركات .. أحد المعلقين على الحدث فى الفيس بوك كاتب الشعر ده اهداء لخالد سعيد

خالد سعيد

الدم خارج من الوريد

مفيش جديد

الحكم حكم النار وحكم الحديد

متقولش لأ ..الباشا فوق الحق

يحكم بكرباجه وكلابه تنهش لحمنا وعضمنا يندق

انت ابن مين

محكوم تبات جوه السنين

صرخت من وجعى .. وبكيت من قهرى

واتهد فيك ضهرى .. والآآآآآآآآآآه بنت عمرى

مكتوب وده قدرى .. انى اموت بدرى بإيدين جبان غجرى

اوعى تقول أنا حر .. لحسن تدوق المر

يطلع انينك دم .. اسود بلون الهم

حسبى الله ونعم الوكيل

يمهل ولا يهمل

وإن غدا لناظره قريب

ملحوظة : آخر التطورات والتحديثات الإخبارية مدرجة مع التعليقات

---------------------------

منظمة العفو الدولية تطالب الحكومة المصرية باجراء تحقيق فى مقتل شاب الاسكندرية

كما تطالب بإجراء تحقيق مستقل وفورى عن الحادث

Thursday, June 10, 2010

أنا والإكتئاب والفارم فيل وحاجات جوايا

وحشتووووووونى جدااااا

ووحشتنى مدونتى وكيبوردى وفايلاتى عالوورد .. رغم انى باشتغل عالكمبيوتر وبتابع حاجات كتير الا انى حسيت لما رجعت اكتب فى المدونة ان الكيبورد وحشانى ومشوفتهاش من زماااااااااان حاجة غريبة جدا

والشئ الاغرب واللى ما زال مسببلى صدمة انى لما بصيت على اخر بوست كتبته " مهى مامتك اللى جايبهالك يا روش " لقيته مكتوب من اربع شهور وزيادة

معقول الايام بتجرى بالسرعة الرهيبة دى ..ده انا كنت فى الكهف بقى .. مش مجرد كسل تدوينى

من فترة كبيرة وانا عايزة ارجع اكتب ومش عارفة .. بحاول ومش قادرة .. احساس غريب بيتملكنى بانى لو مسكت القلم هيتعوج فى ايدى .. زى بالضبط اللى بيحاول يتكلم وصوته مش بيطلع .. احساس صعب الحقيقة مش عارفة ايه سببه ولا عارفة ليه طول معايا كده .. السنة اللى فاتت جالى بعد رمضان .. والسنة دى جالى مع بداية 2010 بس طول المرة دى .. وحسيت انى مش هعرف اكتب تانى .. ولا اخفى عليكم فقدت الثقة فى نفسى

كنت بدخل اشوف الجديد من الريدر وادخل كام مدونة اتابعهم فى صمت من غير تعليق .. حتى تعليقاتكم عندى مكنتش قادرة خالص ارد عليها .. احساس بانى فقدت مفردات اللغة ومعدتش قادرة اكون جملة مفيدة ..مش عايزة اقول شكرا ليكم وامشى .. نفسى اتواصل واتفاعل معاكم ومش عارفة

فى الوقت ده كنت بدأت اتابع بشكل يومى الاكونت بتاعى عالفيس بوك .. بحاول اكتشفه واعرف سر انجذاب الناس ليه .. مدونين كتير سابوا التدويين وركزوا مع الفيس بوك .. وده بقدر ما ضايقني وحسسنى بغيرة على المدونات وكأن الفيس بوك ضرتها بقدر ما اثارنى انى اعرف السبب

والفيس بوك يا سادة يا كرام عامل زى مدينة الملاهى ان صح التعبير .. فيه كل حاجة واى حاجة .. وان كان تأثيره مش قوى زى المدونات .. لكن ملل الحياة وروتينيتها بيكونوا الدافع الأكبر لتحريك مواقع زى دى .. هو لغاية دلوقت مشوفتش منه حاجة وحشة بصراحة وبيعاملنى معاملة الأخ لأخته .. بس مجرد انه قيدنى وخلانى اول ما اقعد عالكمبيوتر افتحه اول حاجة على امل انى هبص بصة سريعة وارجع اشوف المدونة والدنيا ومعرفتش .. وربطنى بالعاب وتوقيتات وخدنى وشغلنى .. ده فعلا اللى خلانى اعلن العصيان المدنى والجوى واعتصم فى مدونتى الحبيبة واقول بأعلى صوتى نعم للتغييييييييييير

مقدرش انكر انه خفف عنى كتير ومكنش مزاجى بيكون حلو غير لما ادخل على لعبة فيه اسمها الفارم فيل او المزرعة Farmville وهى عبارة عن قطعة ارض صغيرة مكونة من 6 مربعات لزراعتها وجنى محصولها والتكسب من بيعها وكل ما تجنى وتكسب تزود الارض وكل ما تزود عدد الجيران عندك تزود المساحة وتكبر المزرعة اكتر واكتر وتشترى ماكينات زراعية تساعدك بدل الشغل اليدوى ..وحاجات تانية كتير زى الحيوانات وبيوتها وغيرها من اشياء لا تنتهى بجد لعبة ممتعة اعتقد انى وصلت فيها لمرحلة الادمان خصوصا انها دائمة التجدد وتشعرك دائما انك تنتج وتربح تجد وتجتهد وتنال ثمن جهدك واجتهادك من انتاج المزرعة اليومى واموال طائلة افتراضية وصلت للملايين
دى صورتها للتوضيح

حاولت بقدر استطاعتى الاقلاع عنها .. حاولت وحاولت ونجحت ولله الحمد بعد ان وصلت للمستوى 68 .. كان فاضل مستويين بس واوصل للقمة ( 70 ) لكن عقدت العزم على الرحيل وتوكلت على الله وتركتها لأعود الى مدونتى الحبيبة ولهذا اطالب بجعل الفارم فيل من الالعاب المحظورة التى تهدر الوقت العام وتساهم فى زيادة مشكلة البطالة والعنوسة والتوحد.. اه طبعا اكيد .. مهو طول ما الشباب بيلعبوها هيفضلوا قاعدين قدامها يشيروا كوليكشن ويجمعوا جيفت وماتريال ويبنوا فى بيوت واسطبلات .. لا هيعرفوا يشتغلوا ولا هيدوروا على شغل

وطووول ما البنات قاعدين قدامها لا حد هيشوفهم ولا هيعرفهم وسنين عمرهم هتضييع هدر

ده غير انهم هينسوا اللى حواليهم ويعيشوا بس مع نفسهم ومع الفارم فيل

ومن هنا أحب أنصح كل شاب وفيتاة بأن الفارم فيل لا تفيد ... وشوفوا مستقبلكم قبل ما العمر يجرى وترجعوا تدعوا عالفيس بوك والفارم فيل وزنجا وعالكل كليلة

اللهم انى قد بلغت .. اللهم فاشهد

طولت انا فى الموضوع ده اوى .. سبحان الله .. يخلق من العدم

كل ما كنت انوى ارجع كنت اقول اغير القالب الاول عشان ارجع بنيولوك للمدونة .. ابقى عالاقل عملت تجديد .. وفين وفين طبعاعما لاقيت قالب بعد عناء ورضا يتظبط معايا .. ويوم ما غيرت القالب كتبت جزء من البوست ده عالوورد ( منا ضفت عليه حاجات كتير دلوقت عشان مبقاش اول بوست بعد العودة ) ولما جيت انسخه عالمدونة مرضيش .. نمت ولما صحيت سمعت عن اسطول الحرية واللى حصل .. تفاعلت مع الحدث بس مش من خلال المدونة .. من خلال اليوتيوب والفيس بوك .. وبعدين رجعت للمدونة اشوف هى مش راضية تعمل paste ليييييييه .. وللاسف معرفتش وكتبت البوست لايف عالبلوج .. مكنش كبير الحمد لله بس اكتشفت بعدين انى ممكن احدد الكلام عالوورد وبعدين اشده وارميه فى المدونة بطريقة drag & drop .. قلت أقولكم لو مش عارفين .. اكسب فيكم ثواب هههههههه

حاجة حلوة اووووى حصلت فى غيابى ... حملة 30 يوم تدويين .. الحملة دى عجبتنى جدا .. ومن يوم ما شوفتها كان نفسى اشارك فيها .. بس بصراحة خفت مقدرش عالتحدى خصوصا انى غايبة بقالى فترة ولازم اسخن قبل ما العب ولا ايه ؟؟ .. بس ان شاء الله هعملها .. هى كانت لشهر مايو .. بس مش هتفرق لو عملتها فى اى شهر تانى المهم اكون أد التحدى

كمان عجبتنى فكرة د اسلام مدونة ( هنعيش يعنى هنعيش ) .. اشترك مع مجموعة جميلة من المدونين فى تأليف رواية اسمها ( ليالى مصرية ) اهداء لروح الكاتب الكبير اسامه انور عكاشه رحمه الله على غرار ليالى الحلمية .. د اسلام هو صاحب الفكرة .. والرواية بدات من مدونته لو تحبوا تتابعوها هتلاقوها فى الريدر عندى .. بجد اتمنى لو اشارك فيها .. بس ان شاء الله اول ما أحس انى بقيت فى الفورمة

رغيت جامد اوووووى .. معلش استحملوووونى .. الحنفية كانت مسدودة صلحناها وهتغرقكم هههههههههههههه بس قولوا يارب

بجد بجد وحشتونى جدااااااااااااااااا

Sunday, June 6, 2010

هو مفيش فايدة ؟... ولا مفيش فايدة

دمياط تتظاهر ضد مجزرة اسطول الحرية

بجد الواحد معدش لاقى كلام يقوله

لامتى هنفضل نقول لازم العرب يتحدوا.. لامتى هنفضل نلعب فيها دور الشجيع بس من بعيد لبعيد

كبيرنا كلام .. على ورق او فى ندوة .. او فى مظاهرة

بنطلع اللى جوانا وخلاص بس ده بيفيد فى ايه .. مش عارفة

اصلا صوتنا ملوش قيمة .. ولا حتى صوت حكامنا

حكامنا صوتهم بيعلى علينا احنا بس .. لكن مع اسرائيل بيلزموا جحورهم ويرموا الغلط على بعض

ايه اللى كبر اسرائيل للدرجة دى .. ايه اللى غطرسها بالشكل ده .. ايه اللى فرعنها على العالم كله .. مين اللى اداها الحق .. مين اللى ساعدها تكبر بدون وجه حق .. حتى على امريكا نفسها ..انا مش فاهمة حقيقى

الدول العربية دول غنية .. ارض وشعب وجنود .. ليه متخاذلين للدرجة دى

احنا امتى هنفوق ؟؟

امتى شبابنا هياخد باله ان كل المغيبات اللى بقت منتشرة فى حياتنا كلها متخطط لها كويس

ليه عايشين مآمنين للدرجة دى ومش فى دماغنا ان فيه اعداء حوالينا شايفينا كويس وعارفين نقاط ضعفنا وبيستغلوها ضدنا واحنا بنساعدهم على تحقيق مخططاتهم بكل بساطة وهمة وجد واجتهاد

بنساعدهم يغرقونا .. ويستعبدونا .. ويذلونا

احساس فظيع بالقهر بيكبر جوانا يوم بعد يوم

واحساس اخطر بالتضامن بيقل جوانا يوم بعد يوم

مش لعدم اهتمام .. لكن لقلة حيلة ويأس من قدراتنا

وأملنا الوحيد فى ربنا .. عسى ان يكون نصره قريب

حسبنا الله ونعم الوكيل

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.