حاجــــات جوايــا: 10/1/10

كيف تكسب الملايين بل المليارات من الحسنات بدون جهد أو تكلفة تُذكر ؟؟؟؟؟ عن أبي هريرة رضي الله عنه: أن رسول الله صلى الله عليه وسلم قال: (من قال: سبحان الله وبحمده، في يوم مائة مرة، حطت خطاياه وإن كانت مثل زبد البحر). متفق عليه.- عن أبي هريرة، قال: قال رسول الله صلى الله عليه وسلم "كلمتان خفيفتان على اللسان، ثقيلتان في الميزان، حبيبتان إلى الرحمن. سبحان الله وبحمده. سبحان الله العظيم". متفق عليه. عن أبي الدرداء، عن النبي صلى الله عليه وسلم قال: "أيعجز أحدكم أن يقرأ في ليلة ثلث القرآن؟" قالوا: وكيف يقرأ ثلث القرآن؟ قال "قل هو الله أحد، تعدل ثلث القرآن".رواه البخاري ومسلم. عَنْ عَبْدِ اللَّهِ بْنِ مَسْعُودٍ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ وَالْحَسَنَةُ بِعَشْرِ أَمْثَالِهَا لا أَقُولُ الم حَرْفٌ وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ) رواه الترمذي. عَنْ سَهْلِ بْنِ مُعَاذٍ عَنْ أَبِيهِ عَنْ رَسُولِ اللَّهِ صَلَّى اللَّهُ عَلَيْهِ وَسَلَّمَ قَالَ : ( يُقَالُ لِصَاحِبِ الْقُرْآنِ يَوْمَ الْقِيَامَةِ إِذَا دَخَلَ الْجَنَّةَ اقْرَأْ وَاصْعَدْ فَيَقْرَأُ وَيَصْعَدُ بِكُلِّ آيَةٍ دَرَجَةً حَتَّى يَقْرَأَ آخِرَ شَيْءٍ مَعَهُ ) رواه الإمام أحمد . عن البراء بن عازب قال: قال النبي صلى الله عليه وسلم: (إذا أتيت مضجعك، فتوضأ وضوءك للصلاة، ثم اضطجع على شقك الأيمن، ثم قل: اللهم أسلمت وجهي إليك، وفوضت أمري إليك، وألجأت ظهري إليك، رغبة ورهبة إليك، لا ملجأ ولا منجى منك إلا إليك، اللهم آمنت بكتابك الذي أنزلت، وبنبيك الذي أرسلت، فإن مت من ليلتك، فأنت على الفطرة، واجعلهن آخر ما تتكلم به) قال: فرددتها على النبي صلى الله عليه وسلم، فلما بلغت: اللهم آمنت بكتابك الذي أنزلت، قلت: ورسولك، قال: (لا، ونبيك الذي أرسلت). رواه البخاري. قال الله تعالى : ( الَّذِينَ يُنفِقُونَ أَمْوَالَهُم بِاللَّيْلِ وَالنَّهَارِ سِرًّا وَعَلاَنِيَةً فَلَهُمْ أَجْرُهُمْ عِندَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ ) البقرة:274 ، وعن النبي صلى الله عليه وسلم قال: (سبعة يظلهم الله في ظله يوم لا ظل إلا ظله: الإمام العادل، وشاب نشأ في عبادة ربه، ورجل قلبه معلق في المساجد، ورجلان تحابا في الله اجتمعا عليه وتفرقا عليه، ورجل طلبته امرأة ذات منصب وجمال، فقال إني أخاف الله، ورجل تصدق، اخفى حتى لا تعلم شماله ما تنفق يمينه، ورجل ذكر الله خاليا، ففاضت عيناه). أخرجه البخاري ومسلم. ورد في الصحيحين عن أبي مسعود الأنصاري قال: قال النبي صلى الله عليه وسلم: (الآيتان من آخر سورة البقرة، من قرأ بهما من ليلة كفتاه). عن النبي صلى الله عليه وسلم: (سيد الاستغفار أن تقول: اللهم أنت ربي لا إله إلا أنت، خلقتني وأنا عبدك، وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء لك بذنبي فاغفر لي، فإنه لا يغفر الذنوب إلا أنت. قال: ومن قالها من النهار موقنا بهاً، فمات من يومه قبل أن يمسي، فهو من أهل الجنة، ومن قالها من الليل وهو موقن بها، فمات قبل أن يصبح، فهو من أهل الجنة). رواه البخاري. قال عليه الصلاة والسلام : من حلف بغير الله فقد كفر وأشرك . رواه الإمام أحمد وأبو داود والترمذي. من قال: لا إله إلا الله وحده لا شريك له، له الملك وله الحمد وهو على كل شيء قدير، عشر مرات. كان كمن أعتق أربعة أنفس من ولد إسماعيل. قال رسول الله صلى الله عليه وسلم "يا أيها الناس! توبوا إلى الله. فإني أتوب، في اليوم، إليه مائة مرة". رواه مسلم. عن أبي هريرة رواية، قال: (لله تسعة وتسعون اسماً، مائة إلا واحداً، لا يحفظها أحد إلا دخل الجنة، وهو وتر يحب الوتر).متفق عليه.

Sunday, October 31, 2010

بخـــــاف

الخوف

مرض العصر

لما بدات باب افتـــح قلبك .. جاتلى رسايل كتير معظمها رفض النشر

واحترمت رغبة الجميع

بس اللى استغربتله ان العامل المشترك بين كل اللى رفضوا النشر كان الخوف

الخوف من المجهول

الخوف من كلام الناس

الخوف من الزواج .. والفشل فيه

الخوف من الحسد

الخوف من السير فى الطرقات بسبب السرقة

الخوف من ركوب المواصلات بسبب التحرش

الخوف من الكلام والتعبير والافصاح

الشك فى كل المحيطين وفى نواياهم

الخوف من ارسال ايميل وتفضيل التحدث عبر الماسنجر ..باعتبار الايميل ممكن يتعرض لاختراق

عدم الشعور بالامان كان عامل مسيطر وقوى لدرجة مكنتش اتخيلها ..ولدرجة انى احيانا مكنتش بفهم المشكلة صح من كتر ما هما خايفين يتكلموا

انزعجت جدا من الحالة اللى وصلنالها دى

يعنى لما نبقى كبار كده وبنخاف .. هنغرس فى ولادنا الامان ازاى

واساسا ايه اللى يخلينا نوصل للدرجة دى

الخوف شعور طبيعى .. واللى ميخافش اكيد مجنون

بس يكون بحدود

...............................

طبيعى اننا نقلق من ناس منعرفهاش

بس لو استمر القلق باستمرار معرفتهم يوم ورا يوم واظهار حسن النوايا منهم يبقى العيب فينا احنا

مش معقول كل اللى حوالينا ممثلين جامدين

صحيح فيه ناس بتلبس اقنعة كتير بس مش هيفضلوا كده طول الوقت

اكيد فى موقف من المواقف هيتكشفوا وساعتها يبقى من حقنا نبعد خالص ونشكرهم ونشكر الظروف اللى كشفتهم لينا وعلمتنا (نحذر ) فى المرات اللى جاية ..

التجربة خير معلم .. لازم ندخل التجربة ونقبل حلوها ومرها .. لو عدت على خير يبقى كسبنا صديق وكسبنا راحة بالنا .. ولو معديتش على خير يبقى اتعلمنا حاجة تنضاف لرصيد خبرتنا فى الحياة

أمال الخبرة بتتكون ازاى .. مش من التجارب اللى بنعيشها ؟

.........

طبيعى اننا نخاف من الحسد

مهى مش كل الناس قلوبها صافية وبريئة .. وكل صاحب نعمة محسود

بس منخافش لدرجة اننا ننفى نجاحنا ..ونكبت طموحاتنا .. ونوقف كل مشاريعنا

عشان محدش يحسدنا لو نجحنا

الحسد مذكور فى القرآن .. يعنى حقيقة واقعة

وانت نفسك ممكن تحسد نفسك مش بيقولوا ما يحسد المال الا اصحابه

هتعمل ايه ساعتها .. هتقاطع نفسك ولا هتموت نفسك

يبقى نتوكل على الله فى امرنا ونعيش حياتنا واحنا مسلمين امرنا لله

ونحصن نفسنا بالاذكار .. ونستعيذ بالله من الشيطان ونبعد الوساوس والشكوك من دماغنا
وفى الاول والاخر .. ما اصابك لم يكن ليخطئك وما اخطأك لم يكن ليصيبك

يعنى كل شيء بقدر الله

" وقل لن يصيبنا الا ما كتب الله لنا "

.......................

الخوف من المستقبل

ضعف ايمان مننا اننا نخاف من بكره .. هو احنا فى ايدنا ايه غير اللحظة اللى احنا عايشينها

بكره ده فى علم الغيب .. هو احنا ضامنين نعيشه عشان نخاف منه ونعمل له حساب؟

وسبحان الله .. مفيش حاجة بتشيل همها وتخاف منها وتسلم امرك لله فيها الا وربنا بييسرها بشكل عجيب

ويذلل لك كل الصعاب اللى كانت بتدور فى دماغك وعاملالك قلق

القلق يا جماعة بيجيب المرض

اقل حاجة بيسببها الصداع والارق

ده غير طبعا ارتفاع ضغط الدم والسكر

دى اقل حاجة .. ورغم كده محدش بيقدر يستحمل حاجة منهم

يبقى ليه نموت نفسنا بايدنا

ما نسيبها على الله ونقدم حسن الظن بالله

والله الدنيا ما هى مستاهلة .. والله ما تستاهل كل ده

......................

الخوف من الفشل فى الزواج

يعنى انا عايزة اعرف .. هو مين كان واثق تمام الثقة انه هينجح فى زواجه

انت بتستخير ربنا وترضى بقضاؤه

وتدخل التجربة واللى مكتوبلك هتشوفه

للسعادة الزوجية اسباب .. وللتعاسة الزوجية برضه اسباب

خد اسباب السعادة وافهمها وادرسها وعلمها لشريك حياتك

وخلى فترة الخطوبة فترة تاسيسية لحياة زوجية سعيدة

اكيد هيبان فيها ان كان شريك حياتك متفهم ومتجاوب ولا مش فى دماغه

ولو لاقيتيه مش فى دماغه وعايز يتجوز وبس تقدرى تقررى ان كان هيناسبك ده ولا لا

وانت تقدر تقرر برضه هتقدر تستمر كده ولا لا

والخوف من فسخ الخطوبة وكلام الناس ولا العنوسة والكلام الفاضى ده متحطهوش فى دماغكوا خالص

وربنا معوض مخلف

لما الخطوبة تفشل افضل مليون مرة من ان الجواز يفشل

ولا ايه ؟؟

..........................

الخوف من المشى فى الشارع وركوب المواصلات

اتعلمنا واحنا صغيرين اننا قبل ما ننزل الشارع نقول دعاء

" بسم الله توكلت على الله ولا حول ولا قوة الا بالله .. اللهم انى اعوذ بك ان أذل أو أُذل .. أو أضل أو أُضل .. أو أظلم أو أُظلم .. أو أجهل أو يُجهل علىّ"

قلها وتوكل على الله .. والله خير حافظا وهو ارحم الراحمين

.........

التوكل على الله هو الروشتة السحرية لكل خوف يعترى القلب

التوكل على الله والتسليم لله هو الواقى والمعالج

هو الشافى

هو المعافى

لو استسلمنا لخوفنا عمرنا ما هنتحرك من مكاننا خطوة

وكل الامراض هتسكن قلوبنا واجسادنا

ربنا خلقنا عشان نسعى فى الارض ونعمرها .. وخلق برضه ناس تضيق علينا وتضايقنا.. عشان يتحدى فينا ارادتنا .. ويقوى عزيمتنا .. فنقوم من بعد سكون .. وننتصر من بعد هزيمة .. ونتقدم من بعد تأخر ..ونشفى من بعد مرض

ربنا بيبتلينا بالداء ويسخر لنا من يصنع الدواء

وعليك ان تختار اما تستسلم لداءك وتفضل قاعد مكانك لحد ما تموت

واما تنزل وتحاول وتسأل لغاية ما توصل لدواءك

وتشفى بإذن الله

...

حبيبت اتناول معكم بعض المشكلات دى

مع الحفاظ طبعا على السرية التامة لاصحابها

وعايزة اسأل

قلبك لسه بيخاف

طب بيخاف من ايه ؟؟؟

التعليقات مفتوحة للحوار

وخاصية " المجهول " مفعلة لمن يريد عدم ذكر اسمه

فى انتظار ردودكم

كل الحب لكم

Friday, October 29, 2010

أبجديتنا الجديدة .. هتعلموها لولادكم ؟؟؟

الحروف الابجدية

لما أبجديتنا تتغير من

ماما بابا وطنى علمى حرية قومية سلام امان جندى بلدى شجاع

إلى

واوا شقاوة وطنى همى امية حرامية كلام ينام ضريبة امبوبة فساد

يبقى ده أكبر دليل ان مصر بتتقدم بينا وهى متبعة فكر جديد

........................

يلا حالا بالا بالا حاربوا أبو الفساد

تحية خاصة لأبو حفيظة وفريق العمل

Wednesday, October 27, 2010

تاج دموع القمر

التاج ده وصلنى يا سادة يا كرام من الحبيبة دموع القمر .. ( همسات فى بحر الحياة ) صاحبة مدونة دموع القمر من قبل رمضان .. ونظرا لان حالتى النفسية كانت مش ولا بد فمقدرتش اجاوب عليه فى وقتها .. بس انا عند وعدى يا قمر بلا دمووووع .. وادى اجابة تاجك الغالى

السؤال الاول

ابتدينا بقى

رتب الاتى حسب اهميتها بالنسبه لك

الصداقه _ الحب _ العائله_ المستقبل _ المال

بحب انا اسئلة رتب دى

الحب _ العائلة _ الصداقة _ المال _ المستقبل

ولمزيد من التفصيل عشان آخد الفول مارك

الحب هو اصل العائلة وأساس العلاقة بين أفرادها .. والصداقة بلسم الحياة .. والمال قوة الحياة وضرورى للحاضر والمستقبل بيد الله

.............................

السؤال التانى

الحمد لله ان الاول عدى .. يا مسهل

اجب عما يلى

يا ساتر يارب .. صيغة الاسئلة دى بتجيبلى مغص .. بتفكرنى بالامتحانات

ربنا يستر بقى وملقيش علل وبم تفسر وما النتائج المترتبة على

................................

عرف الحب فى جمله صغيره ( حب الحبيب و الحبيبه )

الحب أخذ وعطاء

مفيش جملة اصغر من كده .. اجابة نموذجية يعنى من الاخر

...............................

وهل يمكن ان نعيش بدون حب (الحبيبه او الحبيب برده )

ليه لا .. ناس كتير بتعيش من غير حب .. وعايشين عادى

للحب شروط عشان يبقى اسمه حب .. مش اى علاقة ثنائية بين رجل وامرأة تتخللها دقات قلب او ارتعاشة يد أو فرحة باللقاء تبقى علاقة حب

الحب شعور وجدانى وروحانى وعقلى .. انجذاب وامتزاج وتناغم بين كيانين يكمل كل منهما الاخر ويبقى للأبد

ان حدث .. فاهلا بالحب

وان لم يحدث .. فأى شيء آخر غير الحب .. وكله ماشى

..................................

ما الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش ؟

الحياة حلوة بس نفهمها

..............................

ياترى إيه أكتر حاجة بتكرهها فى الحياة ؟؟؟

القهر بكل انواعه ومسمياته وما يندرج تحته .. والكذب

..................................

لو هتتمنى أمنية قبل ما تموت هتبقى إيه<뭬ѷ>

افرح بابنى فى كل حاجة .. خلق .. دين .. دراسة .. شغل .. جواز .. ذرية طيبة

وحسن الخاتمة لنا جميعا بس قولوا امين
................................

مين أكتر حد محتاج تشوفه وترتاح فى حضنه أو تبص فى عنيه ؟؟<뭬ѷ>

؟؟؟ مش عارفة والله حبايبى كلهم حواليا ربنا يخليهوملى يارب
.........................

مين أكتر حد نفسك تخسره ؟؟؟

مفيش حد نفسى اخسره .. اللى مش بيعجبنى ببعد عنه ببساطة.. مش بضغط على اعصابى عشان استحمل حد مضايقنى .. الدنيا مش مستاهلة وجع قلب

...............................

من وجهة نظرك ... إيه هى الحياة ؟؟؟

رسالة طالت او قصرت لا يهم .. المهم تكون ذات قيمة

....................................

ياترى هتقع فى الحب تانى لو حبيبك/حبيبتك سابك أو لو كان سابك بالفعل ؟؟؟؟

طالما الحياة مستمرة تبقى المشاعر مستمرة

..................................

ياترى تقول إيه للعالم كله ؟؟

اتقـــوا الله يجعل لكم مخرجا

...................................

ياترى لو هتخسر كل اللى حواليك فى سبيل حلمك ؟؟؟ هتكمل وتحاول تحققه حتى لو كان مستحيل ؟؟؟

اخسر كل اللى حواليا عشان احقق حلمى !! .. ليه هو انا بحلم اشتغل رقاصة ؟؟؟

معنديش حلم يستدعى خسارة لا كل ولا بعض من حولى

........................

ياترى إيه أكتر إحساس عشته الايام اللى فاتت ؟

الايام اللى فاتت دى سقفها لحد فين ؟؟

عموما هقول شوية احاسيس .. فاضيين ولا وراكوا حاجة ؟؟

فى رمضان حسيت ان ده اخر رمضان هيعدى عليا وكان عندى الاحساس ده من قبلها لدرجة انى مكنتش مصدقة انى بلغته.. والله اعلم

· فى التعليم حاسة ان فيه لبخ كتيروالقائمين على التعليم بيطوروه بطريقة عكسية .. يعنى لما نيجى نطور لازم الاول نطور المعلم ونؤهله انه يتعامل مع منهج متطور ومن ثم يوصله للطلبة بطريقة جيدة وسلسة .. لكن العكس هو اللى بيحصل .. المنهج هو اللى بيتغيرللأصعب والاسوأ والمدرسين والطلبة بيخبطوا فى بعض .. عشان كده نفسى نفسى ابنى يتعلم فى امريكا .. بس طبعا مستحيل

فى الحرية والديموقراطية .. حاسة بغدر كبير واضطراب سلوكى ونفسى عند مسئولين كتير

· حاسة ان الاسلام فى خطر .. الاسلام فى حد ذاته بعيدا عن التنصر او خلافه .. اللى عايز يتنصر ولا يتهود ولا حتى يلحد والعياذ بالله هو حر ربنا اللى هيحاسبه

لكن شايفة ان الاسلام حاليا اصبح بين جبهتين .. إما متشددين .. وإما متحررين

والمعتدلين الوسطيين تايهين فى النص .. يسمعوا للاتنين .. وكل جبهة بتحاول تقنعهم انها الاصوب

· وأخيــــــــرا حاسة بيأس انى اشتغل حاجة تناسبنى ماديا وعمليا ومهاريا

..............................

بتمررى التاج دا لمين ......

تقريبا التاج ده مر على كل المدونين

وبناء عليه بهديه لكل اللى لسه مجاوبش عليه

وبالهنـــ والشفا ـــا

Wednesday, October 20, 2010

مصــر بخيـر

باقى الفيديوهات عند نوارة نجم هنا

كلمة ابراهيم عيسى فى نقابة الصحفيين

كلمة فووووووق الرائعة

عمرى ما شوفت ابراهيم عيسى بالقوة دى والجرأة دى والغضب ده والثورة دى

بس طبعا طبعا عنده حق مليون فى الميه

الظلم والقهر والقمع محدش يقبلهم ولا يقدر يستحملهم

ربنا ينصره وينصر كل صاحب حق وكل صاحب مبدأ وكل شريف فى مجاله

انا مش عارفة فيه ايه جديد فى مصر

سياسة تكميم الافواه والبطش دى بقت ظاهرة

مش مجرد حدث عابر

والقمع بقى على كل حاجة حتى القنوات الدينية واوربت وغيرهم

ومحدش عارف يصد ولا يرد معاهم

انا شايفة الحقيقة ان استنعاج بعض المصريين هو سبب تكالب الذئاب عليهم .. وتجرأهم على النيل منهم

لو كل حاجة بتحصل ناخد فيها موقف قوى وجرئ وصلب زى موقف شباب الدستور - ما شاء الله عليهم - كانت النظرة لآدميتنا اتغيرت عن كده خالص .. وكان المواطن المصرى بقى له قيمة وقامة تطاول البنيان ومحدش كان هيقدر يرغمه على حاجة مش عايزها ولا يبطش به بالشكل الفج ده

لكن الدولة اتبعت سياسة التجويع ما بين فقر وغلاء امعانا فى الاذلال والامتهان .. وفرقت الجموع للبحث عن لقمة العيش وانشغال كل فرد بحاله وحال اسرته ودورانه فى ساقية اشباع الحاجات الاساسية من مأكل ومشرب وكساء ودواء .. حتى الزواج اصبح صعب المنال ولابد له من دوران فى ساقية اخرى بالاضافة للساقية الاولى للوصول اليه

فهام الشعب على وجهه يبحث عن اسباب رزقه واسقط كل ما هو دون حاجاته الاساسية من حساباته .. نسى حقوقه .. نسى فكره .. نسى ابداعه .. انصرف من الانتاج الى الاستهلاك .. ومن التطوير الى التلقى .. فليس هناك وقت لكل هذا وذاك .. فكل الوقت منصرف فى توفير الاحتياجات الأساسية .. وليكن بعدها ما يكون

بهذا نجح المخطط فى استبعاد المواطن من ماهية المواطنة

.. فى جهل المواطن بحقوق المواطنة ..

فى سلب المواطن حقوق لم يعلم يوما انها كانت لديه

وفى التكرم عليه بعطايا لا يعلم اصلا انها ملك له

هنقول ايه ..؟؟

ربنا كبيــــــــــر

ومهما ساد الظلم

فدولة الظلم ساعة

ودولة الحق الى قيام الساعة

ورغم كل شيء

مصــــــــر بخيـــــــــر

طول ما فيها شباب شجعان واصحاب مبادئ زى شباب الدستور

لأن هما المستقبل

المستقبل المشرق بإذن الله

Friday, October 8, 2010

عدنـــا.. والعودُ أحمدُ

أخيرا رجعت الحمدلله

بعد غياب شهرين عن بيتى وعن مدونتى

والسبب زى ما قلتلكم فى البوست السابق كان عمل اصلاحات فى الشقة

أما عن الاصلاحات فكانت تكسيرسقف3 غرف ودهن الحديداللى صدى بمادة عازلة واعادة صبه من جديد

وده كان اخف الحلول..لأن كان فيه اراء باعادة صب السقف كله يعنى كله يتشال ويتصب من جديد

والداعى ليها كان ظهور شقوق فى السقف بتزيد كل شوية رغم ان البيت لسه مبنى من 10 سنين بس

لكن للاسف الضمير بقى عملة نادرة فى زمننا

والمقاول اللى كان ماسك البنا كان حاطط ضميره فى تلاجة

ربنا يسامحه بقى هو والعمال اللى كانوا معاه وكانوا شايفين وساكتين

ويديلهم على أد نيتهم

اتمنى الموضوع ينتهى على اد كده ومنفتحش حاجات تانية

ويكون الحل ده فعال

الحمد لله على كل حال

شكرا جزيلا لكل من زارنى وسأل عنى

وشكرا جزيلا ياواندا على تهنئتك يا حبيبتى بعيد ميلادى

متحرمش منكم أبدا

جمعة مباركة عليكم وعلى سائر المسلمين

اللهم اجعل مدونتى حجة لى ولا تجعلها حجة على يوم القيامة

اللهم لا تجعلنى ممن ضل سعيهم فى الحياة الدنيا وهم يحسبون انهم يحسنون صنعا

اللهم انى اعوذ بك من ان أكون جسرا يعبرون به إلى الجنة ويلقى به فى النار

اللهم ارزقنى الإخلاص فى القول والعمل

استغفر الله الذى لا إله إلا هو الحى القيوم واتوب إليه عدد ما كان وعدد ما يكون .. عدد الحركات وعدد السكون

كافة المواد المنشورة فى هذا الموقع محفوظة ومحمية بموجب قوانين حقوق النشر والملكية الفكرية ولا يجوز نسخ هذه المواد او إعادة إنتاجها او نشرها أو تعديلها أو اقتباسها لخلق عمل جديد أو ارسالها أو ترجمتها أو إذاعتها أو اتاحتها للجمهور بأى شكل بدون الحصول على إذن كتابى مسبقcopyright © sally fawzee 2007-2010.